متی2
1یسوعؔ زاو یہُودیہ صوبہٕ کِس بیت لحم کِس قصبس منٛز بادشاہ ہیرودیسؔ سنٛدِس حکومت کِس زمانس منٛز۔ یسوعؔ سنٛدِ زیٚنہٕ پتہٕ کینٛہہ کٲلؠ ؤلؠ ولؠ آیہِ کینٛہہ ستارٕ شناس دوٗر مشرقہٕ پیٚٹھٕ یروشلم شہرس منٛز۔ 2تِمو پرُژھ لوٗکن، "سُہ کتہِ یُس یہودٮ۪ن بادشاہ زاو؟ اسہِ وُچھ مشرقس منٛز اکھ تارُک یُس اسہِ تٔمسُنٛد زایُن باوان چھُ۔ اوے آے أسؠ تسنٛز عبادت کرنہِ" 3ییٚلہِ بادشاہ ہیرودیسنؔ بوز یِمن ہُنٛد ونُن، سُہ سپُد سٮ۪ٹھا فِکِر منٛد۔ یروشلم شہرس منٛز سپٕدؠ واریاہ لوٗکھ فِکِر منٛد۔4اوٕ پتہٕ أنؠ ہیرودیسنؔ سٲری سردار کاہن تہٕ یہُودؠ شریعتٕکؠ مٲہر ناد دِتھ سمبرٲوِتھ۔ تٔمؠ پرُژھ تِمن زِ نبیو کتھ جایہِ چھُ مسیحؔ سنٛدِ زیٚنٕچ پیش گویی کٔرمٕژ۔5تِمو ووٚن تمِس، "سُہ لبہِ زایُن بیت لحم ناو قصبس منٛز، یہُودیہ صوبس منٛز تکیازِ میکاہؔ نبین چھُ کرتام یہِ لیٚوکھمُت یہِ صحیفن منٛز،6"توٚہؠ یِم یہُوداؔ صوبہٕ کِس بیت لحم قصبس منٛز روزان چھُو، تُہنٛد یہِ قصبہٕ چھُ پزی اہم، تو کِنؠ زِ اتیُک اکھ زوٚن بنہِ حٲکم۔ سُہ کرِ اسرائیلس منٛز روزن والیٚن میانٮ۪ن لوٗکن اکِس پہلؠ سنٛدؠ پٲٹھؠ رہنمٲیی "7پتہٕ أنؠ ہیرودیس بادشاہن تِم ستارٕ شناس نفر سِرٕ پٲٹھؠ ناد سوزِتھ۔ تٔمؠ پرُژھ تِمن زِ سُہ صحی وقت ییٚلہِ تارکھ گۅڈنچہِ پھرِ نوٚن دراو۔8اوٕ پتہٕ ووٚننکھ، "نیرِو گژھِو بیت لحم تہٕ پورٕ پرٕژھ گٲر کٔرِو زِ یہِ نوزٲید کتہِ چھُ۔ ییٚلہِ توٚہؠ سُہ لٔبؠ وُن، واپس پھیرِتھ ؤنِو یہِ شیٚچھ مےٚ تاکہِ بہٕ ہیٚکہٕ پانہٕ تہِ گژھِتھ تور تمِس عبادت کرنہٕ باپتھ۔9ییٚلہِ یِمو نفرو بادشاہ سُنٛد عرض بوز، تِم دراے بیت لحم قصبس کُن۔ تِم سپٕدؠ حٲران۔ یہِ ڈیشِتھ زِ یُس تارکھ تِمو مشرقی ملکس منٛز وُچھاو سُے تارکھ چھُ تِمن برونہٛہ تتھ گرس پیٚٹھ زوتان یتہِ سُہ نوزٲید اوس۔ پتہٕ رود سُہ تارُک تتھ جایہِ ہیٚور کُن۔10ییٚلہِ تِمو تارُک ڈیونٛٹھ، تِم آے وۅلسنس تہٕ رودؠ أتھؠ تارکس پتہٕ پتہٕ پکان۔ 11چھیکرس لوٚب تِمو گرٕ تہٕ ژاے انٛدر تہٕ وُچھُکھ نوزٲید تہٕ تسنٛز موج مریمؔ۔ تِم نمییہِ تس برونہٛہ کنہِ تہٕ کٔرٕکھ تسنٛز عبادت۔ اوٕ پتہٕ کھولِکھ پنٕنؠ خزانہٕ ڈبہٕ تہٕ کٔرِکھ أمِس پیش تحفہٕ، سۅن، قٟمتی مُشکہٕ چاٹہِ، تہٕ مر۔12اوٕ پتہٕ دراے یِم تتہِ یتہِ بچہٕ اوس تہٕ کوٚر خداین تِمن خوابس منٛز ٹھاکھ بادشاہ ہیرودیسسؔ نِش گژھنس۔ اوے دراے تِم سیوٚدُے پنُن ملک ووٚنؠ گوو اور ینہٕ واجِنؠ وَتھ ژٔٹِتھ ہیژٕکھ بدل وَتھ۔