متی10
1یسوعنؔ ووٚن پننٮ۪ن بہَن شٲگردن پانس نِش ناد دِتھ۔ اوٕ پتہٕ بخشُنکھ طاقت تِم بدروح ژلراونُک یِمن لوٗکھ ٲسؠ تل رٔٹؠ مٕتؠ۔ تٔمؠ بنٲوؠ تِم لوٗکھ بٔلراونس لایق یِم بٮ۪ماریٚو رٔٹؠ مٕتؠ ٲسؠ یا یِم رنگہٕ رنگہٕ دادیٚو ؤلؠ مٕتؠ ٲسؠ۔2یہِ چھُ فہرست تِمن بہَن شٲگردن ہُنٛد یِمن سُہ پنٕنؠ رسول ویندان اوس۔ تِم ٲسؠ شمعونؔ یمِس تٔمؠ نوو ناو دیُت پطرسؔ۔ پطرسؔ سُنٛد کونٛس بوے اندریاسؔ، زبیدی سُنٛد نیٚچو یعقوبؔ تہٕ یعقوبؔ سُنٛد بوے یوحناؔ؛3فلپس، برتلمایی، تُوماؔ؛ متیؔ، محصول وٹن وول۔ حلفیؔ سُنٛد نیٚچو یعقوبؔ، تدیؔ،4شمعونؔ غیور تہٕ یہُوداؔ اِسکریوتی۔ یپس یسوعسؔ بے وفا دراو۔ یمؠ حٲکمن تسنٛز نشاندہی کٔر تہٕ سُہ رٹنووُن۔5ییٚلہِ یسوعؔ یِمن بہن رسولن سوزنس تیار اوس، تٔمؠ ووٚن یِمن زِ تِم واتناون رٕژ شیٚچھ مختلف علاقن منٛز لوٗکن تام۔ تمؠ دِتؠ یِمن ہدایت: "تِمن جاین مہٕ گٔژھِو یتہِ غٲر یہُودؠ روزان ٲسؠ۔ یا تِمن قصبن یتہِ سمرٲتؠ روزان آسن ۔6بلکہِ گٔژھِو اسرائیلین کُن۔ یِم چھِ پہلہِ روٚس تیر کھیوٚل۔7ییٚلہِ یِمن نش گژھِو، تِمن ؤنِو زِ خدا کرِ آسمانہٕ پیٚٹھٕ پنٕنؠ بادشٲہی ؤلؠ ؤلؠ۔8بٮ۪مارن بخشِو شفا، مۅردٕ کٔرؠ وُکھ زنٛدٕ، مینٛدؠ لد بٔلرٲؠ وُکھ تہٕ أنؠ وُکھ بیٚیہِ واپس پننِس سماجس منٛز۔ لوٗکن تل رٹن وٲلؠ بد روحن کٔڈِو پٔٹؠ۔ لوٗکن مدد کرنس منٛز مہٕ منٛگِو پونٛسہٕ ماوضہٕ کِنؠ تکیازِ خداین تہِ ما منٛگِو توٚہہِ مدد کرنس پونٛسہٕ۔9پانس سٟتؠ مہٕ تُلِو کانہٛہ پونٛسہٕ یا نالٲنؠ،10نَہ مہٕ تُلِو پننیٚو چیزو باپتھ ٹھیلہٕ۔ نَہ مہٕ تُلِو ہُریمانہٕ پلو، نَہ مہٕ تُلِو کھۅربانہٕ تمہِ علاوٕ یہِ چھُو عاصہٕ یہِ تُلِو اتھس منٛز۔ پرٛتھ کٲنٛسہِ مزوٗرس چھُ حق پونٛسہٕ یا ماوضہٕ رٹنُک تِمن لوٗکن نِش یہنٛدِ باپتھ سُہ کٲم کرِ۔ اوے چھُو توٚہہِ غذا حٲصِل کرنُک حق تِمن لوٗکن نِش یوٚت توٚہؠ گٔژھِو۔11پرٛتھ قصبس یا گامس منٛز کٔڈؠ وون ونہِ سُہ نفر یا گرٕ یُس توٚہہِ پننِس گرس منٛز روزنہٕ دیُن یژھان آسہِ۔12یُتھےٕ توٚہؠ تتھ گرس منٛز أژِو، خدایس منٛگِو أمہِ گرٕ باپتھ خٲر تہٕ برکت۔ أتھؠ گرس منٛز روزٕ یوٚتام یہِ قصبہٕ یا گام ترٲیِو۔