لوق2
1بیٚیہِ تٔتھؠ وقتس دوران، قیصر اوگوستُسنؔ یُس سٲرسےٕ رومسؔ پٮ۪ٹھ حکومت کران اوس، کوٚر اکھ فرمان جٲری زِ تہنٛدس سلطنتس منٛز روزَن وول ہرکانٛہہ نفر گژھہِ پنُن پان درج کرناوُن۔ تسُنٛد ناو گژھہِ سرکٲرؠ فہرستس منٛز درٕج یُس تتہِ روزان اوس۔2یہِ اوس گوٚڈنچہِ لٹہِ زِ أکؠ رومی حکمرانن کٔر پننِس سلطنتس منٛز مردم شمٲری۔ تِمو کوٚر یہِ تمہِ وزِ ییٚلہِ کورنیسؔ شامہٕ کِس صوبس حٲکم اوس۔3اوے پیٚو ہرکانٛسہِ پننِس پننِس آبٲئی شہرس منٛز پنُن ناو درج کرناونہٕ باپتھ گژھن۔4یوسفنؔ تہِ کوٚر پننِس آبٲئی شہرس کُن سفر، أمِس سٟتؠ ٲس مریمؔ، یۅسہ تمِس نیتھٕرؠ ٲس تہٕ ٲس گۅبِہ خۅر۔ تکیازِ یوسفؔ اوس داوود سنٛزِ زٲژ منٛزٕ، تِم درایہِ گلیل علاقکہِ ناصرت شہرِ پٮ۪ٹھٕ تہٕ یہُودیہ علاقہٕ کس بیت لحم شہرس کنُ کوٚرکھ سفر، یتھ داوود سُنٛد شہر تہِ ونان چھِ۔ یوسفؔ تہٕ مریمؔ گییہِ توٚت پنُن ناو عوٲمی فہرتس منٛز درج کرناونہٕ خٲطرٕ۔6ییٚلہِ تِم بیت الحم وٲتؠ، تتہِ ٲس نہٕ بہنہٕ خٲطرٕ جایی یتہِ اکثر زیارت کرن والیٚن ہُنٛد یُن گژھن اوس۔ لہٰذا پیٚو تِمن راتس چارواین ہنٛدس أکِس گانَس منٛز روزُن یتہِ تِم شونٛگؠ۔ ییٚلہ تم تتہِ ٲسؠ مریم سنٛدِ خلٲصی ہُنٛد وق ووت تہٕ تمِس زاو پنُن گۅڈنیُک نیٚچو۔ تٔمؠ روٚٹ سُہ پلون ہٕنٛدیٚن بڑیٚن پٹیٚن منٛز تہٕ تھووُکھ سُہ تتھ گُدامس منٛز یتہِ چارواین باپتھ کھیٚن اوس۔8تٔتھؠ راتس منٛز ٲسؠ کینٛہہ پٔہلؠ بیت الحمس نکھٕ کُھلہٕ مٲدانس منٛز ڈیرٕ دِتھ۔ تِم ٲسؠ پننِس جَبس رٲچھ کران۔9اچانک وُچھ تِمو خداوند سُنٛد اکھ فرشتہٕ پانس برونٛہہ کنہِ کھڑا۔ خداوند سنٛدِ طرفہٕ پیٚو تِمن ژۅپٲرؠ خداوندٕ سٕنٛدِ جلالُک گاش۔ تِم کھوٚژؠ سخ۔10مگر فرشتن ووٚن تِمن، "کھوژیٚو مٕہ! احتیاتہٕ سان بوزیٚو، تکیازِ بہٕ چُھس توٚہہِ اکھ رٕژ شیٚچھ وننہِ آمُت! یہِ شیٚچھ چھےٚسارنےٕ لوٗکن ۂنٛدِ باپتھ، تہٕ پرٛیتھ کانٛہہ سپدِ شادمان!11تِمن گژھِ بٔڈ خوشی، تکیازِ از زاو داوود سنٛدِس شہر بیت الحمس منٛز اکھ شخص یُس توٚہہِ گُنہَو نِشہ نجات دییہِ! سُہ چُھ مسیحؔ، خداوند!12تہٕ تُہنٛدِ خٲطرٕ چُھ یہِ اکھ نشانہٕ۔ ہرگاہ توٚہؠ بیت الحم گٔژھیو، توٚہؠ لٔبوون سُہ تتہِ أکِس زچہِ ہُرِس ؤلِتھ تہٕ سُہ آسہ چارواین ہنٛزِ نِگیہ منٛز۔"13اچانک گییہِ فرشتن ہنٛز اکھ جماتھ باقین فرشتن سٟتؠ آسمانس پؠٹھ اظہار۔ تِم سٲری ٲسؠ خدایہِ سنٛدؠ تعریف کران یہِ ونان،14"آسمانہِ بالا ہَس منٛز کرن سٲری فرشتہٕ خدایہِ سنٛدؠ تعریف! تہٕ زمینہِ پیٚٹھٕکؠ سٲری لوٗکھ یِم خدایس خوش کران چھِ روزَن امنہٕ سان خدایس سٟتؠ، تہٕ اکھ أکِس سٟتؠ تہِ!"15ییٚلہِ فرشتہٕ تِمن نِش دراے تہٕ کٔتھؠ آسمانس کُن واپس، پہلیٚو وُن اکھ أکِس، "اسہِ پزِ وُنؠ بیت لحم گژُھن تہٕ یہِ حٲران کرن وول واقہٕ وچُھن یُس سپدیو، یتھ متعلق خداوندن اسہِ ووٚن!"16أتی گےَ تِم جَل جَل، تہٕ ییٚلہِ تِمو سۅ جاے لٔب یتہِ مریمؔ تہٕ یوسفؔ ٹھہریمٕتؠ ٲسؠ، تِمو وُچھ سُہ بچہٕ یُس چارواین ہنٛزِ نِگیہ منٛز اوس۔17تمِس وُچھنہٕ پتہٕ، ووٚن تِمو پرٛتھ أکِس تہِ یہِ خداوندن تِمن أمِس بچَس متعلق ووٚنمت اوس۔18تِم سٲری لوٗکھ یِم بوزان ٲسؠ تِمو سونچ زِ یہِ پہلیٚو تِمن ووٚن اوس حٲران کرٕوُن۔19پوٚز مریمؔن تھاوِ تِم سارے کتھٕ احتیاتہٕ سان یاد تہٕ تِمن متعلق روز لگاتار سونچان۔20پٔہلؠ گے واپس، نیٖرین کُن یتہِ تِمن پنٕنؠ جَب ٲسؠ۔ تِم روٗدؠ خدایہِ سٕنٛدِس بُجرس متعلق کتھٕ کران تہٕ تمِس ٲسؠ تِمن چیٖزن متعلق تعریف کران یہِ تِمو بوز تہٕ وچُھکھ۔ ہرکانٛہہ چیٖز اوس برابر تی یہِ فرشتو تِمن ونمُت اوس زِ یتھ کِنؠ آسہ۔21 زیٚنہٕ پتہٕ ٲٹھِ دوٚہؠ، کرنو تِمو تس ختنہٕ تہٕ تمِس آو یسوعؔ ناو تھاونہٕ۔ یہِ اوس سُہ ناو یُس فرشتن مریمؔس تٔمؠ سُنٛد حمل لگنہٕ برونٛہہ ونمُت اوس۔22 مریمؔن تہٕ یوسفؔن کوٚر تِمن دوٚہُن انتظار یِم موسیٰؔ سٕنٛدِ شریعتہٕ مطٲبق اکھ بچہ زیٚنہٕ پتہٕ آب شیرنہٕ باپتھ ضروری ٲسؠ۔ پتہٕ اوٚن تِمو سُہ یروشلم یتہِ زن سُہ خداوندس ہیکلس منٛز پیش ییہِ ہےکرنہٕ۔23 تِمو کوٚر یہِ خداوند سٕنٛدِ شریعتہٕ مطٲبق، یُس ونان چُھ، "توٚہہِ پزِ ہرکانٛہہ لٔڑکہٕ یُس گۅڈٕ زیوِ خداوندس آیہ تن تھاوُن۔"24 تِمو دِژ تتہِ سۅ قربٲنی یۅسہ خداوندن والدینن نو زادٕ شُر زیٚنس متعلق ونمٕژ ٲس، "قُمرؠ جوٗرؠ یا زٕ کوتُر بچہ۔"25تمہِ وقتہٕ اوس یروشلمسؔ منٛز اکھ شخص یمِس شمعونؔ ناو اوس۔ سُہ اوس تیِ کران یہِ خدایس خوش کران اوس تہٕ خدایہِ سنٛدِس شریعتس پؠٹھ اوس پکان۔ سُہ اوس بیتٲبی سان خدایس مسیحؔ سوزنہٕ خٲطرٕ انتظار کران یُس اسرائیل کین لوٗکن حوصلہٕ افزایی کرِہے۔ پاک روح اوس تمِس رہبری کران۔26پاک روحن اوس تمِس برونٛہہ بووٕمُت زِ یۅتام نہٕ سُہ خداوندٕ سُنٛد مسیحؔ وُچھ تۅتام مَرِ نہٕ سُہ۔