لوق8
1تمہِ پتہٕ کوٚر یسوعؔن تہٕ تمِسنٛدیو بہو شاگردو انٛدؠ انٛدؠ واریہن شہرن تہٕ گامن ہُنٛد سفر۔ یوٚت تہِ تِم گےَ، یسوعؔ رود لوٗکن رٕژ شیٚچھ بوزٕناوان تِمَن اصل خبر ؤنِتھ زِ خدا ہیٚکہ ہے تِہنٛزِ زِنٛدگی پٮ۪ٹھ حکومت کٔرِتھ۔2تِمن سٟتؠ آسہ کینٛہہ مستوراتہٕ تہِ سفر کران یِمن تٔمؠ بدروح نیٚبر کٔڈمٕتؠ تہٕ بیماریو نِشہ شفا بخشمُت اوس۔ تِمن منٛز ٲس مگدلِینی گامچ مریمؔ تہِ شٲمل۔ یسوعؔن ٲسؠ تمِس نِشہ ستتھ بدروح دور کٔرؠ مٕتؠ۔3تِمو زنیٚو منٛزٕ ٲس بیٛاکھ زٔنؠ یوانہؔ۔ سۅ ٲس خوزہؔ سنٛز آشِنؠ، یُس بادشاہ ہیرودیسؔنہِ دیوان خانُک اکھ مینیجر اوس۔ سوسناہؔ تہٕ بیٚیہِ واریاہ مستوراتہٕ آسہ تِمن منٛز شٲمل۔ تِمہٕ آسہ پننہِ ذٲتی پوٗنٛسو، کھٮ۪نہٕ تہٕ پلوَو سٟتؠ یسوعؔ ہس تہٕ تسنٛدین شٲگردن مدد کران۔4لُکہٕ ہجوُم آو أمِس انٛدؠ انٛدؠ سٔمِتھ اکہِ دوٚہہ۔ لوٗکھ ٲسؠ واریہو شہرو پؠٹھٕ یسوعؔ ہس وُچِھنہِ یوان۔ تٔمؠ وُن تِمن ورگہٕ پٲٹھؠ۔5اکھ کۅمیٛل دراو کینٛہہ بیول ہیٚتھ۔ سُہ گوٚو بیٚول زمینس ووان، کینٛہہ بیلؠ پٔھلؠ پیٚی وتہِ پؠٹھ۔ لوٗکو کٔرٕس لتہٕ مونٛڈ، تہٕ باقی کھیو جاناوارو۔6کینٛہہ بیٚول پٮیٚو پتھر ٹاسرِ میٚژِ پؠٹھ۔ یتُھےٕ سُہ بیوٛل کھوٚت، تِتھُے ہوکھ تکیازِ تِہنٛدین موٗلن ووت نہٕ کٔنیوو منٛزٕ سگےٕ۔7کینٛہہ بیوٛل پیٚو تتھ جایہِ یتہِ کٔنڈؠ دُپھن پنُن بیوٛل ہَریومُت اوس۔ نٔوی کٔنڈؠ زنٛڈ گےَ یِمن فصلہٕ کُلیٚن سٟتؠ سٟتؠ بٔڈؠ۔ طاقتور کنٛڈؠ زنٛڈو رٔٹؠ یِم فصلہٕ کُلؠ تل، لہٰذا بڑییہِ نہٕ فصلہٕ کُلؠ اصل پٲٹھؠ۔8مگر فصلُک کینٛہہ بیوٛل پیٚو زرخیز زمیٖنہِ منٛز۔ سُہ کھوٚت تہٕ دراس فصٕل یُس تمہِ بیٛالیُک ہتہٕ گنہٕ اوس۔ یہِ ؤنِتھ لوے تٔمؠ لوٗکن ہنٛدس ہجومس ناد، "توٚہہِ پزِ تتھ متعلق ہوشیاری سان غور کرُن یہِ مےٚ توٚہہِ وُنؠ ووٚن!"9شٲگرد آے پتہٕ پہن یسوعسؔ نِش تہٕ پرُژھہَس، "امہِ دلیلہ ہُنٛد مطلب کیاہ چُھ؟"10 پتہٕ ووٚن تٔمؠ، "خداین چُھو توٚہہِ خدایی بادشٲہی ہُنٛد پوشیدٕ راز زاننہِ باپتھ امتیٲزی حَق بخشمُت۔ مگر بہٕ چُھس ہَر أکِس سٟتؠ مثالن منٛز کتھٕ کران، اگرچہ تِم وُچھان چھِ، سمٕج چُھکھ نہٕ یوان، زِ تِم اگر بوزان چھِ مگر فِکرِ چُھکھ نہٕ ترٛان۔11امہِ دلیلہٕ ہُنٛد چُھ وُنؠ یہِ مطلب: بیول چُھ تمِچ نمایندگی کران یہِ خدایہ چُھ لوٗکن یژھان سمجھاون۔12یُس بیوٛل وتہِ پؠٹھ پیو سُہ چُھ تِم لوٗکھ ہاوان یِم خدایہِ سُنٛد کلام صرف مجان چھِ۔ یہِ چُھ شیطانہٕ سٕنٛدِ باپتھ آسان سپدان زِ سُہ چُھ یوان تہٕ تہنٛدیو دِماغو منٛزٕ چُھ سُہ کلام کٔڈتھ نِوان۔ امیٚک نتِیجہِ چُھ یہِ نیران زِ تِمن چُھنہٕ اتھ پؠٹھ ایمان روزان، تہٕ خدا چُھنہٕ تِمن بچاوان۔13یُس بیوٛل کُنہِ زمینس پؠٹھ پیٚو سُہ چُھ ہاوان زِ تِم لوٗکھ یِم خوشی سان خدایہِ سُنٛد کلام رٹان چھِ، تم چُھنہٕ پٔزؠ پٲٹھؠ پننؠن دلن پٮ۪ٹھ یقین کران۔ تِم چھِ صرف تتھ پؠٹھ کٔمےٕ وقتس ایمان تھاوان۔ یتھُے تِمن ظلم تہٕ سِتم در پیش یوان چھِ، تِم چھِنہٕ پتہٕ خدایس پؠٹھ یقین کران۔14یُس بیوٛل کنٛڈؠ دُپھن منٛز پیٚو، سُہ چُھ ہاوان زِ تِم لوٗکھ یِم خدایہِ سُنٛد کلام بوزان چھِ۔ ییٚلہِ تِم زندگی منٛز برونٛہہ پکان چھِ، تِم چھِ زندگی ہنٛزن پریشانیٚن، دولتس تہٕ عٲشہٕ عشرتس منٛز گرفتار سپدان۔ تمہِ کِنؠ چھِنہٕ تِم روحٲنی طور بالیغ سپدان۔15مگر یُس بیوٛل زرخیز زمیٖنس منٛز پیٚو، سُہ چُھ ہاوان زِ تِم لوٗکھ یِم خدایہِ سُنٛد کلام بوزان چھِ تہٕ پتہ چھِ پٔزؠ پٲٹھؠ تتھ مانان۔ تِم چھِ پۅختہٕ وعدہ کران تہٕ پتہٕ سُہ وعدہ برقرار تھاوان، تم چھِ صبرٕ سٕتؠ روحٲنی طور بالغ گژھان۔16یتھ متعلق کریو غور زِ ییٚلہِ لوٗکھ اکھ ژونگ زالان چھِ، تِم چھِنہٕ تتھ کُنہِ أکِس ٹوکرِ تل ژوٗرِ تھاوان۔ تِم چھِنہٕ تتھ أکِس پلنٛگس تل تھاوان۔ بلکہ چھِ تمہِ بجایہ تِم تتھ أکِس زوٗرِ پؠٹھ تھاوان۔ یُتھ زن کمرس منٛز پرٛیتھ کانٛہہ اژن وول گاش وُچِھتھ ہیٚکہ۔17یہٕ تمثیل چھےٚ یتھٕ پٲٹھؠ زِ پریتھ پوشیدٕ چیزٕ خاطرٕ ییہِ پرٮ۪تھ کانٛہہ وچھنہٕ خاطرٕ ظٲہر کرنہٕ۔ تہٕ کُنہِ دوٚہہ وُچھِ پرٛیتھ کانٛہہ سُہ چیز یُس ونہِ کیٚن پردس تل چُھ۔18لہٰذا یہِ بہٕ توٚہہِ ونان چُھس تہِ چُھو توٚہؠ پوٗرٕ یقینہٕ سان بوزان، تکیازِ ہرگاہ کٲنٛسہِ ایمان چُھ زِ خدایہِ سٕنٛدِ پزرُک، خدا دِییہ تمِس زیادٕ پہن سمجھنُک طاقت۔ ہرگاہ کٲنسہِ آسہ نہٕ ایمانےٕ زِ خدا چُھ پزر، خدا دِییہ نہٕ تمِس اکھ ذرٕ تہِ سمجھنُک طاقت یہِ سُہ سونچہِ زِ تٔمؠ چُھ سمجھمُت۔"19اکہ دوٚہہ آیہِ یسوعؔ سنٛز موج تہٕ تسنٛدؠ بٲے تمِس سمکھنہ، پوٚز تِم ہیٚکؠ نہٕ تمِس نزدیک وٲتِتھ تکیازِ لوٗکن ہُنٛد اکھ بوٚڈ ہجوم اوس تتھ مکانس انٛدؠ انٛدؠ گیرٕ کٔرِتھ یتھ منٛز سُہ اوس۔20پتہٕ ووٚن لوٗکو تمِس، "چٲنؠ موج تہٕ چٲنؠ بٲے چھِ نیٚبرٕ کنہِ ژےٚ سمکھنہٕ باپتھ کھڑا۔"21مگر تٔمؠ دِیُت تِمن جواب، "تِم یِم خدایہ سُنٛد کلام بوزان چھِ تہٕ تتھ پؠٹھ عمل کران چھِ، تِمے چھِ مےٚ ٹٲٹھؠ زنتہٕ میٲنؠ موج تہِ بٲے۔"22یسوعؔ ووٚتھ ناوِ دوٚیمہِ دوٚہہ تہٕ کھوٚت پننٮ۪ن شٲگردن سٟتؠ۔ تٔمؠ ووٚن تِمن، "بہٕ چُھس یژھان یمہِ جھیلہٕ کِس دوٚیمس بٔٹھس کُن ترُن۔ "لہٰذا لوگ تِمو جھیلس اپور ترُن۔23مگر ییٚلہِ ناو یتھ منٛز تِم سوار ٲسؠ، یسوعؔ شونٛگ۔ جھیلس آو زبردست واوٕ طوٗفان۔ ناو آیہِ آبہٕ سٟتؠ بٔرِتھ، تہٕ تِم اے خطرس منٛز۔24أتی آے یسوعؔ سنٛدؠ شٲگرد تمِس وُزٕناونہِ۔ تِمو ووٚن تمِس، "ووستاد! ووستاد! ٲسؠ سٲری ہیٚتنؠ مارٕ سپدٕنؠ!" سُہ ووٚتھ نینٛدرِ تہٕ تٔمؠ کوٚر واوس تہٕ خوفناکھ لہرن گرینٛز۔ واون کوٚر پھیرُن بنٛد، لہرٕ تہِ روزٕ ناوِ سٟتؠ مان چھاونہٕ نِشہ پتھ، پرٛیتھ کانٛہہ چیز سُپد خاموش۔25تٔمؠ ووٚن پتہٕ تِمن، "توٚہہِ کٔرو تِژھ کٲم زنتہِ توٚہہِ ایمانےٕ اوس نہٕ!" شٲگردن گییہ خبر تہٕ سَپدکھ تعجب تکیازِ تہِ اوس تمی وزِ سپدمُت۔ تِم لٔگؠ پانہٕ وٲنؠ پرژھنہِ، "یسوعؔ کُس ہیٚکہِ ٲسِتھ؟ تکیازِ سُہ چُھ واو تہٕ آبُک حکم تہِ دِوان، تہٕ تِم چھِ تٔمؠ سنٛز عبادت کران۔"