مکاشفہ12
1پتہٕ سپُد آسمانس پیٚٹھ واریاہ اہم چیز ظٲہر۔ یہ ٲس اکھ مستور یۅسہٕ پننیٚو پلوو رنگؠ آفتاب ؤلِتھ ٲس۔ سۅ ٲس زوٗنہِ پیٚٹھ ۅدٕنؠ۔ تمسںنٛدِس کلس اوس تاج دِتھ یُس بہَن تارکن ہُنٛد بنیٚومُت اوس۔2سۅ ٲس بچہٕ دنہٕ واجِنؠ۔ سۅ ٲس دگہِ سٟتؠ کریکہٕ دِوان تکیازِ تمِس اوس بچس زایُن دیُن واریاہ مشکِل۔3پتہٕ سپُد آسمانس پیٚٹھ بییہِ اکھ اہم چیز نمودار۔ یہ اوس اکھ بوٚڈ وۅزُل اژدھا۔ تمِس ٲسؠ ستھ کلہٕ تہٕ داہ ہینٛگ۔ پرٛتھ کُنہِ کلس پیٚٹھ اوسس شٲہی تاج۔4أمؠ اژدھاہن أنؠ لچہِ سٟتؠ آسمانٕکؠ ترےٚ حصہٕ تارک وٹِتھ تہٕ دتِن زمینس پیٚٹھ درِتھ۔ اژدھا سپُد تمِس خاتونہِ برُونٛہہ کنہِ کھڑا یۅسہٕ بچس زایُن دنہٕ واجِنؠ ٲس یُتھ سُہ بچس زیٚوان زیٚوانےٕ کھیٚیہ ہے۔5پتہٕ دیُت تمہِ مستوراتہِ اکِس گوٚبرس زایُن۔ سُہ چھُ تمام لوٗکہٕ جمٲژن پیٚٹھ لوریٚو حکومت کرنُک مکمل اختیار ہیٚتھ آمُت۔ خداین نیٚو سُہ بچہٕ حفاظتہٕ باپتھ تُلِتھ تہٕ واتنووُن آسمانس منٛز پننِس تختس پیٚٹھ۔6مگر مستور ژٔج اکِس وٲران علاقس کُن۔ خداین ٲس تمسنٛدِ باپتھ اکھ جاے تیار تھٲومٕژ یتہِ لوٗکھ بہن شتن تہٕ شیٹھن دوہُن تمسنٛز رٲچھ راوٕٹ کرن۔7پتہٕ ؤژھ آسمانس منٛز لڑٲے۔ مِیکائیلن تہٕ تمسنٛدیٚو ماتحت فرشتو کٔر اژدھاہس سٟتؠ لڑٲے۔ اژدھا تہٕ تمسنٛدیٚو فرشتو کٔر میکائیل تہٕ تمسنٛدین فرشتن سٟتؠ واپس لڑٲے۔8مگر اژدھاہن ہور یہ جنٛگ تہٕ خداین دیُت نہٕ پتہٕ اژدھاہس تہٕ تمسنٛدین فرشتن آسمانس پیٚٹھ روزنُک اِجازت۔9بلکہِ دیُت خداین بوٚڈ اژدھا آسمانہٕ پیٚٹھٕ بوٚن دٔرِتھ۔ یہ اژدھا چُھ سُے بد روح یُس واریاہ برُونٛہہ اکھ سرف بنِتھ ظٲہر گٔیاو۔ یمِس ابلیس تہٕ شیطان ونان ٲسؠ۔ سُہ چھُ دنیاہس منٛز روزن وٲلِس پرٛتھ کانٛسہِ فردس دونٛکھٕ دِوان۔ خداین دیُت سُہ تہٕ تمسنٛدؠ تمام فرشتہٕ زمینس پیٚٹھ بوٚن دٲرِتھ۔ 10پتہٕ بوز مےٚ آسمانہٕ پیٚٹھٕ بڈِ بڈِ کُس تام تھدِ ہٹہِ کریکہٕ، ووٚنؠ بچٲوؠ سٲنؠ خداین پننہِ طاقتہٕ سٟتؠ پنٕنؠ لوٗکھ، تہٕ سُہ چُھ سارنی لوٗکن پیٚٹھ حکومت کران!