13یودوے أمہِ گرٕکؠ بٲژ توٚہہِ سٟتؠ رُت کرن خدا دِیہِ بے شک یِمن رُتے۔ یودوے توٚہہِ سٟتؠ رُت کرن نہٕ، تیٚلہِ دِیہِ نہٕ تُہنٛد دعا منگُن یِمن کانہٛہ فٲیدٕ تہٕ خدا کرِ نہٕ یِمن کانہٛہ خٲر۔14یودوے توٚہہِ کُنہِ قصبٕکؠ یا گامٕکؠ لوٗکھ خوش آوے کرن نہٕ تہٕ نہ بوزن تہنٛز شیٚچھ پٲغامےٕ، تیٚلہِ گےَ سۅ جاے تراوٕنؠ تہٕ پننٮ۪ن کھوٚرن ہنٛز لژھ أتی دٕنٕنؠ۔ یہِ کٔرِتھ کٔرِو توٚہؠ تِمن خبردار زِ خدا کرِ تِمن رد۔ یتھ پٲٹھؠ تمو تُہنٛد ونُن رد کوٚر۔15یہِ تھٲیو وارٕ ژٮ۪تس۔ تٔمہِ دوٚہہ ییٚلہِ خدا لوٗکن عدالت لاگہِ، سُہ دِیہِ کمین لوٗکن سزا۔ سدومؔ تہٕ عمورہ شہرن ہنٛدؠ پٲٹھؠ۔ مگر یودوے توٚہہِ کُنہِ شہرٕکؠ لوٗکھ رد کرن خدا دیہِ تِمن تہنٛدِ کھۅتہٕ تہِ ژوٚر سزا۔16یہِ کتھ تھٲیو وارٕ ژٮ۪تس: ییٚلہِ بہٕ توٚہہِ نٮ۪بر سوزان چھُسو، توٚہؠ ٲسِو تیرن ہنٛدؠ پٲٹھؠ کُنہِ حفاظتہٕ ورٲے۔ تہٕ یوٚت تہٕ گژھِو تِم آسن رامہٕ ہوٗنین ہنٛدؠ پٲٹھؠ توٚہہِ زاگہِ۔ اوے روزو محتاط۔ سرفہٕ سنٛدؠ پٲٹھؠ تہٕ تِمن لوٗکن کُن روزو کوترٕ سنٛدؠ پٲٹھؠ بے زرٮ۪ر۔17یِمن لوٗکن نِش روزِو خبردار۔ تِم ہیٚکن توٚہہِ بٲنٛدؠ بنٲوِتھ تہٕ کُنہِ انتظٲمی کونسلس حوالہٕ کٔرِتھ عدالت لاگنٲوِتھ۔ تِم ہیٚکن توٚہہِ پننٮ۪ن ہیکلن منٛز لورِ وٲیِتھ۔18اوے کِنؠ زِ توٚہہ چُھ مےٚ پؠٹھ ایمان، تِم نِن توٚہہِ حٲکمن تہٕ بادشاہن نِش تاکہِ توٚہہِ ییہِ عدالت لاگنہٕ تہٕ سزا دِنہِ۔ مگر توٚہؠ بٔنِو میٲنؠ گواہ یِمن حٲکمن نِش۔19ییٚلہِ تِم لوٗکھ توٚہہِ بٲنٛدؠ بناون۔ پننہِ صفٲیی منٛز وننہٕ باپتھ مہٕ گٔژھِو پریشان۔ تکیازِ یِم لفظ توٚہہِ ونٕنؠ آسن تِم یِن توٚہہِ پانے اورے۔20توٚہہِ چھُنہٕ پانہٕ فٲصلہٕ کرُن زِ توٚہؠ ؤنِو کیا۔ بلکہِ ؤنِو توٚہؠ تی یہِ آسمانکِس بب خدایہِ سُنٛد روح توٚہہِ ونُن ونہِ۔21تِم نِن توٚہہِ حٲکمس نِش۔ مرنہٕ باپتھ تکیازِ توٚہہِ چھُو ایمان مےٚ پیٚٹھ۔ تکیازِ لوٗکھ کرن پننٮ۪ن باین سٟتؠ تی، یہِ مٲلؠ پننٮ۪ن شُریٚن سٟتؠ کرن۔ شُرؠ وۅتھن مالٮ۪ن خلاف یُتھ تِم مارنہٕ یِن ۔22واریاہ لوٗکھ ورتاون توٚہہِ سٟتؠ دٕے تکیازِ توٚہہِ چھُو مےٚ پیٚٹھ ایمان۔ ووٚنؠ گوو سُہ کانہٛہ تہِ یمِس مرنس تام مےٚ پیٚٹھ ایمان آسہِ، تمِس بچاوِ خدا۔