متی9
1یسوعؔ تہٕ تسٕنٛدؠ شٲگرد کھٔتؠ ناوِ۔ جیٖلہٕ منٛزؠ ناو ترٲوِتھ وٲتؠ کفرنحوم شہر یتہِ سُہ روزان اوس۔2کینٛژو لوٗکو اوٚن أمِس نِش اکھ فالجہِ لد یس بستری اوس۔ ییٚلہِ یسوعن ژیون زِ یِمن چھےٚ پژھ زِ سُہ ہیٚکہِ تس شفا دِتھ۔ تٔمؠ ووٚن أمِس، "ہے جوانہٕ، حوصلہٕ تھاو۔ بہٕ چھُسے گناہ معاف کران۔3یہُودؠ شریعتچ تعلیم دِنہٕ وٲلؠ کینٛہہ لوٗکھ رودؠ اکھ أکِس کُن ونان۔ یمِس نفرس چھُ برم زِ یہِ چھُ خدا۔ یہِ ہیٚکہِ نہٕ گناہ معاف کٔرِتھ"4یسوعؔ اوس زانان یہِ یِم نفر سونچان ٲسؠ۔ اوے ووٚن تٔمؠ، "توٚہہِ پزن نہٕ بد خیال سونچِنؠ!5سہل کیا چھُ، أمِس یہِ ونُن زِ چٲنؠ گناہ سپٕدؠ معاف۔ کنہِ وۅتھ تھوٚد تہٕ لاگ پکُن۔6اوے کرٕ بہٕ ووٚنؠ تِتھؠ چیز یمہِ کِنؠ توٚہؠ زٲنِو زِ بہٕ انسان سُنٛد گوبر چھُ خداین مجاز کوٚر کوٚرمُت گناہ معاف کرنُک۔ ادٕ ووٚن أمؠ فالجہٕ لدس، "وۅتھ تھوٚد أمہِ بسترٕ پیٚٹھٕ تہٕ نیر گرٕ"7یہِ نفر ووٚتھ یکدم تھوٚد۔ پنُن بستر تلُن تہٕ دراو گرٕ۔8ییٚلہِ ہجومن یہِ وُچھ، تِمن گوو خوف۔ تِمو کٔرؠ خدایہِ سنٛدؠ تعریف یتھ اختیار لوٗکن بخشنس پیٚٹھ۔9یمہ وِزِ یسوعؔ اتہِ نیران اوس، أمؠ وُچھ اکھ نفر یمِس متی ناو اوس سُہ اوس أکِس میزس پیٚٹھ بہِتھ رومی حکومتہٕ باپتھ محصول وصول کران۔ یسوعنؔ ووٚن أمِس، "وۅلہٕ مےٚ سٟتؠ تہٕ بن میون شٲگرد۔ "اوے ووٚتھ متی تہٕ دراو أمِس سٟتؠ۔10یسوعؔ تہٕ تسٕنٛدؠ شٲگرد بیٹھؠ یِمن سٟتؠ کھیٚنہِ۔ ییٚلہِ تِم کھیٚوان ٲسؠ، واریاہ محصول جمع کرن وٲلؠ تہٕ باقےٕ گناہگار لوٗکھ یِمو نہٕ موسیٰ سنٛدین قانونن پیٚٹھ عمل کٔر، آے تہٕ کھیوکھ تِمن سٟتؠ۔11ییٚلہِ فریسیو یہِ وُچھ، تِم گے شٲگردن نِش تہٕ ووٚنہکھ، "یہِ کوتاہ ویکھُت چھُ زِ تُہنٛد وۅستاد چھُ معصول وٹن والیٚن تہٕ تِمنےٕ ہیوٮ۪ن باقے لوٗکن سٟتؠ وۅتھان، بیٚہان تہٕ کھیٚوان۔12یسوعنؔ بوز تہٕ یہٕ تِمو ووٚن، اوے ووٚننکھ یہِ: طبیب سُنٛد حاجت چھُ بٮ۪مارن آسان نَہ زِ صحت مندن۔13توٚہہِ پزِ خدایہِ سنٛدِس کلامس معنہِ مفہوم ژھارُن۔ بہ چھُس یژھان زِ توٚہؠ کٔرِو لوٗکن پیٚٹھ رحم أمہِ بجایہ زِ توٚہؠ کٔریٚو قربٲنیہِ پیش۔ یہِ کتھ تٲرِو ذہنس منٛز زِ بہٕ آس نہٕ توٚہہِ نِش تِمن لوٗکن دعوت دِنہِ یِم پانس راستباز ونان چھِ تہٕ تِمن نیک وتن پیٚٹھ اننہٕ باپتھ پانس سٟتؠ پکنُک وننہٕ بلکہِ تِمن لوٗکن یِم زانان چھِ زِ تِم چھِ گناہ گار۔