Mark14
1แฮ๋มสองวันจะตึ๋งเทศกาลวันแห่งการปลดปล่อย และเทศกาลขนมปังไร้เจื๊อ หมู่ผู้นำนักบวช และหมู่คูสอนกฎปฏิบัติ ก็หาตางตี้จะแอบยั๊บพะเยซูเอาเปิ้นไป๋ฆ่า2หมู่เปิ้นต๋กลงกั๋นว่า “อย่าเพิ่งเยี๊ยะในช่วงเทศกาล เพาะว่าปะชาชนจะก่อการจลาจลขึ้น”3ตอนพะเยซูอยู่ตี้หมู่เฮือนเบธานี ขณะตี้กำลังกิ๋นเข้าอยู่ในเฮือนของซีโมนคนตี้เคยเจ๋บไข้ตี้ผิวหนังน่ากั๋ว ก็มีหญิงคนนึ่งถือขวด น้ำมันหอมนาระดา ซึ่งแพงจะนักเข้ามา นางบุ๋บปากขวดฮื๊อแต๋กและชโลมน้ำมันหอมอั่นลงบนหัวของพะเยซู4เยี๊ยะฮื๊อบางคนตี้อยู่ตี้ฮั่นบะพอใจ๋และจ่มกั๋นว่า “อะหยังตึ๋งเยี๊ยะเสียของจะอี้5ถ้าเอาน้ำหอมนี้ไป๋ขายคงได้สตางค์ตึ๋งสามร้อยเหรียญสตางค์ จะได้เอาไป๋แจกจ่ายฮื๊อกับคนตุ๊ก” แล้วหมู่เปิ้นก็ต่อว่าแม่หญิงนี้จะนัก6แต่พะเยซูอู้ว่า “อย่ายุ่งกับเปิ้นลุ ไป๋วุ่นวายกับเปิ้นจะได๋ เปิ้นได้เยี๊ยะสิ่งตี้ดีงามฮื๊อกับเฮา7โบ๋สูจะมีคนตุ๊กอยู่ตวยเสมอ ใค้จ้วยกั๋นไดก็จ้วยได้ แต่เฮาจะบะอยู่กับโบ๋สูเสมอไป๋8และนี่เป๋นสิ่งเดียวตี้เปิ้นจะเยี๊ยะฮื๊อกับเฮาได้ ก็คือการเทน้ำมันหอมบนตั๋วเฮาฮื๊อเตี๋ยมห้างของเฮาล่วงหน้าก่อนการฝัง9เฮาจะอู้ฮื๊อฮู๊ว่า บะว่าข่าวดีนี้จะอู้ไป๋ตี้ไดๆในโลกนี้ ก็จะมีคนอู้ตึ๋งเรื่องตี้เปิ้นเยี๊ยะฮื๊อกับเฮานี้เสมอ ฮื๊อเป๋นการระลึกตึ๋งเปิ้น”10แล้วยูดาสอิสคาริโอท ลูกซิดคนนึ่งในซิบสองคนของพะเยซูก็ได้ไป๋หาหมู่ตัวป้อนักบวช ฮื๊อเสนอตั๋วตี้จะจ้วยยั๊บพะเยซูฮื๊อ11หมู่เปิ้นดีใจ๋จะนักตี้ได้ยินอย่างอั่น และสัญญาว่าจะจ่ายสตางค์ฮื๊อเป๋นก้าตอบแตน ดังอั่นยูดาสจึงเริ่มหาโอกาสเหมาะตี้จะมอบพะเยซูฮื๊อกับหมู่ตัวป้อนักบวช12ในวันแรกของเทศกาลกิ๋นขนมปังไร้เจื๊อ ซึ่งเป๋นวันตี้หมู่ยิวจะฆ่าลูกสูะถวายพะจ้าว สำลับเทศกาลวันปลดปล่อยตวย หมู่ลูกซิดของพะเยซูได้ซอยพะอ๋งว่า “จะฮื๊อหมู่เฮาไป๋เตี๋ยมเข้าสำลับเทศกาลวันปลดปล่อยฮื๊อกับอาจ๋านตี้ไดดีครับ”13พะเยซูจึงส่งลูกซิดสองคนไป๋ พะอ๋งสั่งว่า “เข้าไป๋ในเมิงแล้วจะเจอป้อจายตี้หามเหยือกน้ำ ฮื๊อตวยเปิ้นไป๋14ฮื๊ออู้กับเจ้าของเฮือนตี้ป้อจายคนอั่นเข้าไป๋ว่า ‘อาจ๋านฮื๊อซอยว่าห้องตี้เฮาจะใจ๋กิ๋นเข้าในเทศกาลวันปลดปล่อยกับหมู่ลูกซิดอั่นอยู่ตี้ได’15แล้วเปิ้นจะพาสูไป๋พ้อห้องใหญ่ชั้นบนตี้เตี๋ยมฮื็อป๊อมแล้ว ฮื๊อจัดเข้าตี้ฮั่น”16แล้วลูกซิดทั้งสองก็เข้าไป๋ในเมิง และมันก็เป๋นไป๋ตามตี้พะเยซูอู้กุ๊กอย่าง หมู่เปิ้นจึงจัดเตี๋ยมเข้าสำลับเทศกาลวันปลดปล่อยตี้ฮั่น17ตอนตึ๋งเมื่อแรง พะเยซูมาตึ๋งเฮือนหลังอั่นป๊อมกับหมู่ลูกซิดเอกทั้งซิบสองคน18ในขณะตี้กำลังกิ๋นอยู่อั่น พะเยซูอู้ว่า “เฮาจะอู้ฮื๊อฮู๊ว่า คนนึ่งในโบ๋สูจะหั๋กหลังเฮา และเปิ้นก็นั่งกิ๋นอยู่กับเฮาตี้นี่ตวย”19หมู่ลูกซิดฮู๊สึกเป๋นตุ๊กจะนัก ต่างคนต่างก็ซอยพะอ๋งว่า “คงบะใช่ผมนะอาจ๋าน”20พะเยซูจึงอู้กับหมู่เปิ้นว่า “คนนึ่งในโบ๋สูซิบสองคนนี่แหละ คือคนตี้จุ่มขนมปังในชามเดียวกับเฮา21ลูกมนุษย์จะต้องต๋ายอย่างเดียวกับตี้พะคัมภีร์ ได้เขียนฮื็อแล้ว แต่คนตี้ได้หั๋กหลังลูกมนุษย์อั่นน่าละอายแต๊ๆ ถ้าเปิ้นบะได้เกิดมาก็คงจะดีกว่า”22ขณะตี้กำลังกิ๋นเข้าอยู่อั่น พะเยซูได้หยิบขนมปังขึ้นมาขอบคุณพะจ้าว จากอั่นก็หั๋กแบ่งฮื๊อหมู่ลูกซิดแล้วอู้ว่า “ฮับไป๋กิ๋น นี่คือห้างกายของเฮา”23แล้วพะอ๋งหยิบถ้วยขึ้นมาขอบคุณพะเจ๊าและยื่นฮื๊อกับหมู่ลูกซิด หมู่เปิ้นก็ได้ดื่มจากถ้วยอั่นกุ๊กคน24แล้วพะอ๋งอู้ว่า “นี่คือเลือดของเฮา พะเจ๊าเยี๊ยะสัญญาขึ้นมาตวยเลือดนี้ มันได้หลั่งไหลออกมาฮื๊อคนจะนัก25เฮาจะอู้ฮื๊อฮู๊ว่า เฮาจะบะดื่มเหล้าองุ่นแฮ๋มลุจนตึ๋งวันอั่นตี้เฮาจะดื่มเหล้าองุ่นใหม่ในเมิงของพะจ้าว”26ตอนหมู่เปิ้นได้ฮ๊องเพลงสรรเสริญพะเจ๊าแล้ว กะออกไป๋ตี้ดอยมะกอกเทศ27พะเยซูอู้กับหมู่ลูกซิดว่า “โบ๋สูจะละเฮาไป๋กั๋นเมิ๊อดตุ๊กคน