Mihingo yeBapositoli27
1Kwakati kwatjimisiwa kuti takafanila yenda kuIthali ngekepe, bakayendisa Phawuli nebamwe basungwa kunlawuli webagwi bengwa wetjikamu tja Ogasitani, unoyi Juliyasi.2Takatanha kepe tjeku Adiramithiyamu, tjaka tjobva tjimilika tjiyenda tjipinda pamahhambuko apansumho wehango yeAsiya, takayenda, taka tina Arisitakhasi wekuMakhedoniya ebva muThesalonika.3Tjimuka takaswika kuSidoni; Juliyasi waka akabhata Phawuli zwakanaka, akawumbvumila kuti ayende anobona bakwinya babe bawumbhatshe nezwaanohaka.4Tikati timilika ipapo nekepe tikayenda nekundzibo yeSayiphurasi yakasitila, ngobe mhepo yaka ileyana naswi.5Tikati tapalama gungwa lipakati kweSilisiya nePhamfiliya, tikaswika kuMayira, imuLisiya.6Ikweno nlawuli webagwi bengwa wakanowana kepe tjekuAlekizandha tjakatjiyenda kuIthali, akatitanhisa itjo.7Takayenda polepole kwemahhuba, tikanoswika zwakalema pawhunde yeSinidasi. Nentha yekuti mhepo yaka isingatibvumile kuti tiyendile mbeli, takayenda tili kundzibo yakasitila yeKhiriti takalingisana neSalimoni.8Takayipinda zwakalema, tikaswika pabugalo gunoyi Pakasumbikika Pakanaka, pedlo napo kwaka kuna nzi-nkulu weLaseya.9Saku taka tatjitola lubaka gulefu, pindila mbeli kwaka kusingatjathame ngobe hhuba leyila zodliwa laka latjipinda, Phawuli akabapa mano,10eti, “Botate, ndobona kuti gwendo gowhobe nekukubala nelahikigwa kukulu, kusi kusilahikigwa kwentolo nayitjo kepe koga, koga nebutjilo gwedu bo.”11Koga nlawuli webagwi bengwa wakawhilila ntungamili wekepe nemweni wekepe kupinda tjinolebgwa naPhawuli.12Ngono nentha yekuti panoswikila zwikepe paka pasakalulamila gala po mumbaba, bunji gwebanhu bakati kungin'we mugungwa kuyendiwe, kuti swiyo kungaswikiwa kuFenikisi, panoswikila zwikepe muKhiriti pakalinga kubunandzwa gwakadziba kunohwa hhuba nekuburwa gwakadziba kunohwa hhuba, kuti kugagwe po lubaka gwembaba.13Kukati kwafulilidza mhetshwana inobva kuburwa, bekumbula kuti tjababakalingilila tjeyetikala, bakasunungula kepe bakayenda besumha nemhili yeKhiriti.14Koga nelubakanyana kwakaswika dutu linabuhongola, linoyi bunandzwa-bhehhuba, libva muhango;15kukati dutu latjitikulila, kepe tjisingatjatubule yenda tjakalinga kunobva dutu, takaletja tjikayenda sekwatjinosundiwa nemhepo.16Takati tipinda pakasitigwa netjigwizi tjitukununu tjinoyi Khawuda tikatubula kweba nghoro wekepe, koga zwakalema;17bakati batjiwumilidza bakawunsa pehhugwi, bakatola mitjili yawo bakayipombela pakepe; ngentha yekuti baka behla kuti bangalobelela pansetje weSiritisi, bakajitisa tjinomisa kepe, kepe tjikasundiwa nemhepo.18Dutu lina buhongola laka yendilambeli litigwisa, tjimuka bakatangisa posela ntolo wekepe kuhhe;19muhhuba lebutatu bakaposela zwihingiswa zwekepe kuhhe ngemaboko abo.20Kwakatola mahhuba manjinji kusingabonakale hhuba kene nyenyedzi, kuna dutu lisihoma, galabgwe kwedu kuti towhowana jidzo kwakadza kuka pela.21Bakati baba nemahhuba basingadle, Phawuli akamilika pakati