14اوٕ پتہٕ آے بپتسمی یوحنا سٕنٛدؠ شٲگرد یسوعسؔ نِش اکہِ دۅہہ تہٕ ووٚنہَس، "أسؠ تہٕ فریسی چھِ اکثر فاقہٕ پالان تاکہِ خدا روز اسہِ خوش، مگر چٲنؠ شٲگرد چھِنہٕ یہِ کران۔ یِم کیازِ پالن نہٕ فاقہٕ۔15یسوعن ووٚنُکھ جوابس منٛز، "ییٚلہِ مہرازٕ پننٮ۪ن یارن سٟتؠ آسہِ نیتھرٕ وِزِ تِم چھِنہٕ پالان دۅکھ۔ چھا پالان۔ نَہ۔ تکیازِ أمہِ وِزِ چھِنہٕ تِم دۅکھٕ لد آسان۔ مگر ییٚلہِ مہرازس آسہِ نیرُن، أمہِ وِزِ چھِ یِم فاقہٕ دِوان تکیازِ تِم آسن دۅکھٕ لد۔16لوٗکھ چھِنہٕ گیٚنہِ ورٲے دٔج کُنہِ پرٲنس پلوس شیرنس لاگان۔ یودوے تم یہِ کرن، ییٚلہِ تِم اتھ پلوس چھلن، ونن پلو کھسہِ چھلنہٕ سٟتؠ تہٕ چھکراوِ سٲرسےٕ پلوس تہٕ انہ اتھ ژٔٹِتھ تہٕ پلوُک پرون گوٚد کُھلہٕ مزید۔17یِتھے پٲٹھؠ چھُنہٕ کانہٛہ تازٕ دچھِ رس کُنہِ پرٲنِس مشقہِ تھیلس منٛز تہِ بران اتھ محفوظ تھاونہٕ باپتھ۔ یودوے کانہٛہ یہِ کرِ، یِم دالہِ تھیلہٕ رنن ییٚلہِ یہِ دچھہِ رس شراب بنہِ یِم تھیلہٕ گژھن برباد تہٕ شراب پیٚیہِ پتھرِس۔ بلکہِ چھِ لوٗکھ نوو شراب نوٮ۪ن دالہِ تھیلن بران۔ یِم تھیلہٕ چھِ کھُلان ییٚلہِ شرابس خٟمہٕ کھسہِ۔ أمہِ کِنؠ روزٕ شراب تہٕ تھیلہٕ دۅنوے محفوظ۔18ییٚلہِ یسوعؔ یہِ ونان اوس اکھ سردار آو شہرٕ پیٚٹھٕ تہٕ نمیوو أمِس برونہٛہ کنہِ۔ اوٕ پتہٕ ووٚننس، "میٲنؠ کور مۅیہِ وُنؠ وُنؠ! ووٚنؠ گوو یودوے ژٕ یژھکھ تہٕ تس تھاوکھ پنُن اتھہٕ پیٚٹھ، سۅ لبہِ بیٚیہِ زندگی!"19اوے ووٚتھ یسوعؔ تہٕ دراو پنٕنؠ شٲگرد ہٮ۪تھ أمِس نفرس پتہٕ پتہٕ۔20أتی آیہِ اکھ زنان یمِس پتمیٚو بہَو ؤرؠ یو پیٚٹھٕ خوٗن اوس یِوان یسوعسؔ نِش۔ سۅ آیہِ تس پٔتؠ کِنؠ تہٕ لوگنس پلوَس اتھہٕ۔21سۅ ٲس پانس کُن ونان، "یودوے بہٕ چھرا امسنٛدِس پلوَس اتھہٕ لاگہِ، بہٕ بلہٕ"22پتہٕ پھیور یسوعؔ پتھ کُن یہِ وُچھنہِ زِ امسنٛدِس پلوَس کٔمؠ لوگ اتھہٕ۔ ییٚلہِ أمؠ یہِ زنان وُچھ، أمؠ ووٚن أمِس، "حوصلہٕ تھاو ٹاچھہِ خوتونہٕ۔ تکیازِ ژےٚ ٲسے پژھ زِ بہٕ دِمے ژےٚ شفا، مےٚ دِتُےٕ شفا۔ "یہِ زنان گےَ أمی ساعتہٕ ٹھیک۔23یسوعؔ ووٚت تمِس زِٹھؠ سُنٛد گرٕ تہٕ وُچِھن نَے واین وٲلؠ یِم تھدِ ودان ٲسؠ تکیازِ اکھ جوان کور ٲس مٔمٕژ۔24أمؠ ووٚن یِمن، "نیرو یتہِ یہِ مرن لے تہٕ ودُن رِوُن کٔرِو بند تکیازِ یہِ کور چھنہٕ مٔمٕژ۔ یہِ چھےٚ بس شونٛگِتھ!" لوٗکو ترووُس اورٕ اسُن تکیازِ تِم ٲسؠ زانان زِ سۅ چھےٚ مٔمٕژ۔25مگر یسوعنؔ ووٚن یِمن گرٕ منٛزٕ نٮ۪بر نیرنہٕ باپتھ۔ پتہٕ گوو سُہ تتھ کمرس منٛز یتہِ سۅ کور ٲس۔ تٔمؠ کٔر تس ۂژِس تھپھ تہٕ کور سپٕز زنٛدٕ تہٕ ؤژھ تھوٚد۔26تہٕ یہِ خبر بوز أمہِ علاقہٕ کیٚو ساروے لوٗکو۔27ییٚلہِ یسوعؔ اتہِ دراو، زٕ أنؠ رودؠ أمِس أتی تہٕ لویہَس ناد، "اسہِ پیٚٹھ کٔرؠ تو رحم۔ اسہِ تہِ بٔلرٲوؠ تو، ہے بادشاہ داوودؔ سٕنٛدِ زُریا!"28یسوعؔ ژاو گرس منٛز تہٕ یِم زٕ أنؠ تہِ ژاے اوٚت۔ یسوعن ووٚنُکھ، "توٚہہِ چھا پژھ زِ بہٕ بٔلراوَو توٚہؠ؟" تِمو ووٚنُس اورٕ، "آ، سانہِ خداوندٕ"29أمہِ پتہٕ ڈول یسوعنؔ یہنٛزن أچھن اتھہٕ تہٕ ووننکھ اوٕ کِنؠ زٕ توٚہہِ چھےٚ پژھ زِ بہٕ ہیٚکہٕ تہنٛزن أچھن انٮ۪ر کٲسِتھ۔ بہٕ چھُسکھ یِمہٕ یمے دمہٕ بٔلراوان"30تہٕ یِمن آو أچھن گاش۔ پتہٕ ووٚن یسوعنؔ یِمن سختی سان، "یِنہٕ ہرگِز تہِ یہِ میون کرُن کٲنٛسہِ بٲوِو۔31مگر تِم دراے نٮ۪بر تہٕ پھٲلاوکھ یہِ خبر سارنےٕ تتھ علاقس منٛز۔32یمہِ وِزِ تِم زٕ نفر یورٕ نٮ۪بر نیران ٲسؠ ، امی وِزِ ژاے اور لوٗکھ اکھ نفر ہٮ۪تھ یُس بدروحن روٚٹمُت اوس توے اوس گوٚمُت کوٚل۔33ییٚلہِ یسوعنؔ یہِ یہِ بدروح ژلروو، أمؠ نفرن لاجہِ کتھہٕ کرنہِ۔ یہِ دیدمان وُچھِتھ گوو ہجوم حٲران تہٕ ووٚنُکھ، "از برونہٛہ چھُنہٕ اسہِ اسرائیلس منٛز یُتھ ہیٚو سپدُت زانہٛہ وُچھمُت۔34مگر فریسیو ووٚن یہِ چھُ شیطان بدروحن ہُنٛد بادشاہ حٲکم یُس أمِس بدروح ژٔلراونس منٛز مدد کران چھُ۔35اوٕ پتہٕ پھیرؠ یسوعؔ تہٕ تسٕنٛدؠ شٲگرد گلیلی ہنٛدیٚو واریہو علاقو منٛزؠ۔ سُہ رود ہٮ۪چھناوان عبادت گاہن منٛز تہٕ بیٚیہِ رٕژِ شیٚچھِ ہنٛز تعلیم دِوان زِ خدا کِتھہٕ پٲٹھؠ کرِ آسمانہٕ پیٚٹھٕ راج تاج۔ سُہ رود بٮ۪مارن تہٕ مینٛدؠ لدن تہِ بٔلراوان مرضو تہٕ دادیٚو نِشہٕ۔36ییٚلہِ تٔمؠ لُکہٕ ہجوم وُچھ، تس آو تِمن پیٚٹھ ترس تکیازِ تِم ٲسؠ مایوس تہٕ پریشان۔ تِم ٲسؠ پہلہِ روٚس تیر کھیوٚل۔37پتہٕ ووٚن أمؠ پننٮ۪ن شٲگردن: "یِم لوٗکھ میٲنؠ شیٚچھ رٹنس تیار چھِ، تِم چھِ زنتہٕ کھاہ لوننہٕ باپتھ فصل ہٮ۪تھ تیار۔ مگر واریاہ لوٗکھ چھِنہٕ یہِ فصل لوٚننس نیرٲنی۔38اوے منٛگِو خداوند خدایس ژرؠ لوٗکھ فصل لوٚننس سوزنہٕ باپتھ۔
Bridge Connectivity Solutions Pvt. Ltd.