مرقُس2
1کینٛہہ دوٚہہ گٔژھتھ ییٚلہِ یسُوعؔ کفرنحوم واپس آو، یہِ خبرَ پھٲلیِیہ زِ یسوعؔ اوس واپس آمُت تہٕ سُہ چُھ أکِس مخسوٗس گرِس منٛز ۔2یتہِ گےَ بٔڈس تعدادس منٛز لوٗکھ جَمع۔ تتہِ ٲس نہٕ دروازس نِشہ تہِ لتھ ترٚاوٕنسَ باتھ۔ یسُوعؔ اوس تِمنَ خدایہِ سٕنٛدِ کلامُک تبلیغ کران۔3تتھ گرس منٛز وٲتؠ کینٛہہ نفر اکھ فالجہِ لد شخص ہؠتھ۔ یمِسِ ژوٗر مہنیٚو ڈانجہ پؠٹھ پکناوان ٲسؠ۔4لوٗکن ہنٛدِ گنٛرٕہ کِنؠ ییٚلہِ نہٕ تِم یسُوعؔس نِشہ وٲتِتھ ہیٚکؠ، تمِو نہَنوو پیٚٹھؠ کنؠِ پش تہٕ ؤتھؠ وۅگہٕ ژٔٹتھ ڈٲنجہِ سان یہِ فالجہِ لد یسوعؔ ہس نِشہ۔5یمِنَ لوٗکن ہُنٛد ایمان زانتھ ووٚن یسوعنؔ أمِس فالجہِ لد شخصس، "گۅبریا چٲنؠ گناہ ٲئے معاف کرنہٕ!"6اتہِ أسؠ شریعت زانن وٲلؠ کینٛہہ شخص بہِتھ۔ تِم لٔگؠ پانس سٟتؠ سونٛچنہِ۔7 "یہِ کِتھٕ پٲٹھؠ ہیٚکہِ یہِ کتھ ؤنِتھ ہے کفُر چُھ! کسُ ہیٚکہ گناہ معاف کٔرتھ صرف خدایس بغٲر؟"8یسوعؔن زون یہِ ؤلؠ ؤلؠ پننس روحس منٛز تہِ یہِ یِم سونچان ٲسؠ۔ تٔمؠ ووٚن تِمنَ، "تہنٛدٮ۪ن دِلنَ منٛز کیازِ یِتھؠ خیال وتھان؟ مےٚ چُھنا کانٛہہ حق گناہ معاف کرنکؠ؟9کیاہ فالجہِ لدسَ یہِ ونُن چھا سُہلیےٕ، "چٲنؠ گناہ آے معاف کرنہٕ "یاہ "وۅتھ تھوٚد! تلُ پننؠ ڈٲنج تہٕ پکھ؟"10مگر بہٕ چُھسو توٚہہِ یہِ زٲنؠ راوُن یژھان زِ آدمؔ سنٛدِس گۅبرس تہِ چُھ زمیٖنہِ پٮ۪ٹھ گناہ معاف کرَنک اختیار، تمٔؠ ووٚن فالجہِ لدسَ،11"وۅتھ تھوٚد! تلُ پنٕنؠ ڈٲنجؠ تہٕ گژھِ گرٕ!"12سُہ مہنٛیو ووٚتھ تھوٚد۔ تجِن جلدٕے پنٕنؠ ڈٲنجؠ تہٕ دراو سارِنےٕ برونٛہہ کِنؠ گرٕ کنُ۔ یتھٕ کِنؠ گےَ سأری حٲران تہٕ لٔگؠ خدایہِ سنٛدؠ تعریف کرنہِ، تِمو ووٚن، "اسہِ چُھنہٕ یُتھ واقہٕ زانہٛہ تہِ وُچھمُت!"13یسُوعؔ ہن تروو کفرنہوم قصبہٕ تہٕ درٛاو بیٚہ گلیل کِنؠ سمندرٕ بٔٹھؠ بٔٹھؠ۔ تمِس نِشہ گےَ سیٹھاہ لوٗکھ جَمع، تہٕ دِژنَکھ تعلیم۔14یُتھُے سُہ برُونٛہہ کنُ پوٚک امؠ وُچھ حلفیؔ سُنٛد نیٚچو لاوی گُزرسَ پٮ۪ٹھ بہتٕھ۔ أمؠ ووٚن أمِس، "پکھ مےٚ سٟتؠ، بن میون چہلہٕ۔ "سُہ ووٚتھ تہٕ دراؤ یسُوعؔ ہس پتہٕ پتہٕ۔15یسوعؔ اوس لاوی سنٛدِ گرِ بتہٕ کھیوان۔ واریاہ ٲسؠ محصول جمع کران یمن مذہبی سردار گناہ گار سمَجھان أسؠ، تہٕ ٲسؠ یسُوعؔ ہسَ تہٕ انَدٮ۪ن چہلن سٟتؠ کھیٚوان چٮ۪وان۔ یَتھٕ پٲٹھؠ پٔکؠ یسُوعؔ ہسَ پتہٕ پتہٕ واریاہ لوٗکھ۔16ییٚلہِ شریعتہٕ کیو عٲلمَو، یِم فریسی فرقکؠ رُکنَ أسؠ، وُچھ یِمؠ گُذر وان گُۅنہگار لوٗکھ، یسُوعؔ ہس سٟتؠ کھٮیٚوان چیٚوان۔ تِمو پرُوژھ اہنَدین چہلنَ: یہِ کیازِ چُھ گُذر ہیٚنہ والیٚن گناہ گار لوٗکن سٟتؠ کھیٚوان چیٚوان؟"17پتہٕ یہٕ بوزِتھ پرُوژھ یسوعؔنَ تِمنَ نفرن یِمؠ یہُودؠ شریعت ہچھناوان أسؠ، "صحت منٛد لوٗکن چھنہٕ حکیمہٕ سنٛز ضرورت آسان۔ بلکہ چھےٚ بیمارن چھِ حکیٖم سنٛزٕ ضروٚرت آسان۔ بہٕ چُھس نہِ نیکو کارن ہنٛدِ باپتھ آمُت بلٔؠ کہ چُھس بہٕ گناہ گارن ہنٛدِ باپتھ آمُت۔"18أمؠ ساعتہٕ ٲسؠ یوحناؔ سنٛدؠ مرید؛ تہٕ فریسی فرقکؠ روزدار۔ تِم آیہِ تہٕ پرٕٛۅژکھ یسُوعؔ ہس، "یوحناؔ سنٛدؠ چہلہٕ تہٕ فریسی چھِ روزدار روزان ییٚلہِ زَن چٲنؠ چہلہٕ چھنہٕ روزدار روزان؟"19یسوعؔن ووٚن تِمن، "ییٚلہ اکھ نفر اکِس زنہِ سٟتؠ خاندر کران چُھ تہٕ تس سٟتؠ آمٕتؠ سالرٕؠ روزنا ییٚنہِ وٲلِس اندر روزدار یۅتام مہرازٕ یِمن سٟتؠ چُھ یمہ ہیٚکن نہٕ روزدر روٗزتھ۔20پوٚز تِم دوٚہہ یِن ییٚلہِ زن مَہبادشاہ یِمن نِش جُدا ییہِ کرنہٕ تِمن دوٚہُن روزن ادٕ تِم روزدار۔"21یسُوعؔ گوٚو تِمنَ ونان، "لوٗکھ چھِنہٕ پرانیٚن پلون نَوِ کپرٕچ دٔج لاگان، اگر وُنؠ لاگہوس یہِ ژَٹہِ پرٲنؠ ہنَ تہِ۔ نتیجہِ نیرہ پلوک زوٚد گژھِ بڈِ کھوٗتہٕ بوٗڈ!22یتھے پٲٹھؠ، لوٗکھ چُھنہٕ نوو شراب پرانیٚن مشقن منٛز بران، تکیازِ تازٕ شٮراب پھاٹناوہِ دالسَ تہٕ شٮراب تہِ ضایہِ تہٕ مشق تہِ۔ بہٚتھر چُھ نوٚو شٮراب برَو نویٚن مشقن منٛز!"23 سبتکہِ دوٚہہ ٲسؠ یسُوعؔ تہٕ تسٕنٛدؠ چہلہٕ فصلہٕ دار کھہَو مٔنٛزؠ پکان۔ امسنٛدیٚو چہلو لٲگؠ ہیٚلؠ ژَٹٔنؠ۔24کینٛہہ فریسی أسؠ یہٕ وچھان تہٕ تِمو ووٚن یسُوعؔ ہس، "یوٗر کنُ وُچھ یِم کیازِ چھِ سَبتٕکہِ دوٚہہٕ غلط کٲم کران؟ یۅسہ سبتکہِ دوٚہہ بلکل جٲیز چھِنہٕ۔"25یسوٗعؔ ہنَ ووٚن تِمنَ، "توٚہہِ چُھو نا زانٛہہٕ تہِ پورمت ییٚلہِ بادشاہ داوود تہٕ تمٔؠ سنٛدؠ سأتھی نفر بۅچھِ ۂتؠ ٲسؠ؟"26 تِمنَ دوٚہُن اوس ابیاترؔ زیٹھ کاہن، بادشاہ داوودؔ ژاو خدایہِ سنٛدِس گرس منٛز تہٕ منٛجن کینٛہہ ژۅچہِ۔ زٹھؠ کاہنن دِژٕ ٲمس تِمہٕ ژۅچہِ یِم خدایس برونٛہہ کنہِ نیازِ باپتھ تراوِمژِ آسکھ۔ شریعتہٕ متابق ہیٚکہ ہن یِم ژۅچہِ چھرا کاہن ہوٛت کھؠتھ! مگر داوودنؔ کھیٚیہِ کینٛہہ ژۅچہِ۔ تِمن تہِ دِژن یِم أمِس سٟتؠ ٲسؠ۔"27یسُوعؔ ہنَ ووٚن مزید تِمنَ، "خداین بنَۅو سبت اِنسانہِ سنٛدِ آرامہٕ خٲطرٕ۔ تِم بنَنووٛ نَہ یہٕ آرامُک دوٚہہ انسانہِ سٕنٛدِ باپتھ کانٛہہ بور۔28لہٰذا، صاف پٲٹھؠ، یہِ آدمؔ سُنٛد گۅبُر چُھ، سبت دوٚہُک تہِ خداوند!"
Bridge Connectivity Solutions Pvt. Ltd.