رومؔ1
1بہٕ، پولُسؔ چُھس یہ خط لیٚکھان بہٕ چُھس یسوع مسیحؔ سنٛز خدمت کران۔ تٔمؠ بلووُس بہٕ پنٕنؠ ترجمٲنی کرنہٕ باپتھ تہٕ خاص پٲٹھؠ ژورنس بہٕ خدایہ سنٛز خۅش خبری ہنٛز پارَے دِنہٕ باپتھ۔2امہِ برونہٛہ کوٚر خداین امہِ خۅش خبری ہُنٛد وعدٕ پننٮ۪ن تِمن ترجمان نبین ہنٛدِ ذریعہٕ یِمو امِچ پیشن گویی کٔر تہٕ مقدس نٔوشتن اندر یہِ لیٚکھِتھ تھوو3یہ خۅش خبر چھےٚ خدایہ سنٛدِس گوبرس متعلق۔ تٔمؠ پروو بادشاہ داوود سنٛدِس زُرؠ سنٛدؠ رنگؠ اکھ فطری زایُن۔4پاک روحس سٟتؠ رٔلِتھ لوٚر خداین طاقتہٕ سان امیُک عملی مظٲہرٕ زِ یسوعؔ چھُ تمسُنٛد گوبر ییٚلہِ تٔمؠ سُہ تمہِ ساعتہٕ دُبارٕ زندٕ کوٚر ییٚلہِ سُہ مودمُت اوس خدایہِ سُنٛد گوبر چھُ یسوعؔ مسیحؔ، یُس سون خداوند چھُ۔5یسوعنؔ کوٚر اسہِ پیٚٹھ فضل یِم تمسنٛدؠ ترجمان چھِ تہٕ دِتُن اسہِ پننہِ طرفہٕ پنٕنؠ ترجمٲنی کرنُک اختیار یُتھ زن سٲری قوم یسوعؔ مسیحسؔ پیٚٹھ بھروسہٕ کٔرِتھ خدایہِ سنٛز فرمانبردٲری کرن۔6یسوعؔ مسیحؔ چھُو توٚہؠ تہِ ناد دِتھ أنؠ مٕتؠ یِم قومن منٛزباگ روزان چھِ۔7بہٕ چھُس یہِ خط توٚہہِ سارنےٕ ایماندارن لیٚکھان یِم رومؔ کِس شہرس منٛز روزان چھِ۔ خدا چھُو توٚہہِ لول بران تہٕ توٚہؠ چھِنو ناد دِتھ أنؠ مٕتؠ یُتھ توٚہؠ تمسنٛدؠ لوٗکھ بٔنِو۔ سون بب خدا تہٕ خداوند یسوعؔ مسیحؔ روزِن ہٮ۪تھےٕ توٚہہِ پیٚٹھ مہربان تہٕ بنٲوؠ نو پُر امن۔8ؤنؠ یۅسہٕ گۅڈنِچ کتھ بہٕ توٚہہِ ونٕنؠ یژھان چھُس، سۅ چھےٚ یہِ زِ بہٕ چھُس توٚہہِ سارنےٕ ہنٛدِ خٲطرٕ یِم مسیحؔ سنٛدؠ ایماندار چھِ، یسوعؔ مسیحؔ سنٛدِ ذریعہٕ میٲنِس خدایس پیٚٹھ ہٮ۪تھےٕ شکُر کران۔ بہٕ چھُس تمِس شکُر کران تیازِ سٲرؠ سےٕ معلوم دنیاہس منٛز چھِ لوٗکھ اعلان کران زِ توٚہؠ کِتھہٕ پٲٹھؠ چھُو یسوعسؔ پیٚٹھ بھروسہٕ کران۔9بہٕ ہیٚکہٕ پزرٕ سان یہِ ؤنِتھ تکیازِ خدا چھُ میانہِ خٲطرٕ گوٲہی دِوان زِ بہٕ چھُس وقتہٕ وقتہٕ تہنٛدِ خٲطرٕ دعا منٛگان۔ بہٕ چھُس تمسنٛدِس گوٚبرس، یسوعسؔ متعلق خۅش خبری ہنٛز پارَے دِنہٕ ذریعہ سۅ دِلہٕ تمسنٛز خدمت کران۔10ییٚلہِ بہٕ دعا منٛگان چھُس گاہ بٮ۪گاہ گذٲرش کران زِ ٲخرس گژھٕ بہٕ توٚہہِ سٟتؠ ملاقات کرنس منٛذ کامیاب تکیازِ خدا چھُ مےٚ نِش یی یژھان۔