مکاشفہ21
1پتہٕ وُچھ مےٚ اکھ نُو آسمان تہٕ نٔو زمین۔ گۅڈنیُک آسمان تہٕ گۅڈنِچ زمین گییہِ غٲب، تہٕ سمندر تہِ ٲسؠ نہٕ وۅنؠ موجود۔ 2مےٚ وُچھ یروشلمُک شہر یُس خدایہ سنٛدِ باپتھ خاص چھُ اکِس نوِ شکلہِ منٛز۔ یہ اوس آسمانہٕ پیٚٹھٕ خدایہ سنٛدِ طرفہٕ زمینہِ پیٚٹھ وسان۔ یہ شہر اوس سیٚٹھاہ خوبصورت باسان، زنتہٕ ٲس مہرِنؠ خاندرکہِ دۅہہ پٲرٲوِتھ۔3پتہٕ بوز مےٚ اکھ تٔھز آواز یۅسہٕ خدایہ سنٛدِ تختہٕ پیٚٹھٕ ناد دِوان ٲس۔ آواز ٲس ونان، "یہ بوزیٚو! ووٚنؠ یتہِ لوٗکھ روزان چھِ خدا روزِ تٔتؠ! تِم آسن تمسنٛدی، تہٕ خدا روزِ پانہٕ تِمن سٟتؠ۔ 4سُہ دییہِ تِمن تسلی یُتھنہٕ تِم یمہِ یوکُن غمگین گژھن، یمو منٛزٕ مرِنہٕ پتہٕ دُبارٕ کانٛہہ تہِ، نہ کرِ ماتم، نہ ہییہِ ودُن تہٕ نہ وۅتلیٚکھ کانٛہہ دگ۔ خداین نی تِم سٲری چیز تُلِتھ، اوٕ کِنؠ گےَ تِم ہمیشہ باپتھ ختم" 5پتہٕ ووٚن خداین تختہٕ پیٚٹھٕ، "یہ بوز، بہٕ چُھس ووٚنؠ سورےٕ کینہٛہ نوو بناون وول" تمؠ ووٚن مےٚ یتہ، "یمہٕ کتھٕ لیٚکھ یمہٕ مےٚ ژےٚ ونےَ۔ ژٕ تھاو پژھ زِ بہٕ دمہٕ یمہٕ ضرور انجام" 6تٔمؠ ووٚن مےٚ یتہِ، "مےٚ کٔرؠ یِم سٲری چیز مکمل، بےٕ چُھس سُہ یمؠ یِم سٲری چیز شروع کٔرؠ تہٕ یُس سارنےٕ چیزن فناہ کرِ، بہٕ دمہٕ پرٛتھ کانٛسہِ کانٛچھن وٲلِس مفت ہمیشہٕ پوشہٕ ؤنؠ زندگی زنتہٕ آسکھ بہٕ یِم تمہِ ناگٕچ تریش چاوان یمیُک آب لوٗکن زنٛدٕ تھاوان چھُ۔7بہٕ دمہٕ یہ تِمن سارنی یمہٕ شیطانس پیٚٹھ فتح پراون تہٕ بہٕ آسہٕ تِہُنٛد خدا تہٕ تِم آسن میانؠ شُرؠ۔8مگر باقی تمام لوٗکھ تُلن دزوٕنس گنٛدک جھیلس منٛز مصیبت. دویمہِ پھرِ مرنُک مطلب چُھ یی۔ یِم لوٗکھ بُزدل آسن تِمن چُھ یہ پیٚترُن۔ یتھے پٲٹھؠ تِم لوٗکھ یم نہٕ مےٚ پیٚٹھ ایمان انان چھِ، تِم لوٗکھ یِم قٲبلِ نفرت کار کران چھِ، یِم لوٗکن قتٕل کران چھِ، تِم یِم بدکٲری کران چھِ، یِم سہرٕ کران آسن، تِم یِم بُتن ہنٛز پوٗزا کران چھِ تہٕ تِم سٲری یِم اپُز ونان آسن" 9پتہٕ آو مےٚ نِش اکھ فرشتہٕ سُہ اوس تِمو ستو فرشتو منٛزٕ اکھ یِمن اتھِ شرابٕکؠ ستھ پیالہٕ ٲسؠ یمہٕ ٲخری ستن مشکِلاتن ہنٛدؠ بٲعث ٲسؠ۔ تمؠ ووٚن مےٚ، "ۅلہٕ مےٚ سٟتؠ۔ بہٕ ہاوے ژےٚ تمہٕ لوٗکھ یمہٕ ہمیشہٕ باپتھ برہؔ ہس سٟتؠ یِکوٹہٕ روزن!10پتہٕ کوٚرس بہٕ خدایہ سنٛدؠ پاک روحن آگاہ یُتھ زن بہٕ رویا ہس منٛز یمہ چیز وچھِتھ تہٕ بوزِتھ ہیٚکہٕ۔ فرشتن نیوٗس بہٕ اکِس تھدِس بالہٕ تینٛتٲلِس پیٚٹھ۔ تتہِ ہوو تٔمؠ مےٚ سُہ شہر یُس خدایہ سنٛدِ باپتھ خاص چُھ، نُوو یروشلم۔ یہ اوس خدایہ سنٛدِ طرفہٕ آسمانہٕ پیٚٹھٕ وسان۔11شہر اوس پانہٕ خدایہ سنٛدِ طرفہٕ ینہٕ والہِ شاندار نوٗرٕ سٟتؠ چمکان۔ یہ اوس اکہِ بےٚ مۅل کنہِ یشبٕکؠ پٲٹھؠ چمکان، تہٕ یہ اوس بلور ہیٚوٗ صاف12شہرس اوس انٛدؠ انٛدؠ اکھ تھوٚد دیوار۔ اتھ دیوارس ٲسؠ باہ دروازٕ۔ یِمو بہو دروازو منٛز اوس پرٛتھ کُنہِ دروازس پیٚٹھ اکھ اکھ فرشتہٕ کھڑا اسرائیل کیٚن بہن قبیلن ہنٛدؠ ناو گےَ دروازن پیٚٹھ ظٲہِر۔ پرٛتھ دروازس پیٚٹھ اوس اکہِ قبیلُک ناو درٕج۔13شہرس مشرقہٕ انٛدٕ ٲسؠ ترےٚ دروازٕ، ترےٚ ٲسؠ شمالہٕ انٛدٕ، ترےٚ دروازٕ ٲسؠ جنوب پاسہٕ تہٕ ترےٚ دروازٕ ٲسؠ مغرب انٛدٕ۔14شہرچہ فصیلہِ ہُنٛد کٕن اوس بہن کنٮ۪ن پیٚٹھ۔ پرٛتھ کُنہِ کنہِ پیٚٹھ اوس تِمو بہو رسولو منٛزٕ أکؠ سُنٛد ناو لیٚکِھتھ یمہٕ برہؔ ہن مقرر کٔرؠ مٕتؠ ٲسؠ۔15یُس فرشتہٕ مےٚ سٟتؠ کتھ کران اوس تمِس اتھِ اوس میننہٕ باپتھ سۅنہٕ سُنٛد گز۔ تٔمؠ کوٚر سُہ شہر، تمِکؠ دروازٕ تہٕ دیوار میننہٕ باپتھ استعمال۔ 16شہر اوس مربع چالہِ مطلب یوٗتاہ کھوٚل اوس تیٚوتُے اوس زیوٹھ تہِ۔ فرشتن ووٚن پننہٕ گزٕ سٟتؠ شہر میننہٕ پتہٕ زِ یہ چُھ زٕ ساس تہٕ ژور ہتھ کلو میٹر زیوٹھ تہٕ امیُک کھجر تہٕ تھزر چُھ امکِس زیچھرس برابر۔17تٔمؠ میٚون دیوار تہٕ ونُن زِ یہ چُھ 66 میٹر تھوٚد۔ فرشتن کٔر سۅے پیمٲیش استعمال یۅسہٕ لوٗکھ عام پٲٹھؠ استعمال کران چھِ۔18شہرچہِ فصیلہِ ہنٛزٕ کنہِ آسہٕ سبٕز کنٮ۪ن ہِشہٕ یِمن لوٗکھ یشب ونان ٲسؠ۔ شہرچہِ عمارتس آسہٕ خٲلص سۅنہٕ سنٛزٕ تہٕ تمہٕ آسہٕ صاف شیشٕکؠ پٲٹھؠ ٹکر دِوان۔