مکاشفہ4
1یمو چیزو پتہٕ وُچھ مےٚ یوحناہنؔ اکھ قٲبلِ ذِکر چیز: آسمانس اوس اکھ دروازٕ یلہٕ۔ سُہ یمؠ مےٚ سٟتؠ امہِ برونہٛہ کتھ کٔرمٕژ ٲس، یمسنٛز آواز اکہِ ترے ہنٛدؠ پٲٹھؠ گرٮ۪زان ٲس، کٔر مےٚ سٟتؠ بییہِ کتھ۔ تمؠ ووٚن، "ولہٕ کھس یورؠ، بہٕ ہاوے ژےٚ تِم واقعات یِم آینٛدٕ سپدن۔2یکدم گوو پاک روح مےٚ پیٚٹھ نٲزِل یُتھ مےٚ اکِس رویا ہس منٛز چیز وُچِھتھ تہٕ بوزِتھ ہیٚکہٕ۔ مےٚ وُچھ قٲبلِ ذکر اکھ چیز: "آسمانس منٛز اوس اکھ تخت یتھ پیٚٹھ کُس تام بہِتھ اوس۔ 3یُس حٲکم تختس پیٚٹھ بہِتھ اوس سُہ اوس ۅزلہِ جوہرٕکؠ پٲٹھؠ پرٮ۪زلان تہٕ انٲرؠ عقیقٕکؠ پٲٹھؠ چمکان۔ تختس انٛدؠ انٛدؠ ٲس سبٕز زمُردی سونٛزلہِ ہنٛدؠ پٲٹھؠ چمکان۔ 4تختس انٛدؠ پٔکؠ ٲسؠ بییہِ تہِ ژوُہہ تخت یِمن تختن پیٚٹھ ٲسؠ سفید پۅشاک لٲگِتھ ژوُہہ بُزرگ زِٹھؠ بہِتھ۔ تِمن ٲسؠ خٲلص سفید پلو لٲگِتھ تہٕ تِمن کلن پیٚٹھ سۅنہٕ سنٛدؠ تاج۔5تختہٕ پیٚٹھٕ آسہٕ چمکدار وُزملہٕ تہٕ گرٮ۪زوٕنہِ مشالہِ نیران۔ تختس برُونٛہہ کنہِ آسہٕ دزٕ ونہِ ستھ مشالہِ، یمہٕ ستھ مشالہِ آسہٕ خدایہ سنٛدین ستن روحن ہنٛز نمایندگی کران۔ 6تختس برُونٛہہ کنہِ اوس بیاکھ چیز تہِ یُس شیشو سمندر ہیٚوٗ باسان اوس۔ یہ اوس بلورٕکؠ پٲٹھؠ صاف کرِسٹل۔ تختس ژورو طرفو اوس اکھ اکھ جاندار وۅدٕنؠ۔ پرٛتھ اکِس جاندارس اوس جِسم ژۅپٲرؠ أچھو سٟتؠ ؤلِتھ۔ 7گۅڈنیُک جاندار اوس سٕہس سٟتؠ مشاہبت تھاوان۔ دویِم جاندار اوس داندس ہیٚوٗ تریمِس جاندار سُنٛد بُتھ اوس انسان شکلہِ۔ ژورِم جاندار اوس وُڈوُن عُقاب باسان۔ 8ژورو جاندارو منٛزٕ اسہٕ پرٛتھ اکِس جاندارس شےٚ پکھٕ۔ أچھو سٟتؠ ٲسؠ یِم جاندار پوٗرٕ پٲٹھؠ ولِتھ۔ تِم ٲسؠ کُنہِ تھکہٕ ورٲے ہر ساعتہٕ ونان، "مقدس، مقدس، مقدس چُھ خداوند خدا یُس پرٛتھ چیزس تہٕ پرٛتھ اکِس پیٚٹھ حکومت کران چُھ۔ سُے چُھ سُہ اکھ یُس ہمیشہ پیٚٹھٕ موجود چُھ، یُس از تہِ موجود چُھ، تہٕ یُس یمہ پتہٕ تہِ ییہِ تہٕ کرِ پرٛتھ أکؠ سُنٛد یِنہٕ کالس منٛز فٲصلہٕ" 9 جاندار ٲسؠ بار بار خدایہ سنٛدؠ تعریف، تعظیم تہٕ شُکر ادا کران، یُس تختس پیٚٹھ بہِتھ چُھ تہٕ ہمیشہٕ روزن وول چُھ۔ ییٚلہِ تِم یہ کران ٲسؠ تہٕ 24 بُزرگ تہِ ٲسؠ تختس پیٚٹھ موجود خدایس برُونٛہہ کنہِ نمِتھ سربسجود سپدان۔ تِم ٲسؠ پنٕنؠ تاج تمسنٛدِس تختس برُونٛہہ کنہِ تراوان یُس ہمیشہٕ زندٕ روزن وول چُھ تہٕ ٲسؠ ونان۔11"اے سانہٕ خداوند خدایہ، ژٕ چُھکھ اتھ لایکھ زِ تمام مخلوق کرِ چٲنؠ عظمت، عزت تہٕ یہ تسلیم زِ ژٕ کوتاہ طاقتور چُھکھ۔ ژٕ چُھکھ اتھ لایکھ تکیازِ ژےٚ کوٚرتھ پرٛتھ کانٛہہ چیز پٲدٕ۔ آ، پرٛتھ اکھ چیز چُھ تِتھے پٲٹھؠ موجود یتھ پٲٹھؠ سُہ بناونُک اِرادٕ ژےٚ کوٚرُتھ"
Bridge Connectivity Solutions Pvt. Ltd.