مکاشفہ9
1پتہٕ ووے پٲنٛژِم فرشتن تمسُنٛد نرسنگا تہٕ مےٚ وُچھ اکھ تارُک یُس آسمانہٕ پیٚٹھٕ زمینس پیٚٹھ پیمُت اوس۔ خداین دِژ تس اکہِ سرنہِ تہٕ انہِ گٔٹؠ چہٕچ کُنٛز۔ 2ییٚلہِ تٔمؠ یہ چاہ کھول تہٕ تورٕ لوٚگ سیٚٹھا مقدارس منٛز دٔہہ کھسنہِ، زنتہٕ سۅ اکھ دزٕ ؤنؠ بٔٹھؠ ٲس۔ یہ دٔہہ رُکاوِہے کانٛسہِ تہِ آفتابُک تہٕ زوٗنہِ ہُنٛد گاش وُچھنہٕ نِشہٕ۔ 3پتہٕ دراے امہِ دُہہ منٛزٕ ہالو تہٕ لٔگؠ زمینس پیٚٹھ پھٲلنہِ۔ خداین دیُت یِمن ہالون بِچن ہنٛدؠ پٲٹھؠ لوٗکن ٹۅپہٕ نُک طاقت۔4خداین ووٚن ہالون زِ تِم کھیٚن نہٕ زمینہِ پیٚٹھٕ سورےٕ گاسہٕ، سٲری کُلؠ تہٕ کُلٮ۪ن پیٚٹھ سٲری پن تُلؠ" یہ زن عام طور ہالو کران چھِ" خداین ووٚن یِمن صرف تِمن لوٗکن ٹۅپہٕ دنہِ یہنٛدین ڈٮ۪کن پیٚٹھ سُہ نشانہٕ آسہِ نہٕ یُس ہاوان چُھ زِ یِمن چُھ خدایس سٟتؠ تعلق۔ 5خداین دیُت نہٕ ہالون تِم لوٗکھ مارنُک اِجازت۔ امہِ بجایہ رودؠ ہالو پانٛژن ریتن لوٗکن تکلیف واتناوان۔ یِمو لوٗکو یۅسہٕ دگ محسوس کٔر سۅ ٲس تِژھےٕ دگ یژھ بِچہٕ ٹۅپہِ سٟتؠ ۅتھان چھےٚ۔6اتھ دوران ییٚلہِ ہالو تِمن لوٗکن تکلیف دِوان ٲسؠ یِم خدایس سٟتؠ تعلق تھاونس انکار کران ٲسؠ۔ تِمن لوٗکن اوس تیوٗت تکلیف زِ تِم یژھٕ ہن مرُن۔ مگر خدا بنٲو یہ کتھ یقینی زِ لوٗکھ روزن زنٛدٕ پننٮ۪ن گُنہن ہُنٛد سزا تُلنہٕ باپتھ۔ 7ہالو ٲسؠ جنٛگہٕ باپتھ تیار گُرین ہنٛدؠ پٲٹھؠ لبنہٕ یوان۔ تِہنٛدین کلن پیٚٹھ ٲسؠ سۅنہٕ سنٛدؠ تاج ہی نظرِ گژھان۔ تِہنٛدؠ بُتھؠ ٲسؠ انسان بُتھؠ باسن۔ 8تِمن اوس زنٮ۪ن ہنٛدؠ پٲٹھؠ زیوٹھ مس۔ تِہنٛدؠ دنٛد ٲسؠ سٕہہ دنٛدن ہنٛدؠ پٲٹھؠ مضبوط۔9تِمن ٲسؠ دھاتو بنیامٕتؠ سینہٕ سِپر نٲلؠ ترٲوِتھ۔ ییٚلہ تِم وُڈان ٲسؠ تہٕ تِہنٛدیٚو پرو سٟتؠ اوس سُہ شور ۅتلان زنتہٕ واریاہ گُرؠ جنٛگس پیٚٹھ درامٕتؠ رتھس لمان ٲسؠ۔10تِمن ہنٛزٕ لچہٕ آسہٕ بِچن ہنٛزن لچن ہنٛدؠ پٲٹھؠ۔ تِمو سٟتؠ ہیٚکہٕ ہن تِم لوٗکن ٹۅپہٕ دِتھ۔ یِمن پانٛژن ریتن اوس تِمن لوٗکن نقصان واتناونہٕ باپتھ یِمنےٕ لچن منٛز طاقت۔11یُس بادشاہ تِمن پیٚٹھ حکومت کران اوس سُہ اوس سرنہِ تہٕ انہِ گٔٹؠ چہُک فرشتہٕ۔ عِبرٲنؠ زبٲنؠ منٛز ٲسؠ تمِس ابدونؔ تہٕ یونٲنؠ زبٲنؠ منٛز اپلیون ونان۔ یِمن دوٚنونی ناون ہُنٛد مطلب چُھ "تباہ کرن وول"12پانٛژھ ریٚتھ گٔژھِتھ دراے یِم ہالو۔ یتھ کنؠ ووت گۅڈنیُک خوفناک واقعہٕ انٛد۔ مگر یاد تھٲوؠ زیٚو زِ بییہِ زٕ خوفناک واقعہٕ چھِ وُنہِ باقی۔13پتہٕ ووے شییِم فرشتن نرسنگا تہٕ مےٚ بوز سۅنہٕ سنٛدیو قربان گاہو ہنٛدیٚو ژۅنویٚو کوٗنو پیٚٹھٕ اکھ آواز یۅسہٕ خدایہ سنٛزِ بارگاہِ منٛز چھےٚ۔14یہ آواز ٲس شیمِس فرشتس ونان یمِس اتھِ نرسنگا اوس، "تِم ژور فرشتہٕ تراوُکھ یلہٕ یِم مےٚ فرات دریاوس پیٚٹھ بنٛد تھٲوؠ"15پتہٕ سپٕدؠ تِم ژور فرشتہٕ آزاد۔ تِم ٲسؠ أتھؠ وقتس پراران۔ تِم سپٕدؠ آزاد تاکہ تِم ہیٚکہٕ ہن پننِس فوجس اتھ قٲبِل بنٲوِتھ زِ تِم مارن انسانن ہُنٛد ترییِم حصہٕ۔16مےٚ بوز کُستام اوس یہ ونان زِ گُرٮ۪ن پیٚٹھ کٲتیاہ سِپاہ ٲسؠ سوار۔ تِمن ہُنٛد تعداد اوس وُوہہ کرور۔17رویا ہس منٛز وُچھ مےٚ زِ گُرؠ تہٕ تِمن پیٚٹھ سوار فوجی کِتھؠ ٲسؠ باسان۔ سِپہو ٲسؠ سینہٕ بنٛد گنٛڈمٕتؠ یمہٕ نارٕکؠ پٲٹھؠ وۅزٕلؠ، نیٖلم ہی نیٖلؠ تہٕ گنٛدک یہ لیٚدٕرؠ ٲسؠ۔ گُرٮ۪ن ہنٛدؠ کلہٕ ٲسؠ سٕہن ہنٛدؠ کلہٕ ہی۔ تِہنٛدیٚو ٲسو منٛزٕ اوس نار، دٔہہ تہٕ دزٕوُن گنٛدک دٔہہ نیران۔18تِمو تریٚنوٕیو چیزو نارٕ، دُوہہِ تہٕ گُرین ہنٛدِ ٲسہٕ منٛزٕ نیرن والہِ گنٛدکہٕ سٟتؠ مود ترییِم حصہٕ لوٗکن ہُنٛد۔19مگر گُریٚن اوس تِہنٛزن لچن منٛز تہِ طاقت تہٕ تِہنٛدِس ٲسس منٛز تہِ۔ تِہنٛدؠ لچہِ ٲسؠ سرفن ہنٛدؠ پٲٹھؠ تہٕ تِمن ٲسؠ کلہٕ یمہٕ لوٗکن ٹۅپہٕ دِوان ٲسؠ۔20مگر امہِ باوجود ٲسؠ تِتھؠ کینٛہہ لوٗکھ یِم نہٕ نارٕ، دُہؠ تہٕ دزوٕنؠ گنٛدک تووونہٕ سٟتؠ مودؠ۔ تِم لوٗکھ ٲسؠ نہٕ گناہ کرنہٕ نِشہٕ پوٚت ہیٚوان۔ تِمو ترٲو نہٕ بد روحن تہٕ بُتن ہنٛز پرستِش کرٕنؠ تہِ، یمہٕ تِمو سۅنہٕ سنٛدؠ، رۅپہٕ سنٛدؠ، سرتلہِ، کنٮ۪ن تہٕ ہچو بنٲوؠ مٕتؠ ٲسؠ۔ لوٗکو ترٲو نہٕ بُت پرستی حالانکہِ تِم آسہٕ بےٚ زُو موٗرژٕ یِم نہٕ لوٗکن مدد کرِتھ ہیٚکہَن۔ 21تِم پھیرؠ نہٕ باقی لوٗکھ قتٕل کرنس، جٲدؠ گری کرنس، بدکٲری تہٕ چیٖز ژوٗرِ نِنس پتھ۔
Bridge Connectivity Solutions Pvt. Ltd.