Mark16
1หลังจากวันยู๋ดตางศาสนาเลยพ้นไป๋แล้ว มารีย์จาวมักดาลา สะโลเม และมารีย์แม่ของยากอบ ก็ซื้อเครื่องหอมฮื๊อจะเอาไป๋อาบซบพะเยซู2ตอนจ๊าววันอาติ๊ด ดวงอาติ๊ดเพิ่งจะขึ้น หมู่เปิ้นก็พากั๋นไป๋ตี้อุโมงค์ฝังซบ3ตามตางหมู่เปิ้นอู้กั๋นว่า “แล้วไผจะกลิ้งหินใหญ่ตี้ปิดปากอุโมงค์ออกฮื๊อเฮาล่ะ”4ตอนมาตึ๋ง หมู่เปิ้นพ้อไป๋ตี้อุโมงค์ และหันหินก้อนใหญ่จะนักอั่นถูกกลิ้งออกไป๋แล้ว5หมู่เปิ้นเข้าไป๋ในอุโมงค์กั๋นและหันป้อจาย คนนึ่งสวมเสื้อกุมสีขาวนั่งอยู่ข้างขวา หมู่เปิ้นก็สะดุ้งต๊กใจ๋6ป้อจายคนอั่นอู้ว่า “บะต้องสะดุ้ง๋ โบ๋สูพ้อหาเยซู จาวนาซาเร็ธตี้ถูกขึงบนไม๊กางเขนก๋ะ พะอ๋งบะได้อยู่ตี้นี่ พะอ๋งฟื้นขึ้นจากความต๋ายแล้ว ต๋งนี้ไงตี้เปิ้นวางซบของพะอ๋ง7ไป๋อู้กับหมู่ลูกซิดของพะอ๋งและเปโตรตวยว่า ‘พะอ๋งล่วงหน้าไป๋ตี้แคว้นกาลิลีแล้ว โบ๋สูจะป๊ะพะอ๋งตี้ฮั่นอย่างเดียวกับตี้พะอ๋งได้อู้ฮื็อฟังแล้ว’”8หมู่เปิ้นจึงรีบล่นไป๋จากอุโมงค์อั่นตวยความงุนงงและสั่นเทิ้มไป๋ทั้งตั๋ว หมู่เปิ้นโก๊วจะนักจนบะกล้าเล่าฮื๊อไผฟัง9ฮุ่งจ๊าวของวันอาติ๊ดอั่น หลังจากตี้พะเยซูฟื้นขึ้นจากความต๋าย คนแรกตี้พะอ๋งได้ปาก๋ดตั๋วฮื๊อหันคือมารีย์จาวมักดาลา คนตี้พะอ๋งเคยขับผีจั๋วเจ็ดตนออกฮื๊อ10แล้วนางไป๋อู้ฮื๊อหมู่ลูกซิดของพะอ๋งฟังขณะตี้หมู่เปิ้นกำลังฮ๊องไห้เศร้าโศกเสียใจ๋กั๋น11แต่ตอนนางอู้ว่าพะอ๋งฟื้นขึ้นมาแล้วและนางได้หันพะอ๋ง หมู่เปิ้นปิ๊กบะเจื้อตี้นางอู้12หลังจากอั่นพะเยซูได้มาปาก๋ดตั๋วในแฮ๋มฮูปแบบนึ่งฮื๊อลูกซิดสองคนหัน ในขณะตี้หมู่เปิ้นเตียวออกไป๋ตี้ชานเมิง13แล้วหมู่เปิ้นก็รีบปิ๊กมาอู้หมู่ตี้เหลือ แต่หมู่อั่นบะยอมเจื้อ14ต่อมาพะเยซูได้มาปาก๋ดตั๋วฮื๊อลูกซิดทั้งซิบเอ็ดคนหัน ในขณะตี้หมู่เปิ้นกำลังกิ๋นเข้ากั๋นอยู่ พะอ๋งต่อว่าหมู่เปิ้นว่าเป๋นคนดื้อดึงตี้บะยอมเจื้อคนหมู่อั่นตี้ได้หันพะอ๋งหลังจากตี้ฟื้นขึ้นมาแล้ว15พะอ๋งอู้กับหมู่เปิ้นว่า “ฮื๊อออกไป๋ทั่วโลกและอู้ข่าวดีนี้ฮื๊อกับตุ๊กคนในตุ๊กแห่งฟัง16ตุ๊กคนตี้เจื้อและเข้าพิธีจุ่มน้ำก็จะรอด แต่ตุ๊กคนตี้บะเจื้อจะถูกตั๊ดสินลงโต้ด17คนตี้เจื้อจะมีฤทธิ์เยี๊ยะสิ่งต่างๆจะหนี้ได้ คือจะไล่ผีจั๋วออกได้โดยอ้างจื้อของเฮา จะอู้ภาษาเป๋กๆได้ จะยั๊บงูพิษได้ตวยมือเปล่า18หรือถ้าดื่มยาพิษเข้าไป๋ ก็จะบะเป๋นอันตรายลุ และหมู่เปิ้นจะสามารถวางมือบนคนเจี๊บแล้วเยี๊ยะฮื๊อหมู่คนเจี๊บหายได้”19หลังจากตี้องค์พะเยซูเจ้าอู้กับหมู่เปิ้นเสร็จแล้ว พะอ๋งก็ถูกฮับขึ้นไป๋บนสวรรค์ และนั่งอยู่ตางขวามือของพะจ้าว20ตั้งแต่อั่นมา หมู่ลูกซิดได้ออกไป๋อู้ตุ๊กหนตุ๊กแห่ง องค์เจ้าจีวิดได้เยี๊ยะงานร่วมกับหมู่เปิ้นตวย และฮื๊อฤทธิ์อำนาจกับหมู่เปิ้นตี้จะเยี๊ยะสิ่งอัศจรรย์ต่างๆได้ ฮื๊อฮับฮองว่าสิ่งตี้หมู่เปิ้นอู้อั่นเป๋นเรื่องแต๊
Empower Asia Bible Translation Movement