เพาะว่ามีคำเขียนฮื็อแล้วว่า‘เฮาจะฆ่าคนเล่งสูะและสูะอั่นก็จะหนีกระเจิงไป๋’28แต่ตอนเฮาฟื้นขึ้นจากความต๋าย เฮาจะล่วงหน้าโบ๋สูไป๋ตี้แคว้นกาลิลีก่อน”29แต่เปโตรอู้กับพะอ๋งว่า “ตึ๋งคนอื่นจะละอาจ๋านไป๋เมิ๊อด ผมก็จะบะมีวันละอาจ๋านไป๋อย่างเด็ดขาด”30พะเยซูจึงอู้กับเปิ้นว่า “เฮาจะอู้ฮื๊อสูฟังว่า คืนนี้ก่อนไก่ขันเตื้อตี้สอง สูจะอู้ว่าบะฮู๊จักเฮาสามเตื้อ”31แต่เปโตรก็ยังยืนยันเสียงแข็งว่า “ตึ๋งผมจะต้องต๋ายกับอาจ๋าน ผมก็บะมีวันอู้ว่าบะฮู๊จักอาจ๋าน” และหมู่ลูกซิดตึงมด ก็อู้อย่างเดียวกั๋น32หมู่เปิ้นมาตึ๋งสถานตี้แห่งนึ่งฮ้องว่า เกทเสมนี พะเยซูอู้กับหมู่ลูกซิดว่า “นั่งท่าอยู่ตี้นี่นะ เฮาจะไป๋อธิษฐาน”33พะอ๋งพาเปโตร ยากอบ และยอห์นไป๋ตวย แล้วพะอ๋งก็เริ่มโศกเศร้าเสียใจ๋และเป๋นตุ๊กยิ่งนัก34จึงอู้กับหมู่เปิ้นว่า “เฮาตุ๊กใจ๋จะนักจนแทบจะต๋ายอยู่แล้ว ฮื๊อหมู่สูตื่นและเฝ้าอยู่นี้เต๊อะ”35พะอ๋งเตียวห่างออกไป๋แฮ๋มน่อย แล้วซบหน้าลงกับดิ๋น อธิษฐานว่า ถ้าเป๋นไป๋ได้ขอฮื๊อกั๋นแห่งความตุ๊กยากนี้เลยพ้นไป๋จากพะอ๋ง36พะอ๋งอู้ว่า “อับบา อีป้อ ตุ๊กสิ่งกุ๊กอย่างเป๋นไป๋ได้สำลับพะอ๋ง ขอจ้วยเอาถ้วย แห่งความตุ๊กยากนี้พ้นไป๋จากลูกตวยเต๊อะ แต่ขอฮื๊อเป๋นไป๋ตามใจ๋อีป้อ บะใช่ตามใจ๋ลูก”37แล้วพะอ๋งก็เตียวปิ๊กมา หันหมู่ลูกซิดนอนลับอยู่ พะอ๋งจึงอู้กับเปโตรว่า “ซีโมน ยังจะลับอยู่แฮ๋มหรือ สูจะตื่นเป๋นเปื้อนกับเฮาสักจั๋วโมงบะได้ลุ38โบ๋สูต้องเฝ้าระวังและอธิษฐาน จะได้บะแพ้ต่อการยั่วยวน ตึ๋งแม้จิตใจ๋ใค้จะเยี๊ยะในสิ่งตี้ถูกต้อง แต่ห้างกายก็ยังอ่อนแออยู่”39พะอ๋งเตียวไป๋อธิษฐานแฮ๋มเตื้อนึ่งและอู้อย่างเก่า40พอเตียวปิ๊กมา ก็เจอหมู่ลูกซิดยังนอนลับอยู่ เปือกตาเปิ้นหนักอึ้งลืมบะขึ้น เปิ้นบะฮู๊จะอู้ไอหยังกับพะอ๋ง41ต่อมาพะอ๋งก็เตียวปิ๊กมาพ้อหมู่เปิ้นแฮ๋มเป๋นเตื้อตี้สาม และอู้ว่า “ยังนอนลับพักผ่อนกั๋นอยู่แฮ๋มจะได๋ นอนเมินแล้ว