مرقُس1
1خدایہِ سُنٛد گۅبُر یسوعؔ مسیحؔ سنٛز رٕژ شیٚچھ گییہِ یتھٕ پأٹھؠ شروع۔2 یہِ رٕژ شیٚچھ گییہِ تمہِ وزِ شروٗع ییٚلہِ نبی یسعیاہنؔ سیٹھاہ برونٛٹھ لیٚوکھمُت اوس" وُچھِو، بہٕ سوزن پنُن رسول ژےٚ برٛونٹھےٕ۔ سُہ کرِ لوٗکن تیار تمہِ وقتہٕ خٲطرٕ ییٚلہِ ژٕ یکھ۔3 کُستام چُھ بیابانن منٛز ناد دِوان، "پنن پان کریو خداوندٕ سنٛزِ خوش آوے خٲطرٕ تیار۔ تہٕ بنٲیو تمؠ سنٛدِ باپتھ وتھ سیٚود۔4یمِس رسولس متعلق یسعیاہنؔ لیٚوکھ سُہ اوس یوحناؔ۔ یمِس لوٗکو ووٚن "بپتسمہ دنہٕ وول۔ "یوحناؔ آو بیابانن منٛز اردن دریاوس نکھٕ۔ سُہ اوس لوٗکن بپتسمہ دِوان، بیٚیہِ اوس توبہ تہٕ گناہ معاف کرنہٕ باپتھ بپتسمہ ہُک تبلیغ کران۔5پتہٕ وٲتؠ یہُوداؔ ملکٕکؠ تہٕ یروشلمٕکؠؔ ساری لوٗکھ أمِس نِش۔ تِم ٲسؠ پننؠن گناہن ہُنٛد اقرار کران تہٕ سُہ اۅس تِمن دریایہِ یردنس منٛز بپتسمہ دِوان۔6 یوحناہسؔ اوس اونٛٹ جژٔ ہُنٛد لباس لأگِتھ تہٕ کمبرس اوسس دالو ہوٚل گٔنڈِتھ، سُہ اوس ہالو تہٕ جنٛگلی مانٛچھ کھیٚوان۔7تٔمؠ کوٚر تبلیغ زِ" مےٚ پتہٕ ییہِ اکھ زوراور شخص یمِس نہٕ بہٕ کھۅربانہٕ صاف کرنَس تہِ لگہٕ۔8مےٚ دیتو توٚہؠ آبہٕ سٟتؠ بپتسمہ مگر سُہ دِیو توٚہہ پاک روح سٟتؠ بپتسمہ۔"9یہِ واقہٕ سپُد تِمن دوٚہُن ییٚلہِ یسوعؔ گلیل کِہ شہر ناصرت پٮ۪ٹھٕ آو تہٕ یوحناؔہن دیٚت تمِس دریایہِ یردنس منٛز بپتسمہ۔10یتھےٕ یُسوعؔ آبہٕ منٛزٕ کھوٚت تہٕ تمؠ وُچھ آسمانس چاکھ گژھان تہٕ خدایہِ سُنٛد روح ووٚتھ أمِس پؠٹھ کوتُر سنٛدؠ پٲٹھؠ۔11آسمانہٕ پؠٹھٕ آیہِ آواز، "ژٕ چُھکھ میٚون ٹوٹھ گۅبُر۔ بہٕ چُھسے ژےٚ سیٹھاہ خوش۔"12پتہٕ سوز خدایہِ سنٛدؠ روحَن یسُوعؔ وٲران علاقس کُن۔13سُہ رود بیابانن منٛز ژَتجہَن دوٚہُن، شیطانن اوس تس ورگہٕ لاوان۔ سُہ اوس وحشی جنَگلی جانورن منٛز تہٕ فرشتہٕ رودِس خدمتس۔14یوحناؔ سٕنٛدِ جیل برنہٕ پتہٕ ووت یسوعؔ گلیلس منٛز تہٕ خدایہِ سنٛدِ بجرٕچ رٕژ شیٚچھ لوٚگ لوٗکن وننہِ،15سُہ اوس ونان، "ٲخٕر کار ووت سُہ وقت۔ خدایہِ سنٛز بادشٲہی چھِےٚ نزدیک، توبہٕ کٔرِو رٕژِ شیٚچھہِ پؠٹھ پژھ۔"16اکہ دوٚہہ ییٚلہ گلیل سمندرکہ بٔٹھؠ بٔٹھؠ یسوعؔ پکان اوس تمٔس پیٚیہِ شمعونؔ تہٕ امسنٛدِس بٲیس، اندریاسسؔ پٮ۪ٹھ نظر، یِم سمندرس منٛز زال ترٛٲوِتھ گاڈٕ ٲسؠ رٹان: تِم ٲسؠ گاڈٕ رٹنس تہٕ کٕننس پؠٹھ پأنسہٕ کماوان۔