متی1
1یہِ چھُ یسوع مسیحؔ سنٛدین اجدادن ہُنٛد نسب نامہٕ ، بادشاہ داوودؔ تہٕ ابرہامؔ سنٛدِس زُرِس یسوع مسیحؔ سنٛدین اجدادن ہُنٛد نسب نامہٕ۔2ابرہامؔ اوس اضحاقؔ سُنٛد مول۔ اضحاقؔ اوس مول یعقوبؔ سُنٛد۔ یعقوبؔ اوس یہُوداؔ سُنٛد تہٕ تسنٛدیٚن باین ہُنٛد مول۔ 3یہُوداؔ اوس مول فارصؔ تہٕ زارحؔ سُنٛد۔ یہنٛز موج تمرؔ ٲس۔ فارضؔ اوس مول حصرونؔ سُنٛد تہٕ حصرونؔ رامؔ سُنٛد مول۔4رامؔ اوس مول عِمیندآبؔ سُنٛد۔ تہٕ عِمیندآبؔ اوس مول نحسونؔ سُنٛد۔ نحسونؔ اوس مول سلمونؔ سُنٛد۔5سلمونؔ تہٕ تسنٛز آشِنؠ راحبؔ، اکھ غٲر یہُودؠ زنان، ٲسؠ بوعزؔ سنٛدؠ مول موج۔ بوعزؔ اوس عوبیدؔ سُنٛد مول۔ عوبیدؔ سٕنٛز موج ٲس رُوتؔ یۅسہٕ بیاکھ یہُودؠ زنان ٲس۔ عوبیدؔ اوس یسیؔ سُنٛد مول۔6یسیؔ اوس مول بادشاہ داوودؔ سُنٛد۔ داوودؔ بنیاو مول سلیمانؔ سُنٛد۔ سلیمانؔ سٕنٛز موج ٲس گۅڈٕ اوریا سٕنٛز آشِنؠ روزمٕژ۔7سلیمانؔ اوس مول رحُبِعامؔ سُنٛد تہٕ رحُبِعامؔ اوس مول ابیاہؔ سُنٛد۔ ابیاہؔ اوس آساؔ سُنٛد مول۔8آساؔ اوس یہوسفطؔ سُنٛد مول۔ ہوسفط ؔ اوس مول یوُرامؔ سُنٛد۔ یوُرامؔ اوس عُزیاہؔ سُنٛد اکھ جد۔9عُزیاہؔ اوس مول یوتامؔ سُنٛد۔ یوتامؔ اوس آخزؔ سُنٛد مول۔ آخزؔ اوس حزقیاہؔ سُنٛد مول۔10حزقیاہؔ اوس منسیؔ سُنٛد مول۔ منسیؔ اوس امون ؔ سُنٛد مول۔ امون ؔ اوس یوسیا ؔ سُنٛد مول۔11یوسیاہؔ اوس یکونیاہؔ تہٕ تسنٛدین باین ہُنٛد مول۔ یِم ٲسؠ تتھ وقتس منٛز ییٚلہِ بابلٕکؠ لشکرن اسرائیلی بٲنٛدؠ بنٲوِتھ بابل واتنٲوؠ۔ 12بابل کیٚو ییٚلہِ اسرائیلی بابل جلایہِ وطن کٔرؠ، یکونیاہؔ بنیاو سیالتی ایل ؔ سُنٛد مول۔ سیالتی ؔ اوس مول زربابلؔ سُنٛد۔13زربابلؔ اوس ابیہودؔ سُنٛد مول۔ ابیہودؔ اوس الیاقیمؔ سُنٛد مول۔ الیاقیمؔ اوس عازورؔ سُنٛد مول۔14عازورؔ اوس مول ضدوق ؔ سُنٛد۔ ضدوق ؔ اوس اخیمؔ سُنٛد مول۔ اخیمؔ اوس الیودؔ سُنٛد مول۔15الیودؔ اوس الِیعزرؔ سُنٛد مول۔ الِیعزرؔ اوس مول متانؔ سُنٛد۔ متانؔ اوس یعقوبؔ سُنٛد مول۔