متی5
1ییٚلہِ یسوعنؔ یہِ لُکہٕ ہجوم وُچھ، سُہ کھوٚت أکِس بالس پیٚٹھ۔ سُہ بیوٹھ أتی پتھر تہٕ دِژٕن پننٮ۪ن شٲگردن تعلیم۔ تِم آیہِ تس نکھہٕ تس بوزنہٕ باپتھ۔2اوٕ پتہٕ لٲجؠ تٔمؠ یہِ ؤنِتھ تِمن تعلیم دِنؠ،3"خدا چھُ خوش تِمن لوٗکن یِم پننہِ روحٲنی حاجت مندی ہُنٛد اقرار کران ؛ سُہ کرِ آسمانو پیٚٹھٕ تِمن بادشٲہی کرٕنؠ منظور۔4خدا چھُ تمن لوٗکن خوش یِم یمہِ گناہ گار دنیا کِنؠ ماتم چھِ کران؛ سُہ دِیہِ تِمن حوصلہٕ۔5خدا چھُ خوش تِمن لوٗکن یِم حلیم آسن۔ تِمے پراون یہِ زمین یۅسہٕ خدا نوِ سرٕ تعمیر کرِ۔6خدا چھُ خوش تِمن لوٗکن یِم راست بٲزی ہنٛز زندگی گُذارٕنؠ چھِ یژھان یِتھٕ پٲٹھؠ زن کانہٛہ کھیٚون تہٕ چیوٚن یژھان چھُ؛ سُہ بناوِ تِمن راستبٲزی سان روزنس لایق۔7خدا چھُ خوش تِمن لوٗکن یِم باقین پیٚٹھ رحم کران چھِ؛سُہ روزِ یِمن سٟتؠ تہِ رحیم۔8خدا چھُ خوش تِمن لوٗکن یِم تہِ کرنچ کوشش کرن یہِ خدایس خوش کرِ۔ اکہِ دوٚہہ آسن یِم تتہِ یتہِ خدا چھُ تہٕ وُچھن دیدمان تس۔9خدا چھُ خوش تِمن لوٗکن یِم باقین اتھہٕ روٚٹ کرن امنہٕ سان روزنس منٛز۔ سُہ روزٕ تِمن پنٕنؠ شُرؠ مازان۔10خدا چھُ خوش تِمن لوٗکن یِم راستبٲزی ہنٛز زندگی گُذارن۔ یہِ چھُس عزت ییٚلہِ پزرچ زندگی گُذارن وٲلؠ وجہہ بنن کۅ کار لوٗکن ہنٛدِ توہینک تہٕ لعنتعنٕکؠ تہٕ بُرٕ سلوکٕکؠ۔ خدا چھُ آسمانہٕ پیٚٹھٕ یِمن راستباز لوٗکن پیٚٹھ حکومت کران۔11خدا چھُ خوش توٚہہِ سٟتؠ ییٚلہِ باقےٕ لوٗکھ توٚہہِ وکٕر والنو، تہٕ تمِس چھےٚ عزت افزٲیی سپدان ییٚلہِ تِم توٚہہِ سٟتؠ بُرٕ چیز ورتاوان چھِ تہٕ ییٚلہِ تِم توٚہہِ متعلق اپُز ونان چھِ، یہِ ؤنِتھ زِ توٚہؠ چھُو بد۔12ییٚلہِ یہِ سپدِ، خوش گٔژھِو تہٕ خوش روزِو تکیازِ خدا دِیو توٚہہِ جنتس منٛز بوٚڈ انعام۔ ژٮ۪تس تھٲیو، یِتھے پٲٹھؠ ستٲوؠ یِمو سٮ۪ٹھا برونہٛہ کالہِ روزن وٲلؠ نبی۔13یہِ نوٗن غذا باپتھ چھُ، تی کٔرِو توٚہؠ یمہِ دنیا باپتھ۔ ووٚنؠ ہرگاہ نوٗنس پنُن طاقتےٕ راوِ کانہٛہ تہِ ہیٚکہِ نہٕ اتھ پنُن طاقت واپس أنِتھ۔ لوٗلن ژھٕنن اتھ نٮ۪بر چھکِتھ تہٕ کرنس زمینس پیٚٹھ لتہٕ مونجہِ۔14یہِ گاش لوٗکن ہنٛدِ باپتھ انہِ گٹہِ کران چھُ، تی کٔرِو توٚہؠ یمہِ دنیا باپتھ۔ سٲری لوٗکھ روزن توٚہہِ وُچھان۔ یتھٕ پٲٹھؠ تِم بالس پیٚٹھ شہر تعمیر سپُدمُت وُچھان چھِ۔15کانہٛہ تہِ چھُنہٕ ژونگ زٲلِتھ اتھ پجہِ تل رٹان۔ بلکہِ چھُ اتھ زورٕ پیٚٹھ تھاوان تاکہِ یہِ دِیہِ سارنےٕ لوٗکن گاش یِم گرس منٛز آسن۔16یِتھے پٲٹھؠ پزِ توٚہہِ تہِ تی کرُن یہِ درُست آسہِ یتھٕ پٲٹھؠ باقےٕ تہ وُچھن توٚہؠ کیا چھُو کران۔ ییٚلہِ تِم وُچھن تِم کرن تعریف تہنٛدِس بب خداے سنٛدؠ یُس آسمانس پیٚٹھ چھُ۔17توٚہہِ پزِ نہٕ یہِ فرض کرُن زِ بہٕ چھُس آمُت توٚہہِ نِش موسیٰ ہس خدایہِ سنٛدؠ طرفہٕ دِنہٕ آمٕتؠ قانون یا یہِ نبیو لیٚوکھ تہِ منسوخ کرنہِ بلکہِ آس بہٕ تُہنٛد ونُن، لیٚکھُن پوٚز ثٲبت کرنہِ۔18یہِ چھُ اکھ پوٚز ونُت خدا ما ڈالہِ یا نٔہناوِ یہِ زمین تہٕ آسمان مگر خدا ڈالہِ نہٕ قونونو منٛزٕ لۅکٹہِ کھۅتہٕ لۅکٕٹ کتھ تہِ۔ انٛد کرنُک نشان تہِ نہٕ، ییتِس کالس نہٕ خدا پننہِ وننہٕ مطٲبق سورےٕ کرِ یہِ اتھ شریعتس منٛز درج چھُ۔19چونکہِ یہِ چھُ پوٚز یودوے توٚہؠ اکھ معمولی قانون تہِ پھُٹرٲیو تہٕ باقین تہِ یہےَ تعلیم دِیو، توٚہؠ بٔنِو آسمانہٕ پیٚٹھٕ خدایہ سٕنٛز بادشٲہی منٛز ساروےٕ کھۅتہٕ معمولی نفر۔ یودوے توٚہؠ یِم سٲری قانون پانرٲیو تہٕ باقین تہِ دِیو خدایہِ سنٛدؠ حکم پانراونٕچ تعلیم یتھٕ پٲٹھؠ توٚہؠ پانہٕ مانان چھُو، توٚہؠ بٔنیٚو آسمانہٕ پیٚٹھٕ خدایہِ سنٛز بادشٲہی منٛز سٮ۪ٹھا اہم۔20بہٕ ونو زِ توٚہہِ پزن شریعت کٮ۪ن وۅستادن ہنٛدِ کھۅتہٕ اصل پٲٹھؠ قانون پالٕنؠ، تہٕ توٚہہِ پزِ دِلہٕ سٟتؠ تی کرُن یہِ صحیح چھُ۔ تہٕ توٚہہِ پزِ فریسیو کھۅتہٕ بہتر کٲم کرٕنؠ نتہٕ یِیِو نہٕ توٚہؠ زانہٛہ تہِ آسمانہٕ پیٚٹھٕ خدایہِ سنٛزِ حکمرٲنی تحت۔21"باقیو چُھ توٚہہِ ووٚنمُت زِ خداین کیا ووٚن سانیٚن آبا و اجدادن، "توٚہہِ پزِ نہٕ کانٛہہ تہِ مارُن، تہٕ "یودوے توٚہؠ کانہٛہ تہِ مٲرِوُن، سرکٲرؠ مشاورتٕکؠ رکُن ہیٚکن توٚہہِ سزا دِتھ "22مگر بہٕ چھُسو توٚہہِ ونان زِ اگر توٚہہِ کٲنسہِ ہُنٛد شرارت چھُو، خدا کرِ پانہٕ تُہنٛد فٲصلہٕ۔ اگر توٚہؠ کٲنسہِ ؤنِو، "ژٕ چھُکھ نابکار، اکھ سرکٲرؠ کونسل کرِ تُہنٛد فٲصلہٕ۔ اگر توٚہؠ کٲنسہِ ؤنِو، "ژٕ چُھکھ بیوقوف" خدا تراوِ توٚہہِ جہنم کِس نارس منٛز۔