متی8
1ییٚلہِ یسوعؔ بالہٕ پیٚٹھٕ بوٚن ووٚتھ، واریاہ لوٗکھ لٔگؠ تس پتہٕ پتہٕ پکنہِ۔2یُتھےٕ یسوع لُکہٕ ہجومہٕ نِشہٕ دوٗر ژوٚل، اکھ مینٛدؠ لد آو تس نِش تہٕ نمیوو تس برونہٛہ کنہِ۔ تٔمؠ ووٚن یسوعسؔ، "خداوند، مےٚ دِ شفا، تکیازِ مےٚ چھےٚ پتا زِ ژٕ ہیٚککھ مےٚ بٔلرٲوِتھ یودوے ژٕ یژھکھ۔3اوٕ پتہٕ کوٚڈ یسوعن اتھہٕ تہٕ لوگُن أمِس نفرس۔ تٔمؠ ووٚن أمِس مینٛدؠ لدس، "بہٕ چھُستھ یژھان ژٕ بٔلراوُن، تہٕ بٔلروومکھ ووٚنؠ!" یہِ نفر بلیوو أمی ساعتہٕ امہِ مینٛدِ نِشہٕ۔4پتہٕ ووٚن یسوعن أمِس، "یہِ کتھ بناو یقینی زِ ژٕ ونکھ نہٕ کٲنٛسہِ سواے کاہنس میانہِ بٔلراونُک۔ پتہٕ گژھ یروشلمس منٛز مندرس منٛز تہٕ کر اتہِ موسیٰ سنٛدِ حکمہٕ مطٲبق پننہِ باپتھ قربٲنی پیش تاکہِ لوٗکن لگہِ پتاہ زِ ژٕ بلیوکھ ۔5ییٚلہِ یسوع کفرنحوم شہر گوو، أکؠ رومی حٲکم یُس أکِس ہتس نفرس حکم اوس کران آو تس نِش۔ تٔمؠ کوٚر یسوعسؔ زارٕ پارٕ مدتہٕ باپتھ۔6تٔمؠ ووٚن تس، "خداوند، میون نوکر چھُ بسترس پیٚٹھ پٮ۪تھ گرِ تہٕ تس چھےٚ گٲمٕژ حرکت بند تہٕ تس چھےٚ دگےٕ دگ۔7یسوعن ووٚن أمِس، "بہٕ گژھٕ چون گرٕ تہٕ بٔلراون سُہ"8مگر أمؠ ہتھ نفرن ہنٛدؠ رومی حٲکمن ووٚنُس اورٕ، "میانہِ خداوندٕ، بہٕ چھُس نہٕ اتھ لایق زِ ژٕ یِکھ میٲنِس پشس تل میون گرٕ۔ امہِ بجایہ، ون یُتےٕ زِ چون نوکر بلیوو تہٕ سُہ بلہِ۔9یہِ چھُ تِتھے پٲٹھؠ زنتہٕ مےٚ سٟتؠ۔ بہٕ چھُس اکھ سِپاہ۔ مےٚ چھُ پننٮ۪ن سالارن ہُنٛد مانُن تہٕ مےٚ ماتحت تہِ چھِ سِپاہ یِمن بہٕ حکم چھُس کران۔ ییٚلہِ تِمو منٛز کٲنٛسہِ أکِس چھُس ونان، "نیر" سُہ چھُ نیران۔ ییٚلہِ بہٕ کٲنٛسہِ ونہٕ "وۅلہٕ" سُہ چھُ یِوان۔ ییٚلہِ بہٕ پننِس نوکرس ونہٕ "یہِ کر" سُہ چھُ تہِ کران۔10ییٚلہِ یسوعن یہِ بوز، تٔمؠ کوٚر تعجُب۔ تٔمؠ ووٚن لُکہٕ ہجومس کُن یُس تس سٟتؠ سٟتؠ پکان اوس، "یہِ بوزِو: مےٚ لوٚب نہٕ ازتام مےٚ پیٚٹھ یِژھ پۅختہٕ ایمان تھاون وول کانہٛہ یُتھ یہِ غٲر یہُودؠ نفر چھُ۔ سٲرسے اسرائیلس منٛز تہِ نہٕ۔ ییٚتہِ بہٕ یہِ امید تھاوان چھُس زِ لوٗکھ کرن مےٚ پیٚٹھ یقین لوٚب نہٕ مےٚ یُتھ کانہٛہ نفر یمِس یِژھ پژھ آسہِ مےٚ پیٚٹھ۔11بہٕ ونو توٚہہِ پزی زِ واریاہ غٲر یہُودؠ لوٗکھ تہِ کرن مےٚ پیٚٹھ پژھ۔ تِم یِن واریاہو ملکو پیٚٹھٕ۔ یِمن منٛز دوٗر مشرقہٕ تہٕ دوٗر مغربہ پیٚٹھٕکؠ تہِ آسن تہٕ ییٚلہِ خدا آسمانہٕ پیٚٹھٕ پرٛتھ چیزس پیٚٹھ پنٕنؠ بادشٲہی قٲیِم کرِ یِم لوٗکھ تہِ بیٚہن ابرہامسؔ، اضحاقسؔ تہٕ یعقوبسؔ سٟتؠ سال کھیٚنہِ۔12مگر یوٚتام یِمن یہودٮ۪ن ہُنٛد سوال چھُ، یِمن پیٚٹھ خدا سُنٛد منشا حکمرٲنی کرٕنؠ ٲس، یِمن تراوِ سُہ جہنمس منٛز یتہِ مکمل انہِ گٔٹ آسہِ ادٕ روزن یِم برسان پننہِ دگہِ تہٕ دادِ کِنؠ۔ امہِ دگہِ روزن تِم پنٕنؠ دنٛد ٹکان۔13اوٕ پتہٕ ووٚن یسوعنؔ أمِس حٲکمس، "نیر گژھ گرٕ۔ تی سپدِ یہِ چٲنؠ پژھ چھےٚ" اوٕ پتہٕ گوو یہِ حٲکم گرٕ تہٕ ڈیونٹھُن پنُن نوکر اوٚر تہٕ دوٚر بنیامُت تمہِ ساعتہٕ یمہِ وِزِ یسوعن ووٚنُس زِ سُہ بٔلراوِ تس۔14ییٚلہِ یسوعؔ تہٕ امسنٛدؠ کینٛہہ شٲگرد پطرسؔ سُنٛد گرٕ گےَ، یسوعسؔ وُچھ پطرسؔ سٕنٛز ہش موج۔ سۅ ٲس بٮ۪مار بسترس منٛز تپھ آسنہٕ کِنؠ۔15أمؠ لوگ تسنٛدِس اتھس اتھہٕ تہٕ أتھؠ سٟتؠ مۅکلیو تس سورےٕ تپھ۔ توٕ پتہٕ ؤژھ سۅ تھوٚد تہٕ شیٚہرٕن تمِس کینٛہہ غذا رژھا۔16أمہِ دوٚہہ شامن أنؠ أکؠ ہجومن واریاہ لوٗکھ یِمن بدروح پرکس ٲسؠ تہٕ کینٛہہ ٲسؠ دٲدؠ لد۔ چھرا پننہِ کتھ کرنہٕ سٟتؠ ژلرٲوؠ أمؠ یِم بدروح تہٕ بٔلرٲوِن سٲری دٲدؠ لد لوٗکھ۔17ییٚلہِ أمؠ یہِ کوٚر، أمؠ بنوو نبی یسعیاہؔ سُنٛد ونُن پوٚز۔ أمؠ کٔرؠ بٮ۪مار دادیٚو نِشہٕ آزاد تہٕ بنٲوِن تِمہٕ أرؠ۔18یسوعن وُچھ پانس أنٛدؠ أنٛدؠ لُکہٕ ہجوم تہٕ ووٚنُن پننٮ۪ن شٲگردن زِ تِم تارن تس جیٖلس دویمہِ انٛدٕ اپور۔19ییٚلہِ زن تِم ناوِ کُن ٲسؠ وتہِ پکان، یہُودؠ شریعتچ تعلیم دِنہٕ وول اکھ نفر آو تس نِش تہٕ ووننس، "وۅستاد، بہٕ تہِ یِمے ژےٚ سٟتؠ سٟتؠ یوٚت ثٕ گژھکھ۔20یسوعن ووٚن أمِس، "پوژھٕ لاوین چھےٚ زمینہِ منٛز روزنہٕ باپتھ گوٚپھ آسان تہٕ جاناوارن ٲلؠ، وۅنؠ گوو بہٕ چھُس خدایہِ سُنٛد گوبر۔ مےٚ چھُنہٕ کانہٛہ گرٕ یتہِ بہٕ شونٛگِتھ ہیٚکہٕ"21یسوعؔ سٕنٛدؠ أکؠ شٲگردن ووٚن أمِس، "خداوند گۅڈٕ دِیو مےٚ گرٕ گژھنُک رۅخصت۔ میانہِ مٲلؠ سٕنٛدِ مرنہٕ پتہٕ تہٕ تس وُڈراونہٕ پتہٕ یِمہٕ بہٕ واپس توٚہہِ نِش"22مگر یسوعنؔ ووٚن أمِس، "وۅلہٕ ووٚنؠ مےٚ سٟتؠ۔ دِیو تِمو لوٗکن پرارنہٕ پننٮ۪ن ہنٛدس مرنس یِم لوٗکھ گۅڈے مۅردٕ چھِ۔23یسوعؔ ووٚتھ ناوٕ أمہِ پتہٕ تہٕ شٲگرد رودِس پتہٕ پتہٕ۔24أتی متیوو اکھ واوٕ گٹہٕ کار آبس۔ آبہٕ ملریٚو مِلنٲوؠ ٹاوٕ ٹاسراے تہٕ برن یہِ ناو آبہٕ سٟتؠ۔ مگر یسوعؔ رود نینٛدرِ۔25تِم گےَ گتس نکھہٕ تہٕ وُزنووُکھ تہٕ ووٚنہس، "خداوند اسہِ بچاو! أسؠ چھِ پھٹنس تیار!"26تٔمؠ ووٚن تِمن، "توٚہؠ مہٕ کھوٚژِو۔ توٚہہِ چھنہٕ پوٗرٕ پژھ زِ بہٕ ہیٚکہٕ توٚہہِ بچٲوِتھ۔ "اوٕ پتہٕ ووٚتھ سُہ تھوٚد تہٕ کوٚرُن واوس روب تہٕ لہرن ووٚنُن قرار لبنہٕ باپتھ۔ أمہِ وقتہٕ لوٚب واون تہِ قرار تہٕ آب تہِ رود لۅتہِ۔27امسنٛدؠ شٲگرد سپٕدؠ حٲران تہٕ ووٚنُکھ اکھ أکِس، "یہِ چھُ پزی غٲر معمولی قوت وول۔ سٲری چیز چھِ امسنٛدِس اختیارس منٛز۔ یہِ واو تہٕ یِم ملرٕ تہِ چھےٚ امسُنٛد مانان!"28ییٚلہِ تِم جیٖلہٕ کِس مشرقس منٛز وٲتؠ، تِم ژاے گدریٚنؠ علاقس منٛز۔ اتہِ آے بد روحو رٔٹؠ مٕتؠ زٕ نفر پننیٚو قبرو منٛزٕ نیرِتھ یتہِ یِم روزان ٲسؠ۔ چونکہِ یِم ٲسؠ انتہٲیی لڑایہِ گٔرؠ تہٕ لوٗکن حملس یِنہٕ وٲلؠ۔ أمہِ وتہِ اوسنہٕ کانہٛہ تہِ پکنُک جُرعت کران۔29اچانک آے یِم یسوعسؔ پیٚٹھ چِکہٕ دِوان ؤتھِتھ، "ژٕ چھُکھ خدایہِ سُنٛد گوبر! تکیازِ ژےٚ تہٕ اسہِ چھُنہٕ کہینؠ مشترک۔ اسہِ تراو تہٕ مُچھہِ۔ ژٕ آکھا یور اسہِ عذاب دِنہٕ باپتھ مقرر خدایہِ سنٛدِ وقتہٕ برونٛٹھےٕ ۔30اتہِ اوس سورن ہُنٛد اکھ بوٚڈ کھیوٚل نکھے۔31اوے ووٚن یِمو بدروحو یسوعسؔ، "ژٕ چھُکھ اسہِ یِمو انسانو نِش ژلراوُن یژھان۔ تیٚلہِ سوز تہٕ اسہِ یِمن سورن منٛز!"32یسوعنؔ ووٚن یِمن، "یودوے توٚہؠ یی چھُو یژھان، گژھِو یِمو بدروحو ترٲوؠ انسان تہٕ ژاے سورن منٛز۔ اچانک دورییہ یِم سٲری سور بوٚن آبس کُن تہٕ پھٔٹؠ۔33سورٕ رٲچھ نفر کھوٚژؠ یِم سورن سٟتؠ ٲسؠ تہٕ دورییہ قصبس کُن تہٕ ووٚنُکھ سورےٕ یہِ اتہِ سپُد بدروحو رٔٹؠ مٕتؠ دوٚن نفرن متعلق تہِ لوٗکن۔34أمہِ پتہٕ سپُد یہِ زنتہٕ اتِکؠ سٲری لوٗکھ دراے یسوعسؔ سمکھنہِ۔ ییٚلہِ تِمو سُہ وُچھ تہٕ تِم زٕ نفر تہِ یِم بدروحو رٔٹؠ مٕتؠ ٲسؠ، تِمو کوٚر یسوعسؔ پننہِ أمہِ علاقہٕ منٛزٕ نیرنہٕ باپتھ زارٕ پارٕ۔
Bridge Connectivity Solutions Pvt. Ltd.