مکاشفہ10
1پتہٕ وُچھ مےٚ رویا ہس منٛز بیاکھ اکھ طاقتور فرشتہٕ آسمانہٕ پیٚٹھٕ بوٚن کُن وسان۔ سُہ آو اکِس ابرٕ لنٛگس منٛز ہیٚنہٕ۔ تمِس ٲس کلس پیٚٹھ سونٛزل۔ تمسُنٛد بُتھ اوس آفتابٕکؠ پٲٹھؠ چمکان۔ تمسنٛزٕ زنٛگہٕ آسہٕ نارو سِتون ہشہٕ چمکان۔2تمسنٛدِس اتھس منٛز اوس اکھ لۅکُٹ طُمار یُس مُژرٲوِتھ اوس۔ تٔمؠ تھوو پنُن دٔچُھن کھۅر سمندرس منٛز تہٕ کھووُر کھۅر زمینس پیٚٹھ۔3سُہ اوس بڈِ بڈِ کرٮ۪کہٕ دِوان زنتہٕ سٕہہ گرٮ۪زان اوس۔ ییٚلہ سُہ کرٮ۪کہٕ دِوان اوس، مےٚ بوز ستن وُزملن تہٕ گگراین ہنٛز آواز۔ گگراین منٛز ٲسؠ تِم الفاظ یِم بہٕ سمجھِتھ ہیٚکہٕ ہا۔4بہٕ اوسُس تمہٕ کتھٕ درج کران وول یمہٕ گگرایو ونہِ مژٕ آسہٕ۔ مگر پتہٕ آیہ آسمانہٕ پیٚٹھٕ بیاکھ آواز، "یہ کینٛژھا گگرایو ووٚن تہِ تھٲیو پوشیدٕ، تمہٕ مہٕ کٔریٚو درج!" 5پتہٕ پلنوو تٔمؠ فرشتن پنُن دچھُن اتھٕ آسمانس کُن یمسنٛز اکھ لتھ مےٚ سمندرس تہٕ دویِم زمینس پیٚٹھ وُچھ یُتھ سُہ اکھ حلف ہیٚکہِ تُلِتھ۔ 6تٔمؠ پرُژھ خدایس یُس ابدی روزن وول چُھ تہٕ یمؠ پرٛتھ کانٛہہ چیز پٲدٕ کوٚر یُس موجود چھُ، یتھ کتھِ تصدیق کرنہٕ باپتھ زِ یہ تٔمؠ ووٚن تہِ چُھ پوٚز۔ فرشتن ووٚن زِ خدا یہ کینٛژھا کرنُک اِرادٕ کرُن یژھان چُھ تہِ کرنس منٛز کرِ نہٕ سُہ ووٚنؠ مذید دیری۔7تٔمؠ ووٚن زِ ییٚلہِ ستمِس فرشتس نرسنگا وایہ نُک وقت واتہِ تہٕ خدا واتناوِ پنُن پوشیدٕ منصوبہٕ انٛد۔ یہےَ کتھ چھےٚ خداین پننٮ۪ن بنٛدن نبین ونمٕژ۔ 8پتہٕ یُس مےٚ آسمانہٕ پیٚٹھٕ کتھٕ کران بوز، تٔمؠ کوٚر دُبارٕ مےٚ سٟتؠ کلام۔ تٔمؠ ووٚن، گژھ ہُمِس فرشتہٕ سنٛدِ اتھس منٛز کھولِتھ یہ طُمار ان یُس سمندرس تہٕ زمینس پیٚٹھ وۅدٕنؠ چُھ۔9بس، بہٕ گوس فرشتس نِش تہٕ تمِس ووٚنُم زِ سُہ دییہِ مےٚ لۅکُٹ طُمار۔ تہٕ تمؠ ووٚن مےٚ، "یہ رٹھ تہٕ کھیٚیہ، ییٚلہِ ژٕ یہ کھیٚکھ تہٕ امیُک مزٕ آسہِ مانٛچھ ہیٚو، مگر ییٚلہِ ژٕ یہ کھیٚکھ ژےٚ کری امہِ سٟتؠ یٔڈ دود" 10لہٰذا رۅٹ مےٚ فرشتہٕ سنٛدِ اتھٕ منٛزٕ لۅکُٹ طُمار تہٕ کھیوم۔ ییٚلہِ مےٚ یہ کھیٚو تہٕ امیُک مزٕ اوس مانٛچھ ہیٚوٗ مگر کھیٚتھ باسیاو مےٚ زٕ مےٚ کرٕن یٔڈ دگ۔11پتہٕ ووٚن مےٚ کٔمؠ تام، ژےٚ چھی واریہن قومن، واریہن لوٗکن ہنٛزن جمٲژن، بیٚون بیٚون زبان بولن والیٚن تہٕ واریہن بادشاہن متعلق خدایہ سُنٛد پٲغام دوبارٕ بوزناوُن۔
Bridge Connectivity Solutions Pvt. Ltd.