مکاشفہ20
1پتہٕ وُچھ مےٚ آسمانہٕ پیٚٹھٕ اکھ فرشتہٕ وسان۔ تمِس اتھِ ٲس سرنہٕ انہِ گٔٹؠ چہٕچ کُنٛز تہٕ اتھس منٛز اوس اکھ بٔڈ ہانٛکل ہیٚتھ پکان۔2فرشتن رۅٹ اژدھا۔ سُہ اژدھا چھُ پرانہِ وقتُک سرف ابلیس یعنی شیطان۔ فرشتن گونٛڈ سُہ ہانٛکلہِ سٟتؠ۔ یتھ ہانٛکلہِ سُہ ساس ؤریس گنٛڈِتھ روزِ۔3فرشتن دیُت سُہ انہِ گٔٹؠ سرٔنِس چہَس منٛز دٲرِتھ۔ تٔمؠ تھوو چہس دروازٕ دِتھ تہٕ کوٚرُن سُہ بنٛد، تٔمؠ کٔر تتھ مُہر یُتھ نہٕ تتھ کانٛہہ کھولہِ۔ تٔمؠ کوٚر یہ اوٕ مۅکھٕ یُتھ نہٕ شیطان ساس ؤرین ہنٛدس ٲخرس تام تِمن واریہن لُکہٕ جمٲژن گمراہ کرِتھ ہیٚکہِ۔ تمہِ وقتہٕ تراوِ خدا شیطانس کینٛژٕ کالہٕ باپتھ یلہٕ۔4پتہٕ وُچھ مےٚ تختہٕ یِمن پیٚٹھ لوٗکھ بہِتھ ٲسؠ۔ خداین بنٲوؠ تِم لوٗکھ منصف۔ مےٚ وُچھ باقی لوٗکن ہنٛدؠ روح تہِ یمہٕ سر قلم کرِتھ تِہنٛدیٚو دشمنو مٲرمٕتؠ ٲسؠ۔ تہنٛدیٚو دشمنو مٲرؠ تِم اوٕ موٚکھٕ تکیازِ تِمو اوس خدایہ سنٛدِ طرفہٕ یسوعسؔ متعلق پوٚز ونمُت۔ مےٚ وُچھ باقی لوٗکن ہنٛدؠ روح تہِ یِم نہٕ تہنٛدیٚو دشمنو قتٕل کٔرمٕتؠ ٲسؠ مگر یِمو جانور یا تمسنٛزِ مورژِ ہنٛز عبادت کرنس انکار کوٚرمُت اوس۔ تِمو دیُت نہٕ جانور سنٛدین نوکرن اِجازت زِ تِم تراون جانور سُنٛد نشان پننٮ۪ن ڈٮ۪کن یا اتھن پیٚٹھ۔ تِم سٲری گےَ دوبارٕ زنٛدٕ تہٕ تِمو کٔر تتھ ساسس وریس مسیح ہس سٟتؠ حکومت۔5یِم ٲسؠ تِم لوٗکھ یمہٕ گۅڈنچہِ لٹہِ دُبارٕ زنٛدٕ سپٕدؠ ییٚلہِ خداین مۅردٕ لوٗکھ دوبارٕ زنٛدٕ کٔرؠ۔ باقی یمہٕ لوٗکھ فوت سپٕدؠ مٕتؠ ٲسؠ تِم سپٕدؠ امہِ ساسہٕ ورؠ یہ پتہٕ دوبارٕ زنٛدٕ۔6خدایس سپدِ تِمو لوٗکو سٟتؠ مسرت یمہٕ گۅڈنچہِ لٹہِ دوبارٕ زنٛدٕ سپٕدؠ۔ آ، خدا سمجھِ تِمن اکہِ خاص وتہِ کِنؠ پنُن۔ تِم مرن نہٕ دوبارٕ۔ امہِ بجایہ آسن تِم کاہن یِم خدا تہ مسیح سنٛز خدمت کران چھِ۔ تِم کرن اتھ ساسس وریس دوران مسیحسؔ ہس سٟتؠ حکومت۔7ساس وری انٛد وٲتِتھ کرِ خدا شیطانس سرنہِ انہِ گٔٹؠ چاہ منٛزٕ آزاد۔8شیطان نیرِ زمین پیٚٹھ کٮ۪ن سارنی بٲغی جمٲژن دونٛکھٕ دنہٕ باپتھ۔ یِم چھِ تِم قوم یِمن حزقیلؔ نبین یاجوج تہٕ ماجوج ووٚن۔ شیطان کرِ تِمن خدا سنٛدین لوٗکن خلاف لڑنہٕ باپتھ جمع۔ یمو منٛزٕ لڑن واریاہ لوٗکھ خدا سنٛدین لوٗکن خلاف یہُنٛد شمار نہٕ کانٛہہ کرِتھ ہیٚکہ، یتھ پٲٹھؠ نہٕ کانٛہہ سمندر بٹھِس پیٚٹھ بہِتھ سیٚکہِ دانہٕ گنٛزرٲوِتھ ہیٚکہِ۔9تِم کرن زمینہِ ہنٛزو واریہو جایو پیٚٹھٕ سفر۔ تِم کرن خدایہِ سنٛدین لوٗکن ہنٛدِس فوجس گیرٕ۔ یتہِ تِم جنگٕچ صفہٕ بندی کرِتھ تیٲری کران آسن۔ تہِ آسہِ یروشلمس منٛز، سُہ شہر یتھ سٟتؠ خدا محبت کران چُھ۔ مگر خدا کرِ آسمانہٕ پیٚٹھٕ نار نٲزِل تہٕ سُہ ژھنہِ تمسنٛدؠ تمام دشمن زٲلِتھ 10پتہٕ ژھنہِ خدا شیطانس دزوٕنس گنٛدک جھیلس منٛز دٲرِتھ یمؠ تِم لوٗکھ گمراہ کٔرمٕتؠ ٲسؠ۔ یہ چھےٚ سۅ جاے یتہِ خداین جانور تہٕ اپُز نبی دٲرِتھ دِتؠ۔ نتیجہ نیرِ یہ زِ تِم روزن ہیٚتھےٕ ہمیشہٕ باپتھ سختی تُلان۔ 11پتہٕ وُچھ مےٚ اکھ بوٚڈ سفید تخت یتھ پیٚٹھ خدا بہِتھ اوس۔ سُہ اوس تیوٗت خوفناک زِ ییٚلہِ سُہ ظٲہِر سپُد زمین تہٕ آسمان سپُد بلکل غٲب۔ 12پتہٕ وُچھ مےٚ پرٛتھ قسمٕکؠ لوکھ یِم گُذریمٕتؠ ٲسؠ مگر ووٚنؠ سپدؠ دوبارٕ زنٛدٕ تہٕ چھِ خدایہ سنٛدِس تختس برُونٛہہ کنہِ کھڑا۔ خداین مُژراوِ تِم کتابہِ یِمن منٛز سُہ درٕج کران چُھ زِ لوٗکھ کیاہ چھِ کران۔ خداین کھوج بیاکھ کتاب تہِ، زندگی ہنٛز کتاب۔ خدا چُھ اتھ کتابہِ منٛز تِمن لوٗکن ہنٛدؠ ناو لیٚکھان یِمن پوشہٕ ؤنؠ زندگی چھےٚ۔ خداین کوٚر تِمن لوٗکن سٟتؠ انصاف یِم گُذریمٕتؠ چھِ تہٕ یِم ووٚنؠ دوبارٕ زنٛدٕ سپٕدؠ تہنٛدیٚو کرمو مطٲبق یمہ تٔمؠ کتابن منٛز درٕج کٔرمٕتؠ ٲسؠ۔ 13یِمن لوٗکن ہنٛزٕ لاشہٕ سمندرس منٛز آسہٕ تِم سپٕدؠ دوبارٕ زنٛدٕ تہٕ یہنٛزٕ لاشہٕ زمینہِ پیٚٹھ آسہٕ تِم تہِ سپٕدؠ زنٛدٕ۔ تِم سٲری ٲسؠ خدایہ سنٛدِس تختس برُونٛہہ کنہِ کھڑا، تہٕ خداین کوٚر تِمو منٛزٕ پرٛتھ اکِس سٟتؠ تہنٛدیٚو اعمالو مطٲبق فٲصلہٕ۔14پتہٕ رٔٹ خداین سۅ جاے یوٚت روح جسمٲنی طور مرنہٕ پتہٕ گژھان چھِ۔ تہٕ سۅ جاے دِژن دزوٕنس جھیلس منٛز درِتھ۔ دزٕوُن جھیل چُھ سۅ جاے یوٚت لوٗکھ روحٲنی طور مرنہٕ پتہٕ گژھان چھِ۔15پتہٕ وُچھ خداین زِ تمؠ کہنٛدؠ ناو چھِ اتھ کتابہِ منٛز درج کٔرؠ مٕتؠ یُس تِمن لوٗکن ہُنٛد فہرستہٕ چُھ یِمن ہمیشہٕ پوشہٕ وٕنؠ زندگی چھےٚ۔ اگر کانٛسہ ہُنٛد ناو اتھ کتابہِ منٛز اوس نہٕ خداین ژُھن سُہ دزوٕنس جھیلس منٛز درِتھ۔
Bridge Connectivity Solutions Pvt. Ltd.