16یعقوبؔ یوسف ؔ سُنٛد مول۔ یوسف ؔ اوس اوش مریم ؔ سُنٛد تہٕ مریم ٲس یسوع ؔ سٕنٛز موج۔ یسوع گوو سُے یمِس مسیحؔ تہٕ ونان چھِ۔17یسوعؔ سنٛدین اجدادن ہُنٛد فہرست چھُ یہِ: ابرہامؔ سنٛدِ وقتہٕ پیٚٹھٕ داوود بادشاہس تام چھِ کُل ژۅداہ پُشت۔ مزید ژۅداہ پُشت چھِ داوودؔ سٕنٛدِ پیٚٹھٕ اسرائیلین ہنٛدِ بابل کٔڈِتھ ژھننس تام تہٕ اوٕ پتہٕ بیٚیہِ ژۅداہ مسیحؔ سنٛدِس زیٚنس تام۔18یہِ چھُ حال یُس یسوع مسیح سنٛدِ زیٚنہٕ برونہٛہ وقوع سپُد۔ امسنٛز ماجہِ مریمن اوس وعدٕ کوٚرمُت یوسفسؔ سٟتؠ نیتھٕر کرنُک۔ ووٚنؠ گوو پانہٕ وٲنؠ نیتھرٕ برونٛٹھےٕ لٔب سۅ تٔمؠ گۅبہِ کھور پاک روح سنٛدِ طاقتہٕ سٟتؠ۔19اوے کوٚر امسنٛدؠ بنن وٲلؠ خاندارن یوسفنؔ خداے سنٛدؠ احکام مٲنِتھ تس سٟتؠ نیتھٕر نَہ کرنُک فٲصلہٕ۔ ووٚنؠ گوو سُہ اوس نہٕ تس منٛدچھاوُن تہِ یژھان لوٗکن برونہٛہ کنہِ۔ اوے تروو أمؠ لۅتہِ پٲٹھؠ تس سٟتؠ نیتھرُک اِرادٕ۔20ییٚلہِ سُہ اتھ پیٚٹھ سنٛجیدگی سان سونچان اوس، خداوند سنٛدِ طرفہٕ سوزنہٕ آمٕتؠ أکؠ فرشتن کوٚر سُہ خوابس منٛز یِتھ حٲران۔ فرشتن ووٚنُس، "یوسفؔ! ہے داوودؔ سٕنٛدِ زُرِ۔ مہٕ کھوژ مریمس سٟتؠ نیتھٕر کرنس۔ تس منٛز زایُن لبَن وول چھُ روح القدس سنٛدؠ کِنؠ اتہِ۔21سۅ دِیہِ زایُن أکِس نیٚچوِس۔ چونکہِ یہِ چھُ سُے یُس لوٗکن گنہَو نِشہٕ نجات دِیہِ۔ أمِس کر ناو یسوعؔ"22یہِ سورےٕ سپُد اوٕ کِنؠ تاکہِ یسعیاؔ نبیس یہِ خداوندن ووٚنمُت اوس تہِ سپُد پوٚز۔ عیساہنؔ لیٚوکھ،23 "بوز، اکھ انۂرِش کور گژھِ گۅبہِ کھور تہٕ دِیہِ زایُن أکِس نیٚچوِس۔ تِم ونن تمِس عمانوایلؔ" یمیُک معنہِ گو، "خدا چھُ اسہِ سٟتؠ"24ییٚلہِ یوسف نٮ۪نٛدرِ ووٚتھ، تٔمؠ کوٚر تی یہِ خداوند سنٛدؠ فرشتن حکم کوٚرُس۔ تٔمؠ لوگ مریمس سٟتؠ اوش بٔنِتھ روزُن۔25ووٚنؠ گوو سُہ آو نہٕ تس نکھہٕ یوٚتام تٔمؠ پننِس گۅڈنکِس شُرِس زایُن دیُت تہٕ یوسفن کوٚر تس ناو یسوعؔ۔
Bridge Connectivity Solutions Pvt. Ltd.