23ییٚلہِ کُنہِ شہرٕکؠ لوٗکھ توٚہہِ عِذا واتناون، ژٔلِو بیٚیہِ کُنہِ شہرس کُن۔ یہِ کتھ تھٲیو ژٮ۪تس۔ بہٕ آدمؔ سُنٛد گوبر ییہِ یقیناً واپس بُترٲژ پیٚٹھ۔ أمہِ برونہٛہ زِ توٚہؠ ٲسِو مےٚ متعلق اسرائیلس منٛز لوٗکن ونِتھ مۅکلیومُت۔ اکہِ شہرٕ پیٚٹھٕ بیٚیِس شہرس گٔژھِتھ۔24أکِس شٲگردس پزِ نہٕ پننِس وۅستادس برونہٛہ نیرنٕچ امید تھاوٕنؠ، تہٕ نوکر چھُنہٕ پننِس حٲکمس بوٚڈ آسان۔25توٚہہِ پزِنہٕ امید تھاوٕنؠ زِ لوٗکھ کیا ورتاون رُت أکِس شٲگردس سٟتؠ تسنٛدِس وۅستادٕ سنٛدِ کھۅتہٕ۔ یا تِم کیا کرن نوکرس سٟتؠ پننس مٲلکہٕ سنٛدِ کھۅتہٕ رُت ویوہار۔ یتھے پٲٹھؠ چونکہِ بہٕ چھُس تُہنٛد وۅستاد تہِ تہٕ مٲلک تہِ رہبر تہ۔ توٚہہِ گژھ، خبر آسٕنؠ زِ لوٗکھ ورتاون شر توٚہہِ سٟتؠ تکیازِ تِمو ورتوو مےٚ سٟتؠ تہِ شر۔ زٲنؠ تو بہٕ چھُس اکہِ گرُک حٲکم، یمِس تِم شیطان ونان چھِ ییٚلہِ تِم یوٗتاہ ویکھُت ویوہار مےٚ سٟتؠ کرن، تُہنٛد کیا خیال چھُ توٚہہِ سٟتؠ کیُتھ ویوہار کرن ۔26یِمن لوٗکن مہٕ کھوٚژِو۔ یہِ کینٛہہ پردس تل آسہِ تہِ سپدِ بے پردٕ۔ تہٕ پرٛتھ کانہٛہ راز سپدِ فاش۔27اوے تہِ ؤنِو کھۅژنہٕ بدلہٕ برملا کھُلہٕ پٲٹھؠ تہِ یہِ بہٕ توٚہہِ لوٗکن ہنٛدؠ پٲٹھؠ رات کیُت ژوٗرٕ ژھیٚپہِ ونان چھُس۔ یہِ بہٕ توٚہہِ الگ پٲٹھؠ ونان چھُس یتھٕ پٲٹھؠ توٚہہِ لوٗکھ کنہٕ پھِسراے کران چھِ تہِ کٔرِو دوٚہلؠ گاش ہیٚو اظہار۔28تِمن لوٗکن مہٕ کھوٚژِو، یِم تہنٛدِس جسمس مارنس لایق چھِ مگر تہنٛدِس روحس مارنس لایق نہٕ بلکہِ کھوٚژِو خدایس تکیازِ سُہ چھُ تہنٛدِس جسمس تہٕ روحس دۅشوٕنؠ جہنمس منٛز گالنس لایق۔29یِمن ژرٮ۪ن متعلق سونٛچِو۔ یِمن چھُنہٕ کینٛہہ مۅلےٕ۔ یِمہٕ ہیٚکؠ ووکھ توٚہؠ أکِس لۅکٹِس سِکس زٕ زٕ ژرِ مٔلؠ ہٮ۪تھ۔ ووٚنؠ یودوے کانہٛہ ژٔر تہِ پتھرِس پیٚیہِ تہٕ مرِ آسمانس پیٚٹھ، بب خدا چھُ یہِ زانان۔ سُہ چھُ پرٛتھ کینٛہہ زانن وول۔30سُہ چھُ توٚہہِ متعلق تہِ سورےٕ زانان، تس چھےٚ تہنٛدِس کلس پیٚٹھ مس والن ہنٛز گرنٛد تہِ معلوم۔31خدا چھُ توٚہہِ یِمو ژریٚو کھۅتہٕ زیادٕ قدر کران۔ اوے مہٕ کھوٚژِو تِمن لوٗکن یِم توٚہہِ مارنٕچ دھمکی چھِ دِوان۔