رومؔ5
1امکِس نتیجس منٛز پزِ اسہِ خدایس سٟتؠ امنہٕ سان زُوُن تمہِ کرنکہِ برکتہٕ یہِ خداوند یسوع مسیحنؔ اسہِ سٟتؠ کوٚر تکیازِ أسؠ بنیاے راستباز یسوعسؔ پیٚٹھ ایمان اننہٕ کِنؠ۔2سون خداوند یسوعؔ مسیحؔ چھُ لگتھےٕ اسہِ خدایہِ سُنٛد مہربان آسُن ژٮ۪تراوان یسوعسؔ پیٚٹھ سانہِ ایمان اننہٕ سٟتؠ۔ أسؠ ہیٚکو خود اعتمٲدی سان فخر کٔرِتھ زِ أسؠ چھِ خدایہِ سنٛز پرٮ۪زلوٕنہِ عظمژ منٛز شرکت کران۔3چھرا چھنہٕ کتھ یِژے یتھ پیٚٹھ أسؠ فخر ہیٚکو کٔرِتھ۔ بلکہِ ہیٚکو أسؠ تِمن دۅکھٕ دٲوؠ چیزن پیٚٹھ تہِ فخر کٔرِتھ یِم اسہِ ژٮ۪ترٲوؠ۔ أسؠ ہیٚکو یہِ کٔرِتھ تکیازِ أسؠ چھِ زانان زِ دۅکھٕ دٲوؠ چیز یِم اسہِ ژٮ۪ترٲوؠ چھِ اسہِ مشکلات برداشت کرنُک ژوٚر حوصلہٕ دِوان۔4تہٕ برداشت کرنس لایق بنُن چُھ اسہِ خدایس نِش قبولیت بخشان تہٕ ییٚلہِ خدا اسہِ قبول کرِ، أسؠ چھِ زیادٕ حوصلہٕ لبان۔5ییٚلہِ أسؠ خود اعتمٲدی پراوو، أسؠ سپدو نہٕ زانہٛہ تہِ نا امید۔ یہِ چھُ اوٕ کِنؠ زِ پاک روحن بنٲوؠ أسؠ زیادٕ سنرِ سان سمجھنس لایق۔ اسہِ کوتاہ چھُ خدا لول بران۔ خداین دیُت اسہِ پاک روح بخشمُت۔6پزر گوو یہِ زِ ییٚلہِ أسؠ وُنہِ مجبور ٲسؠ، یسوعؔ مسیحنؔ دیُت پنُن زُو اسہِ گناہگار لوٗکن ہنٛدِ باپتھ چھپہِ۔ خداین دیُت یہِ سپدنہٕ صحی موقعس پٮ۪ٹھ۔7بے شک کرِ کانہٛہ تہِ نفر کٲنٛسہِ تہِ نیک فردٕ سنٛدِ باپتھ مرُن خالے قبول ہرگاہ زن کانہٛہ نفر کٲنٛسہِ نیک فردٕ سنٛدِ باپتھ مرنس غور تہِ کرِ۔8وۅنؠ گوو خدا چھُ پننہِ لولُک اظہار اسہِ نیک لوٗکن ہنٛدِ باپتھ کران یمہِ واقعہٕ کِنؠ: ییٚلہِ زن أسؠ وُنہٕ گناہگارےٕ ٲسؠ، یسوعؔ مسیحنؔ دیُت پنُن زُو چھپہِ سانہِ باپتھ۔9امکِس نتیجس منٛز مسیحؔ سنٛدِ قربٲنی دٔسؠ زُو دِنہٕ کِنؠ بنیاے أسؠ راستباز۔ یہِ چھُ وارے یقینی زِ سُہ بچاوِ اسہِ ییٚلہِ خدا چھیکرس گناہگارن سزا دِیہِ۔10بے شک دیُت خدایہِ سنٛدؠ گۅبرؠ یسوعنؔ پنُن زُو اسہِ خدایس سٟتؠ ملناونہٕ باپتھ چھپہِ ییٚلہِ أسؠ وُنہِ تسنٛدؠ دُشمنےٕ ٲسؠ۔ اوے تہِ ییٚلہِ زن یسوعنؔ أسؠ برونٛٹھےٕ خدایس سٟتؠ ملنٲوؠ۔ یہِ چھُ وۅنؠ زیادے یقینی زِ سُہ بچاوِ اسہِ ییٚلہِ خدا گناہگارن سزا دِیہِ تکیازِ سُہ چھُ دُبارٕ زنٛدٕ گومُت۔11وونؠ گوو یُتےٕ یوت کوٚر نہٕ خداین سانہِ باپتھ بلکہِ چھِ أسؠ فخر کران خدایس پیٚٹھ تمہِ ذریعہٕ تہِ یہِ خداوند یسوعؔ مسیحنؔ سانہِ باپتھ کوٚر۔ یسوعنؔ ملنٲوؠ أسؠ برونٛٹھے خدایس سٟتؠ۔12بس تہٕ اوے ییٚلہِ اکِس فردٕ سنٛدِ گناہ کرنہٕ سٟتؠ دنیاہس منٛز گناہ وجودس منٛز یُن ہیٚتُن، زُو ذٲژو ہیوٚت مرُن تکیازِ اکؠ فردن کوٚر گناہ۔ یِتھے پٲٹھؠ ہیوٚت پرٛتھ کٲنٛسہِ مرُن تکیازِ پرٛتھ کٲنٛسہِ کٔرؠ گناہ۔