kwabo, akati, “Balume, katshene maka mandiwhilila, kuti tisimilike kuKhiriti tobe tisakalahikigwa kakale tisakakubaligwa zwingapa.22Ndemubudza ke sangwenu, gadzikanani mumimoyo; ngobe akuna unowholahikigwa nebutjilo pakati kwenyu, kuhhe kwekepe nditjo tjinowhopalala.23Ngobe busiku gwanasi ntome kwangu kwakulimile ntumwa weNdzimu wandili uwe kakale wandinonamata.24Wati kundili, ‘Usihle, Phawuli; wakafanila kuti unoma mbeli kwaKhesari. Linga, Ndzimu waba nengoni akatjidza bose ibabo bawunoyenda nabo.’25Ndizo ke gadzikanani mumimoyo balume, nekuti ndina kugalabgwe muNdzimu kuti kowhoyetikala sekwandabudziwa.26Koga dutu lowhotisundila kutjimwe tjigwizi.”27Gwakabe guli busiku gwebugumi lina kuna, tiwunga tisundiwa nedutu mugungwa leAdiriya, banoyendesa kepe bakakumbulila kuti batjibe pedlo nehango.28Ndizo bakayela gungwa bakawana lidzika kungapa mamitha ali makumi matatu nematanhatu; bakati bati tshelele bakayela kakale bakawana mamitha ali makumi mabili nekutondeka.29Bakati bohla kuti kwaba pedlo nepana hongwe kusi, bakadelusa kuhule kwekepe zwibhati zwina, bakatembezelela kuti kuyedze.30Kukati banoyendesa kepe bohaka kuti batihhe babhude mukepe, batjidelusa nghoro bakawunsa mugungwa, beyeta sekunoyi banoposela zwibhati mbeli,31Phawuli akati kunlawuli webagwi bengwa nekubagwi bengwa, “Balume ibaba bakasagala mukepe, amungatjile.”32Bagwi bengwa bakaba bethubula misungo yaka yakasunga nghoro, bakaletja ukayenda.33Kukati kweyedza, Phawuli akabakuludzila kuti badle zodliwa, eti, “Nasi ihhuba lebugumi nemana makangolindila musingalonge tjimwe munlomo, kusina tjamadla.34Ndizo ndomukuludzila kuti mudle zodliwa; ndiko kwamunowhoba nemasimba, saku kusina kene ilo vudzi limun'holo kene wayani pakati kwenyu linowhopalala.”35Akati aleba ikoku, akatola tjinkwa, akaboka Ndzimu mbeli kwabo bose akatjipemula akatangisa dla.36Bose bakakuludzika bakadla bo.37(Toseni banhu bamukepe taka tili makulu mabili anamakumi ali kutondeka nebatanhatu. )38Bakati batjidla baguta, bakatapudza ntolo wekepe, belahila zwidlo mugungwa.39Kukati kwayedza, basizibe hango iyeyo, koga bakabona kuti kuna nsetje, ndipo pabakakumbulila kuti hapa kubvuma, bamise kepe po.40Ndizo bakadelusa zwibhati bakazwisiya mugungwa, ngeno besunungula misungo yaka yakabhata migoti inoyendisa kepe; bekotjimilidza jila lambeli kudze mhepo itjisundile kumhili.41Koga tjakanolobana nensetje wepanohangana makungwa mabili; mbeli kwekepe kukalamba kulimile kusingayende, kuhule kwekepe kukavunika nentha yemabundo evula aka ana buhongola.42Bagwi bengwa bakaluka mano kuti babulaye basungwa, swiyo umwe wabo waka angaloba bhamu akatihha;43koga nlawuli webagwi bengwa, ehaka tjidza Phawuli, wakabadzibisa thama tjabaka bakumbula. Akabudza baka betubula loba bhamu kuti babhude mukepe kutanga bayende kumavu,44bamwe bose batobele bakabhatilila pamakwasayila kene zwipemu zwekepe. Nayiyeyi zila bose bakanoswika pahango beli bapenyu.
The Word for the World International