مکاشفہ8
1پتہٕ کھول کٹہٕ برن مومُک ستِم ٹُکرٕ یتھ منٛز طومار بنٛد اوس۔ ییٚلہ تمؠ تہِ کوٚر تہٕ کینٛژس کالس آیہ نہٕ آسمانہٕ پیٚٹھٕ کانٛہہ تہِ آواز۔2پتہٕ وُچھ مےٚ تِم ستھ فرشتہٕ یِم خدایس ذٲتی خٲدِم ٲسؠ۔ تمؠ دیُت تِمن سارنی اکھ اکھ نرسنگا۔3پتہٕ آو بیاکھ اکھ فرشتہٕ تہٕ رود قربان گاہس پیٚٹھ وۅدٕنؠ۔ تمِس اوس بخور زالنہٕ باپتھ اتھس منٛز سۅنہٕ سُنٛد پیالہٕ۔ خداین دیُت تس واریاہ بخور پننٮ۪ن لوٗکن ہنٛدین دُعاہن سٟتؠ خدایہ سنٛدِس تختس برُونٛہہ کنہِ سۅنہٕ سنٛدِس قربان گاہس پیٚٹھ زالنہٕ باپتھ۔ 4فرشتن لوگ بخور زالُن۔ بخور زالنٕکہِ بانہٕ منٛزٕ یُس فرشتس اتھِ اوس وُتھن وول دُہہ کھۅت لوٗکن ہنٛدین دُعاہن سٟتؠ خدایس نِش۔ 5پتہٕ تُل فرشتن سۅنہٕ سُنٛد بخورُک پیالہٕ تہٕ برِنس قربان گاہ کہِ نارچہِ ژنہِ۔ پتہٕ دِژن تِم ژِنہِ تہٕ دزوُن بخور زمینہِ پیٚٹھ دٔرِتھ۔ ییٚلہ تِم تہِ کوٚر تہٕ وُزملہٕ ہیٚژن چمکٕنہِ تہٕ گگرایہ لجہِ گرٮ۪زنہِ تہٕ زمین لرزییہِ۔6پتہٕ گے تِم ستھ فرشتہٕ یِمن پرٛتھ کانٛسہِ اتھِ نرسنگا اوس تتھ پھۅکھ دنہٕ خٲطرٕ تیار،7پتہٕ ہیٚوت گۅڈنِکؠ فرشتن نرسنگا وایُن تہٕ گوو ڈوٹھ تہٕ نار ظٲہِر۔ اتھ ڈوٹھس تہٕ نارس منٛزس اوس خوٗن۔ یہ سورےٕ پیٚو زمینس پیٚٹھ۔ امؠ نارن ژھُن خوشک زمینہِ پیٚٹھ پرٛتھ کُنہِ چیزُک تریٚیِم حصہٕ، کُلیٚن ہُنٛد تریٚیِم حصہٕ تہٕ سورےٕ سبٕز گاسہٕ زٲلِتھ۔ 8پتہٕ ووے دویِم فرشتن پنُن نرسنگا، تہٕ کیاہتام یُس اکھ بوٚڈ بارٕ پہاڑ ہیٚو اوس یُس دزان اوس، پیٚوو سمندرس منٛز۔ امہِ سٟتؠ سپُد سمندرُک ترییِم حصہٕ خوٗنےٕ خوٗن، 9سمندرس منٛز موجود جاندارن ہُنٛد ترییِم حصہٕ سپُد ختم تہٕ جہازن ہُنٛد ترییِم حصہٕ ڈُبیاے سمندرس منٛز۔10پتہٕ وُوے ترییِم فرشتن نرسنگا یمہِ سٟتؠ اکھ بوٚڈ تارُک آسمانہٕ پیٚٹھٕ وسِتھ آو یُس تِتھ پٲٹھؠ چمکان اوس زن اوسُس نار ہیٚوتمُت۔ تارکٕکؠ کینٛہہ ٹُکرٕ پیہ دریاون ہنٛدِس تریٚیمِس حِصس تہٕ زمینہِ پیٚٹھ آبہٕ ناگن ہنٛدِس تریٚیمِس حِصس پیٚٹھ۔11تارکُک ناو اوس ناگدونا۔ ییٚلہ یہ دریاوٕ کِس تہٕ ناگہٕ کِس تریمِس حصس منٛز پیٚو تہٕ تِمن ہُنٛد آب بنیاو زہریلہٕ۔ سُہ زہریلہٕ آب چیٚنہٕ سٟتؠ مودؠ واریاہ لوٗکھ۔ 12پتہٕ ووے ژورِم فرشتن نرسنگا تہٕ خداین وول آفتابس، زوٗنہِ تہٕ تارکن تیُتھ ٹاس زِ تِمن روو وقتکہِ تریٚمہِ حصہٕ خٲطرٕ پنُن گاشےٕ۔ دوٚہہ کِس تریمِس حصس چمکیاو نہٕ آفتابےٕ تہٕ نہ چمکییہِ رٲژ ہنٛدِس تریمِس حصس زوٗنےٕ تہٕ نہ ٲسؠ تارکےٕ زوتان۔ 13پتہٕ، ییٚلہ مےٚ نظر دِژ، مےٚ بوز اکھ عُقاب آسمانس پیٚٹھ واریاہ ہیٚور وُڈان تہٕ تھدِ ہٹہِ کریکہٕ دِوان، "ییٚلہ باقی ترےٚ فرشتہٕ زمینس پیٚٹھ نرسنگاہ واین تہٕ ترےٚ ہٲبت ناکھ چیز سپدن تِمن لوٗکن سٟتؠ واقہ یِم زمینس پیٚٹھ روزان آسن۔ تِم چھِ جلدے نرسنگا واین وٲلؠ"
Bridge Connectivity Solutions Pvt. Ltd.