23لہٰذا ییٚلہِ توٚہؠ خدایہ سٕنٛدِ خٲطرٕ پنُن تحفہٕ قربان گاہس پیٚٹھ نیٚو، اگر توٚہہِ یاد چھُ زِ توٚہہِ چھُو کانہٛہ ناراض کوٚرمُت،24پنُن تحفہٕ تھٲیِو قربان گاہَس پیٚٹھ، تہٕ گۅڈٕ گٔژھِو تمِس نفرس نِش یمِس سٟتؠ توٚہہِ ناراضگی چھےٚ، تمِس نفرس ؤنِو زِ توٚہہِ چھُو پننِس کٔرمٕتِس پیٚٹھ افسوس، تہٕ تمِس نفرس ؤنِو توٚہہِ معٲفی دِنہٕ باپتھ۔ پتہٕ گٔژھِو واپس تہٕ کٔرِو خدایس پنُن تحفہٕ پیش۔25اگر کانٛہہ سٲتھی شہری توٚہہِ پیٚٹھ کانٛہہ غلط کٲم کرنُک الزام لگاونہٕ خٲطرٕ توٚہہِ عدالتس کُن پکناوِ، تیٚلہِ کٔرِو تمِس نفرس سٟتؠ جلدٕی محادٕ، عدالتس کُن أمِس نفرس سٟتؠ پکنس دوران۔ یہِ کٔرِو ییٚلہِ زَن وُنہِ تہِ وقت آسہِ تاکہِ سُہ نِیہِ نہٕ توٚہہِ منصفس برونہٛہ کُن، تکیازِ منصف ہیٚکہِ ؤنِتھ زِ توٚہؠ چھُو مجرم تہٕ توٚہہِ کٔرِو قٲد خانکِس رٲچھدرس حوالہٕ، تہٕ جیلر تھاوِ توٚہہِ جیلس منٛز۔26یہِ تھٲیِو ذہنس منٛز: یودوے توٚہؠ جیلس منٛز گٔژھِو، تیٚلہِ ہیٚکِو نہٕ توٚہؠ زانٛہہ تہِ جیلہٕ منٛزٕ نٮ۪بر نیرِتھ تکیازِ توٚہؠ ہیٚکِو نہٕ زانٛہہ تہِ سُہ سورےٕ ادا کٔرِتھ یہِ منصف سُنٛد ونُن چھُ۔ لہٰذا یاد تھٲیِو زِ پننٮ۪ن باین ستؠ تہِ روزِو امنہٕ سان"27"تۅہہِ چُھو بوزمُت زِ خداین ووٚن سانٮ۪ن اجدادن زِ زنا مہٕ کٔرِو۔28مگر بہٕ یہِ توٚہہِ ونان چھُس تہِ چھُ یتھٕ پٲٹھؠ: ہرگاہ کٲنٛسہِ مردس أکِس زنانہِ پیٚٹھ نظر پیٚیہِ تہٕ خوٲہِش وۅتلٮ۪س تمِس سٟتؠ بدکٲری کرنٕچ، خدا چُھ سمجھان زِ تٔمؠ نفرن چُھ گۅڈے پننِس ذہنس منٛز تمِس زنانہِ سٟتؠ زنا کوٚرمُت۔29اگر توٚہؠ گناہ کرُن یژھان چھُو تکیازِ توٚہہِ چھُو کینٛہہ چیٖز وُچھمٕتؠ، تیٚلہِ کٔرِو تِمن کُن وچُھن بند۔ ووٚنؠ گوو اگر توٚہہِ پننہِ دۅشوے أچھ تباہ پیٚن کرنہِ، تیٚلہِ کٔرِو تہِ۔ ہرگاہ تمہِ سٟتؠ توٚہہِ گناہ کرنہٕ نِشہٕ لوٚب روزنس منٛز مدد سپدِ، تیٚلہِ کٔرِو یہِ اگر توٚہہِ گناہ کرنہٕ نِش بچِتھ ہیٚکِو۔ اوٚن روزُن تہٕ گناہ بنٛد کرُن روزِ بہتر، تمہِ نِشہٕ زِ خداے ترایو توٚہہِ جہنمس منٛز ییٚلہِ توٚہؠ وُنہِ تہِ وُچھِتھ ہیٚکان چھُو۔30تہٕ اگر تُہنٛد اَکھ اَتھہٕ چُھ گناہ کران، تیٚلہِ کٔرِو پنُن اَتھہٕ استعمال کرُن بنٛد۔ اگر توٚہہِ پنُن اَتھہٕ ژٔٹِتھ ترٲوِتھ تہِ پیٚیہِ ژھٕنُن، یہِ کٔرِو اگر توٚہؠ گناہ کرنہٕ نِش بچِتھ ہیٚکِو۔ خدایہِ سٕنٛدِ خٲطرٕ پنُن پوٗرٕ جسم جہنمس منٛز تراونہٕ کھۅتہٕ روزِ پننہِ جسمُک اکھ حصہٕ راوُن بہتر"31"خداین چُھ صحیفن منٛز ووٚنمُت، "اگر کانٛہہ مرد پنٛنہِ خاندارنہِ طلاق دِوان چُھ، تمِس پزِ اکھ دستاویز لیٚکھُن یَتھ پیٚٹھ سُہ ونان چُھ زِ سُہ چُھ أمِس طلاق دِوان ۔32مگر ووٚنؠ بوزِو بہٕ کیا چُھسو توٚہہِ ونان: اکھ مرد ہیٚکہِ پننہِ خانٛدارنہِ طلاق صرف تمہِ وِزِ دِتھ ییٚلہِ تٔمؠ زنانہٕ بدکٲری کٔرمٕژ آسہِ۔ اگر کانٛہہ مرد پنٛنہِ خاندارنہِ بیٚیہِ کُنہِ وجہ سٟتؠ طلاق دِوان چُھ، تیٚلہِ چھےٚ سۅ بیٚیہِ کٲنسہِ سٟتؠ خانٛدر کرنہٕ سٟتؠ زنا کران۔ تہٕ سُہ شخص یُس أمِس سٟتؠ خانٛدر چُھ کران سُہ تہِ چُھ زنا کران"33"توٚہہِ چُھو یِتہِ بوزمُت زِ واریاہ برونہٛہ اوس لوٗکن خدایہِ سنٛدِ طرفہٕ وننہٕ آمُت، "توٚہہِ پَزِ نہٕ زانٛہہ تہِ اپُز ؤنِتھ قسم کرُن! أمہِ بجایہ پَزِ توٚہہِ پنُن وعدٕ تِتھٕ پٲٹھؠ کرُن زنتہٕ خداوند توٚہہِ برونہٛہ کنہِ پانے چھُ۔34مگر ووٚنؠ ونہٕ بہٕ توٚہہِ مزید بیٚیہِ کینٛہہ: کُنہِ تہِ وجہہ باپتھ مہٕ کٔرِو قسم! تتھ جایہِ مہٕ پرژھِو ییٚتہِ خدا آسمانس منٛز روزان چھُ سُہ کٔرِو توٚہہِ وعدٕ کرنٕچ ضمانت۔ ییٚتہِ امسنٛدِ تختٕچ بٔڑ نشست چھےٚ تہٕ ییٚتہِ پیٚٹھٕ سُہ تمام چیزن پیٚٹھ حکومت کران چھُ۔35یِنہٕ کانہٛہ قسم تُلِو یتھ وعدس پیٚٹھ زِ بُترات چھےٚ تہنٛز گواہ۔ یہِ مہٕ کرِو تکیازِ بُترات چھےٚ خدایہِ سنٛدین قدمن ہنٛز جاے۔ یِنہٕ یروشلم شہرُک قسم تُلِو، تکیازِ یروشلم شہر چھُ سٲنِس بٔڈِس بادشاہ خدایہِ سٕنٛز ملکِیت۔36یِنہٕ کینٛہہ کرنُک وعدٕ کٔرِو تہٕ اتھ سٟتؠ ؤنِو زِ وعدٕ پوٗرٕ نہ کرنہٕ کِس صوٗرتس منٛز ژٹِن تِم ژےٚ کلہٕ۔ توٚہؠ کِتھہٕ ہیٚکِو یوت بوٚڈ وعدٕ کٔرِتھ، ییٚلہِ نہٕ توٚہؠ پننہِ کلہٕ کہِ اکہِ مس والُک رنگ تہِ بدلاونس لایق چھُو۔37یودوے توٚہؠ کینٛہہ کرنچ کتھ کٔرِو، صرف ؤنِو، "آ۔ بہٕ کرٕ یہِ" یا "نَہ۔ بہٕ کرٕ نہٕ یہِ۔ "ہرگاہ توٚہؠ أمہ ہُریمانہٕ ؤنِو، یہِ چھُ تیٚلہِ توٚہہِ شیطان بدکار یتھٕ پٲٹھؠ ونہٕ ناوان۔38توٚہہِ چھُو بوزمُت زِ سانٮ۪ن جدن اجدادن آو وننہٕ۔ ہرگاہ توٚہہِ أکِس أچھ کانہٛہ ددارٕ واتناوِ، تیٚلہِ پزِ توٚہہِ تہِ تس أکسےٕ أچھ بدلہٕ أچھ ددارٕ واتناوُن۔ ہرگاہ توٚہہِ کانہٛہ أکِس دنٛدس ددارٕ واتناوِ، تیٚلہِ پزِ توٚہہِ تہِ تس أکسےٕ دنٛدس ددارٕ واتناوُن۔39ووٚنؠ تھٲیِو وارٕ کن زِ بہٕ کیا ونَو، "توٚہہِ کُنہِ قسمُک تکلیف واتناون وٲلِس کانہٛہ انتقام ہٮ۪نہٕ بجایہ دِیو تس تکلیف واتناونہٕ۔ تمِس روٚٹ کرنٕچ مہٕ کٔرِو کوشش تہِ۔ ہرگاہ کانہٛہ توٚہہِ أکِس بُتھؠ لبہِ چپاتھ لٲیِتھ بے عزت کرِ، دٲرؠ ووس بیاکھ بُتھؠ لب تہٕ یُتھ سُہ تتھ تہِ چپاتھ لایہِ۔40یودوے تہنٛز کُرتٕنؠ نِنہٕ باپتھ کانہٛہ توٚہہِ عدالت وان کھالہِ، تمِس دِیو پننہِ کُرتنہِ سٟتؠ پنُن پھٮ۪رن تہِ نِنہٕ یُس تُہنٛدِ باپتھ زیادٕ مۅلہٕ وول آسہِ۔41یودوے کانہٛہ رومی سپاہ توٚہہِ پنُن سامان تُلنہٕ باپتھ جبر کٔرِتھ أکِس میٖلس پکناوِ، تس سٟتؠ پٔکِو زٕ میٖل یہِ سامان ہٮ۪تھ۔42ہرگاہ توٚہہِ کانہٛہ کینٛہہ تہِ منگہِ تس دِیو تہِ۔ ہرگاہ کانہٛہ وۅزُم منٛگیٚو، تس دِیو تہِ یہِ سُہ منٛگان چھُو۔43توٚہہِ چھُو بوزمُت زِ خداین ووٚن سانٮ۪ن جدن اجدادن پننٮ۪ن اسرائیلی باین سٟتؠ تھٲیِو محبت تہٕ وۅپر لوٗکن سٟتؠ تھٲیو نفرت تکیازِ تِم چھِ تہنٛدؠ دشمن۔44ووٚنؠ بوزِو بہٕ کیا چھُسو ونان توٚہہِ۔ لول بٔرِو پننٮ۪ن دشمنن سٟتؠ تہِ تہٕ دوستن سٟتؠ تہِ۔ تہٕ تہنٛدِ باپتھ منٛگِو دعا یِم توٚہہِ دوکھٕ واتناونو۔45یہِ کٔرِو تاکہِ خدایس ہیٚوؠ بٔنِو یُس تُہنٛد بب خدا چھُ تہٕ آسمانس پیٚٹھ چھُ۔ سُہ چھُ سارنے سٟتؠ رحیم۔ مثالہِ پٲٹھؠ سُہ چھُ آفتابس سارنےٕ پیٚٹھ یکسان تاپھ تراوناوان۔ یودوے سُہ بد آسہِ یا نیک، سُے چھُ سارنے لوٗکن پیٚٹھ روٗد تراوان یِم تس فرمانبردٲری کران چھِ یا نافرمٲنی کران چھِ۔46یودوے توٚہؠ تٔسؠ لول بٔرِو یُس توٚہہِ اورٕ لول بریٚو، یِنہٕ خدایہِ سنٛدِ کُنہِ انعامُک توقع تھٲیو۔ ویکھٕتؠ کار کرن وٲلؠ لوٗکھ چھِ تِمنے لول بران یِم تِمن لول برن۔ توٚہہِ پزِ تہنٛدِ کھۅتہٕ رُت بنُن۔47یودوے توٚہؠ چھرا پننٮ۪ن یارن خوش آوے کٔرِو تہٕ خدایس منٛگِو تُہنٛدِ باپتھ رٕژر، توٚہؠ چھُو نہٕ تیٚلہِ باقےٕ لوٗکن ہنٛدِ کھۅتہٕ بہتر کینٛہہ کران۔ غٲر یہُودؠ یِم خدایہِ سنٛدؠ حکم چھِنہٕ مانان تہِ چھِ یی کران۔48لہٰذا پزِ توٚہہِ خدایس یُس آسمانن پیٚٹھ تُہنٛد بب چھُ، مکمل پٲٹھؠ مانُن تہٕ مازُن یتھٕ پٲٹھؠ سُہ چھُ توٚہہِ مانان تہٕ مازان۔
Bridge Connectivity Solutions Pvt. Ltd.