27اوے واتنوو پاک روحن شمعونؔ ہیکل کس آنٛگنس منٛز۔ سُہ اوس تٔتؠ ییٚلہِ یوسفنؔ تہٕ مریمنؔ یسوعؔ انٛدر ژون یُتھ زن تِم تسٕنٛدِ باپتھ سۅ تقریب انجام دِہَن یمیُک خداین شریعتس منٛز حکم کوٚرمُت اوس۔28ییٚلہِ شمعوؔنن یسوعؔ وُچھ، تٔمؠ روٚٹ سُہ کۅچھِ منٛز تہٕ کوٚرن خدایہِ سُنٛد شُکر ادا، تہٕ پتہٕ ونُن،29"خداوندٕ، ژےٚ کوٚڑُتھ مےٚ سٟتؠ کوٚرمُت وعدہ پورٕ، بہٕ چُھس چون سیٹھاہ مشکوٗر مےٚ دِ وُنؠ مَرنہٕ۔30تکیازِ مےٚ وُچھ سُہ یُس ژےٚ لوٗکن نجات دِنہٕ باپتھ سوٗزمُت چُھتھن،31سُہ اکھ یُس لوٗکن ہنٛدِ وُچھنہٕ خٲطرٕ تیار کوٚرمُت چُھتھن۔32 سُہ آسہ اکھ گاش ہیو یُس باقین قومن چون پزر ہاوِ۔ سُہ ہاوِ چانین اسرائیل کیٚن لوٗکن ۂنٛدِ خٲطرٕ چٲنؠ کٟتیاہ شاندار منصوبہ۔"33یسوعؔ سنٛدؠ مول تہٕ موج گییہِ حٲران تتھ پؠٹھ یہِ شمعوننؔ تمِس متعلق ووٚن۔34 تہٕ شمعوننؔ کوٚر تِمن دُعا، تہٕ ونُن یسوعؔ سنٛزِ ماجہِ، مریمؔس، "اصل پٲٹھؠ تھاو یاد یہِ مےٚ ووٚن: خداین چُھ اِرادٕ کوٚرمُت زِ، یمِس بچہٕ سٕنٛدِ سببہٕ کرَن اسرائیل لٕکؠ واریاہ لوٗکھ خدایس اِنکار تہٕ واریاہ لوٗکھ انُن خدایس ایمان۔ سۅ آسہ اکھ نشٲنی خدایہِ سنٛدِ طرفہٕ زِ واریاہ لوٗکھ کرن برخلٲفی۔35یۅتام چون تعلق چُھ، لوٗکھ کرن تمِس پؠٹھ تشدُد تیوتاہؔ ژٕ گژھکھ غمگیٖن تہٕ گژھی محسوس زنتہٕ آسہ تلوار چٲنس روحس گوٚد کران۔ مگر یہٕ چُھ ضروری زِ سُہٕ ہیٚکہ واریہن لوٗکن ہندین دِلن منز دِلٕکؠ خُفیہ گناہ ظٲہر کٔرِتھ۔"36بیٚیہِ ٲس تتہِ اکھ نبیہؔ ہیکل کس آنٛگنس منٛز یمِس حنَاہ ناو اوس۔ یۅسہ واریاہ بُڈٕ ٲس۔ سۅ ٲس فنوایلؔ سنٛز کور، یۅسہ آشرؔ قبیلہٕ منٛزٕ ٲس۔ لوکچارسےٕ منٛز اوسُکھ تمِس خاندر کوٚرمُت، سۅ ٲس روٗزمٕژ پنِنس رٲنِس سٟتؠ سَتن ورؠ یَن، پتہٕ اوس تٔمؠ سُنٛد خاندار گُزریامُت۔37تمہِ پتہٕ، روز سۅ مونٛڈ ژوِشیتن ورؠ یَن پیٚٹھی زندٕ۔ سۅ ٲس ہمیشہِ ہیکلس منٛزےٕ آسان، سۅ ٲس روزدر روٗزتھ ہر وزِ راتس دوٚہس خدایہ سنٛز عبادت کران۔38 تمی ساعتہٕ وٲژ حنَاہؔ، یوسفؔ، مریمؔ تہٕ تِہُنٛد بچہٕ۔ حناہؔ ہن لوگ خدایہِ سُنٛد شُکرانہٕ ادا کرُن، تمِس اولادٕ سنٛدِ خٲطرٕ۔ تمہِ پتہ روز سۅ باقین واریہن لوٗکن سٟتؠ کتھ کران یِم خدایہ سنٛدِ طرفہٕ مسیحؔ ینَس پراران ٲسؠ یُس اسرائیل کین لوٗکن نجات دِیہ ہے۔