تہٕ ووٚنؠ کٔر تسنٛدؠ مسیحنؔ حکومت کرٕنؠ شروع!یہ چُھ اوٕ موٚکھٕ زِ خداین ژھُن آسمانہٕ پیٚٹھٕ سانٮ۪ن سٲتھی ایمان والیٚن پیٚٹھ اِلزام لگاون وول بوٚن دٲرِتھ۔سُہ اوس بار بار خدایس نِش یِتھ ایمان والیٚن پیٚٹھ غلط کام کرنُک اِلزام لاگان۔11مگر سٲنؠ سٲتھی ایمان وٲلؠ سپٕدؠ تس پیٚٹھ غٲلِب۔ یہ چُھ اوٕ موٚکھٕ زِ کٹہٕ برن دیُت تِہنٛدِ باپتھ قربٲنی دِتھ پنُن خوٗن،تہٕ اوٕ موٚکھٕ تہِ زِ تِمو ووٚن باقی لوٗکن تمِس متعلق پوٚز۔تِم ٲسؠ نہٕ صرف زندٕ روزُن یژھان۔تِم ٲسؠ مرنہٕ خٲطرٕ تہِ تیار اگر تمِس متعلق پوٚز وننہٕ خٲطرٕ ضرورت پییہِ ہے۔12بس، توٚہؠ سٲری آسمانس پیٚٹھ روزن وٲلؠ منٲیو خوشی!مگر توٚہہِ سٟتؠ یِم زمینس پیٚٹھ روزان چھِ تہٕ سمندری سفر کران چھِ ین ہولناک واقعات پیش تکیازِ ابلیس چُھ وۅنؠ توٚہہِ درمیان۔تمِس چُھ سیٚٹھاہ شرارتھ تکیازِ سُہ چُھ زانان زِ تمِس چُھ کمےٕ وقت خدایہ سنٛز عدالت تہٕ تمسُنٛد سزا رٹنس۔13ییٚلہ اژدھاہس معلوم سپُد زِ خداین چھوٚک سُہ زمینس پیٚٹھ تہٕ تٔمؠ کٔر تس زنہِ پیٚٹھ حملہٕ کرنٕچ کوشش یمہِ اکِس گۅبرس زایُن دیُت۔14مگر خداین دژٕ امِس زنہِ اکِس بڈِس عُقاب سنٛزٕ ہِشہٕ زٕ پکھٕ یمو سٟتؠ سۅ وٲران علاقس کُن وُڈو کرنس قٲبِل بنییہِ۔ خداین ٲس تتہِ تمسنٛدِ باپتھ اکھ محفوظ جاے تیار کرِتھ تھٲومٕژ۔ تتھ جایہ کٔر خداین ساڑن ترین ورین تمسنٛز رٲچھ راوٕٹ۔ سرف یعنی اژدھا اوس نہٕ تمسنٛزِ تتھ جایہ واتنس قٲبِل۔15پتہٕ تروو سرفن پننہِ عٲسہٕ کِنؠ تمِس زنہِ کُن آبُک سہلاب۔ سُہ اوس تس آبہٕ سٟتؠ یرٕ والُن یژھان۔16مگر زمینن کوٚر زنہِ مدد۔ زمینس گو اکھ بوٚڈ وُل تہٕ اژدھا سنٛدِ عٲسہٕ منٛزٕ درامُت سہلاب گو امی وُلہِ کِنؠ زمینہِ تل۔17پتہٕ کھۅت امِس اژدھا ہس امِس زنہِ پیٚٹھ زیادے شرارتھ یمہِ کِنؠ سُہ تمسنٛدین باقی شُریٚن سٟتؠ لڑنہِ دراو۔ یِم چھِ تِم لوٗکھ یِم خدایہ سنٛدین احکامن پیٚٹھ عمل کران چھِ تہٕ یِم یسوعسؔ متٮعلق پوٚز ونان چھِ۔18پتہٕ رود اژدھا سمندر بٹِھس پیٚٹھ ۅدٕنؠ۔
Bridge Connectivity Solutions Pvt. Ltd.