26یسوعؔ تہٕ تسَنٛدؠ شٲگرد رودؠ ناوِ منٛز پکان تہٕ وٲتؠ تتھ علاقس منٛز ییٚتہِ جراسینی لوٗکھ روٗزان ٲسؠ۔ یہِ اوس تتھ سمندرس گلیل علاقہٕ سیدِ سیٚود دویمہِ طرفہٕ۔27ییٚلہ یسوعؔ ناوِ منٛزٕ بٔٹھس پؠٹھ کھوٚت، تمِس سمُکھ تتھ علاقس منٛز تمہِ شہرُک اکھ خاص شخص۔ أمِس شخصس منٛز ٲسؠ واریاہ بدروح۔ یہِ شخص اوس واریاہ کالہٕ پؠٹھٕ نہٕ پلو لاگان تہٕ نہٕ اوس گرِ دران۔ تمہِ بجایہ اوس سُہ وسِتھ گٲمژن قبرن منٛز روزان۔28ییٚلہِ تٔمؠ شخصن یسوعؔ وُچھ، تٔمؠ دژٕ کرؠکہٕ تہٕ تمِس برونٛٹھٕ کنہِ تھُوون بُتھ بوٚن کُن۔ تٔمؠ ووٚن بُلنٛد آوازِ منٛز، "ہے یسوعؔ، تھدِس خدایہِ سنٛدِ گۅبرٕ، ژےٚ کیاہ چُھے مےٚ سٟتؠ؟ بہٕ چُھسے ژےٚ زارٕ پارٕ کران، مےٚ متہٕ کرِ تہٕ عذاب!"29تٔمؠ شخصن ووٚن یہِ اوٕ موٚکھٕ تکیازِ یسوعؔ ہن اوس گۅڈے بد روحس أمِس نفرس نِشہ نیٚبر نیرنُک حکم۔ پتمہِ لٹہِ، اوس سُہ لوٗکو ہانٛکلو تہٕ ہتھکریو سٟتؠ بنٛد کوٚرمُت پتہٕ ٲسِس پورٕ رٲچھ رودمٕتؠ۔ تمہِ پتہٕ تہِ اوس بدروح تمِس اچانک پننہِ طاقتہٕ سٟتؠ زبردستی کٔڈتھ نِوان۔ پتہٕ اوس سُہ شخص یلہِ گژھان، سُہ بدروح اوس تمِس وجارٕ جاین واتناوان۔30پتہٕ پرُوژھ تمِس یسوعؔن، "ژےٚ کیاہ چُھے ناو "بدروحن دِیُت جواب، "میون ناو چُھ لشکر۔ "تٔمؠ ووٚن تکیازِ تمِس شخصس منٛز ٲسؠ واریاہ بدروح ژامٕتؠ۔31تِم بدروح رودؠ یسوعؔ ہس زارٕپارٕ کران تِمن متہٕ دِتہٕ تتھ سرٔنِس چہَس منٛز گژھنُک حکم ییٚتہِ خدا بد روحن سزا چُھ دِوان۔32تتہِ اوس نزدیکےٕ بالس پؠٹھ سورن ہُنٛد اکھ بوٚڈ کھیٚول گاسہٕ کھیٚوان۔ تِمو بدروحَو کوٚر یسوعؔ ہس زارٕ پارٕ زِ تِمن دِ تِمن سورن منٛز دٲخل گژھنُک اجازت، پتہٕ دِیُت یسوعؔن تِمن اجازت۔33ادٕ ترٛوو تِمو بدروحَو سُہ شخص یلہِ تہٕ گےَ سورن منٛز دٲخٕل، پتہٕ وۅتھ تِمن سورن ہُنٛد کھیٚول ژھرٹہٕ ژھرٹہٕ کران وسونِس بٔٹھس بوٚن تہٕ پھٔٹؠ جیلس منٛز۔34ییٚلہِ سورٕ رٲچھ نفر تہِ وُچھان ٲسؠ، تِم ژٔلؠ! تِمو دِژ انٛدؠ پٔکؠ کیٚن سارنےٕ لوٗکن تمِچ خبر۔35پتہٕ گےَ لوٗکھ تہِ وُچھنہِ یہِ سپدمُت اوس۔ ییٚلہِ تِم توٚت وٲتؠ ییٚتہِ یسوعؔ اوس، تِمو وُچھ سُہ شخص یمِس بدروح نیٚبر درامٕتؠ ٲسؠ، یسوعؔ سنٛدین پادن تل بہتھ۔ تِمو وُچھ سُہ پلو لٲگتھ تہٕ بیٚیہِ اوس سُہ ہوشس منٛز۔ تِمن گوٚو احساس زِ یسوعؔ کوتاہ طاقتور چُھ تہٕ تِمن گٔییہِ خوف۔36یمو لوٗکو سُہ واقہٕ وُچھمُت اوس تِمو ووٚن پتہٕ ینہٕ والیٚن لوٗکن زِ یسوعؔن کِتھہٕ پٲٹھؠ بچوو سُہ شخص یُس بدروحو رُٹمُت اوس۔37پتہٕ ووٚن أنٛدؠ پٔکؠ کیٚن مُلک جراسینن ہنٛدیٚو تمام لوکو تمِس تِمو نِشہ نیرنہٕ خٲطرٕ، تکیازِ تِم ٲسؠ واریاہ خوفہٕ سٕتؠ قبضہٕ کرنہٕ آمٕتؠ۔ لہٰذا ووت سُہ ناوِ منٛز تہٕ آو واپس۔38تِم نیرن وزِ کوٚر تٔمؠ نفرن یسوعؔ ہَس یہِ ونان زارٕ پارٕ یمِس بدروح نیٚبر درامٕتؠ ٲسؠ زِ، "مہربٲنی کٔرِتھ نِیو مےٚ پانس سٟتؠ!" پوٚز امہِ بجایہ، کوٚریسوعؔن تمِس یہِ ونان روخصت۔39"نَہ، گژھِ پنُن گرٕ تہٕ پرٛیتھ أکِس ون زِ خداین کوتاہ چُھ چانہِ باپتھ کوٚرمُت!" ادٕ درٛاو سُہ تہٕ تمام شہرٕ کیٚن لوٗکن ونُن زِ یسوعؔن کوتاہ کوٚر تہنٛدِ خٲطرٕ۔40ییٚلہِ یسوعؔ تہٕ تسَنٛدؠ شٲگرد سُہ جھیل پار کٔرِتھ واپس کفرنحوم وٲتؠ، لوٗکن ہنٛدؠ اکؠ ہجومَن کٔر تِہنٛز خوش آوے۔ تِم سٲری ٲسؠ تٔمؠ سُنٛد انتظار کران۔41ہیکل کیٚو سردارو منٛزٕ آو تمی وزِ یائِیرؔ ناوک اکھ نفر یسوعؔ ہس نکھٕ، سُہ جُکیٚو تمِس برونٛہہ کنہِ۔ تٔمؠ کوٚر یسوعؔ ہس زارٕپارٕ زِ سون گرٕ یہِ۔42تٔمؠ کوٚر یہِ اوٕ موٚکھٕ تکیازِ تمِس ٲس باہ ؤرِش کُنی کور یۅسہ مرنَس تیار ٲس۔ سُہ اوس یژھان زِ یسوعؔ بخشہِ تمِس شفا۔ وُنؠ ییٚلہِ یسوعؔ تمِس سٟتؠ درٛاو، واریاہ لوٗکھ گےَ تمِس انٛدؠ انٛدؠ جمع۔43تتھ ہجومس منٛز ٲس اکھ زٔنؠ یمِس بہَو ؤرؠ یو پؠٹھٕ اکھ بٮ۪مٲرؠ ٲس یمہِ سٟتؠ تس خوٗن جٲری اوس روزان۔ تمہِ اوس پنُن سورےٕ پونٛسہٕ پان بٔلراونہٕ باپتھ حکیمن پؠٹھ خرچ کوٚرمُت، مگر سۅ ٲس نہٕ کٲنسہِ ہنٛدؠ دٔسؠ بلیمٕژ۔44سۅ ٲس یسوعؔ ہس پٔتؠ کِنؠ تہٕ لوگُن تمسٕنٛدس جامَس دامنس اتھٕ۔ تمِس گوٚو خوٗن یُن یکدم بنٛد۔45یسوعؔن ووٚن، "مےٚ کٔمؠ لوٗگ اتھٕ "یسوعؔ ہس انٛدؠ انٛدؠ یِم ٲسؠ تِمو کوٚر تمِس اتھٕ لاگنہٕ نِشہ اِنکار۔ پطرسؔن ووٚن، "ووستاد، اتہِ چھِ واریاہ لوٗکھ ژےٚ انٛدؠ انٛدؠ جمع تہٕ اتہِ چُھ ژیٚل تہِ گژھان۔ ادٕ تِمو منٛزٕ آسہ کانٛسہِ توٚہہ سٟتؠ اتھٕ تہِ لوٚگمُت!"46پوٚز یسوعؔن ووٚن، "مےٚ چھےٚ پتاہ زِ کٔمؠ تام لوگ زٲنتھ مٲنتھ مےٚ اتھٕ، تکیازِ سُہ نفر بٔلراونُک طاقت درٛاو مےٚ منٛزٕ۔"47پتہٕ گوٚو تمِس زنہِ احساس زِ سۅ ہیٚکہِ نہٕ ژوٗرِ روٗزتھ۔ سۅ کانٛپنییہِ تہٕ آیہ یسوعؔ ہس نِش تہٕ کوٚرُن ادبہٕ سان تمِس برونٛہہ کٔنہِ سٕجدٕ۔ سارنےٕ لوٗکن برونٛہہ کٔنہِ ونُن زِ تمہِ کٔمہِ باپتھ لوگ یسوعؔ ہس اتھٕ تہٕ تمی وزِ کتھٕ پٲٹھؠ سپدُس ؤلؠ ؤلؠ شفأ۔48یسوعؔن ووٚن تس، "میٲنؠ کورؠ چٲنؠ ایمانن بچٲوکھ ژٕ۔ ووٚتھ نیر وُنؠ، خدا تھٲونےَ سلامت۔"49یسوعؔ اوس وُنہِ تمِس زنہِ سٟتؠ کتھےٕ کران زِ یائِیرؔ سنٛدِ گرِ پؠٹھٕ آو اکھ نفر تہٕ ووٚنُن یائِیرؔس، "چٲنؠ کور مویہِ۔ لہٰذا مٕہ کرِ ووستادٕ سُنٛد وقت ضایہِ۔"50یسوعؔن بوز یہِ، تٔمؠ ووٚن یائِیرؔس، "مہَ بر غم، صرف تھاو مےٚ پؠٹھ یقین، سۅ گژھِ دُبارٕ زندٕ۔"51ییٚلہِ سُہ گرٕ آنٛگنس منٛز ووت، یسوعؔن دِیُت نہٕ پطرسسؔ، یوحناہسؔ، یعقوبسؔ تہٕ کورِ ہنٛدس مٲلس ماجہِ ورٲے کٲنسہِ تہِ انٛدر اژنہٕ۔52سٲری لوٗکھ ٲسؠ اتہِ زورٕ زورٕ ودان زِ یہِ کور چھےٚ مومٕژ۔ مگر یسوعؔن وُن تِمن، "مہ ؤدِو! سۅ چھیٚنہٕ مومٕژ! سۅ چھےٚ نینٛدرِ!"53تہٕ تِمو ساروٕے لوٗکو تُروو تمِس اسُن تکیازِ تِمن ٲس پتاہ زِ سۅ کور چھےٚ مومٕژ۔54پوٚز یسوعؔن کٔر تس اتھس تھپھ تہٕ آلو دِتھ وُننَس، "کوٗری ووٚتھ تھوٚد!"55تس آیہِ ؤلؠ ؤلؠ زندگی واپس، سۅ ؤژھ تھوٚد۔ یسوعؔن ووٚن تِمن زِ أمِس دِیو کینٛہہ کھیٚنہٕ خٲطرٕ۔56تسُند مول موج سپدؠ وُچِھتھ حٲران، مگر یسوعؔن ووٚن تِمن زِ یہِ کینٛژھا سُپد تہِ وُنؠ زیٚو نہٕ وُنہِ کٲنسہِ۔
Bridge Connectivity Solutions Pvt. Ltd.