39ییٚلہِ یوسفنؔ تہٕ مریمنؔ خداوندٕ سٕنٛدِ شریعتہٕ مطٲبق سُہ ہر کانٛہہ چیز انجام دِیت یہِ والدینن گوڈٕ نیُک اولاد زیٚنس پؠٹھ کرُن اوس۔ پتہٕ درٛایہِ تِم گلیل علاقہٕ منٛزٕ پنُن شہر ناصرت کنُ واپس۔40سُہ بچہٕ ہیٚوتُن بوٚڈ بوٚڈ گژھُن، سُہ بنیاو طاقتور تہٕ سیٹھاہ گاٹل۔ خدا اوس تس سنٛزِ زندگی منٛز موجود۔41یسوعؔ سنٛدؠ والدین مول تہٕ موج ٲسؠ پرٛیتھ ؤرؠ یہِ فَسح عید مناونہٕ خٲطرٕ یروشلم گژھان۔42ییٚلہِ یسوعؔ باہ وُہر ووت، تِم سٲری گےَ یکجا بٔڈس دوٚہس یعنی فسح عیز ہنٛدس موقس پؠٹھ یروشلم۔43ییٚلہِ بوٚڈ دوٚہہ مناونٕچ تقریب انٛد وٲژ، یسوعؔ سٕنٛدؠ مول تہٕ موج ٲسؠ گرٕ واپس وٲتؠ مٕتؠ، مگر تِہُنٛد نیٚچو، یسوعؔ رود پتھ یروشلمس منٛز۔ تسٕنٛدِس مٲلِس ماجہِ روزنہٕ خبرےٕ زِ سُہ چُھ وُنہِ تٔتی۔44 تِمو سونچ زِ سُہ آسہ باقی نفرن سٟتؠ پکان۔ پوٚز اکہ دوٚہُک سفر طے کرنہٕ پتہٕ لوگ تِمو سُہ پننؠن رشتہٕ دارن تہٕ دوستن نِشہ ژھانٛڈُن۔45ییٚلہِ نہٕ تِمو سُہ لوٚب، تِم گےَ تمِس ژھانٛڈنہِ واپس یروشلم۔46ترٛیہِ دوٚہؠ یروشلمہٕؔ واپس نیرتھ، لوٚب تِمو یسوعؔ ہیکلس منٛز۔ سُہ اوس یہُودؠ مذہبی ووستادن منٛز بہتھ۔ سُہ اوس تِمن سوال کران تہٕ تہنٛز تعلیم بوزان۔47سٲری بوزَن وٲلؠ لوٗکھ ٲسؠ تہنٛدس کلامَس پؠٹھ تعجب کران زِ سُہ کوتاہ سمٕجدار اوس تہٕ کٲتیاہ معقول جواب اوس تِمن سوالن دِوان یم وۅستاد تس پرٛژھان ٲسؠ۔48ییٚلہِ سُہ پنٕنؠ مٲلؠ ماجہِ وُچھ تِم گےَ حٲران۔ تس سنٛزِ ماجہِ ووٚن تمِس، "میٚانہِ گۅبرا، ژےٚ پزی نہٕ یہِ اسہِ سٟتؠ کرُن۔ میٚون بوز! چون مول تہٕ بہٕ گٔیَس سیٹھاہ پریشان أسؠ چِھتھ ژٕ ژھپہِ ژھپہِ ژھاران!"49تٔمؠ ووٚن تِمن، "بہٕ چُھس حٲران زِ توٚہہِ کیاہ ضرورتھ ٲس بہٕ ژھارنچ۔ مےٚ سونچ توٚہہِ آسہ پتاہ زِ مےٚ پیٚو ضرورت پنہٕ نِس مٲلؠ سنٛدِس گرس منٛز تمِس متعلق زاننہٕ خٲطرٕ روزُن۔"50پوٚز تِمن توٚر نہٕ تمیُک مطلب فِکرِ یہِ تٔمؠ تِمن ووٚن۔51پتہٕ گوٚو سُہ تِمنےٕ سٟتؠ ناصرت شہرس کُن واپس، سُہ رود تِمن ہمیشہِ فرمانبردار۔ تس سنٛز موج روز تِمن سارِنے چیزن متعلق سنٛجیدگی سان سونٛچان یِم سپدؠ مٕتؠ ٲسؠ۔52وری واد گےَ گُزران، یسوعؔ ہس رود گاٹہٕ جارس ہُریر سپدان، تہٕ بالیغ رود گژھان۔ خدایس تہٕ لوٗکن منٛز رود مقبولؠ یتس منٛز زیادٕ کھۅتہٕ زیادٕ ترقی پراوان۔
Bridge Connectivity Solutions Pvt. Ltd.