BaEfesu6
1Bana, ibani nemazwibhato kubazwadzi benyu muna He, ngobe ikoku kwakalulama.2“Lemekedza tate babo nameyabo” (iwhoyu ndiwo nlayo wekutanga unatjigadzabgwe),3“kudze kukuyendile zwakanaka kakale utjile butjilo gulefu muhango.”4Botate, musithame bana benyu bakaba nebuhongola, koga mubakulise nezila inamazwibhato nenlayo waHe.5Balanda, ibani nemazwibhato kuna bobatezi benyu bemuhango, mubahle mubateteme nemoyo wakapelela, sekwamuna mazwibhato kuna Khirisitu.6Musikuthame hapa bakamulinga koga, mubahanhisa, koga mukuthame sebalanda baKhirisitu, banothama kuda kweNdzimu kubva mumoyo.7Muhinge nemimoyo yakapelela sekunoyi mohingila He, amutohingila banhu,8saku muziba kuti nhu wose unowhowamutjila mbhayilo unobva kuna He unoyendidzana nehinga kukwe kwakanaka, kusineni nekuti unlanda kene wakasununguka.9Bobatezi, thamani mujalo bo kubalanda benyu, letjani bahlihlidzila, saku muziba kuti iwhoyo uBatezi wabo kakale ali He wenyu bo ukudzimu, kakale iye aana luhalawulo.10Tjebupelo, simani muna He nemusimba lile gulu.11Mbalani zwiyambalo zwengwa zwamunopiwa neNdzimu, kudze muzwigwile mubutjengeli gwaSatane.12Ngobe atitogwisana nenyama nelopa, koga togwisana nebutungamili, nemasimba, nebatongi behango belubaka guno gwehhalima, nemeya yebubi ikubugalo gwekudzimu.13Ndizo mbalani zwiyambalo zwengwa zwamunopiwa neNdzimu, kudze mutubule zwigwila muhhuba lebubi, kakale hapa mapedza zwigwila, mume makasima.14Ndizo ke mani makasima, makazwisunga nhunji nemwandabula wemalebeswa, makambala tjidzibililo tjendulamo pafuba,15nemakumbo enyu makambala kuzwilulamisa kunobva mundebo mbuya yekunyalala,16pehhugwi kwayikoku kose, mutole tjidzibililo tjebugalimoyo, tjamungahingisa dzima yose misebe yembi inopfuta.17Kakale tolani whuntshi yetjidzibililo yejidzo, nethumo leMeya, ilo dama leNdzimu.18Tembezelani lubaka gose muMeya, ngemitembezelo yakasiyana siyana nange kumbila kwakasiyana siyana. Nentha yayikoku mulinde muna moyonlefu kwazo, mutembezelela banhu beNdzimu bose,19munditembezelele bo, kuti hapa ndihhula nlomo wangu, ndipiwe matama kudze ndisihle leba masazibgwa endebo mbuya,20wandilimilili wayo ndilimumiketane, kudze ndilebeleke nekwayo ndina tjilopa, sekwandakafanila kuti ndilebeleke.21Thikhikhasi hama inodikala ali nlanda unogalikabgwe muna He unowhomubudza kose, kudze muzibe nekwangu nekwandinothama.22Ndawuntuma kumuli nentha yayikoku, kuyetila kuti muzibe kuti titjini, nekuti akuludzile mimoyo yenyu.23Kunyalala neludo guna kugalamoyo, kunobva kuNdzimu Tate naHe Yesu Khirisitu ngakube kubagalimoyo.24Ngoni ngadzibe kuna bose banoda He wedu Yesu Khirisitu neludo gusingapele.
The Word for the World International