مرقُس16
1بٹہٕ وارِ دوٚہہ شامن ییٚلہِ یہُودؠ سبتکُ دوٚہہ اند ووتمُت اوس، مگدلِینچ مریمؔن، یعقوبؔ سنٛزِ ماجہ تہٕ سلومیؔ ین ہوٗت مشکہٕ دار مرہم مٔلؠ یُس زنَ یسوعؔ سنٛدِس بدنس ملہٕ ہنَ۔ یمہٕ زنانہٕ آسہ یژھان دفن کرنکؠ یہُودؠ رسم پُوٗرٕ کرٕنؠ۔2ہفتٕکہِ گوڈنکؠ دوٚہہ، آتھوارِ سیٹھاہ سُلہِ، افتاب کھسنہٕ وزِ، آیہِ تِم مقبرس پؠٹھ سۅ مُشکہٕ دار مرہم ہٮ۪تھ۔3وتہِ وتہِ آسہ، تِم پانہٕ وٲنؠ أکِس اکھ ونان، "کسُ کرِ اسہِ مدد سۅ گوٚب کٔنؠ ڈُلناونس منٛز یوسہ مقبرس بتھِ چھِ؟"4توٚت وٲتِتھ، تِمو وُچھ تہٕ سُپدؠ حٲران زِ کمؠ تام ٲس سۅ کٔنؠ ڈلُنٲومژٕ، تکیازِ سۅ ٲس سیٹھاہ بٔڈ۔5تِم ژأیہِ مقبرس اندر تہٕ وُچُھکھ اکھ نوجوان نفر۔ تمِس ٲس سفید جامہٕ لٲگتھ تہٕ سُہ اوس گۅپھِ دٔچِھنؠ کنَ بہتھ۔ سۅ نظارٕ وُچِھتھ گوٚو تِمن خطرٕ پٲدٕ!6تٔمؠ نوجوان نفرن ووٚن تِمن، "مہ کھوٗژو! مےٚ چھِ پتاہ توٚہؠ چُھو ہن یسوعؔ تلاش کران، سُہ ناصرت شہرک نفر یُس پھہہِ کوٗٹس کھالنہٕ آو۔ پوٚز سُہ گوٚو دُبارِ زندٕ! سُہ چُھ نہٕ یتہِ! وُچِھو! یہِ چھِ سۅ جاۓ یتہِ تِمو تس سنٛز لاش تھٲو۔7یتہِ روزنہٕ بجایہ چُھ یہِ، پوٚز توٚہؠ گژھو تہٕ ونوِ تٔمؠ سنٛدین شٲگردن! خاص کٔرتھ، توٚہؠ وُنؠ زیوِ خُصوصن پطرسسؔ۔ تِمن ونیو، "یسوعؔ چُھ توٚہہ برونٛہہ برونٛہہ گلیل کس علاقس کنُ گٔژھان، تہٕ توٚہؠ وُچھوون سُہ تٔتی، یتھٕ کِنؠ زَن تٔمؠ توٚہہ برونٛٹھے ووٚنمت اوسو۔"8تِمہٕ زنانہٕ درایہِ نیٚبر کنُ تہٕ مقبرٕ نِشہ ژجہِ۔ تِمن ٲس تھرٕ تھرِ تکیازِ تِمہٕ آسہٕ کھۅژان، تہٕ تِمہٕ گےَ حٲران۔ مگر تِمو ووٚن نہٕ کٲنٛسہِ اتھ متعلق، تکیازِ تِمہٕ آسہٕ کھۅژان۔9 ییٚلہِ یسوعؔ آتھوارِ دوٚہہ صبُٲۓ، ہفتٕکہِ گۅڈ نکہ دوٚہہ، دُبارِ زندٕ گوٚو، سُہ گوٚو مگدلِینچہِ مریمؔس سارنےٕ برونٛہہ نظرِ۔ سۅ ٲس سۅ زنان یمِس تٔمؠ ستہِ لٹہِ بد روح نیٚبر کٔڈیمتٕؠ ٲس۔10سۅ گییہِ تِمن نِشہ یمؠ یسوعؔ ہس سٟتؠ ٲسؠ متؠ ٲسؠ، ییٚلہِ تِم ودان تہٕ رِوان ٲسؠ۔ تمہِ ووٚن تِمن یہِ تمہِ وُچھمُت اوس۔