2 BaKhorinte4
1Ndizo ke, saku wali ngemawhilangoni eNdzimu tina n'hingo iwhoyu watinawo, atitonyala moyo.2Takatjisiyana nezila dzinohemesa dzakasumbikika; tolamba tjila butjilo gwebupitipiti kene gwetjinya dama leNdzimu, koga ngeleba lebeswa patjena tozwikudza kuhana yenhu wose mbeli kweNdzimu.3Nekutobe ndebo mbuya yedu yakakwitidziwa, yakakwitidziwa kuna ibabo banopalala.4Kubali ndzimu wehango ino wakayeta mikumbulo yebasingagalemoyo ikasawhisisa, kudze basibone tjedza tjendebo mbuya yaKhirisitu, iye umbumbiko yeNdzimu.5Ngobe tjatinosumikila atitosumikila nekwedu, koga tosumikila Yesu Khirisitu saHe, iswi tili sebahingi benyu ngentha yaYesu.6Ngobe iye Ndzimu wakati, “Tjedza ngatjipenye kubva muhhalima,” ndiye zwe wakayeta tjedza tjikapenya mumimoyo yedu, tjedza tjeluzibo gwegudzo leNdzimu tjinoboneka mubuso gwaYesu Khirisitu.7Koga tina fumwa iyeyi muhali dzentapwe, kulakidza kuti masimba makulu ndeeNdzimu haata edu.8Togwadzisiwa ngezila dzose, koga atitokundiwa; topinganyidziwa, koga atitonyala moyo;9todziyidziwa, koga Ndzimu atotifupatila; tolobgwa tikalala pasi, koga tisingafe;10togala takasenga lufu gwaYesu mumbili, kuyetila kuti butjilo gwaYesu guboneke bo mumibili yedu.11Ngobe mukutjila kwedu togala takalingisana nelufu tibulayiwa ngentha yaYesu, kuyetila kuti butjilo gwaYesu guboneke mumibili yedu inofa.12Ndizo wali lufu gohinga mutili, koga butjilo gohinga mumuli.13Saku tina iyo zwayo meya yegalamoyo yaaka enayo iye wakakwala eti, “Ndakagalamoyo, ndizo ndaka lebeleka,” naswi bo togalamoyo, ndizo tilebeleka,14tiziba kuti iwhoyo wakamusa He Yesu unowhotimusa bo naYesu akatihhisa kan'ompela namwi mbeli kukwe.15Ngobe kose ikoku kungentha yenyu, kuyetila kuti sengoni dziswikilila kubanhu banjinji boka kuwande, kube gudzo leNdzimu.16Ndizo ke atitonyala moyo. Nekutobe mbumbiko yedu yakuhhe ihakala, mbumbiko yedu yamukati inoyetiwa ikaba ntshwa mahhuba ose.17Ngobe dziyidzika kwedu ikoku kutukununu kwelubakanyana kotilulamisila gudzo gulu lisingapele linopinda dziyidzika kose,18ngobe atitolinga zwinhu zwinoboneka koga tolinga zwinhu zwisingaboneke; kana zwinhu zwinoboneka zopinda, koga zwisingaboneke zobayapo tjoselele.
The Word for the World International