17یسوعنؔ ووٚن تِمن، "یتھٕ پٲٹھؠ توٚہہ گاڈٕ چُھو جمع کران، ؤلِو مےٚ سٟتؠ، بہٕ ہیچھناوَو توٚہہ کتھٕ پٲٹھؠ چھِ لوٗکھ میٲنؠ شٲگرد بننہٕ خٲطرٕ جمع یوان کرنہٕ۔"18ؤلؠ ؤلؠ ژٕھنؠ تِمو زال ترٲوِتھ تہٕ درٛایہ یسوعؔ ہس پتہ پتہٕ۔19یُتھےٕ یسُوعؔ رژھا برُونٛہہ پوٚک تہٕ یسوعنؔ وُچھ زبیدیؔ سُنٛد نیٚچو یعقوبؔ، جیمس تہٕ أمؠ سُنٛد بوے یوحناؔ، یِم پننہِ ناوِ منٛز زال گنڈان ٲسؠ۔20یسُوعہنؔ دیٚتُ یَمن ؤلؠ ؤلؠ آلو تہٕ تمِو ترٛوو پنُن مول تہٕ کرایہِ پیٚٹھٕکؠ مُزور ہٮ۪تھ ناوِ منٛز أتی تہٕ درٛایہِ أمِس پتہٕ پتہٕ۔21یسوعؔ، گوٚو پطرسؔ، یعقوبؔ تہٕ یوحناؔ ہٮ۪تھ نزدیک کفرنحوم شہرس منٛز۔ تتہِ لاجؠ یسوعنؔ یہُودؠ عبادت خانس منٛز سبتکہٕ دوٚہہ تالیٖم دِنؠ۔22لوٗکھ گےَ أمؠ سنٛز تعلیم بوزِتھ حٲران۔ أمؠ ہیٚچھِ نٲوؠ أکِس زانن وٲلِس ووستادٕ سنٛدؠ پٲٹھؠ۔ أمؠ ہیٚچھِ ناو نہٕ یہُودؠ شریعت ہیٚچھناون والیٚن ھُندٕ پٲٹھؠ، یِم مختلف چیٖز دُھراون ٲسؠ یمؠ تِمن باقیو نفرو ہیٚچھنٲوؠ متؠ ٲسؠ۔23تہٕ تہندِس عبادت خانس منز اوس اکھ نفر یتھ ناپاک روح، تٔمؠ دِژٕ کریکہٕ۔24سُہ اوس ونان، "ہے! یسوعؔ ناصری، ژیے کیاہ چُھے اسہِ ناپاک روحن ستؠٕ! کیاہ ژٕ چُھکھا آمُت اسہِ مارنہِ؟ مےٚ چھِےٚ پتاہ ژٕ کسُ چُھکھ۔ ژٕ چُھکھ خدایہِ سُنٛد اکھ پاک روح۔"25یسوعؔن دِژ ناپاکھ روحس بےیزتی، تہٕ ووننس، "ژھۅپہٕ کر أمِس شخصس منٛز نیر نٮ۪بر!"26تہِ أمؠ ناپاک روحن دِژ أمِس دٕننَ تہِ بجہ کرٛیٚکہٕ دِتھ درٛاؤ أمِس منٛزٕ نٮ۪برَ۔27عبادت گاہس منٛز موجود سٲری لوٗکھ گےَ یہِ وُچِھتھ حٲران۔ نتِجہِ دراو، تِمو لوگ پانہٕ وٲنی بحث کرُن، "یہِ چُھ نہٕ اسہِ زانٛہہ بوزمُت! یہِ چُھ نہٕ صرف نٔوِس تہٕ حٲکمانہٕ انٛدازس منٛز تعلیم دِوان۔ سُہ چُھ ناپاک روحن تہِ حکم کران پتہٕ چھِ تِم أمؠ سُنٛد مانان۔"28تہٕ تمِس مُتعلِق پھٔلییہِ فوراً شہرت گلیلس أنٛدؠ پٔکؠ تمام علاقن منٛز۔29یہُودؠ عبادت خانہٕ منٛز نٮ۪برَ نیرتھ گییہِ تِم یعقوبؔ یوحناؔ ہس سٟتؠ سیٚودے شمعونؔ تہٕ اندریاؔ سُنٛد گرٕ۔30شمعونؔ سنٛز ہش ٲس بسترس منٛز تکیازِ سۅ ٲس بیمار تمِس اوس تپھ۔ کمؠ تام ووٚن دوٗرے پہن یسُوعؔ ہس تُہنٛدس بیمار آسنس متُلق۔31یسُوعؔ گوٚو أمِس نِشہ تہٕ اتھٕ رٔٹتھِ تجِن سۅ تھوٚد۔ تہٕ تمٔس ووٚتھ تپھ ؤلؠ ؤلؠ تہٕ لٔاجن یہٛنزٕ خدمت کرٕنؠ۔