اعمال28
1ییٚلہ أسؠ حفاظتہٕ سان سٲحِلس پیٚٹھ وٲتؠ تہٕ اسہِ سپُد معلوم زِ یہ چُھ مالٹا ناوُک جزیرٕ۔2تتہِ کیٚو روزن والیٚو لوٗکو کٔر اسہِ معمولہٕ کھۅتہٕ تہِ بہتر مہمان نوٲزی۔ تِمو زول نار تہٕ دِژکھ اسہِ وُشنیر کرنہٕ باپتھ دعوت، تکیازِ رود اوس پیٚوان تہٕ سردی تہِ ٲس۔3ییٚلہ پولُسنؔ کینٛہہ زِنؠ ہرِ جمع کرِتھ نارس پیٚٹھ تراوِ تہٕ نارٕ تاوٕ نِشہٕ ژلنہٕ باپتھ دراو نارٕ ڈیرٕ تلہٕ اکھ زہریلہٕ سرف تہٕ دِژٕن پولُسسؔ اتھس ٹوٚپھ تہٕ رود أتی۔4جزیرس پیٚٹھ روزن والیٚو لوٗکو وُچھ یہ جانور پولُسسؔ اتھس الوونت تہٕ لٔگؠ اکھ اکِس وننہِ، "یمؠ نفرن چُھ شاید کُس تام قتٕل کوٚرمُت۔ اگر یہ سمندرس پھٹنہٕ نِشہٕ بچاو مگر انصافُک دیوتا آو أمِس موت ہیٚتھ"5مگر پولُسنؔ دیُت سرف سیٚودے نارس منٛز دٲرِتھ تہٕ تس گو نہٕ کِہین۔6لوٗکن ٲس یہ امید زِ پولُسسؔ کھسہِ ووٚنؠ تپہٕ سٟتؠ سٲرسےٕ پانس ورم تہٕ نتہٕ پییہِ اچانک پتھر تہٕ مرِ۔ مگر واریہس کالس پرارنہٕ پتہٕ وُچھ تِمو زِ أمِس سٟتؠ سپُد نہٕ کِہین تہِ ناکارٕ۔ اوٕ کِنؠ بدلٲو لوٗکو پنٕنؠ راے تہٕ لٔگؠ اکھ اکِس وننہ، "یہ نفر چُھنہٕ قٲتِل۔ یہ چُھ اکھ دیوتا!"7ووٚنؠ ٲس اکھ جاے یتہِ تِم ٲسؠ، تتہِ ٲس کینٛہہ زمین یۅسہ اکِس نفرٕ سنٛز ٲس یمِس پبلیسؔ ناو اوس۔ سُہ اوس امہِ جزیرُک سردار آفیسر۔ تٔمؠ دِژ اسہِ پنُن گھرٕ ینٕچ تہٕ تتہ روزنٕچ دعوت۔ تٔمؠ کٔر اسہِ ترین دوٚہُن سیٚٹھاہ خدمت۔8تمہ وقتہٕ اوس پبلیسؔ سنٛدِس مٲلِس تپھ تہٕ پیچِش تہٕ سُہ اوس بسترس منٛز پیٚتھ۔ چناچہِ پولُسؔ گو تس نِش تہٕ کوٚرُن تمہ سنٛدِ باپتھ دُعا۔ پتہٕ تھٲوؠ پولُسنؔ تمِس پیٚٹھ پنٕنؠ اتھٕ تہٕ بلرووُن سُہ۔9پولُسؔ سنٛدِ یہ کرنہٕ پتہٕ آے جزیرٕکؠ باقی لوٗکھ یمہ بٮ۪مار ٲسؠ تمِس نِش تہٕ تٔمؠ بٔلرٲوؠ تِم تہِ۔10تِمو أنؠ سانہِ خٲطرٕ تحفہٕ تہِ تہٕ باقی طریقو تہِ کوٚرُکھ یہ اِظہار زِ تِم چھِ اسہِ عزت کران۔ ییٚلہ أسؠ ترییہِ ریٚتؠ پتہٕ نیرنہٕ خٲطرٕ تیار سپٕدؠ تہٕ تِمو اوٚن سانہِ باپتھ کھیٚن تہٕ باقی چیز یِمن ہنٛز اسہِ جہازس منٛز ضرورت لگہِ ہے۔11ترین ریتن روزنہٕ پتہٕ سپٕدؠ أسؠ اکِس جہازس پیٚٹھ سوار یُس اسکندریہ پیٚٹھٕ آمُت اوس تہٕ اٹلی کُن اوس گژھن وول۔ جہازٕ کِس برونٛہمِس حصس پیٚٹھ ٲس دُوچہِ دیوتاہن ہنٛز تصویر کھنِتھ یِمن کستورؔ تہٕ پولِکسؔ ناو اوس۔12ییٚلہِ أسؠ سرَکُوسہؔ شہرس منٛز وٲتؠ تہٕ تتہِ ٹھہریاے أسؠ ترین دوٚہُن۔