32یودوے لوٗکھ باقین یہِ وننس تیار چھِ زِ تِم چھِ میٲنؠ۔ بہٕ تہِ چھُس آسمانس پیٚٹھ پننِس ببس برونہٛہ کنہِ یہِ ماننس تیار زِ یِم چھِ میٲنؠ۔33ووٚنؠ گوو یودوے تِم باقین برونہٛہ کنہِ یہِ وننس کھوٚژان چھِ زِ تِم چھِ میٲنؠ۔ بہٕ ونہٕ آسمانس پیٚٹھ پننِس مٲلِس زِ یِم چھِنہٕ میٲنؠ۔34"یہِ مہٕ سونٛچِو زِ بہٕ آس بُترٲژ پیٚٹھ لوٗکن امنہٕ سان روزنس منٛز اتھہٕ روٚٹ کرنہِ، چونکہِ بہٕ آس، مےٚ پتہٕ پتہٕ پکن وٲلؠ کینٛہہ لوٗکھ مرن۔35چونکہِ بہٕ آس بُترٲژ پیٚٹھ، مےٚ پیٚٹھ ایمان نہ تھاون وٲلؠ کینٛہہ لوٗکھ گژھن مےٚ پیٚٹھ ایمان تھاون والیٚن خلاف۔ مثالہِ پٲٹھؠ کینٛہہ نیٚچوؠ گژھن پننٮ۪ن مالٮ۪ن خلاف، کینٛہہ کورِ پننٮ۪ن ماجیٚن تہٕ کینٛہ نوٚشہٕ آسن خلاف پننٮ۪ن ہشٮ۪ن۔36امیُک مطلب گوو کینژن آسن پنٕنؠ گرِکؠ بٲژ دشمن ۔37لوٗکھ یِم میانہِ کھۅتہٕ ژوٚر لول برن پننٮ۪ن ماجیٚن مالیٚن چھِنہٕ میٲنؠ بننس لایق۔ یِتھے پٲٹھؠ یِم میانہِ کھۅتہٕ ژوٚر لول برن پننٮ۪ن کورٮ۪ن نیٚچوٮ۪ن تہِ چھِنہٕ میٲنؠ بننس لایق۔38یودوے توٚہؠ میٲنؠ روزنہٕ باپتھ پننِس صلیبس پٮ۪ٹھ مرُن چھُو نہٕ یژھان تیٚلہِ تہِ چھُو نہٕ توٚہؠ میٲنؠ بننس لایق۔39لوٗکھ یِم مرنہٕ نِشہٕ بچنہٕ باپتھ میون آسنس انکار کران چھِ، لبن نہٕ خدایس سٟتؠ پوشوٕنؠ زندگی۔ مگر تِم یِم مےٚ ایمان تھاونہٕ کِنؠ مرنہٕ باپتھ تیار روزن، پراون پوشوٕنؠ زندگی خدایس سٟتؠ۔40خدا چھُ یتھ مانان زِ یس ژےٚ خوش آوے کرِ چھُ ژکہِ مےٚ خوش آوے کران تہٕ سٟتؠ یِتہِ ونان یُس مےٚ خوش آوے کرِ، کٔری ژےٚ تہِ خوش آوے۔ خداین سوزُس بہٕ یور۔41تِم یِم زن کٲنٛسہِ خوش آوے یہِ زٲنِتھ کرن زِ سُہ چھُ نبی، سُہ پراوِ انعام یُس زن نبین میلہِ خدایہِ سٕنٛدِ طرفہٕ۔ یِتھے پٲٹھؠ یِم کٲنٛسہِ خوش آوے کرن تکیازِ تِم چھِ زانان زِ سُہ چھُ راستباز پراون سُے انعام یُس راستباز پراون خدایس نِش۔42یہِ کتھ تھٲیو ژٮ۪تس: فرض کرو لوٗکھ وُچھن توٚہہِ تریشہٕ ہوٚت تہٕ دِنو کینٛہہ ٹھنٛڈٕ تریش تکیازِ تِم چھُو توٚہہِ میون زانان یودوے زن توٚہؠ کانہٛہ انسان ٲسِو تنہٕ۔ خدا دِیہ یقیناً یِتھٮ۪ن لوٗکن پنن انعام۔
Bridge Connectivity Solutions Pvt. Ltd.