مکاشفہ15
1پتہٕ سپُد آسمانہٕ پیٚٹھٕ بیاکھ اکھ اہم چیز نمودار۔ مےٚ وُچھ ستھ فرشتہٕ۔ خداین پُشرٲو تِمن یہ ذمہٕ دٲری زِ تِم دِن بٲغی نفرن ستو مختلف طریقو سزا۔ یہ چھےٚ ٲخری وِز ییٚلہ لوٗکن خدا یتھٕ پٲٹھؠ سزا دییہِ، تکیازِ یمو سزہو ذریعہ آسہِ تٔمؠ زمین پیٚٹھٕ کیٚن لوٗکن سُہ سورےٕ سزا دیتمُت یمکؠ تِم مستحق آسن۔2مےٚ وُچھ شیشُک اکھ بوٚڈ چپٹل حصہٕ تہِ یُس گاشہٕ سٟتؠ چمکان اوس۔ مےٚ وُچھ تِم لوٗکھ تہِ یمو امِس جانور سنٛز عبادت نہ کرنہٕ باوجود کانٛسہِ تہِ امِس جانور سنٛدِ ناوٕچ نمایندگی کرن والہ نمبرٕ نشانہٕ تراونُک اِجازت نہ دِتھ تمِس پیٚٹھ غلبہٕ پروو۔ تِم ٲسؠ شیشہٕ کِس بڈِس ستریارس پیٚٹھ کھڑا، تِم ٲسؠ بربتنؠ ہیٚتھ یِم خداین تِمن دِتمٕتؠ ٲسؠ۔3تِم ٲسؠ اکھ بٲتھ گیٚوان یتھ کنؠ زن خدایہ سنٛدؠ بنٛدٕ موسیٰ ہن واریاہ برُونٛہہ گیومُت اوس۔ یہ اوس سُے بٲتھ یُس ووٚنؠ برہؔ گیٚوان چُھ۔ تِمو گیٚوو، "اے خداوند خدا، یُس پرٛتھ چیزس پیٚٹھ حکومت کران چُھ،یہ کینٛژھا ژٕ کران چُھکھ تہِ چُھ سیٚٹھاہ شاندار!ژٕ چُھکھ ہمیشہٕ پوٗرٕ پٲٹھؠ راستبٲزی سان کٲم کران۔ژٕ چُھکھ ہمیشہٕ بادشاہ سنٛدؠ پٲٹھؠ حکومت کران!4اے خداوند، ژےٚ کُس نہٕ کھوٚژی تہٕ ژےٚ کُس نہٕ کری عزت تکیازِ ژٕے یوت چُھکھ پاک۔ آ، پرٛتھ جمٲژ ہنٛدؠ لوٗکھ یِن تہٕ کرن ژےٚ برُونٛہہ کنہِ ڈٮ۪کہٕ پتھر ترٲوِتھ عبادت۔تکیازِ ژےٚ دِتُتھ یہ ہٲوِتھ زِ ژےٚ کوٚرُتھ بہتر طریقہٕ سارنی سٟتؠ انصاف۔5پتہٕ وُچھ مےٚ زِ آسمٲنؠ ہیکلٕکؠ دروازٕ ٲسؠ ؤتھؠ، سُہ آسمٲنؠ ہیکل اوس زمینہِ پیٚٹھ موجود تمہِ خٟمٕکؠ پٲٹھؠ یتھ منٛز مقدس صندوق اوس۔6تِم ستھ فرشتہٕ یہنٛز کٲم بٲغی لوٗکن ستو طریقو سزا دیُن اوس دراے ہیکل منٛزٕ نیٚبر۔ فرشتہٕ ٲسؠ صفا شیٖن ہی ریشم کپرٕکؠ پلو لٲگِتھ۔ تِمو آسہٕ پننٮ۪ن سیٖنن پیٚٹھ سُنہرؠ کپرٕچہ پچہِ تہِ گنٛڈِتھ تھاوِمژٕ۔7یِمو ژورو مخلوقو منٛزٕ دیُت أکؠ ستن فرشتن منٛز پرٛتھ اکِس اکھ سۅنہٕ سُنٛد پیالہٕ۔ پرٛتھ پیالس منٛز اوس یمو لوٗکو باپتھ یمو زن غلط کوٚرمُت اوس مختلف طریقو سزا۔ فرشتہٕ دِن یہ سزا خدایہ سنٛدِ طرفہٕ یُس ہمیشہٕ خٲطرٕ زندٕ روزن وول چھُ۔ 8پتہٕ آو ہیکل دُوہہِ سٟتؠ یُس جلالہٕ وٲلِس تہٕ قادرِ مطلق خدا سنٛز موجودگی ظٲہِر کران چُھ برنہٕ۔ تہٕ یہ دٔہہ رود تۅتام اتہِ موجود یۅتام فرشتہٕ طاعونُک انتظام کران ٲسؠ۔ ییٚلہِ ستھ فرشتہٕ زمینہِ ہنٛدیٚن لوٗکن ستو بیوٚن بیوٚن طریقو سزا دِنٕچ کٲم انٛد واتناون، صرف تیٚلے ہیٚکہِ کانہٛہ شخص دُبارٕ ہیکلس انٛدر أژِتھ۔
Bridge Connectivity Solutions Pvt. Ltd.