گریند18
1خداوندن ووٚن ہارونسؔ، "ژےٚ، چٲنِس نیٚچوِس تہٕ چٲنِس مٲلؠ سنٛدِ خاندان کیٚن باقی افرادن ییہِ سزا دِنہٕ اگر مقدس خٟمس انٛدر موجود چیزن سٟتؠ کینٛہہ بُرٕ سپُد۔ ژےٚ تہٕ چانیٚن اولادن ییہِ سزا دِنہٕ اگر کانٛہہ کاہن کینٛہہ غلط کرِ۔ 2چانہِ قبیلٕکؠ لوٗکھ مطلب یمہٕ لاوی قبیلس سٟتؠ تعلق تھاوان چھِ کرن ژےٚ تہٕ چانیٚن شُریٚن مدد ییٚلہِ تِم مقدس خٟمس منٛز پنٕنؠ کٲم کران آسن۔3مگر ییٚلہ تِم یہ کام کران آسن، تمن پزِ نہٕ خٟمس انٛدر موجود یا قربان گاہَس نکھٕ مقدس چیزن نزدیک گژھُن۔ اگر تمہٕ یہ کرن تِمہ مرن تہٕ ژٕتہِ مرکھ!4تمہ ہیٚکن مقدس خٟمچہ رٲچھ راوچہ ہنٛزن تمام کامیٚن منٛز ژےٚ مدد کٔرتھ مگر تتھ جایہ نزدیک آسہ نہٕ کانٛسہ ینُک اجازت یتھ جایہ ژٕ کام کران چُھکھ۔5ژٕ چُھکھ سُہ یُس مقدس خٟمس اندر تہٕ قربان گاہس پٮ۪ٹھ کٲم کرِ۔ اگر ژٕ یمن ہدایِتن پٮ۪ٹھ عمل کرکھ، بہٕ کرنہٕ تیٚلہ دبارٕ اسرائیلی قومس پٮ۪ٹھ شرارتھ۔6مےٚ ژٲرؠ پانے لاوی قبیلٕکؠ باقی اسرائیلی لوٗکو منٛزٕ تاکہ تِم بنن چٲنؠ خاص مدد گار۔ تِم چھِ اکہ قسمٕکؠ تحفہ یمہ مےٚ ژےٚ مقدس خٟمس منٛز کٲم کرنہٕ خٲطرٕ دِتی۔ 7مگر یہ چُھکھ ژٕ تہٕ چٲنؠ اولاد، یِم کاہن چھِ، دِن تمام تمہٕ تفصیلہ انجام یہُنٛد قربان گاہس متعلق مےٚ حکم دیُتمُت چُھ تہٕ یہ کینٛژھا مقدس جایہ اندر سپدان چُھ۔ بہٕ چُھسے ژےٚ بحثیتِ کاہن خدمت کرنٕچ یہ کام مٹہِ تھاوان۔ لہٰذا اگر بیٚیہِ کانٛہہ یہ کٲم کرنٕچ کوشش کرِ، سُہ گژھِ قتل کرنہٕ یُن۔8یہُوواہنؔ ووٚن ہارونسؔ یتہِ زِ مےٚ کوٚرمکھ ژٕ تِمن تمام مقدس نذرانن ہنٛز رٲچھ راوٹ کرنہٕ باپتھ مقرر یمہٕ اسرائیلی لوٗکھ میانہِ باپتھ انان چھِ۔ مےٚ دِتی یمہ سری مقدس نذرانہٕ ژےٚ تہٕ چانیٚن نیٚچوٮ۪ن۔ ژےٚ تہٕ چانیٚن وٲرثن روزٕ یمن قربٲنیٚن ہُنٛد حصہٕ لگاتار میلان۔ 9قربٲنؠ ین ہُنٛد سُہ حصہٕ یُس نہٕ قربان گاہس پٮ۪ٹہ پوٗرٕ پٲٹھؠ دزان چُھ، چُھ چون۔ مقدس قربٲنؠ ین ہُنٛد سُہ حصہ، یتھ منٛز آٹچہِ قربٲنی سان، گُنہن ہُنٛد کفارٕ ادا کرنٕچ تہٕ گُنہن ہنٛدؠ خطا معاف کرنٕچ قربٲنی آسہ چُھس بہٕ الگ تھاونُک تقاضہٕ کران۔ بہٕ چُھس یژھان زِ سُہ گژھِ ژےٚ تہٕ چانیٚن نیٚچوٮ۪ن دنہٕ یُن۔10توٚہؠ کھیٚزیٚو یہ مقدس ترین قربٲنی زٲنِتھ۔ تُہنٛدِ قبیلُک پرٛتھ کانٛہہ نفر ہیٚکہ یہ کھیٚتھ۔ مگر توٚہہِ چُھ یمن قربٲنیٚن ہُنٛد احترام کرُن تکیازِ یمہٕ چھےٚ تُہنٛدِ باپتھ مقدس۔11کاہن آسن قربان گاہس برُونٛہہ کنہِ کھڑا سپدِتھ مقدس قربٲنیہ تھوٚد تلان۔ تمہ تمام قربٲنیہ یمہ اسرائیلی لوٗکھ مےٚ پیش کران چھِ تمہ سارے چھےٚ چانہِ تہٕ چانیٚن گۅبرن تہٕ کوریٚن ہنٛزٕ۔ تمہ روزن ہمیشہ چانہِ حصچہٕ۔ چانہٕ خاندانٕکؠ سٲری فرد یمو میانؠ قبولیت حٲصل کرنہٕ باپتھ عبادت کٔر تمن چُھ یمو نذرانو منٛزٕ کھیٚنُک اجازت۔12بہٕ چُھسے ژےٚ گۅڈنیُک کھیٚن دِوان یُس لوٗکھ پرٛتھ ورؠ یہ لونِتھ مےٚ نِش انان چھِ سُہ گو زیتونُک بہترین تیٖل، نوو شراب تہٕ اناج۔13گۅدنُک فصل یُس لوٗکھ لونِتھ مےٚ نِش واتناوان چھِ سُہ گو سورےٕ چون۔ چانہِ خاندانہٕ منٛزٕ یمؠ تہِ میانہ باپتھ قٲبلِ قبول رسٕم ادا کٔر تمِس چُھ اجازت سُہ کھیٚن کھیٚنُک۔14اسرائیلس منٛز یہ کینٛژھا تہِ میانہِ ناوٕ وقف چُھ سُہ چُھ چون۔15یمہ تہِ جانورن یا انسانن ہنٛدؠ گۅڈنِکؠ نر بچہ یمہ مےٚ پیش کرنہٕ ین، آسن تُہنٛدؠ۔ مگر لوٗکن پزن پنٕنؠ زِٹھؠ نیٚچوؠ تہٕ زِٹھؠ چاروٲے یمہ نہٕ قربان سپدن واپس مٔلؠ ہیٚنؠ۔16تِمن پزن تِمہ تمہ وزِ ہیٚنؠ ییٚلہ تِم وٲرشِنؠ آسن۔ یُس قٟمت تِم دِن سُہ گژھِ پرٛتھ کِس چانٛدِ ہنٛدؠ پانٛژھ سکہٕ آسُن۔ چٲنٛدؠ گژھِ تتھ تریٚکرِ منٛز تولنہٕ ینؠ یمہٕ مقدس خٟمس منٛز چھےٚ۔17بہٕ دمہٕ نہ توٚہہِ اجازت زِ توٚہؠ ہیُوٗ گۅڈٕ زامژٕ گٲو، تیر یا ژھاوٕلؠ واپس۔ تِم چھِ مقدس، بہٕ چُھس یژھان زِ توٚہؠ تھٲیِووکھ تِم میانہِ خٲطرٕ الگ۔ تِم ذبح کٔرتھ چھکیٚو تِہُنٛد خوٗن قربان گاہس۔ یتہٕ زٲلیٚو تِمن جانورن ہنٛز چربی پورٕ پٲٹھؠ قربان گاہس پٮ۪ٹھ یُتھ میانہِ خٲطرٕ قربٲنی سپدِ۔ تہنٛدِ دزنٕچ مُشِک آسہ میانہٕ خٲطرٕ سیٹھاہ خۅشونؠ۔18یمن قربٲنین ہُنٛد ماز گو تُہنٛد۔ یتھٕ پٲٹھؠ جانورن ہنٛدؠ سیٖنہٕ تہٕ دٔچُھن بوو مےٚ سٟتؠ وفادٲری ہاونہٕ مۅکھٕ مےٚ پیش کرنہٕ یوان چھِ یتھٕ پٲٹھؠ کاہن قربان گاہس نِش تمہٕ تھوٚد تُلان چھِ۔19یہ کینٛژھا تہِ اسرائیلی لوٗکھ مقدس تحفہٕ رنٛگؠ مےٚ پیش کران چھِ تہِ چُھسو بہٕ توٚہہِ دِوان۔ سُہ چُھ توٚہہِ تہٕ تُہنٛدین گۅبرن تہٕ کورٮ۪ن کھیٚنہٕ باپتھ۔ سُہ روزٕ ہمیشہٕ باپتھ تُہنٛد حصہٕ۔ یہ چُھ اکھ مہادٕ یُس بہٕ توٚہہِ سٟتؠ کران چُھس، سُہ مہادٕ یُس ہمیشہٕ باپتھ روزِ۔ بہٕ چُھس یہ مہادٕ تُہنٛدیٚن اولادن سٟتؠ تہِ کران۔20یہُوواہنؔ ووٚن ہارونس یتہِ، "توٚہہِ کاہنن میلیٚو نہٕ زمین یا جادادٕ منٛزٕ کِہین یتھ پٲٹھؠ زنہٕ باقی اسرائیل ین میلہِ۔ سُہ چُھس بہٕ یُس توٚہہِ میلہِ۔