19شہرچہِ فصیل ہنٛز بُنیاد ٲس خوبصورت قٟمتی کنٮ۪ن ہنٛز۔ پرٛتھ کانٛہہ بنیاد ٲس أکِس الگ کنہِ ہنٛز۔ گۅڈنِچ کٔنہٕ کٔنؠ ٲس یشب۔ دویِم کٔنہٕ کٔنؠ ٲس نیٖلم۔ ترییِم کٔنہٕ کٔنؠ ٲس شبِ چراغ۔ ژورِم کٔنہٕ کٔنؠ ٲس زمرُد۔ 20پانٛژِم کٔنہٕ کٔنؠ ٲس عقیق۔ شییِم کٔنہٕ کٔنؠ ٲس لعل۔ ستِم کٔنہٕ کٔنؠ ٲس کریسو لائٹ۔ ٲٹھِم کٔنہٕ کٔنؠ ٲس فیروزہ۔ نٔوِم کٔنہٕ کٔنؠ ٲس پکھراج۔ دٔہِم کٔنہٕ کٔنؠ ٲسی یمنی۔ کٔہِم کٕنہٕ کٔنؠ ٲس سُنبلی۔ تہٕ بٔہِم کنہٕ کٔنؠ ٲس یاقوتٕچ۔21شہرٕکؠ باہ دروازٕ ٲسؠ بہَن بڈٮ۪ن موتین ین ہنٛدؠ۔ پرٛتھ کانٛہہ دروازٕ اوس اکہِ کُنے موتیُک۔ شہرچہِ سڑکہٕ آسہٕ صاف سۅنٕچہِ تمہٕ آسہٕ صاف شیشٕکؠ پٲٹھؠ پرٮ۪زلان۔22شہرس منٛز اوس نہٕ کانٛہہ تہِ ہیکل۔ یہ اوس اوٕ موٚکھٕ زِ خداوند خدا اوس پانہٕ، یُس سارنی پیٚٹھ حکومت کران چُھ، تہ برہؔ اوس تتہِ موجود۔ لہٰذا ٲس نہٕ تتہِ مقدِسٕچ ضرورت۔23وۅنؠ چھنہٕ شہرس گاشہِ باپتھ آفتابٕچ یا زوٗنہِ ہنٛز ضرورت تکیازِ خدایہ تہٕ برہؔ سنٛدِ طرفہٕ ینہٕ وول گاش چھُ تیٚوتھ گاشاہ یمِچ اتھ ضرورت چھےٚ۔ 24یتھٕ کنؠ شہرس منٛز لوٗکھ روزان چھِ تہِ چُھ دنیاہس منٛز روزن والیٚن تمام لوٗکن باپتھ اکھ مثال۔ زمینٕکؠ حکمران انن خدا تہٕ برہؔ سنٛدِ تعظیمہٕ باپتھ پنٕنؠ خزانہٕ شہرس منٛز۔25شہرس منٛز آسہِ نہٕ زانٛہہ تہِ روتل۔ لہٰذا کرِ نہٕ کانٛہہ تہِ کُنہٕ تہِ وزِ شہرُک دروازٕ بنٛد یتھ کنؠ زن عام پٲٹھؠ پرٛتھ دوٚہہ انٛد وٲتِتھ سپدان چُھ۔ 26دنیہٕکؠ لوٗکھ تہِ واتناون پنٕنؠ دولت شہرس منٛز۔27مگر کانٛہہ تہِ چیز یُس اخلاقن ناپاک آسہِ گژھِ نہٕ ہرگِز تہِ اتھ شہرس منٛز دٲخٕل۔ کانٛہہ تہِ سُہ فرد یُس تِتھؠ کار کران آسہِ یِم خدایس نِش مکرُو چھِ تہٕ بیٚیہِ سُہ شخص یُس اپُز ونان آسہِ، گژھِ نہٕ زانہٛہ تہِ اتھ منٛز دٲخل۔ صرف آسن تِمے لوٗکھ یہنٛدؠ ناو خداین اتھ کتابہِ منٛز لیٚکھمٕتؠ چھِ یۅسہٕ برہؔ سنٛز چھےٚ۔ یہ چھےٚ سۅ کتاب یتھ منٛز ہمیشہِ باپتھ زندگی پراون والیٚن لوٗکن ہنٛدؠ ناو درٕج سپدان چھِ۔
Bridge Connectivity Solutions Pvt. Ltd.