11پوٚز ییٚلہِ تمہِ تِمن ووٚن زِ یسوعؔ سُپد دُبارِ زندٕ تہٕ یہِ زن تمہِ وُچھمُت اوس، تِمن آیہِ نہٕ پژھےٕ یہِ تمہِ ووٚن۔12تمہِ دوٚہہ پتہٕ، یسوعؔ گوٚو پننیٚن دوٗن مریدن نظرِ یمؠ یروشلمہٕؔ پؠٹھٕ انٛدؠ پٔکؠ علاقن منٛز پنن گرٕ کنُ پکان ٲسؠ۔ تِمو پرزٕنوو نہٕ سُہ جلد تکیازِ سُہ اوس سیٹھاہ مختلف بوٗزنہٕ یوان۔13تِمو ییٚلہِ سُہ پرزٕنوو تٔمؠ گییہِ یروشلم واپس۔ تِمو ووٚن باقین مریدن یہِ سپدمُت اوس، مگر تِمو کوٚر نہٕ تتھ پؠٹھ یقین یہِ تِمو بوز۔14امہِ پتہٕ یسوعؔ گوٚو تِمن کٔہن شٲگردن نِشہ ظاہر ییٚلہِ تٔمؠ غذا کھیوان ٲسؠ۔ تٔمؠ کرٕ تِمن سخ ملامت، تکیازِ تِمو اوس تِمن خبرن پؠٹھ یقین کرنس سخ پٲٹھؠ اِنکار کوٚڑمُت یمو نفرو سُہ وُچھمُت اوس ییٚلہ سُہ دُبارِ زندٕ گومت اوس۔15تٔمؠ ووٚن تِمن، "گٔژھو سٲرؠ سےٕ دُنیاہس منٛز تہٕ کرو پرٛتھ کُنہِ چیزُک پرٛتھ کٲنسہِ نِش رژٕ شیچھِ ہُنٛد پرچار!16خدایہ دییہِ ہرَ کانٛسہِ نجات یُس تُہنٛدس پٲغامس پؠٹھ یقین کرِ تہٕ یمِس بپتسمہ دنہِ ییہِ۔ پوٚز یُس نہٕ تُہنٛدس پٲغامس یقین کرِ خدایہ دییہِ تمِس سزا۔17یِم رٕژ شیچھِ پؠٹھ یقین کرن تم ہاون معجزٕ۔ خاص پٲٹھؠ، تِم کٔڈن لوٗکن منٛز بد روح میٚانہِ طاقتہٕ سٟتؠ نیٚبر۔ تِم بولن تِم زبانہ یِم نہٕ تِمو ہیٚچھٕ مژے آسن۔18اگر تِم اکھ سرف تُلن یا تِم چؠن کانٛہہ آب یتھ زہر آسہ، تِمن واتہِ نہٕ کانٛہہ نۅقصان۔ خدایہ کرِ تِمن بیمار لوٗکن شفأ یِمن تِمؠ اتھٕ ڈالن۔"19 خداوند یسوعؔن پنہٕ نین شٲگردن سٟتؠ یہِ کالامہٕ کرنہٕ پتہٕ، خداین نیٚو سُہ ہؠوٗر آسمانس منٛز۔ پتہٕ بیوٗٹھ سُہ پننِس تختس خدایس دٔچِھنؠ کنِؠ، یس یزتچ سارِوۓ کھوٗتہٕ تھزٕ جاے چھِ، تمِس سٟتؠ بادشٲہی کرنہِ۔20یوٚت تام زَن شٲگردن ہُنٛد تعلق اوس، تِم گییہِ یروشلمہٕؔ نیٚبر، تہٕ کوٚرکھ پرٛتھ جایہ پرچار۔ ییٚلہِ تہِ تِم گییہِ، خداوند یسوعؔن کوٚر تِمن معجزٕ ہاونس منٛز مدد۔ یہِ کرنہٕ سٟتؠ، ہوو تٔمؠ لوٗکن زِ خدایہ سُنٛد پٲغام چُھ پوٚز۔
Bridge Connectivity Solutions Pvt. Ltd.