จั๋วโมงตี้ลูกมนุษย์จะถูกหั๋กหลังฮื๊อไป๋อยู่ในมือของหมู่คนเยี๊ยะบ่ดีอั่นมาตึ๋งแล้ว42ฮุกขึ้นไป๋กั๋นเถอะ ฮั่นไง คนตี้หั๋กหลังเฮามาตึ๋งแล้ว”43พะเยซูอู้ยังบะทันขาดคำ ยูดาส ลูกซิดคนนึ่งในซิบสองคนก็มาตึ๋งป๊อมกับคนก๋วนใหญ่ตี้ถือดาบและไม๊ตะบอง คนหมู่นี้ถูกส่งมาจากหมู่ตัวป้อนักบวช หมู่คูสอนกฎปฏิบัติ และหมู่ผู้อาวุโส44ยูดาสได้ต๋กลงกับหมู่อั่นฮื็อก่อนล่วงหน้าแล้วว่า “คนตี้ผมจูบคือคนๆอั่น เข้าไป๋ยั๊บกุมและควบคุมตั๋วไป๋ลุ”45ตอนยูดาสมาตึ๋งก็เตียวเข้าไป๋หาพะเยซูและอู้ว่า “อาจ๋านครับ” แล้วจูบพะอ๋ง46หมู่อั่นก็เข้ามายั๊บตั๋วพะอ๋งและคุมตั๋วไป๋47คนนึ่งในหมู่พะเยซูตี้ยืนอยู่ไก้ๆอั่น ได้ชักดาบออกมา แล้วก็ฟันถูกหูทาสคนนึ่งของนักบวชสูงซุ๊ดขาดไป๋48พะเยซูอู้กับหมู่อั่นว่า “หันเฮาเป๋นโจรหรือจะได๋ ตึ๋งได้ถือดาบและไม๊ตะบองมายั๊บเฮา49เฮาอยู่กับโบ๋สูตุ๊กวัน สอนอยู่ในวิหาร แต่โบ๋สูก็บะยั๊บ แต่กุ๊กอย่างก็ต้องเป๋นไป๋ตามตี้ได้เขียนฮื็อแล้วในพะคัมภีร์”50ส่วนหมู่ลูกซิดล่นหนี และละพะอ๋งไป๋กั๋นจนเมิ๊อด51มีป้อจายหนุ่มคนนึ่งตี้ติ๊ดต๋ามพะอ๋งมา บะได้สวมใส่ไอหยังลุ นอกจากห่มเตี่ยวผ้าป่านผืนนึ่ง ตอนหมู่อั่นพยายามจะยั๊บเปิ้น52เปิ้นก็ได้สลัดเตี่ยวผ้าป่านขว้างแล้วเปิ๋อยกายล่นหนีไป๋53หมู่เปิ้นนำตั๋วพะเยซูไป๋ป๊ะนักบวชสูงซุ๊ด หมู่ตัวป้อนักบวช หมู่ผู้นำจาวยิว และหมู่คูสอนกฎปฏิบัติได้อยู่ชุมนุมกั๋นตี้ฮั่น54เปโตรตามพะเยซูมาห่างๆเข้าไป๋ยังลานเฮือนของนักบวชสูงซุ๊ดตวย เปิ้นไป๋นั่งผิงไฟฮื๊อตั๋วอุ่นอยู่กับหมู่ผู้คุม55หมู่ตัวป้อนักบวชและสมาชิกสภาแซนฮีดรินตึงมดพยายามหาพยานเท็จมาปฮักปรำพะเยซู ฮื๊อจะได้ฆ่าพะอ๋ง แต่ก็หาบะได้ลุ56ตึ๋งแม้จะมีพยานเท็จหลายคน แต่สิ่งตี้หมู่เปิ้นอู้ก็บะต๋งกั๋น57ในตี้ซุ๊ดมีบางคนยืนขึ้นเป๋นพยานเท็จกล่าวหาพะเยซูว่า58“หมู่เฮาได้ยินเปิ้นอู้ว่า ‘เฮาจะทำลายวิหารนี้ ตี้แป๋งขึ้นมาตวยมือมนุษย์ และภายในสามวัน เฮาจะแป๋งวิหารแฮ๋มแห่งนึ้ขึ้นมาใหม่ตี้บะได้แป๋งตวยมือมนุษย์’”59แต่คำพยานในเรื่องนี้ก็บะต๋งกั๋นแฮ๋ม60นักบวชสูงซุ๊ดจึงยืนขึ้นต่อหน้าคนตึงมด และซอยพะเยซูว่า “สูจะบะสู้ตั๋วในสิ่งตี้เปิ้นกล่าวหาสูก๋ะ”61แต่พะเยซูก็ยังคงดั๊กบะอู้ไอหยังซักอย่าง แล้วนักบวชสูงซุ๊ดจึงซอยพะอ๋งว่า “สูเป๋นพะคริสต์ ลูกของพะเจ๊าก๋ะ”62พะเยซูจึงอู้ว่า “แม่น เฮาเป๋น และโบ๋สูจะได้หันลูกมนุษย์นั่งอยู่ตางขวามือของพะเจ๊าผู้ยิ่งใหญ่และเสด็จมากับเมฆแห่งสวรรค์”63นักบวชสูงซุ๊ดก็ตึ๊ดทึ้งเสื้อเตี่ยวของตน และอู้ว่า “เฮายังต้องการพยานไอหยังแฮ๋ม64โบ๋สูก็ได้ยินคำหมิ่นปะมาทของเปิ้นแล้ว โบ๋สูคึดว่าจะได๋” หมู่เปิ้นตุ๊กคนตั๊ดสินว่า พะอ๋งมีความปิ๊ดและสมควรต๋าย65บางคนถ่มน้ำลายใส่พะอ๋ง บางคนปิดหน้าพะอ๋ง ต่อยหน้าพะอ๋ง แล้วซอยพะอ๋งว่า “ผู้อู้แตนพะจ้าว ทายสิว่าไผเป๋นคนเยี๊ยะ” และหมู่ผู้คุมก็พาพะอ๋งไป๋บุ๋บ66เปโตรยังอยู่ตี้ลานเฮือนข้างล่างอั่น สาวใจ๋คนนึ่งในเฮือนเตียวมา67เปิ้นหันเปโตรผิงไฟอยู่ แล้วก็เข้ามาพ้อไก้ๆและอู้ว่า “สูก็อยู่กับเยซูจาวนาซาเร็ธนี่นา”68แต่เปโตรก็ได้ปฏิเสธว่า “ผมบะฮู๊บะเข้าใจ๋ว่าสูอู้ตึ๋งเรื่องไอหยัง” แล้วเปโตรก็เตียวไป๋ตางปะตู๋เข้าเฮือน และไก่ก็ขัน69ตอนสาวใจ๋หันเปโตรตี้ฮั่นแฮ๋ม เปิ้นอู้กับคนตี้ยืนอยู่แถวๆอั่นว่า “เปิ้นเป๋นคนนึ่งในหมู่อั่น”70เปโตรปฏิเสธแฮ๋ม และแฮ๋มสักพักนึ่งหลังจากอั่น หมู่คนตี้ยืนอยู่ตี้ฮั่นก็ได้อู้กับเปโตรว่า “สูเป๋นคนนึ่งในหมู่อั่นแต๊ เพาะว่าสูก็เป๋นจาวกาลิลีอย่างเดียวกั๋น”71แต่เปโตรก็เริ่มสบถ โดยอู้ว่า “สาบานได้ลุ ว่าผมบะเคยฮู๊จักป้อจายคนตี้โบ๋สูอู้ตึ๋ง”72ทันใดอั่น ไก่ก็ขันเป๋นเตื้อตี้สอง แล้วเปโตรก็นึกตึ๋งคำอู้ของพะเยซูได้ว่า “ก่อนไก่ขันเตื้อตี้สาม สูจะอู้ว่าบะฮู๊จักเฮาสามเตื้อ” แล้วเปิ้นก็ฮ๊องไห้โฮออกมา
Empower Asia Bible Translation Movement