مکاشفہ5
1پتہٕ وُچھ مےٚ زِ یُس شخص تختس پیٚٹھ بہِتھ اوس تمسنٛدس دٔچھنِس اتھس منٛز اوس اکھ طومار۔ تمؠ ٲسؠ طومارس دۅشوٕنؠ طرفن الفاظ لیٚکھِتھ تھٲوؠ مٕتؠ۔ مگر تٔمؠ اوس پتہٕ تھوومُت سُہ طومار مومہٕ کیٚو ستو ٹُکرو سٟتؠ مُہر ترٲوِتھ بنٛد کرِتھ، یُتھ نہٕ تتھ کانٛہہ پرٛتھ ہیٚکہ یہ تمؠ لیٚوکھمُت اوس۔ 2مےٚ وُچھ اکھ طاقتور فرشتہٕ یُس بڈِ بڈِ پرِژھان اوس: "کُس چُھ سُہ یُس طومارٕ پیٚٹھ مومٕکؠ ٹُکرٕ تُلنس قٲبِل چُھ تہٕ پتہٕ کھولہِ طومار تہٕ پرِ اتھ کیاہ چُھ لیٚکھِتھ؟"3پتہٕ تہِ آسہ نہٕ کانٛہہ آسمٲنی مخلوق، زمینہِ پیٚٹھُک کانٛہہ شخص تہٕ گُذریمتیٚو مۅردو منٛزٕ کانٛہہ اکھ یتھ قٲبِل زِ یہ طومار کھولہِ تہٕ پتہٕ پرِ۔4ییٚلہ مےٚ وُچھ زِ کُنہِ جایہ چُھنہٕ کانٛہہ یتھ قٲبِل یُس طومار کھولِتھ پٔرِتھ ہیٚکہ ہے تہٕ مےٚ ہیٚوت بڈِ بڈِ ودُن۔ مےٚ ہیٚوت اوٕ کِنؠ ودُن تکیازِ بہٕ اوسُس زانان زِ یہ کینٛژھا خداین لیٚوکھ سُہ چُھ واریاہ اہم، مگر بہٕ اوسُس سونٛچان زِ کانٛسہِ اکِس لگہِ نہٕ زانہٛہ کٲلؠ یہِ پتاہ زِ أمؠ کیاہ چُھ لیٚوکھمُت۔5مگر بزرگو منٛزٕ ووٚن مےٚ أکؠ، "ژےٚ چھی نہٕ ووٚنؠ ودنُک ضرورت! یہ چُھ سُہ شخص یمسنٛز اسہِ تلاش ٲس! یہ چُھ سُہ شخص یس نبی یہُوداؔ قبیلُک سٕہہ ونان ٲسؠ تہٕ اکھ سۅ لٔنٛڈ یۅسہٕ داوود سنٛدیو موٗلو پیٚٹھٕ کھٔسِتھ ییہِ۔ سُہ چُھ فتح یاب، یمہِ کِنؠ سُہ طومارٕ پیٚٹھٕ مومٕکؠ ستھ حصہٕ پھٹرٲوِتھ مژراونہٕ تہٕ طومار کھولنہٕ خٲطرٕ پوٗرٕ پٲٹھؠ قٲبل چھُ" 6پتہٕ وُچھ مےٚ اکھ کٹہٕ برٕ تختس نِش کھڑا۔ ژورو جاندارو تہٕ بُزرگن کوٚر تس انٛدؠ انٛدؠ گیرٕ۔ سُہ اوس زنٛدے مگر تمِس ٲسؠ تِتھؠ نشانہٕ یمو سٟتؠ باسان اوس زِ یہ چُھ کٔمو تام اکہِ پھرِ تشدُد کٔرِتھ مورمُت۔ تمِس ٲسؠ ستھ ہیٚنٛگ۔ تمِس تہِ آسہٕ ستھ أچھ۔ یمہٕ چھِ خدایہ سنٛدؠ ستھ روح یمہٕ خدا سٲرسےٕ دنیاہس سوزان چُھ۔ 7کٹہٕ برٕ کھۅت تختس پیٚٹھ تہٕ یُس شخص تختس پیٚٹھ بہِتھ اوس تٔمؠ کوٚر طومار امِس حوالہٕ۔8یِتھُےٕ کٹہٕ برن طومار قبول کوٚر، ژورو جاندارو تہٕ ژُوہو بزرگو کوٚر تمِس برُونٛہہ کنہِ پتھ پٮ۪تھ سجدٕ۔ پرٛتھ کانٛسہِ بزرگس اتھِ اوس اکھ چنٛگہٕ تہٕ کینٛہہ سۅنہٕ سنٛدؠ پیالہٕ یِمن منٛز بخور اوس۔ بخور چُھ تِمن لوٗکن ہنٛدِ دُعاہٕچ علامت یہُنٛد تعلق خدایس سٟتؠ چُھ۔9جاندارو تہٕ بزرگو گیٚوو اکھ تیُتھ بٲتھ یُس نہٕ از تام کانٛسہِ گیومُت اوس۔ تِمو ؤنؠ کٹہٕ برس تِم بٲتھ، "ژٕ چُھکھ یہ طومار حٲصِل کرنس تہٕ امیُک یہ موم کھولنس لایکھ، یُتھ ژٕ یہ پٔرِتھ ہیٚککھ زِ اتھ منٛز کیاہ چُھ لیکِھتھ۔ ژٕ چُھکھ امیُک مستحق تکیازِ ییٚلہ ژےٚ پنُن زُو دِتُتھ، تہٕ ژےٚ کٔرؠ تھکھ پنُن خوٗن دِتھ لوٗکھ گُنہو نِشہٕ آزاد یُتھ تِم خدایہ سنٛز عبادت تہٕ فرمانبردٲری کٔرِتھ ہیٚکن۔ ژےٚ کوٚرُتھ یہ تمام قبیلن تہٕ دنیا کٮ۪ن لوٗکن باپتھ۔10ژےٚ بنٲوتھکھ تِم بادشاہ تہٕ کاہن تِتھؠ لوٗکھ یِمن پیٚٹھ سون خدا حکومت کران چُھ تہٕ بنیاے تِتھؠ لوٗکھ یمہٕ باقین خدا سنٛدِس عبادتس کُن رٲغب کران چھِ۔ تِم آسن تِمن لوٗکن ہنٛدؠ حٲکم یِم دنیاہس منٛز روزان چھِ۔11ییٚلہ بہٕ یِم واقعات وُچھان اوسُس، مےٚ بوز واریہن فرشتن ہُنٛد ونہٕ وُن۔ یِم فرشتہٕ ٲسؠ تختس، زنٛدٕ مخلوقن تہٕ بُزرگن انٛدؠ انٛدؠ گیرٕ کٔرِتھ۔ اتہِ ٲسؠ لچھٕ واد فرشتہٕ، تیٖتؠ فرشتہٕ یِمن نہٕ کانٛہہ گنٛزرٲوِتھ ہیٚکہِ ہے زِ یِم کٲتیاہ ٲسؠ۔ 12فرشتہٕ ٲسؠ بڈِ بڈِ گیٚوان، "کٹہٕ برٕ یمؠ پنُن زُو قربان کوٚر چُھ پرٛتھ کانٛسہ ہنٛدِ باپتھ قٲبلِ احترام، باعثِ عزت، برکت تہٕ حمد چُھ تہٕ یہ زانُن زِ سُہ کوتاہ طاقتور، آسن وول، دٲنشمنٛد تہٕ مضبوط چُھ"13پتہٕ بوز مےٚ تمام مخلوقن نِش تہِ یِم آسمانس منٛز، زمینس پیٚٹھ، زمینس تل تہٕ سمندرن منٛز موجود چھِ۔ آ، یِمن تمام جاین موجود مخلوق ٲس گیٚوان، "پرٛتھ کانٛہہ گژھِ ہمیشہٕ تمِس ذاتس تعریف کرٕنؠ تہٕ عزت کرُن تہٕ جلال بخشُن یُس تختس پیٚٹھ بہِتھ چھُ تہٕ کٹہٕ برس تہِ مانُن زِ تِم کٲتیاہ طاقتہٕ وٲلؠ چھِ"14ییٚلہِ لچھٕ واد فرشت تہٕ تمام مخلوق یمہٕ کتھٕ گیٚوِتھ باوِ تہٕ ژورو جاندارو ووٚن، "یی سپدِن" تہٕ پتہٕ سپدؠ بزرگ خدایس تہٕ کٹہٕ برس برونہٛہ کنہِ سربسجود تہٕ ٲسؠ تِہنٛز عبادت کران۔
Bridge Connectivity Solutions Pvt. Ltd.