فلپین2
1ییٚلہِ زن مسیحؔ روح اسہِ حوصلہٕ افزٲئی کران چُھ، اسہِ پننہِ محبتہٕ سٟتؠ تسلی دوان، ییٚلہِ زن روحن توٚہہِ درمیان برادری پٲدٕ کٔر مٕژ چھِ، ییٚلہِ زن خداین توٚہہِ پانہٕ وٲنؠ لول تہٕ شراکت عطا کٔرمٕژ چھے،2یِم کامہِ کٔرِو یِمو سٟتؠ بہٕ مکمل پٲٹھؠ خۅش روزٕ: اکھ أکس سٟتؠ کرِو اتفاق، پانہٕ وانے بریو لول، أکس بییس سٟتؠ کریو اتحاد، ہم خیال روزِو۔3زانٛہہ تہِ کٔرِو نہٕ خود غرضی سان پنن پان باقیو کھۅتہٕ زیادٕ اہم بناونچ کۅشش، تہٕ پنن پان مہٕ زانیو باقیو کھۅتہٕ اصل۔ تمہِ بجایہ، بنیو حلیم، تہٕ باقی زٲنؠ ووٗکھ پننہِ کھۅتہٕ زیادٕ اہم۔4توٚہہِ منٛز پزِ نہٕ پریتھ أکس صرف پننس فٲیدس متعلق فکرمند روزُن۔ امہِ بجایہ، پزِ توٚہہِ باقین لوٗکن ہندس فٲیدس متعلق تہِ فکرمند روزُن۔5تمی اندازٕ سونچِو یتھٕ پٲٹھؠ یسوع مسیحنؔ سونچ۔6اگرچہ سُہ پرٛتھ کُنہِ اندازس منٛز خدایس برابر اوس، تمؠ کوٚر نہٕ خدایس سٟتؠ برابر روزنکؠ تمام مراعات تھاونس پیٚٹھ زور۔7بلکہ تمؠ ترٲوؠ خدٲیی مراعات تہٕ بنیاو باقین ہُند خدمت گار، تہٕ بنیاو اکھ انسان۔ ییٚلہِ سُہ اکھ انسان بنیامُت اوس،8تمؠ کٔر پانس منٛز زیادے پہن حلیمی پٲدٕ۔ خاص کر، خدایہِ سٕنٛز فرمانبردٲری کران کٔر تمؠ پانس منٛز نیستی قٲیم یُتھ زن سُہ مرنہٕ خٲطرٕ تیار سپد۔ ہتاکہ سُہ اوس أکس صلیبہِ پیٚٹھ کھٔسِتھ مرنہٕ باپتھ تہِ تیار۔9تکیازِ مسیحنؔ کٔر نیستی سان خداے سٕنٛز فرمانبردٲری، خداین تہِ کوٚرُس سؠٹھاہ احترام؛ تمؠ بخش تس سارِوےٕ کھۅتہٕ تھوٚد مقام،10یُتھ زن یسوعس برونہٛہ کنہِ، پریتھ کانٛہہ زُو ذات کرِ سجدٕ تہٕ تمس کرٕ احترام، خواہ تِم زُو زٲژ آسمانس منٛز چِھ بییہِ زمینس منٛز چِھ تہٕ زمینس تلہٕ کنہِ چِھ؛11تہٕ ہر کانٛہہ وننہِ، زِ یسوع مسیحؔ چُھ خداوند، یُتھ زن ببَ خدایس احترام سپدِ۔12میانیو ٹاٹھیو ایمان باجو، یِمن کامیٚن ہندِ نتیجہِ کِنؠ چھےٚ توٚہہِ ہمیشہِ خداے سٕنٛز فرمانبردٲری کٔرمٕژ ییٚلہِ بہٕ توٚہہِ سٟتؠ اوسس، وونؠ چُھس بہٕ توٚہہِ نِشہٕ دوٗر، توٚہہِ پزِ تمؠ سٕنٛز فرمانبردٲری أمہِ کھۅتہٕ زیادے پہن کرنؠ۔ توٚہہِ منٛز پریتھ کانٛہہ کریو خدایس سٟتؠ تُہنٛدِ بچاوٕ خٲطرٕ کٲم، بییٚہِ کریو عٲجزی سان خدایہِ سُنٛد احترام۔13خدا چُھ تُہندس منس منٛز کینٛہہ کران تاکہِ توٚہؠ یژھیو کرُن تہٕ پتہٕ کریو تِم رٕژٕ کامہِ یِم خدایس خۅش کرن۔14تکرار یا جھگڑو ورٲے کریو پریتھ کانٛہہ کٲم۔15ورتاو کریو تمہِ اندازٕ یُتھ توٚہؠ مکمل پٲٹھؠ کٲمل خدایہِ سٕنٛدؠ شُرؠ روزیو، یِم پانہٕ برٲیٔی نِشہٕ دوٗر روزن چھِ ییٚلہِ تِم یمہِ دنیاہکین بدبخت لوٗکن منٛز زندٕ روزن چھِ۔ پتہٕ، ییٚلہِ توٚہؠ تِمن منٛز زندٕ روزیو، توٚہؠ سپدیو روشن گناہن ہنٛدِس انہِ گٔٹِس منٛز۔16باقین ونیو یہِ پٲغام زِ ابدی زندگی کتھہٕ پٲٹھؠ سپدِ حٲصل۔ یِم سارے کامہِ کریو تاکہ ییٚلہِ مسیحسؔ واپس ینُک وقت واتہِ، بہٕ آسہٕ خۅشی مناونس قٲبل زِ میٲنؠ سخت محنت گیہِ نہٕ توٚہہِ منٛز بے کار۔17بییٚہِ چُھس بہٕ خۅش تہٕ بہٕ مناوٕ توٚہہِ سارِنےٕ سٟتؠ شٲدؠ یانہٕ، روزانہٕ تکلیف تُلنہٕ باوجود یا تِمو حالاتو منٛزؠ گزرنہٕ باوجود ییٚلہِ رٕژ شیچھِ مخٲلفت کرن وٲلؠ مےٚ مارنٕچ کوشش چھِ کران۔ مےٚ پیٚن خوشی سان توٚہہِ سٟتؠ سٟتؠ تکلیف تُلنؠ، بہٕ روزٕ تُہنزن خدمژن منٛز اضافہٕ پیش کران تکیازِ توٚہہِ چھُو تمس پیٚٹھ ایمان۔18أمی اندازٕ پزِ توٚہہِ پریتھ أکس تہِ یِمن کامیٚن پیٚٹھ خۅش سپدن؛ توٚہہِ پزِ مےٚ سٟتؠ یکوٹہٕ شاد سپدن!19مےٚ چھےٚ امید زِ خداوند یسوعؔ بناوِ مےٚ اتھ قٲبل یُتھ زن بہٕ تیمُتھیس توٚہہِ کن سوزن۔ بہٕ چُھس یژھان یہِ دورٕ گوٚژھ سپدُن تکیازِ مےٚ چھےٚ امید سُہ ہیکہِ مےٚ حوصلہٕ بخشتھ ییٚلہِ سُہ تُہنٛز خبر ہیٚتھ واپس واتہِ۔20مےٚ چُھنہٕ تیمُتھیس ہیو بییٚہِ کانٛہہ اکھا یمِس پزؠ پٲٹھؠ تُہنٛز فِکِر چِھ۔21باقی سٲری یِم بہٕ توٚہہِ نِشہٕ سوزہکھ تِمن چھِ صرف پننین معاملاتن ہنٛز فِکِر۔ تِمن چِھنہٕ زیادٕ تِمن معاملن ہنٛز فِکِر یِم یسوع مسیحؔ ضروری مانان چُھ۔