21ییٚلہ اسرائیل لٕکؠ لوٗکھ تمام فصلن تہٕ نوزٲید جانورن ہُنٛد دٔہم حصہ مےٚ نِش انن بہٕ دِمو سُہ توٚہہِ لاوی قبیلہٕ کیٚن۔ یہ آسہ تُہنٛزِ تتھ کامہِ ماوضہ یۅسہ توٚہؠ مقدس خٟمس منٛز کران چُھو۔ 22کاہنو ورٲے باقی اسرائیل ین پزِ نہٕ اتھ خٟمس نزدیک گژُھن۔ اگر تمہٕ اتھ نزدیک گے تہٕ بہٕ زانہٕ تہنٛز سۅ کٲم گناہ تہٕ اتھ گُنہَس پٮ۪ٹھ مرن تِمہ۔23صرف چُھ لاوی زُرؠ یٲژےٕ یوت مقدس خٟمس منٛز کٲم کرنُک اجازت تہٕ تِمن ییہِ سزا دِنہٕ اگر تِمو اتھ سٟتؠ کینٛہہ غلط کۅر۔ یہ چُھ سُہ اکھ قانون یُس نہٕ زانٛہہ بدلاونہٕ ییہِ۔ توٚہہ لاوین ہنٛدیٚن زُرین میلہ نہٕ باقی تمام اسرائیل یو منٛزٕ کانٛہہ زمین۔24اسرائیلی لوکھ کرن پننہِ سارے فصلُک تہٕ چارواین ہُنٛد دہم حصہ مےٚ نذرانہٕ رنٛگؠ پیش تہٕ سُہ دمہٕ بہٕ لاوین ہنٛدین وٲرثن تاکہِ تِمہ کرن سُہ پننہِ باپتھ استعمال۔ اوٕ کِنؠ ووٚن مےٚ زِ تِمن زِ لاوین ہنٛدین اولادن ترِنہٕ کانٛہہ زمین۔25یہُوواہنؔ ووٚن موسیٰؔ ہس،26"لاوین ہنٛدۍن زُرین ون زِ ییٚلہ توٚہؠ اسرائیلی لوٗکن نِش تمام فصلُک تہٕ جانورن ہُنٛد دٔہم حصہ وصول کٔریٚو تہٕ توٚہہ پیٚیو تمیُک دہم حصہٕ مےٚ مقدس نذرانہٕ رنٛگؠ پیش کرُن،27یتھ پٲٹھؠ باقی اسرائیلی ۅپدایِمتہِ اناجُک تہٕ شرابُک دہِم حصہ پیش کران چھِ۔28یہ کینٛژھا توٚہہِ اسرائیلی لوٗکو نِشہ میلان چُھ تمیُک دہم حصہٕ کٔرؠ زیٚو توٚہؠ مےٚ پیش۔ یہ آسہ تُہنٛد میانہِ باپتھ مقدس نذرانہٕ۔ یُس توٚہہ ہارونس حوالہٕ کرن چُھ۔29یمہ چیز توٚہہِ دنہٕ ین تمو منٛزٕ ژٲریٚو توٚہؠ میانہِ باپتھ بہترین حصہ۔30تہٕ لاوین ہنٛدین زُرین ؤنیٚو یتہِ زِ ییٚلہ توٚہؠ اناجٕکؠ تہٕ شرابٕکؠ بہترین حصہٕ نذرانہٕ رنٛگؠ مےٚ پیش کٔریٚو، بہٕ زانہٕ زِ زنتہٕ یمہٕ تحفہ توٚہہِ پننہِ اناجہ تہٕ شرابہٕ منٛزٕ أنمٕتؠ چھِ۔31توٚہہِ لاوین ہنٛدین زُرین تہٕ گرانن چُھ امیُک باقی حصہ کھیٚنُک اجازت تہٕ توٚہہِ یتِتھ خوش گژھِ تتِتھ ہکیٚو یہ کھیٚتھ تکیازِ یہ چُھ تُہنزِ تمہِ کامہِ ہُنٛد ماوضہٕ یۅسہ توٚہؠ مقدس خٟمس منٛز کران چُھ۔ 32اگر توٚہؠ کاہنن امیُک بہترین حصہٕ پیش کٔریٚو یُس توٚہہِ میلان چُھ تہٕ توٚہہِ ییہِ نہٕ یمن تحفن ہُنٛد دہم حصہٕ قبول کرنس پٮ۪ٹھ کانٛہہ تہِ سزا دِنہٕ یُس لوٗکھ مےٚ نِش انان چھِ۔ مگر توٚہہِ چھِ یمہٕ تحفہ مقدس زانٕنؠ۔ اگر توٚہؠ یمہ چیز کھیٚتھ تِمن ضٲبطن خلاف ورزی کٔرِتھ گناہ کٔریٚو یمہٕ مےٚ توٚہہِ دِتمٕتؠ چھِ، توٚہہِ ییہِ سزاے موت دِنہٕ۔"
Bridge Connectivity Solutions Pvt. Ltd.