13یِمن سِتارٕ شناس نفرن ہنٛدِ بیت لحم پیٚٹھٕ نیرنہٕ پتہٕ آو یوسفسؔ خداوند سٕنٛدِ طرفہٕ اکھ فرشتہٕ خوابس منٛز۔ تٔمؠ ووٚنُس، "وۅتھ تھوٚد، یہِ بچہٕ تہٕ امسنٛز موج تلُن سٟتؠ تہٕ ژل ملکِ مِصرس کُن۔ روز تٔتی یوٚتام بہٕ تتہِ نیرنہٕ باپتھ ونے۔ تکیازِ بادشاہ ہیرودیسؔ چھُے یمِس بچس ژھارنہٕ باپتھ سپاہ سوزن وول تاکہِ سُہ مارِ تمِس"14اوے سکھریو یوسفؔ أمہِ رٲژ؛ أمؠ تُل بچہٕ تہٕ امسنٛز موج تہٕ ژٔلؠ مِصر۔15 تِم رودؠ تتہِ بادشاہ ہیرودیس سنٛدِس مرنس تام تہٕ ادٕ ترووُکھ بیٚیہِ مِصر۔ یتھٕ پٲٹھؠ دراو پوٚز یہِ خداین ہوشایاؔ نبیس ووٚنمُت اوس لیٚکھُن، "مےٚ اوٚن ناد دِتھ پنُن گوبر مِصرٕ منٛزٕ کٔڈِتھ"16بادشاہ ہیرودیسنؔ لوگ پننہِ مرنہٕ برونہٛہ یہِ ژٮ۪تراوُن زِ تِمو نفرو چھےٚ تس تٲرمٕژ، تہٕ سُہ گوو نارُو نار۔ اوٕ کِنؠ زِ تٔمؠ سونچ یسوعؔ آسہِ وُنہِ بیت لحم قصبس منٛزے، ہیرودیسنؔ سوزؠ پنٕنؠ سپاہ تور تِمن سارنے بچن مارنہِ یِم زٕ یا أمہِ کم وٲنٛسہِ آسن۔ ہیرودیسنؔ لگوو حساب أمِس بچہ سنٛزِ عُمرِ ہُنٛد تِمن ستار شناس نفرن ہنٛدِس وننس پیٚٹھ زِ تِمو کر وُچھ سُہ تارُک گۅڈٕ۔17ییٚلہِ ہیرودیسنؔ یہِ کوٚر، تٔمہِ سٟتؠ دراو پوٚز نبی یرمیاہؔ سُنٛد ونُن، یہِ تٔمؠ واریاہ کال برونہٛہ لیٚوکھمُت اوس بیت لحم قصبس متعلق رامہس نکھہٕ:18رامہس منٛز ووٚتھ بڈِ ہُے زنانن ہُنٛد۔ راخِلؔ، بٔڈ دٮ۪د یِمن زنان ہنٛز، ٲس اوٚش ہاران پننٮ۪ن گُزریامتیٚن شُریٚن ہنٛدِ باپتھ۔ لوکو کٔر یِمن تسلی دِنٕچ کوشِش، مگر تِم ہیٚکؠ نہٕ کٔرِتھ، تکیازِ سٲری شُرؠ ٲسؠ مودؠ مٕتؠ۔ 19ہیرودیسؔ بادشاہ سنٛدِ مرنہٕ پتہٕ ییٚلہِ یوسفؔ تہٕ تسنٛد ٹبر وُنہِ مِصرس منٛزے اوس، خداوند سٕنٛدِ طرفہٕ آو فرشتہٕ یوسفس خوابس انٛدر۔ تٔمؠ ووٚن یوسفس،20"وۅتھ سکھٕر تہٕ تلوٗکھ پنٕنؠ بٲژ شُرؠ تہٕ تسنٛز موج تہٕ نیر ملکِ اسرائیلس کُن تہٕ بس تٔتی۔ تکیازِ یِم بچن مارُن یژھان ٲسؠ مودؠ ووٚنؠ"21اوے تُلؠ یوسفنؔ بچہٕ تہٕ تسنٛز موج پانس سٟتؠ تہٕ گےَ اسرائیل علاقس منٛز واپس۔22ییٚلہِ یوسفنؔ بوز زِ ارخلاوسؔ چھُ ووٚنؠ پننِس مٲلِس ہیرودیسؔ اعظم سنٛدِ بدلہٕ یہُوداؔ صوبُک حٲکم۔ سُہ کھوٚژ تور گژھنس۔ پتہٕ دِتؠ خداین یوسفسؔ خوابس منٛز ہدایت زِ سُہ کیا کرِ۔ اوے گَے یوسفؔ، بچہٕ تہٕ مریم گلیلی کِس ضلعس کُن۔23تِم گَے ناصرت قصبس منٛز بسنہٕ باپتھ۔ امیُک تر دراو یہِ زِ یہِ رسولو اوس یسوعسؔ متعلق کرتام ووٚنمُت، دراو پوٚز۔ لوٗکھ ونن، "سُہ چھُ ناصرت علاقُک"
Bridge Connectivity Solutions Pvt. Ltd.