22مگر توٚہؠ چھُو زانان زِ تیمُتھیس چُھ ثٲبت کوٚرمُت زِ سُہ چُھ خداوندس تہٕ باقین وفادٲری سان خدمت کران۔ توٚہہِ چُھ مولوم زِ تمؠ چِھ مےٚ سٟتؠ نکھہٕ روزتھ لوٗکن نِشہٕ رٕژ شیچھِ ہنٛد اعلان کران خداوندس خدمت کٔرمٕژ۔23بہٕ چُھس امید کران زِ بہٕ کرن تیمُتھیس جلدے توٚہہِ کن روانہٕ یتھۓ مےٚ مولوم گٔژھِ زِ مےٚ سٟتؠ کیاہ سپدِ۔24بییٚہِ چُھ مےٚ یقین زِ خداوند کرِ مےٚ جلدے آزاد، یُتھ زن بہٕ پانہٕ تہِ توٚہہِ نِشہٕ واتہٕ۔25بہٕ چُھس یتھ نتیجس ووتمُت زِ مےٚ شۅبہِ اپفردتسؔ توٚہہِ نِشہٕ واپس سوزُن۔ سُہ چُھ اکھ ایماندار سٲتھی بییٚہِ میٚون سٲتھی کارکن، بییٚہِ چُھ سُہ مےٚ سٟتؠ مشکلات برداشت کران یتھٕ پٲٹھؠ سِپاہو یکوٹہٕ مشکلات برداشت کران چِھ۔ سُہ چُھ تُہند قٲصد تہٕ خدمت گار، یُس توٚہہِ مےٚ نِشہٕ تمہِ ساعتہٕ سوزُو ییٚلہِ مےٚ مددتٕچ ضرورت ٲس۔26ایفردیسؔ چُھ بیتٲبی سان فلپی منٛز توٚہہِ سٟتؠ روزنہٕ یژھان، بییٚہِ چھِ تمس تُہنٛز فِکِر زِ توٚہہِ آسہِ تمؠ سٕنٛز فِکِر ییٚلہِ زن توٚہہِ تمؠ سنٛزِ بٮ۪مارِ ہُند بوزمُت چھُو۔27بےشک، سُہ اوس تیوٚت بٮ۪مار زن تہِ اوس سُہ مودمُت۔ مگر خداین کور تمس رحم، بییٚہِ کور تمؠ مےٚ تہِ رحم یمیک نتیجہ دراو سُہ سپد ٹھیک۔ خداین کور مےٚ رحم نتہٕ پیہِ ہے مےٚ زیادے پہن غم ویٚتراوُن۔28لہٰذا بہٕ سوزن سُہ توٚہہِ نِشہٕ واپس تیوٚت جلد یوٚت ممکن سپدِ۔ بہٕ کرٕ یہِ یُتھ توٚہؠ تمس وُچھِتھ دُبارٕ شاد گژھیو، تہٕ میٚون غم سپدِ ہناہ کم۔29ایفردیسؔ کریو بحثیت اکھ ایماندار سٲتھی خۅشی سان استقبال، بییٚہِ کریو باقی ایمان والین احترام یِم تمؠ سٕنٛدی پٲٹھؠ چھِ۔30یہِ کریو یتھٕ پٲٹھؠ ایفردیسؔ مسیحؔ سٕنٛدِ خٲطرٕ کٲم کران مرنس قریب ووٚت۔ سُہ اوس زانان زِ سُہ مرِ مےٚ مدد کران کران، تہٕ سُہ ووٚت مرنس قریب۔ تمؠ کور مےٚ تِم چیز واتناونس منٛز مدد یِم مےٚ ضرورت ٲسؠ، یُتھ ہیکہِ ہیو نہٕ توٚہؠ کرِتھ تکیازِ توٚہؠ چھِیو مےٚ نِشہٕ سؠٹھاہ دوٗر۔
Bridge Connectivity Solutions Pvt. Ltd.