32تمہِ دوٚہہ شامن، آفتاب لوسنہٕ پتہٕ، انؠ انٛدؠ پٔکؠ علاقو منٛز لوٗکو سأری بیٚمار تہٕ کھوژِمٕتؠ لوٗکھ أمِس نِشہ۔33یہِ زَن تہِ باسیوو شہرٕکؠ تمام روزان وٲلؠ لوٗکھ گےَ شمعونسؔ گرَہ کسِ دروازس پٮ۪ٹھ جمَع۔34یسُوعؔ ہنَ کٔرؠ مختلف بیمارین منٛزٕ آوٕرؠ لوٗکھ ٹھیک۔ تم کٔرؠ واریہن لوٗکن منٛز بدروح نیٚبر۔ أمؠ دیت نہٕ بدروحن پانس متعلق کہنٛہ وننکُ اجازت تکیازِ تِمن ٲس پتاہ یہِ چُھ خدایہِ سنٛدِ طرفہٕ اکھ پاک ذاتھ۔35یسُوع ووٚتھ صبُہس انہ گٹہِ تہٕ درٛاو أکِس وٲران جایہِ کنُ تتہِ ٲسؠ نہٕ لوٗکھ۔ پتہٕ کوٚر تٔم دُعا۔36شمعونؔ تہٕ أمؠ سنٛدؠ سٲتھی درٛایہِ یسُوعؔ ہس ژھانٛڈنہِ۔37ییٚلہِ سُہ تِمو لوٛب تہٕ ووٚن ہس "ژیے چھےَ شہرُک ہرَ کانٛہہ نفر ژھانٛڈان۔"38یسُوعؔ ہن ووٛن تِمن، "اسہِ چھےٚ ضروٗرت یمہِ علاقہٕ کؠن باقیو شہرن منٛز تہِ گژھنچ تاکہِ بہٕ ہیٚکہٕ اصل پٲٹھؠ تتہِ تبلیغ کٔرتھ۔ امی سببہٕ آس بہٕ یوٗر۔"39لہٰذا، پھیٚرؠ تِم سٲرسےٕ گلیل کِس علاقس۔ تم کوٚت کۅٚت وٲتؠ، یسوعؔ اوس یہُودؠ عبادت خاننَ منٛز تبلیغ کران بیٚہِ بد روحن اوس لوٗکو منٛز نیٚبر نیرنس پؠٹھ مجبور کران۔40اکہ دوٚہہ آو اکھ مینٛدؠ لد بیمار یسُوعؔ ہسَ نِشہ۔ سُہ نمیو یسوعؔ ہس برُونٛہہ کنہِ تہٕ کوٚرن تمِس زارٕ پارٕ۔ "مہربٲنی کٔرتھ کرتہٕ مےٚ صاف، تکیازِ ژٕ ہیککھ مےٚ صاف کرتھ اگر ژٕ یژھکھ!"41یسُوعؔ ہسَ آو تسند عار۔ تٔم کوڈ پنن اتھٕ نٮ۪بر تہٕ ڈولن تمِس نفرس تہٕ ووننس، "یہِ چُھ میٲنؠ اِرادٕ ژٕ بلؠ راون، لہٰذا بل!"42دستی بلیوو سُہ نفر! تہٕ سُہ اوس نہٕ وُنؠ مینٛدؠ لد!43یسُوعؔ ہن کوٚر سُہ نفر خبردار زٕ ژٕ نیر یتہِ۔44 ووٚنس، "یتُھ نہٕ کٲنسہِ نکھ، بلکہ گژھِ پنُن پان ہاو کاہنس تاکہِ سُہ وچھِ آیا ژٕچھکھا مینٛدِ نِشہ آزاد گوٚمت کِنہٕ نہٕ۔ پتہ کرِ نذرانہٕ پیش یمک حکم موسیٰؔ ہن تِمن لوٗکن دِیتمت اوس یِمنَ خداین مینٛدِس شفأ کوٚر، یہِ بنہِ عُوامس نِشہ گواہی زِ ژٕ چُھکھ نہٕ وُنؠ مینٛدؠ لد۔"45أمؠ شخصن کٔرنہٕ یسُوعؔ سنٛدِس ہدایتس پٮ۪ٹھ عمل، سُہ دراو نیٚبر تہٕ لوگُن سارِنےٕ ونُن زِ یسوعنؔ کِتھہٕ پٲٹھٗؠ اوس سُہ ٹھیک کوٚرمُت۔ یسُوعؔ ہیٚوک نہٕ وۅنؠ نٔنؠ پٲٹھؠ کُنہِ تہِ شہرس منٛز ٲژتھ بلکہ روٚد وجارٕ جاٮ۪ن یتہِ نہٕ کانٛہہ بسان اوس۔ مگر لوٗکھ روٗدِ یسوعؔ ہس نِشہ تمہِ سارے علاقہٕ پؠٹھٕ یوان۔
Bridge Connectivity Solutions Pvt. Ltd.