11بہٕ چھُس امہِ خٲطرٕ دعا منٛگان تکیازِ بہٕ چھُس سۅ دِلہٕ خوٲہِش تھاوان توٚہہِ ذٲتی طور سمکھُن یُتھ بہٕ پاک روح نِش پروومُت کُنہِ قسمُک فضلہٕ بوٚرُت تحفہٕ توٚہہِ سٟتؠ بٲگرِتھ ہیٚکہِ یُتھ زن توٚہہِ روحٲنی طور مضبوط گژھنس منٛز مدد سپدو۔12دویمٮ۪ن لفظن منٛز چھُس بہٕ یژھان فضلہٕ بٔرٕژ کانہٛہ ڈٲلؠ توٚہہِ سٟتؠ بٲگرٕنؠ یُتھ زن أسؠ باہم اکھ اکِس حوصلہٕ افزٲیی ہیٚکو کٔرِتھ۔ توٚہؠ تہٕ بہٕ دۅنوے ہیٚکو یہِ بٲگراونہٕ دٔسؠ اکھ اکِس مدد کٔرِتھ زِ أسؠ کتھہٕ پٲٹھؠ چھِ اکھ اکِس سٟتؠ رٔلِتھ خدایس پیٚٹھ پژھ تھاوان۔13میانیٚو ایماندار سٲتھیٚو، بہٕ چھُس پٔزؠ پٲٹھؠ یژھان زِ توٚہؠ گٔژھِو زانٕنؠ زِ مےٚ کوٚر واریاہہِ پھرِ توٚہہِ سمکھنُک اِرادٕ۔ ووٚنؠ گوو خداین روٚٹُس بہٕ موجود وقتس تام توٚہہِ سمکھنہٕ نِشہٕ پتھ۔ مےٚ اوس توٚہہِ نِش یِنُک منصوبہ یُتھ بہٕ توٚہہِ منٛز تہِ کینٛژن لوٗکن مسیحسؔ پیٚٹھ ایمان اننس کُن وتھ ہاوِ یتھٕ پٲٹھؠ مےٚ یہِ کٲم باقین قومن منٛز تہِ کٔرمٕژ چھےٚ۔14بہٕ چھُس تمام غٲر یہُودؠ لوٗکن خۅش خبری ہنٛز پارَے دِنُک پابند، ادٕ تِم ادبہٕ رنگؠ یونٲنؠ ٲسؠ تن یا تعلیم یافتہٕ ٲسؠ تن یا متہٕ ٲسؠ تن۔15تہٕ ییٚلہِ ہرگاہ یہِ مینؠ مرضی آسہِ ہے، بہٕ کرہا خۅشی سان توٚہہِ منٛز خۅش خبری ہُنٛد اعلان یِم شہرِ رومسؔ منٛز روزان چھِ۔16بہٕ کرہا خۅشی سان یہِ کٲم تکیازِ خۅش خبری ہُنٛد اعلان کرنہٕ سٟتؠ چھےٚ مےٚ سٮ۪ٹھا عزت افزٲیی سپدان تکیازِ یہِ چھُ سُہ طاقتہٕ وول طریقہٕ یُس خدا کٲنٛسہِ أکِس تہِ نجات بخشنہٕ خٲطرٕ استعمال کران چھُ یُس اتھ پیٚٹھ ایمان انان چھُ۔ یہِ چھےٚ حقیقت تِمن دۅنوٕنؠ یہودٮ۪ن ہنٛدِ خٲطرٕ، یِمو یہِ خۅش خبر گۅڈٕ بوز تہٕ ادٕ باقےٕ پرٛتھ کٲنٛسہِ ہنٛدِ باپتھ ۔17یہِ چھُ پوٚز تکیازِ ییٚلہِ تہِ زانہٛہ کٲلؠ لوٗکھ خۅش خبری ہُنٛد اعلان کران چھِ، تِم چھِ یہِ ظٲہر کران زِ خدا کِتھہٕ پٲٹھؠ چھُ لوٗکن راستباز بناوان، یُس مکمل پٲٹھؠ مسیحسؔ پیٚٹھ بھروسہٕ کرنہٕ دٔسؠ سپدان چھُ۔ یہِ چھُ تی یہِ حبقوقؔ نبی سُنٛد مطلب اوس ییٚلہِ تٔمؠ صحیفن منٛز لیکھِتھ تھوو۔ "پوٚز سُہ شخص یمِس خدا راستباز بناوان چھُ، روزِ خدایس پیٚٹھ پژھ تھاونہٕ ذریعہٕ ہمیشہٕ خٲطرٕ زنٛدٕ" 18یہِ چھُ پوٚز تکیازِ یتہِ خدا آسمانس پٮ۪ٹھ روزان چھُ تتہِ پیٚٹھٕ چھُ سُہ ظٲہر کران زِ سُہ کِتھہٕ پٲٹھؠ چھُ تمِس پرٛتھ کٲنٛسہِ شخصس پیٚٹھ نارو نار یُس خدا دُشمن تہٕ نارٲستی ہنٛزٕ کامہِ کرِ تہٕ کرِ تہنٛزِ عدالت۔ اکہِ نارٲستی ہنٛز زندگی گُذٲرِتھ چھِ یِم لوٗکھ تِم چیز دبٲوِتھ تھاوان یِم خدا ونان چھُ زِ تِم چھِ پٔزؠ۔19خدا کرِ تِمن عدالت تکیازِ یہِ کینٛژا کانہٛہ شخص خدایس متعلق زٲنِتھ ہیٚکہِ سُہ چھُ یِمن لوٗکن پیٚٹھ نوٚن تکیازِ خداین چھُ یہِ تہنٛدِ خٲطرٕ ٹاکارٕ بنوومُت20یہِ چھُ پوٚز تکیازِ لوٗکھ ہیٚکن واضیح پٲٹھؠ خدایس متعلق تِمن چیزن ہُنٛد تجربہٕ کٔرِتھ یِم نہٕ تِم پننٮیٚو أچھو سٟتؠ وُچھِتھ ہیٚکن۔ یِم چیز چھِ یِم زِ خدا کوتاہ طاقتہٕ وول چھُ تہٕ بیٚیہِ یہِ پزر زِ سُہ چھُ خدا۔ تمہِ وقتہٕ پیٚٹھٕ ییٚلہِ خداین کاینات پٲدٕ کوٚر، ہیٚکن لوٗکھ یِمن چیزن ہُنٛد مشٲہدٕ کٔرِتھ۔ یِمو چیزو وُچھ تِم چیز سمجھمٕتؠ یِم خداین بنٲوؠ مٕتؠ چھِ۔ امہِ وجہہ سببہٕ ہیٚکن نہٕ لوٗکھ یہِ کتھ تسلیم کرنہٕ نِشہٕ لوٚب روزنُک بہانہٕ کٔرٕتھ زِ خدا چھُ موجود۔21لوٗکھ ہیٚکن نہٕ پنٕنؠ پان لوٚب رٔٹِتھ تکیازِ تِم چھِنہٕ خدایہِ سنٛدِ رنگؠ تس تعظیم کران ہرگاہ تِم یہِ زانان تہِ چھِ زِ سُہ چھُ وجود تھاوان۔ تِم چھِ تمسُنٛد شکُر کرنس تہِ انکار کران۔ اتھ مقابلہٕ چھِ تِم مۅلہٕ روس چیزن متعلق سونچان، تہٕ تِم چھِنہٕ روحٲنی چیز سمجھنس لایق۔22ہرگاہ تِم یہِ دعوا کران چھِ زِ تِم چھِ گاٹٕلؠ، تِم چھِ عملی طور نادان۔ 23تِم چھِ تمِس خدایس جلال دِنہٕ نِشہٕ پوٚت ہیٚوان یُس لافٲنی چھُ تہٕ امہِ بجایہ چھِ تِم تِمن پۅتلٮ۪ن جلال دِوان یِم فٲنی انسانن، جاناوارن، چارواین تہٕ تِمن جانورن سٟتؠ مشاہبت تھاوان یِم زمینہِ پیٚٹھ یٔڈ کھکھرِ پکان چھِ۔ 24نتیجہٕ رنگؠ چھُ خدا یِمن لوٗکن تمہِ شہوژ بٔرژٕ کامہِ کرنہٕ دِوان یِمہٕ کرنچؠ تِمن خوٲہِش آسان چھےٚ، یُتھ تِم روحٲنی طور ناپاک سپدن تہٕ اکھ اکِس سٟتؠ جنسی طور اخلاق سوز کامہِ کرنہٕ دٔسؠ کرن پننٮ۪ن جسمن ہنٛز بے حُرمتی۔25یِم لوٗکھ چھِ تتھ پیٚٹھ ایمان اننہٕ نِشہٕ پوٚت ہیٚوان یہِ خدایس متعلق پوٚز چھُ تہٕ امہِ بجایہ چھِ تتھ پیٚٹھ یقین کران یہِ پۅتلٮ۪ن متعلق اپُز چھُ۔ تِم چھِ تعظیمہٕ سان تِمن چیزن ہنٛذ عبادت کران یِم خداین پٲدٕ چھِ کٔرؠ مٕتؠ۔ بجایہ تمِس خدایس عبادت کرنہٕ نِشہٕ یمؠ یِم چیز پٲدٕ کٔرؠ۔ سُے چھُ سُہ یمِس لوٗکن پزِ ہر ہمیشہٕ تھزر تہٕ بجر دیُن۔ یی سپدِن۔ 26تکیازِ یِم لوٗکھ چھِ تہِ کران، خدا چھُ تِمن ذلالتچہِ تِم کامہِ کرنہٕ دِوان یِم کرنٕچ تِمن زبردس خوٲہِش چھےٚ آسان۔ مثالہِ پٲٹھؠ تہنٛزٕ زنانہٕ چھےٚ مرد سٟتؠ فطری جنسی عمل کرنہٕ نِشہٕ پوٚت ہیٚوان تہٕ امہِ بجایہ چھےٚ زنانن سٟتؠ غٲر فطری جنسی عمل کران۔27یِتھے پٲٹھؠ چھِ مرد تہِ زنانن سٟتؠ فطری جنسی تعلق بناونہٕ نِشہٕ پوٚت ہیٚوان تہٕ چھِ شدتہٕ سان بیٚین مردن کُن شہوت تھاوان۔ یِم مرد چھِ اکھ اکِس سٟتؠ بے شرمی ہنٛدؠ جنسی کار کران۔ تِم چھِ پننٮ۪ن نےٕ جسمن انٛدر خدایہ سُنٛد تِمن سزا دِنُک تجربہٕ کران۔ خدایس پزِ تِمن سزا دیُن تکیازِ تِم چھِ خدایہِ سنٛزن مقرر کرنہٕ آمژن فطری جنسی عملن بے راہ روی کران۔ 28ییٚلہِ یِتھیٚو لوٗکو یہِ سونچ زِ خدا تسلیم کرُن چھُ بے مۅل، خداین دیُت تہنٛدٮ۪ن دماغن بے مۅل بننہٕ۔ نتیجہٕ دراو یہِ زِ تِم چھِ ناسہٕ تراسہٕ کران۔29یِمن لوٗکن چھِ تمام قسمٕکؠ نارٲستی، بدکٲری، لالچ تہٕ بدی ہنٛدؠ خیال مکمل پٲٹھؠ کاپہِ رٔٹِتھ۔ تِم چھِ حسدی بننہٕ خٲطرٕ، بیٚیہِ کٲنٛسہِ ہنٛز زندگی تھپہِ نِنہٕ خٲطرٕ مکمل پٲٹھؠ آمادٕ۔ تِم چھِ بیٚین نٛدؠ راز نٔنؠ کڈان۔30تِم چھِ بیٚین لوٗکن متعلق غلط کلام کران۔ تِم چھِ خدایس سٟتؠ نفرت کران۔ تِم چھِ تشدُد دار کامہِ کران۔ تِم چھِ پانس متعلق واریاہ تھوٚد سونچان۔ تِم چھِ پانس متعلق تھٮ۪کہٕ تھٮ۪کہٕ کران۔ تِم چھِ نوٮ۪ن قسمن ہنٛزٕ بُرٕ کامہٕ کرنس متعلق سونچان۔ تِم چھِنہٕ پننٮ۪ن مالیٚن ماجیٚن ہنٛز فرمانبردٲری کران۔31یِم لوٗکھ چھِ اخلٲقی طور نادان۔ تِم چھِنہٕ تہِ کران، یہِ کرنُک تِم وعدٕ دِوان چھِ۔ تِم چھِنہٕ بیٚین لوٗکن ہُنٛد پرواے بران۔ تِم چھِ باقین خٲطرٕ بےٚ رحم۔32یِم لوٗکھ چھِ پوٗرٕ پٲٹھؠ سمجھان زِ خدا چھُ راستبٲزی سان اعلان کران زِ تِم لوٗکھ یِم ہٮ۪تھےٕ یِژھٕ ناسہٕ تراسہٕ کامہِ چھِ کران، چھِ تِم روحٲنی طور مرنٕکؠ حقدار۔ تمہِ پتہٕ تہِ چھِ تِم نہ صرف ہٮ۪تھےٕ یِم ناسہٕ تراسہٕ کامہِ کران، بلکہِ چھِ تِم خوشی سان تِمن لوٗکن ہنٛز واہ وٲہی کران یِم یِژھٕ کامہِ کران چھِ۔
Bridge Connectivity Solutions Pvt. Ltd.