13بے شک کٔرؠ لوٗکو سٲرسےٕ دنیاہس منٛز گناہ۔ خدایہِ سنٛدِ طرفہٕ یہُودین قانون میلنہٕ برونٛٹھ۔ وۅنؠ گوو لوٗکن ہُنٛد یہِ کرُن مون نہٕ خداین شریعتہٕ حسابہٕ گناہ۔ تکیازِ تِم قانون ٲسؠ نہٕ وُنہٕ بارسس آمٕتؠ یہِ زاننہٕ باپتھ زِ گناہ کیا گوو۔14وۅنؠ گوو گۅڈنکِس انسان آدمؔ سنٛدِ پیٚٹھٕ رودؠ لوٗکھ مران برابر موسیٰ سنٛدِس وقتس تام تِم لوٗکھ تہِ مودؠ یِمو خدایہِ سنٛدِ طرفہٕ آدمس دِنہٕ آمتیٚن قانونن ہنٛز خلاف ورزی کرؠ نہٕ۔ آدمؔ چھُ تس نفرس ہِیو یُس پتہٕ پہن ییہِ۔15مگر یہِ خداین اسہِ تحفہٕ دیُت پننہِ مہربٲنی سٟتؠ چھُنہٕ تہِ یہِ آدمن رد کوٚر یعنی خدٲیی حکم۔ پزر گوو زِ واریاہ لوٗکھ مودؠ تکیازِ اکؠ فردن آدمن کوٚر نہ بوزُن خدٲیی حکمس۔ مگر خدا کوتاہ مہربان چھُ۔ تہٕ یہِ خداین دیُت پننہِ مہربٲنی سٟتؠ اسہِ لوٗکن یسوعؔ سنٛدؠ دٔسؠ تہِ چھُ واریاہ ژوٚر تہٕ عظیم۔16توتہِ، یہِ خداین تحفہٕ دیُت چھُنہٕ تہِ یہِ سپُد تکیازِ اکؠ فردن آدمن کوٚر گناہ۔ یہِ چھُ پوٚز تکیازِ خدا لاگہِ پرٛتھ کٲنٛسہِ عدالت۔ آدمؔ سنٛدؠ دٔسؠ سپدیمتہِ گناہ پتہٕ۔ یمہِ کِنؠ خداین پرٛتھ کانہٛہ قصوروار قرار دیُت۔ اتھ برعکس بنٲوؠ خداین لوٗکھ راستباز امہِ باوجود زِ تِمو کٔرؠ خدٲیی احکام رد۔17بے شک، چونکہِ پرٛتھ کانہٛہ مود تکیازِ اکؠ فردن آدمن کوٚر خدٲیی حکم رد۔ یہِ چھُ زیادٕ یقینی زِ تِم لوٗکھ یِم مانان چھِ زِ خدا کوتاہ مہربان چھُ۔ تہٕ تِم لوٗکھ روزن زنٛدٕ یِمن خدا راستباز بناوِ پنُن پان ضبطس منٛز رٔٹِتھ۔ یہِ سپدٕ توٕ کِنؠ یہِ زن یسوعؔ مسیحنؔ کوٚر۔18لہٰذا یِتھٕ پٲٹھؠ خداین اکِس فرد آدمؔ سنٛدِ دٔسؠ خدٲیی حکم نہ ماننہٕ کِنؠ سٲری لوٗکھ قصوروار گنٛزرٲوؠ، تِتھے پٲٹھؠ بناوِ خدا سارنےٕ لوٗکن راستباز یمہِ کِنؠ یِم سٲری پوشوٕنؠ زندگی پراون۔ تمہِ راستباز عملہِ کِنؠ یۅسہٕ یسوعنؔ کٔر۔19بے شک امہِ لِکھٕ چھِ لوٗکھ گناہگار بنان اکِس فرد آدمؔ سنٛدِ دٔسؠ خدایہِ سنٛزِ نافرمٲنی سٟتؠ۔ امہِ لِکھٕ بنن واریاہ لوٗکھ راستباز۔ تکیازِ اکؠ فردن یسوعنؔ کٔر خدایہِ سنٛز فرمانبردٲری۔20توتہِ کٔرؠ خداین مذید قانون جٲری تکیازِ ژرؠ ژرؠ لوٗکھ کرن یِمن احکامن رد، وۅنؠ گوو ییٚلہِ ییٚلہِ لوٗکھ ژرؠ ژرؠ گناہ کرٕنؠ لاگن، تیٚلہِ تیٚلہِ چھُ خدا پننہِ نرمی تہٕ مہربٲنی ہُنٛد زیادٕ زیادٕ اظہار کران۔21یہِ سپُد تاکہِ خدا بنہِ لوٗکن پیٚٹھ زیادٕ فضلہٕ وول یِمن راستباز بنٲوِتھ۔ یِتھٕ پٲٹھؠ زن گناہگار بننہٕ کِنؠ لوٗکھ مودؠ تہٕ ضبطس منٛز آے۔ تِتھے پ ٹھؠ ییٚلہِ، خدا لوٗکن راستباز بناوِ تِم پراون پوشوٕنؠ زندگی۔ تکیازِ سٲنؠ خداوند یسوعؔ مسیحنؔ کوٚر یی۔
Bridge Connectivity Solutions Pvt. Ltd.