متی4
1اوٕ پتہٕ نیو خدایہِ سنٛدؠ فرشتن یسوعؔ أکِس وٲرانس کُن تاکہِ ابلیس آزماوِ تس۔2ژتجہن دوٚہن تہٕ رٲژن فاقہٕ ہوٚتُے روزِتھ اوس سُہ ووٚنؠ بۅچھہٕ ہوٚت۔3شیطان ، یُس یسوعسؔ آزماوان اوس، آس نکھہٕ تہٕ ووٚننس، "یودوے ژٕ پزی خدایہِ سُنٛد گوبر چھُکھ، ون یِمن کنٮ۪ن پننہِ باپتھ ژوٚٹ بنٕنؠ۔4مگر یسوعنؔ ووٚنُس، "نَہ۔ بہٕ کرٕ نہٕ یہِ۔ اوٕ کِنؠ زِ خداین چھُ مقدس کتابن منٛز لیٚوکھمُت، "اکِس شخصس پزِنہٕ صرف غذا کھیٚنہٕ خٲطرٕ زنٛدٕ روزُن۔ تِمن پزِ تتھ تہِ کن تھاوُن یہِ خداین ووٚنمُت چھُ۔5أمہِ پتہٕ نیٚو ابلیسن یسوعؔ یروشلم، خدایہِ سُنٛد خاص شہر۔ تٔمؠ تھوو سُہ امہِ ہیکلکِس تھٔدِس حصس پیٚٹھ6تہٕ ووٚننس، "یودوے ژٕ پزی خدایہِ سُنٛد گوبر چھُکھ، تراو ووٚٹھ بوٚن زمینہِ پیٚٹھ۔ ژےٚ وٲتی نہٕ کانہٛہ آزار۔ اوٕ کِنؠ زِ خداین چھُ مقدس کتابن منٛز ووٚنمُت، خدا دِیہِ پننٮ۪ن فرشتن ژےٚ رٲچھ کرنُک حکم۔بوٚن پیٚنہٕ برونٛٹھےٕ اتھہٕ دٲرِتھ رٹنے تِم،پادن چانٮ۪ن رٔچھؠ رٔچھؠ تھاون کھمبریو نِش"7مگر یسوعنؔ ووٚنُس، "نَہ، بہٕ ژھٕنہٕ نہٕ بوٚن وۅٹھ، اوٕ کِنؠ زِ خداین چھُ مقدس کتابن منٛز یِتہِ ووٚنمُت خداوند پنُن خدا مہٕ کرِوُن مجبور پنُن پان ثٲبت کرنہٕ باپتھ۔8پتہٕ نیٚو شیطانن سُہ أکِس تھٔدِس بالس پیٚٹھ۔ اتہِ پیٚٹھٕ ہٲونس دُنیہکؠ سٲری قوم تہٕ یِمن قومن ہنٛدؠ شاندار چیز تہٕ شٲنلہ۔9پتہٕ ووٚننس، "بہٕ دِمے ژےٚ یِمن سارنےٕ ہنٛز تاجدٲری تہٕ اتہِ موجود پرٛتھ کانہٛہ شانل" یودوے ژٕ مےٚ کُن نمکھ تہٕ مےٚ عبادت کرکھ۔10مگر یسوعنؔ ووٚنُس، "نہٕ بہٕ کرہٕ نہٕ چٲنؠ عبادت۔ شیطانہٕ گژھ ژٕ مےٚ نِش دوٗر۔ خداین چھُ مقدس کتابن منٛز ووٚنمُت، "بس چھُ خداوند تُہنٛد خدا یس توٚہہِ پزِ نمُن تہٕ بس تٔسؠ عبادت کرٕنؠ۔ 11اوٕ پتہٕ ژوٚل ابلیس تہٕ أمہِ ساعتہٕ آے یسوعسؔ نِش فرشتہٕ خدمتس۔12ییٚلہِ زن یسوعؔ یہُودیہ صوبس منٛز اوس، بپتسمہ دِنہٕ وٲلِس یوحنا سنٛدؠ شٲگرد آے أمِس نِش تہٕ بوونس زِ بادشاہ ہیرودیسنؔ بوٚر یوحناؔ جیل۔ اوے پھیور یسوعؔ واپس گلیلی کِس ضلعس منٛز ناصرت کِس قصبس کُن۔13مگر ناصرت تہِ ترووُن تہٕ ووت کفرنحوم روزنہٕ باپتھ۔ کفر نحُوؔم چھُ گلیلی ہنٛدِس سۅدرس نکھہٕ تتھِس علاقس منٛز یُس برونہٛہ کالہِ زبولون تہٕ نقتٲلؠ قبیلن ہنٛز ملکِیت اوس۔14سُہ گوو تور تاکہِ یسعیاہؔ نبی سُنٛد واریاہ کال برونہٛہ لیٚکھنہٕ آمُت سپدِ پوٚز۔