مکاشفہ7
1یمو واقہو پتہٕ وُچھ مےٚ ژور فرشتہٕ زمینس پیٚٹھ وۅدٕنؠ۔ اکھ اوس مےٚ شمال انٛدٕ کھڑا، اکھ مشرقہٕ طرفہٕ بیاکھ جنوب کِنؠ تہٕ اکھ اوس مغرب پاسہٕ۔ تِم ٲسؠ یمو طرفو ینہٕ وول واو زمینس، سمندرس یا کُنہِ کُلِس ینہٕ نِشہٕ رُکاوان۔ 2پتہٕ وُچھ مےٚ پانس کُن بیاکھ فرشتہٕ مشرق طرفہٕ یوان۔ امِس فرشتس اوس اتھس منٛز اکھ آلہٕ یُس پٔزِس خدایہ سُنٛد نشانہٕ بناوِہے۔ أمؠ فرشتن کوٚر تِمن ژورن فرشتن کُن بڈِ آلو یمن خداین زمینس تہٕ سمندرس کُن پکن وول واو رُکاونُک اجازت دیُتمُت اوس۔3أمؠ فرشتن ووٚن یِمن ژۅن فرشتن، "ٹھہریو، گۅڈٕ تھاوو أسؠ تِمن نفرن نشانہٕ یمن سٲنِس خدایس پیٚٹھ پژھ چھےٚ تہٕ تمسنٛز عبادت کران چھِ، تہنٛدِس ڈٮ۪کس تراوو مُہر، تۅتام مہٕ رُکٲیو واو زمینس، سمندرس یا کُنہِ کُلِس ینہٕ نِشہٕ" 4پتہٕ تھوو فرشتن تہٕ تمسنٛدیٚو سٲتھی فرشتو تِمن سارنےٕ لوٗکن نشانہٕ ترٲوِتھ یِمو خدایس ایمان اوٚن تہٕ تمسنٛز فرمانبردٲری کٔر۔ مےٚ بوز کُستام اوس یہ ونان زِ یِمو کٲتیاہ لوٗکھ کٔرؠ نشان زد۔ یمہٕ ٲسؠ اسرائیل کیٚو ساروےٕ قبیلو منٛزٕ اکھ لچھ ژویتٲجی ساس نفر۔5فرشتو کٔرؠ یہُوداؔ قبیلٕکؠ باہ ساس نفر مُہر ترٲوِتھ نشان زد۔ تِمو کٔرؠ روبن قبیلٕکؠ باہ ساس نفر تہِ نشان زد۔ جد قبیلہٕ کٮ۪ن تہِ ترووُکھ باہ ساس نفرن نشانہٕ۔6فرشتو تُھوو آشرؔ قبیلہٕ کٮ۪ن بہن ساسن نفرن مُہر ترٲوِتھ نشانہٕ۔ تِمو کٔرؠ نفتٲلی قبیلکؠ تہِ باہ ساس نفرن تہٕ منسیؔ قبیلہٕ منٛزٕ تہِ باہ ساس نفر نشان زد۔7فرشتو تروو شمعونؔ قبیلہٕ کٮ۪ن بہن ساسن نفرن مُہر ترٲوِتھ نشان تہٕ لاوی قبیلہٕ کٮ۪ن تہِ بہن ساسن نفرن تہٕ اشکار قبیلہٕ منٛزٕ تہِ تھووُکھ بہن ساسن نفرن نشانہٕ۔8فرشتن تھوو مُہر ترٲوتھ زبولونؔ قبیلہٕ کٮ۪ن بہن ساسن نفرن نشانہٕ۔ یوسف سنٛدِ قبیلہٕ منٛزٕ تہِ ترووُکھ بہن ساسن نفرن نشانہٕ۔ بنیمینؔ قبیلہٕ منٛزٕ تہِ آو بہن ساسن نفرن مُہر ترٲوِتھ نشانہٕ تھاونہٕ۔9یمو واقعاتو پتہٕ وُچھ مےٚ اکھ قٲبلِ ذِکر چیز: لوٗکن ہُنٛد اکھ بوٚڈ بارٕ ہجوم! ہجومس منٛز ٲسؠ تیٖتؠ لوٗکھ یمن نہٕ کانٛہہ شمار کرِتھ ہیٚکہِ ہے۔ تِم ٲسؠ پرٛتھ کُنہِ قومٕکؠ، قبیلہٕ تہٕ لوٗکن ہنٛدیٚو ونٛڈو منٛزٕ آمٕتؠ، تہٕ ٲسؠ پرٛتھ کانٛہہ زبان بولن وٲلؠ۔ تِم ٲسؠ سٲری تختس برُونٛہہ کنہِ ۅدٕنؠ، یتِتھ کٹہٕ برٕ اوس۔ تِمن سارنےٕ ٲسؠ جامہٕ دار سفید چۅغہٕ لٲگِتھ، تہٕ آسکھ خزٕر کُلٮ۪ن ہنٛزٕ لنجہٕ اتھن کٮ۪تھ۔10تِم ٲسؠ بڈِ بڈِ کرٮ۪کہٕ دِوان، "سٲنؠ خداین، یُس سارنی چیزن ہُنٛد حکمران چُھ، چھِ أسؠ بچٲومٕتؠ، کٹہٕ برن چھِ اسؠ بچٲو مٕتؠ" 11پتہٕ سپٕدؠ تمام فرشتہٕ تختس، بزرگن تہٕ ژورن جاندارن انٛدؠ پٔکؠ کھڑا۔ سٲری فرشتہٕ ٲسؠ تختس برُونٛہہ کنہِ زمینس چونٛٹ دِتھ خدایہ سنٛز عبادت کران۔12ساروےٕ فرشتو ووٚن، "آ، یی بنِن! اے سانہِ خدایہ، أسؠ چھی ہمیشہ ژےٚ تعریف، شُکر و ثنا تہٕ تعظیم کران! أسؠ چھِ ہمیشہٕ باپتھ یہ اعلان کران زِ ژٕ چُھکھ عقلمنٛد، طاقتور تہٕ مضبوط! یی سپدِن"13پتہٕ ووٚن مےٚ أکؠ بزرگن، "بہٕ چُھس یہ ثیقہٕ بناوُن یژھان زِ ژٕ گژھکھ زانُن زِ یِم لوٗکھ کمہٕ چھِ یِمن جامہٕ لٲگِتھ چھِ تہٕ یِم کتہِ پیٚٹھٕ چھِ آمٕتؠ"14مےٚ دیُت تمِس جواب، "جناب مےٚ چھےٚ تُہنٛز ضرورت زِ توٚہؠ ؤنیٚو مےٚ زِ یِم کمہٕ چھِ" پتہٕ ووٚن تمؠ مےٚ: "یِم چھِ، تِم لوٗکھ یمہٕ بڈِ ظُلمہٕ ستمہٕ وزِ یسوعؔ سنٛدؠ وفادار رودؠ۔ امہِ سٟتؠ چُھ ظٲہِر سپدان زِ یِم ٲسؠ یسوعسؔ پیٚٹھ بھروسہٕ کرِتھ گُنہو نِش پاک سپدؠ مٕتؠ، یمؠ صلیبس پیٚٹھ مرنہٕ وزِ یمو باپتھ پنُن خوٗن دیُت۔ 15اوے چھِ یِم خدایہ سنٛدِس تختس برُونٛہہ وۅدٕنؠ روزِتھ۔ تِم چھِ کُنہٕ اژھیٚنؠ پٲٹھؠ تمسنٛدِس ہیکلس اندر خدایہ سنٛز عبادت کران۔ خدا، یُس آسمانس پیٚٹھ تختس بہِتھ حکومت کران چُھ کرِ یہنٛز حفاظت۔ 16خدا بناوِ یہ کتھ یقینی زِ تِمن آسہِ کھیٚنہٕ باپتھ ہمیشہِ وٲفِر کھیٚن۔ خدا بناوِ یہ کتھ تہِ یقینی زِ تِمن آسہِ چیٚنہٕ باپتھ تہٕ کٲفی بدس۔ آفتابُک تژر ہیٚکہِ نہٕ تِمن پتہٕ زانٛہہ تہِ زٲلِتھ۔ آفتابُک گرم ہیٚکہِ نہٕ تِمن پتہٕ زانٛہہ تہِ کمزور کرِتھ۔ 17یہ چُھ اوٕ موٚکھٕ تکیازِ کٹہٕ برٕ یُس تختس نِش چُھ کرِ یہنٛز رٲچھ راوٹ یتھ پٲٹھؠ پوٚہل پننٮ۪ن تیرن ہنٛز رٲچھ راوٕٹ کران چُھ۔ برٕ بناوِ تِمن ابدی زنٛدگی حٲصِل کرنس قٲبِل، تِتھ کنؠ زنتہٕ تِم ناگو منٛزٕ چیٚوان آسن یتہِ شوٚد تہٕ صاف آب نیران چُھ۔ خداے کرِ تِمن مدد یُتھ تِم ودُن تراون تہٕ خۅشی پراون۔
Bridge Connectivity Solutions Pvt. Ltd.