Mark2
1บะกี่วันต่อมา พะเยซูก็เข้าไป๋ในเมิงคาเปอรนาอุมแฮ๋ม พอจาวเฮือนฮู๊ข่าวว่าพะอ๋งปิ๊กมาอยู่เฮือนแล้ว2ก็พากั๋นมาเต็มเฮือนจนล้นออกมาแออัดยัดเยียดกั๋นอยู่หน้าปะตู๋ และพะเยซูก็ตั๋นพะคำของพะเจ๊าฮื๊อกับหมู่เปิ้น3มีป้อจายสี่คนหามคนเป๋นง่อยมาบนเป๋4แต่เข้าไป๋บะตึ๋งพะเยซูเพาะว่าคนแต๊นจะนัก หมู่เปิ้นจึงรื้อหลังคาต๋งกับตี้พะอ๋งนั่งอยู่ออก แล้วอ่อนเป๋ตี้คนเป๋นง่อยอั่นนอนอยู่ลงไป๋5ตอนพะอ๋งหันความเจื้อของหมู่เปิ้น ก็อู้กับคนเป๋นง่อยว่า “ลูกฮัก เยี๊ยะบ่ดีของลูกได้ฮับการอภัยแล้ว”6มีคูสอนกฎปฏิบัตินั่งอยู่ตี้ฮั่นจะนัก หมู่เปิ้นคึดในใจ๋ว่า7“เอ๊ะ มันอู้จะอี้ได้จะได๋ จะหนี้พ้อหมิ่นพะเจ๊าชัดๆเพาะว่ามีแต่พะเจ๊าเต้าอั่นตี้ฮื๊ออภัยเยี๊ยะบ่ดีได้”8พะเยซูฮู๊ท้นเต้าว่าหมู่เปิ้นกำลังคึดไอหยังอยู่จึงอู้ว่า “อะหยังโบ๋สูตึ๋งคึดจะอี้9จะฮื๊อเฮาอู้กับคนเป๋นง่อยคนนี้ว่า ‘เยี๊ยะบ่ดีของสูได้ฮับการอภัยแล้ว’ หรืออู้ว่า ‘ฮุกขึ้นพับเปลแล้วเตียวเต๊อะ’ อันไดจะง่ายกว่ากั๋น10แต่ฮื๊อฮื๊อโบ๋สูฮู๊ว่าลูกมนุษย์มีสิทธิอำนาจในโลกตี้จะฮื๊ออภัยเยี๊ยะบ่ดีได้” พะอ๋งจึงอู้กับคนเป๋นง่อยว่า11“เฮาสั่งฮื๊อสูฮุกขึ้น เก็บเป๋แล้วปิ๊กเฮือนเถ๊อะ”12เปิ้นก็ฮุกขึ้นท้นเต้า เก็บเป๋ แล้วเตียวออกไป๋ต่อหน้าต่อตาตุ๊กคนตี้พ้ออยู่ตวยความงุนงง หมู่เปิ้นจึงฮ๊องสรรเสริญพะเจ๊าและอู้กั๋นว่า “หมู่เฮาบะเคยหันไอหยังจะหนี้มาก่อนลุ”13พะเยซูไป๋ตี้ตะเลสาบแฮ๋ม มีคนมาหาพะอ๋งจะนัก พะอ๋งก็ตั๋นหมู่เปิ้น14ขณะตี้พะอ๋งเตียวมาตามตางอั่นก็หันเลวีลูกของอัลเฟอัสนั่งอยู่ตี้ด่านเก็บต๋ง พะอ๋งอู้กับเปิ้นว่า “ตามเฮามา” เลวีก็ฮุกขึ้นตามพะอ๋งไป๋ท้นเต้า15ตอนแฮงตอนพะอ๋งกิ๋นเข้าอยู่ตี้เฮือนเลวี ก็มีหมู่คนเก็บต๋ง และคนเยี๊ยะบ่ดีจำนวนจะนัก มากิ๋นเข้าร่วมกับพะอ๋งและหมู่ลูกซิด มีคนหมู่นี้ตี้มาติดตามพะอ๋งมีจะนัก16ตอนคูสอนกฎปฏิบัติบางคนตี้เป๋นหมู่นักบวชจั๋นสูงหันเข้า