13پتہٕ دراے أسؠ جہازس منٛز تہٕ وٲتؠ اٹلی ہنٛدِس شہر ریگیمسؔ اندر۔ بیٚکہ دوٚہہ اوس ہوہُک رۅخ جنوبس کُن، اوٕ کِنؠ وٲتؠ أسؠ دون دوٚہُن منٛز پُتیلیؔ شہر۔ تتہِ ترُوو اسہِ یہ جہازٕ۔14پُتیلیؔ منٛز کوٚر اسہِ کینٛژن ایمان والیٚن سٟتؠ ملاقات یمہٕ یژھان ٲسؠ زِ أسؠ گٔژھؠ ستن دوٚہُن تِمن سٟتؠ روزٕنؠ۔ ٲخر تہٕ وٲتؠ أسؠ امہِ پتہٕ رومؔ۔15رومَس منٛز بوز کینٛژو سٲتھی ایمان والیٚو اسہِ متعلق تہٕ تِم آے اسہِ سمکھنہِ۔ یمو منٛزٕ سمٕکھؠ کینٛہہ اسہِ اَپیس سڑکہِ پیٚٹھ واقع بازر ناوکِس شہرس منٛز تہٕ باقےٕ سمکھیاے اسہِ ترے سراے ناوٕکِس شہرس منٛز۔ ییٚلہِ پولُسنؔ یِم ایماندار وُچھؠ، تمؠ کوٚر خدایس کُن شکُر تہٕ بڈییس ہیٚمتھ۔16ییٚلہ أسؠ رومؔ وٲتؠ تہٕ پولُسسؔ میٚول کُنی زنؠ گھرِ بہنُک اجازت۔ مگر امہِ سنٛدِ حفاظتہٕ باپتھ اوس ہمیشہِ اکھ سِپاہ تعینات۔17پولُسؔ سنٛدِ تتہِ ترین دوٚہُن روزنہٕ پتہٕ سوز تٔمؠ یہُودؠ رہنماہن پٲغام زِ تِم یِین تہٕ کٔرِن مےٚ سٟتؠ کتھ۔ ییٚلہ، تِم أمِس نِش وٲتؠ تہٕ پولُسنؔ ووٚن تِمن، "میانیٚو ٹاٹھیٚو بایو، یودوے مےٚ پننٮ۪ن لوٗکن ہنٛز مخالفت کٔرنہٕ تہِ نہٕ کٔرم پننٮ۪ن جد اجدادن ہنٛدیٚن رسمہٕ ریواجن خلاف کانٛہہ کتھ، مگر یروشلمس منٛز رۅٹہس بہٕ پننیٚو قٲعِدو۔ مگر امہِ برُونٛہہ زِ تِم مارٕہن مےٚ، أکؠ رومی کمانڈرن بچووُس بہٕ تہٕ پتہٕ سوزنس بہٕ رومی حٲکمن نِش قیصریہ کِس شہرس منٛز تاکہِ مےٚ خلاف ییہِ مقدِمہ چلاونہٕ۔18رومی حٲکمو کٔر مےٚ پرژھٕ غٲر تہٕ ٲسؠ مےٚ یلہٕ تراوُن یژھان تکیازِ مےٚ ٲس نہٕ کانٛہہ غلط کٲم کٔرمٕژ یمہِ کِنؠ مےٚ سزاے موت میلِتھ ہیٚکہِ ہے۔19مگر ییٚلہ، تتہِ کیٚو یہُودؠ رہنماوو بہٕ آزاد کرنہٕ باپتھ رومین ہنٛزِ خوٲہِشہٕ خلاف کتھ کٔر تہٕ مےٚ پیٚو یہ درخواست کرُن زِ میٚون فٲصلہ گژھِ یتہِ رومکِس بادشاہس نِش سپدُن۔ مگر میٚون یہ کرنُک وجہ اوس نہٕ یہ زِ بہٕ اوسُس پننہِ قومہٕ کٮ۪ن لیڈرن کانٛہہ اِلزام دیُن یژھان۔20اوٕ کِنؠ کوٚرمو مےٚ توٚہہِ درخواست زِ توٚہؠ یِیو یور تاکہِ بہٕ ونو توٚہہِ زِ بہٕ کیازِ چُھس قٲدؠ۔ امیُک وجہ چُھ یہ زِ بہٕ چُھس اتھ کتھِ پیٚٹھ یقین تھاوان زِ اسرائیل لٕکؠ لوٗکھ چھِ پوٗرٕ پژھ تھاوان زِ خدا کیا کرِ اسہِ سٟتؠ۔21پتہٕ ووٚن یہُودؠ قٲعِدو، "اسہِ میٚول نہٕ یہُودیہ ہس منٛز پننیٚو سٲتھی یہُودیٚو طرفہٕ توٚہہ متعلق کانٛہہ تہِ خط۔ امہِ علاوٕ ووٚن نہٕ کانٛسہ تہِ یہُودؠ یمہ یہُودیہ پیٚٹھٕ یور آمٕتؠ چھِ توٚہہِ متعلق کانٛہہ بُرٕ کتھ۔22مگر أسؠ چھِ یہ بوزُن یژھان زِ توٚہؠ کیاہ چُھو اتھ جمٲژ متعلق سونٛچان یتھ سٟتؠ توٚہؠ تعلق تھاوان چُھو، تکیازِ أسؠ چھِ زانان زِ واریہن جاین چھِ لوٗکھ اتھ خلاف ونان۔23لہٰذا کوٚر تِمو فٲصلہٕ زِ تِم یِن بیٚیہِ کُنہِ دوٚہہ واپس۔ ییٚلہ سُہ دوٚہہ آو تہٕ گۅڈنکہِ دوٚہہ کھۅتہٕ تہِ وٲتؠ زیادٕ لوٗکھ تور یتہِ پولُسؔ روزِتھ اوس۔ پولُسنؔ ووٚن تِمن زِ خدا کِتھ پٲٹھؠ چُھ سارنی پیٚٹھ حکومت کران۔ تٔمؠ کٔر اتھ متعلق کتھ زِ کِتھٕ پٲٹھؠ کٔر موسیٰؔ سنٛدؠ شریعتن تہٕ باقی رسولو یسوعسؔ متعلق پیشن گوئی۔ پولُسنؔ کٔر تِمن سارنی سٟتؠ کتھ یمہ صُبح پیٚٹھٕ شام تام بوزان ٲسؠ تمسنٛدِس گھرس منٛز۔24تتھ منٛز آے کینٛہہ یہُودؠ یتھ کتھِ پیٚٹھ آمادٕ کرنہٕ زِ پولُسنؔ یہ کینٛژھا یسوعسؔ متعلق ووٚن تہِ چُھ پوٚز مگر باقیٚو مون نہٕ یہ چُھ پوٚز۔25ییٚلہ تِمن پانہٕ وٲنؠ اختلاف کرنہِ لٔگؠ تہ ووٚنؠ ہیٚوتُکھ نیرن تہٕ پولُسسؔ ٲس بیاکھ کتھ تہِ ونٕنؠ: "پاک روحن ووٚن تُہنٛدین جدٕ اجدادن پزر ییٚلہ تٔمؠ یمہٕ کتھٕ نبی یسعیاہسؔ ونہِ:26پننِس قومس نِش گژھِ تہٕ تِمن ون: توٚہؠ چُھو پننیٚو کنو بوزان مگر زانٛہہ چُھو نہٕ یہ سمجھان زِ خدا کیاہ چُھ ونان۔ توٚہؠ چُھ پننیٚو أچھو وُچھان مگر توٚہؠ چُھو نہٕ پزنہٕ پٲٹھؠ تِم چیز وُچھان یمہٕ خدا کران چُھ۔27یمہٕ لوٗکھ چھنہٕ سمجھان تکیازِ یِم چھِ ضدی بنیامٕتؠ۔ یہنٛدؠ کن چھِ یہ دٔپؠ زِ تہِ زٔرؠ؛ تہٕ یمو چھےٚ أچھ بنٛد تھاوِمژٕ تکیازِ یِم چھنہٕ وچُھن یژھان۔ یِم چھنہٕ کنو بوزُن یژھان، تہٕ نہ چھِ دِلہ سٟتؠ سمجھُن یژھان، تیٚلہ ین یمہٕ مےٚ نِش واپس تہٕ بہٕ بخشہٕ یمن شِفا۔28اوِ کِنؠ پزِ توٚہہ، یہ زانُن زِ خدا چُھ غٲر یہُودؠ بچاونٕچ پیش کش کران تہٕ تِم بوزن۔29ییٚلہ تِمو یہ ونِتھ مۅکلوو تہٕ یہُودؠ دراے۔ تِمن اوس پانہٕ وٲنؠ بوٚڈ تنازٕ چلان۔30پولُسؔ رود تتہِ کرایہِ مکانس منٛز برابر دون ورین۔ واریاہ لوٗکھ اے تس سمکھنہِ تہِ تِمو کوٚر تِمن سارنی خۅشدلی سان استقبال تہٕ تِمن سٟتؠ کرین کتھٕ۔31تٔمؠ دِژ لوٗکن ژینہٕ ون تہٕ ہیٚچھنٲوِن زِ خدا کِتھٕ پٲٹھؠ چُھ پننہِ بادشٲہی ہُنٛد اظہار کران تہٕ تٔمؠ ہیٚچھنٲوؠ تِم خداوند یسوعؔ مسیحؔ ہس متعلق۔ تٔمؠ کٔر بڈٕ ہمتہٕ سان یہ کٲم تہٕ کانٛسہ کٔر نہٕ سُہ رُکاونٕچ کوشش۔
Bridge Connectivity Solutions Pvt. Ltd.