Mark15
1พอฮุ้งจ๊าวหมู่ตัวป้อนักบวช หมู่ผู้อาวุโสหมู่คูสอนกฎปฏิบัติและสมาชิกสภา แซนฮีดริน ก็วางแผนกั๋นว่าจะเยี๊ยะอย่างไรกับพะเยซูดี หมู่เปิ้นมัดพะเยซูแล้วนำตั๋วไป๋มอบฮื๊อกับปีลาต2ปีลาตซอยพะอ๋งว่า “สูเป๋นจ้าวแป่นดินของจาวยิวก๋ะ” พะเยซูก็อู้ว่า “แม่นอย่างตี้ตั้นว่า”3หมู่ตัวป้อนักบวชกล่าวหาพะอ๋งในหลายๆเรื่อง4ปีลาตซอยพะอ๋งแฮ๋มว่า “สูจะบะอู้ไอหยังก๋ะ หันหรือเปล่าว่าหมู่เปิ้นกล่าวหาสูตั้งหลายเรื่อง”5แต่พะเยซูก็บะอู้ไอหยัง ซึ่งเยี๊ยะฮื๊อปีลาตเป๋กใจ๋จะนัก6ในช่วงเทศกาลแห่งวันปลดปล่อยเป๋นปะเพณีตี้ปีลาตจะยอมปล่อยนักโต้ดคนนึ่งตามตี้หมู่เปิ้นขอ7ป้อจายคนนึ่งจื้อ บารับบัส ติดคุกอยู่กับหมู่คนกบฏ เพาะว่าหมู่เปิ้นได้ก่อการจลาจลและฆ่าคนตี๋อั่นตวย8คนก็มาทวงปีลาตฮื๊อปล่อยนักโต้ดตามธรรมเนียมตี้เคยเยี๊ยะกันมา9ปีลาตจึงซอยหมู่เปิ้นไป๋ว่า “หมู่สูใค้ฮื๊อเฮาปล่อยจ้าวแป่นดินของจาวยิวก๋ะ”10ตี้อู้จะอี้ก็เพาะว่าปีลาตฮู๊ดีว่า ตี้หมู่ตัวป้อนักบวชยั๊บพะเยซูส่งมาฮื๊อกับเปิ้นอั่นมันเกิดจากความอิ๊ดฉา11แต่หมู่ตัวป้อนักบวชอั่นยุแหย่ฮื๊อหมู่จาวเฮือนขอฮื๊อปีลาตปล่อยบารับบัสแตนพะเยซู12ปีลาตก็ซอยหมู่เปิ้นแฮ๋มเตื้อนึ่งว่า “แล้วหมู่เจ้าจะฮื๊อเฮาเยี๊ยะจะได๋กับคนตี้หมู่เจ้าฮ้องว่า จ้าวแป่นดินของจาวยิว”13หมู่เปิ้นเฮ็กซะปิ๊กมาว่า “ขึงเปิ้น”14แต่ปีลาตซอยว่า “อะหยังล่ะ เปิ้นเยี๊ยะปิ๊ดไอหยัง” แต่หมู่เปิ้นยิ่งเฮ็กซะดังขึ้นๆว่า “ขึงเปิ้น”15ปีลาตใค้จะเอาใจ๋จาวเฮือน จึงปล่อยบารับบัสฮื๊อกับหมู่เปิ้น จากอั่นเปิ้นสั่งฮื๊อเฆี่ยนพะเยซู และส่งตั๋วพะอ๋งไป๋ฮื๊อกับตะหานฮื๊อเอาไป๋ขึงตี้ไม๊กางเขน16หมู่ตะหานพาพะเยซูเข้าไป๋ในศูนย์บัญชาการใหญ่ (ตี้ฮ้องว่า ศาลปรีโทเรียม) และฮ้องตะหานทั้งกองมา17หมู่เปิ้นเอาเสื้อกุมสีม่วง มาใส่ฮื๊อพะอ๋ง และเอาหนามมาสานเป๋นมงกุฎสวมฮื๊อกับพะอ๋งตวย18แล้วหมู่เปิ้นก็แก้งเยี๊ยะเป๋นคำนับฮื๊อล้อเลียนพะอ๋ง และอู้ว่า “จ้าวแป่นดินของจาวยิวจงเจริญ”19หมู่เปิ้นเอาไม๊อ้อบุบหัวพะอ๋ง ถ่มน้ำลายใส่ และแก้งเยี๊ยะเป๋นคุกเข่าลงกราบไหว้พะอ๋ง20หมู่เปิ้นล้อเลียนกั๋นจนพอใจ๋แล้วอั่น ก็ลู่เสื้อกุมสีม่วงออกแล้วใส่เสื้อเตี่ยวชุดเก่าฮื๊อกับพะอ๋ง แล้วนำพะอ๋งไป๋ขึงตี้ไม๊กางเขน21ในจ้วงตางตี้แห่พะเยซูไป๋อั่นหมู่เปิ้นได้บังคับฮื๊อซีโมนจาวไซรีนตี้เพิ่งมาจากชนบทหามไม๊กางเขนแตนพะเยซู ซีโมนเป๋นป้อของอเล็กซานเดอร์และรูฟัส22หมู่เปิ้นพาพะเยซูมาตึ๋งสถานตี้นึ่งจื้อ กลโกธา (เป๋ว่า “หัวกระโหลก”)23เปิ้นเอาเหล้าองุ่นผสมกับมดยอบ มาฮื๊อพะอ๋งกิ๋น แต่พะอ๋งก็บะยอมกิ๋น24หมู่เปิ้นขึงพะอ๋งตี้ไม๊กางเขน ส่วนหมู่ตะหานก็เอาเสื้อเตี่ยวของพะอ๋งมายั๊บสลากแบ่งกั๋น25ตอนตี้หมู่เปิ้นขึงพะเยซูอั่นเป๋นกั๋นเก้าโมงจ๊าว26มีป้ายเขียนคำกล่าวหาพะอ๋งว่า “จ้าวแป่นดินของจาวยิว”27และเปิ้นก็ขึงโจรสองคนไว้ตี้ไม๊กางเขนข้างๆพะอ๋ง ตางขวาคนนึ่งและตางซ้ายคนนึ่ง28และก็เกิดขึ้นแต๊ตามตี้พะคัมภีร์ได้เขียนฮื็อว่า หมู่เปิ้นได้ยั๊บพะอ๋งฮื็อตวยกั๋นกับโจรหมู่อั่น29คนตี้เตียวเลยไป๋มาพากั๋นส่ายหัว และอู้เยาะว่า “จะได๋อู้ว่าจะทำลายวิหารแล้วแป๋งมันขึ้นมาใหม่ในสามวันก๋ะ30ตอนนี้จ้วยตั๋วเก่าลงมาจากไม๊กางเขนหือได้เตื้อ”31หมู่ตัวป้อนักบวช และหมู่คูสอนกฎปฏิบัติก็อู้เยาะเย้ยพะเยซู เปิ้นอู้กั๋นว่า “มันจ้วยคนอื่นฮื๊อรอดได้ แต่จ้วยตั๋วเก่าบะได้32ฮื๊อพะคริสต์ จ้าวแป่นดินของจาวอิสราเอลคนนี้ลงมาจากไม๊กางเขนหือได้ก่อนเตื้อ เฮาจะได้หันและเจื้อ” และคนตี้ถูกขึงอยู่ข้างๆพะเยซูก็อู้พ้อถูกพะอ๋งตวย33ในตอนเตี้ยง เกิดความมืดมิดปกกุมไป๋ทั่วทั้งแผ่นดินจนตึ๋งบ่ายสามโมง34ตอนตึ๋งบ่ายสามโมงแล้ว พะเยซูก็ฮ๊องเสียงดังว่า “เอโลอี เอโลอี ลามา สะบักธานี” ซึ่งเป๋ว่า “พะเจ๊าของลูก พะเจ๊าของลูก อะหยังตึ๋งละลูกไป๋”35ตอนอั่นบางคนตี้ยืนอยู่ต๋งอั่นได้ยิน หมู่เปิ้นก็อู้ว่า “ฟังสิเปิ้นกำลังฮ้องเอลียาห์”36มีคนนึ่งรีบล่นเอาฟองน้ำไป๋จุ่มเหล้าองุ่นเปรี้ยวมาเสียบตี้ป๋ายไม๊อ้อแล้วยื่นขึ้นไป๋ฮื๊อพะอ๋งกิ๋น ป้อจายคนอั่นอู้ว่า “ฮื๊อท่าพ้อว่าเอลียาห์จะมาเอาเปิ้นลงจากไม๊กางเขนได้ก๋ะ”37ตอนพะเยซูฮ๊องเสียงดังแล้ว พะอ๋งก็สิ้นใจ๋ต๋าย38ตอนอั่นม่านในวิหาร ก็ฉีกออกเป๋นสองตางจากบนลงล่าง39นายร้อยคนตี้ยืนอยู่ไก้ๆอั่น หันการต๋ายของพะอ๋งจะอี้ เปิ้นก็อู้ว่า “เปิ้นเป๋นลูกของพะเจ๊าแต๊ๆ”40มีแม่ยิ๋งบางคนยืนพ้ออยู่ห่างๆ ในก๋วนอั่นมี มารีย์จาวมักดาลา มารีย์แม่ของยากอบน้อย โยเสส และสะโลเม41แม่ยิ๋งหมู่นี้เป๋นคนตี้ได้ติ๊ดต๋ามพ้อแลพะเยซูเมื่อพะอ๋งอยู่ตี้แคว้นกาลิลี และยังมีแม่ยิ๋งคนอื่นๆแฮ๋มหลายคนตี้ติ๊ดต๋ามพะอ๋งมาจากเมิงเยรูซาเล็มอยู่ตี้ฮั่นตวย42ตอนตึ๋งเมื่อแรงของวันจัดเตี๋ยม (เป๋นวันก่อนวันยู๋ดตางศาสนานึ่งวัน)43โยเซฟจากเมิงอาฮิมาเธียเป๋นสมาชิกสภาแซนฮีดรินคนนึ่งตี้คนฮื๊อความเคารพนับถือ เปิ้นกำลังท่าเมิงของพะเจ๊าอยู่ เปิ้นกล้าตี้จะเข้าไป๋หาปีลาตฮื๊อขอซบของพะเยซู44ปีลาตก็ฮู๊สึกเป๋กใจ๋ตี้พะเยซูต๋ายแล้ว จึงฮ้องนายร้อยเข้ามาซอยว่าพะเยซูต๋ายแล้วก๋ะ45ตอนเปิ้นหันรายงานแล้ว เปิ้นก็อนุญาตฮื๊อโยเซฟไป๋เอาพะซบได้46โยเซฟซื้อเตี่ยวลินิน และเอาซบพะเยซูลงมาจากไม๊กางเขน พันพะอ๋งฮื็อตวยเตี่ยวลินินอั่น และฝังพะอ๋งฮื็อในอุโมงค์ตี้เจาะเข้าไป๋ในหิน จากอั่นก็กลิ้งหินก้อนใหญ่มาปิดปากอุโมงค์ฮื็อ47มารีย์จาวมักดาลา และมารีย์แม่ของโยเสส ก็หันว่าพะอ๋งถูกนำไป๋ฝังไว้ตี้ฮั่น
Empower Asia Bible Translation Movement