ก็ซอยหมู่ลูกซิดของพะเยซูว่า “อะหยังเปิ้นตึ๋งกิ๋นเข้ากับหมู่คนเก็บต๋งและหมู่คนเยี๊ยะบ่ดี”17ตอนพะอ๋งได้ยินก็อู้ว่า “คนสบายดีบะต้องการหมอหรอก แต่คนเจี๊บต้องการหมอ เฮาบะได้มาฮื๊อฮ้องคนดี แต่มาฮื๊อฮ้องคนเยี๊ยะบ่ดี”18กั๋นอั่นลูกซิดของยอห์นและของหมู่นักบวชจั๋นสูงกำลังอดเข้ากั๋นอยู่ มีบางคนมาซอยพะเยซูว่า “อะหยังลูกซิดของยอห์นและของหมู่นักบวชจั๋นสูงอดเข้ากั๋น แต่จะได๋ลูกซิดของตั้นตึ๋งบะเยี๊ยะจะอี้”19พะอ๋งอู้ว่า “ตอนตัวป้อยังอยู่ มิตรๆของเปิ้นจะอดเข้าได้จะได๋ เปิ้นจะบะอดเข้าตอนตี้ตัวป้อยังอยู่ตวย20แต่ตอนตึ๋งวันอั่น ตี้ตัวป้อถูกปอนากไป๋จากหมู่เปิ้น แล้วหมู่เปิ้นตึ๋งจะอดเข้า21บะมีไผเอาเตี่ยวตี้ยังบะหดมาปะเข้ากับเตี่ยวเก่าหรอก เพาะว่าตอนชิ้นเตี่ยวใหม่หด ก็จะดึงเตี่ยวเก่าฮื๊อขาดจะนักกว่าเก่า22บะมีไผเอาเหล้าองุ่นใหม่เทใส่ถุงหนังเก่ากั๋น เพาะว่าเหล้าองุ่นใหม่จะเยี๊ยะฮื๊อถุงหนังเก่าแต๋ก เสียทั้งเหล้าองุ่นและถุงหนังเก่า เปิ้นตึ๋งได้เอาเหล้าองุ่นใหม่ใส่ในถุงหนังใหม่กั๋น”23มีเตื้อนึ่งในวันยู๋ดตางศาสนา พะเยซูเตียวเลยต้องข้าวสาลี จ้วงอั่นหมู่ลูกซิดของพะอ๋งก็เด็ดยอดรวงข้าวมาขยี้เปือกออกแล้วกิ๋นกั๋น24ตอนหมู่นักบวชจั๋นสูงหัน จึงซอยพะเยซูว่า “พ้อฮั่นสิ หมู่ลูกซิดของสูกำลังเยี๊ยะปิ๊ดกฎวันยู๋ดตางศาสนา”25พะอ๋งก็อู้ว่า “โบ๋สูบะเคยอ่านหรือว่าจ้าวแป่นดินดาวิดเยี๊ยะไอหยังตอนตี้เปิ้นและลูกน้องอดใค้อ๊ดโหย26เปิ้นได้เข้าไป๋ในเฮือนของพะเจ๊าซึ่งอาบีอาธาร์เป๋นนักบวชสูงซุ๊ดอยู่ในตอนอั่น และกิ๋นขนมปังศักดิ์สิทธิ์ซึ่งตามกฎแล้วมีแต่หมู่นักบวชเต้าอั่นตี้กิ๋นได้ แล้วยังแบ่งฮื๊อลูกน้องกิ๋นแฮ๋มตวย”27พะเยซูอู้หมู่เปิ้นว่า “พะเจ๊าตั้งวันยู๋ดฮื็อฮื๊อจ้วยมนุษย์ บะใช่ฮื๊อมนุษย์ต้องมาตุ๊ก เพาะว่าวันยู๋ดอั่น28ยิ่งกว่าอั่น ลูกมนุษย์ก็เป๋นนายเหนือวันยู๋ดตางศาสนาตวย”
Empower Asia Bible Translation Movement