گریند17
1پتہٕ ووٚن یہُوواہنؔ موسیٰؔ ہس،2اسرائیل کیٚن لوٗکن ون زِ تمہٕ انن توٚہہِ نِش باہ لورِ۔ تِم انن بہَو قبیلو ہنٛدیٚو سردارو منٛزٕ أکِس أکِس۔ توٚہہِ چُھ پرٛتھ اکِس زِٹھؠ سُنٛد ناو تمؠ سنٛزِ لورِ پٮ۪ٹھ کھنناوُن۔3پرٛتھ قبیلہٕ کِس زٹِھؠ سنٛدِ خٲطرٕ گژھِ اکھ الگ لور آسٕنؠ، امہِ کِنؠ پزِ توٚہہِ لاوی قبیلچہِ لورِ پٮ۪ٹھ ہارون سُنٛد ناو کھنناوُن۔4تمہٕ آسہٕ تھٲوؠ زیٚو مقدس خٟمس منٛز تتھ مقدس صنٛدوقس نِش یتھ منٛز تِمہ مشقہٕ چھےٚ یمن پٮ۪ٹھ داہ احکام لیکِھتھ چھِ۔ یہ چھےٚ سۅ جاے یتِتھ بہٕ ہمیشہٕ توٚہہِ سٟتؠ کتھ کران چُھس5تہٕ یُس نفر مےٚ کاہن بننہٕ خٲطرٕ ژورمُت آسہ تمؠ سنٛزِ لورِ پھُٹہِ بامُن۔ ییٚلہِ لوٗکھ یہ وُچَھن تہٕ تمہٕ تراون توٚہہِ متعلق شکایت کرٕنؠ، تکیازِ تِم سمجھن پانے زِ یوٚہے چُھ سُہ یُس مےٚ ژورمُت چُھ۔6لہٰذا ووٚن موسیٰؔ ہن لوٗکن یہ یہُوواہنؔ وۅنُس۔ پتہٕ انہِ ہارونسؔ سان بہَو اسرائیلی زِٹھیٚو پن پننہِ لورِ موسیٰؔ ہس نِشہ۔7موسیٰؔ ہن تھاوِ تمہ لورِ مقدس خٟمس منٛز مقدس صنٛدوقس برُنٛہہ کنہِ۔8دویمہِ دوٚہہ صبحٲے ییٚلہ سُہ مقدس خٟمس منٛز ژاو اتہِ وچُھن ہارون سنٛزِ لورِ یۅسہ لاوی قبیلٕچ نمایندگی کران ٲس پھۅجممژ۔ اتھ اوس پن تہِ درامُت تہٕ پوش تہِ پھۅلمٕتؠ، تہٕ اتھ ٲسؠ پۅختہٕ بادام تہِ درامٕتؠ!9موسیٰؔ ہن کجہِ سارے لورِ مقدس خٟمہ منٛزٕ نیٚبر تہٕ ہاویٚن لوٗکن۔ بہَو سردارو منٛزٕ نیٚیہ پرٛتھ أکؠ پن پنٕنؠ لور واپس۔10پتہٕ ووٚن یہُوواہنؔ موسیٰؔ ہس، "ہارون سنٛز لور تھاوُن مقدس صنٛدوقس برُونٛہہ کنہِ تہٕ یہ گژھِ ہمیشہ خٲطرٕ تٔتی روزٕنؠ۔ یہ روزِ تِمن لوٗکن خٲطرٕ اکھ نصیحت یِم مےٚ خلاف بغاوت کرٕنؠ چھِ یژھان۔ پتہٕ مرِنہٕ بیٚیہِ کانٛہہ مےٚ خلاف شکایت کرنٕکہ سببہٕ۔ 11لہٰذا کۅر موسیٰؔ ہن تی یہ یہُوواہنؔ حکم دِتُس۔12پتہٕ ووٚن اسرائیلی لوٗکو موسیٰؔ ہس، "أسؠ چھِ مرن وٲلؠ۔ أسؠ سٲری چھِ یقینن مرن وٲلؠ!13یُس تہِ کانٛہہ یہُوواہؔ سنٛدِس خٟمس نزدیک گژھان چُھ سُہ چُھ مران۔ کیاہ اسہِ منٛزٕ چھا باقی تہِ مرن وٲلؠ؟"
Bridge Connectivity Solutions Pvt. Ltd.