15"زبولون تہٕ نقتٲلؠ علاقہٕ،سدرس کھن وتہِ ہنٛز تہٕ زمین، یردن دریاوس مشرقہٕ طرفہٕ،غٲر قومن ہُنٛد گلیلی زمین!16اتِکؠ یِم لوٗکھ چھِ تِتھؠ لوٗکھ یِم اکہِ وقتہٕ انہِ گٹِس منٛز بیہِتھ ٲسؠ، مگر ووٚنؠ چھُ تِمو گاش وُچھمُت تکیازِ ووٚنؠ چھِ تِم خدایس زانان۔تہٕ اتھ دوران ییٚلہِ تِم لوٗکن ہنٛدِس اتھ علاقس منٛز رودؠ یِم نہٕ خدایس زانان ٲسؠ، ووٚنؠ لوگُکھ گاش پرزٕناون۔ خداین ہوو ووٚنؠ پنُن آسُن تِمن"17أمہِ وقتہٕ ییٚلہِ زن یسوعؔ کفر نحومس منٛزے اوس، تٔمؠ لٲجؠ لوٗکن تعلیم دِنؠ۔ آسمانو پیٚٹھٕ دے سٕنٛز بادشٲہی چھےٚ نامزد سپدن واجنہِ۔ تہ سُہ کرِ تُہنٛد انصاف ییٚلہِ سُہ حکومت کرِ۔ گنہَو نِشہٕ روزِو پتھ۔18اکہِ دوٚہہ ییٚلہِ یسوعؔ گلیلی جیل کہِ بٹھہِ بٹھہِ پکان اوس۔ تٔمؠ وُچھ زٕ زٔنؠ اکھ شمعونؔ یمِس پتہٕ پطرس ناو پیٚو تہٕ نیاکھ امسُنٛد کونژھ بوے اندریاسؔ۔ یِم ٲسؠ پنٕنؠ گاڈٕ زال سۅدرس تراون وٲلؠ تکیازِ یِم ٲسؠ گاڈٕ ہٲنٛز تہٕ گاڈٕ رٹان تہٕ کٕنان۔19یسوعنؔ ووٚنُکھ، "ؤلِو پٔکِو مےٚ سٟتؠ، بہٕ ہاوَو لوٗکھ کِتھہٕ پٲٹھؠ چھِ رٹٕنؠ تہٕ پنٕنؠ شٲگرد بناوٕنؠ۔ بہٕ بناوَو توٚہؠ لوٗکھ زالس رٹنس قٲبل۔20یِمو ترٲو پنٕنؠ کٲم أتی یۅسہٕ یِم کران ٲسؠ تہٕ دراے أمسےٕ سٟتؠ۔21یُتھےٕ یِم تریٚشوَے دراے، یسوعنؔ وُچھ باقےٕ زٕ بٲے یعقوبؔ تہٕ یعقوبؔ سُنٛد کونٛژھ بوے یوحناؔ یِم ٲسؠ پننہِ ناوِ منٛز مٲلِس زبیدیسؔ سٟتؠ زال شیران۔ یسوعنؔ ووٚن یِمن پنٕنؠ کٲم ترٲوِتھ تٔسؠ سٟتؠ یِنہٕ باپتھ۔22یِمو تہِ ترٲو پنٕنؠ کٲم أتی تہٕ مول تہٕ ناو ترٲوِتھ دراے دۅشوے بارٕنؠ یسوعسؔ سٟتؠ۔23یسوعنؔ تُلؠ یِم ژوٚشوے گلیلی ہنٛدیٚو ساروے ضلعو منٛزؠ پانس سٟتؠ۔ سُہ اوس یہُودؠ عبادت گاہن منٛز لوٗکن تعلیم دِوان۔ سُہ اوس تمہِ خۅش خبری ہُنٛد تبلیغ کران زِ خدا کِتھٕ پٲٹھؠ چھُ حکومت کران۔ سُہ اوس تِمن سارنےٕ لوٗکن بٔلراوان یِم بٮ۪مار ٲسؠ۔24ییٚلہِ شام کٮ۪ن باقےٕ صوریہ علاقن منٛز روزن والیٚو تسنٛزِ کامہِ متعلق بوز، تِمو أنؠ پنٕنؠ مریض أمِس نِش یِمن مختلف بٮ۪مارِ آسہٕ، لوٗکھ یِمن سخ دگ ٲس، تہٕ لوٗکھ یِم بدروحن رٔٹؠ مٕتؠ ٲسؠ، لوٗکھ یِمن لٹھ ٲس، تہٕ یِمن فالٕج ٲس تہٕ یسوعنؔ بٔلرٲوؠ یِم سٲری۔25ووٚنؠ لوگ لُکہٕ ہجومو أمِس پتہٕ پتہٕ پکُن۔ یِم ٲسؠ گلیلی ہنٛدؠ لوٗکھ دہَو قصبو پیٚٹھٕ آمٕتؠ یروشلم شہرٕکؠ لوٗکھ، یہودیہِ صوبہٕ کیٚو باقےٕ حِصو پیٚٹھٕ آمٕتؠ لوٗکھ تہٕ یردن دریاوٕ کہِ مشرقہٕ پیٚٹھٕ آمٕتؠ لوٗکھ۔
Bridge Connectivity Solutions Pvt. Ltd.