لوق17
1یسوعؔن ووٚن پننؠن شٲگردن، "تِم چیز سپدن یقیٖنن واقع یِمو سٟتؠ لوٗکھ چھِ گناہ کرنہٕ خٲطرٕ آزماونہٕ نہٕ یوان۔ پوٚز یہِ کوتاہ خطرناک آسہ تمِس نفرٕ سنٛدِ باپتھ یُس تِمن چیزن واقع سپدنہٕ دِیہ!2یہِ روزہے تمِس شخصہٕ سٕنٛدِ خٲطرٕ بہتھر ہرگاہ تمِس کانٛہہ اکھا اکھ گرؠٹہٕ ژٔکر گردٔنہِ نٲلؠ ژھنہِ تہٕ سمندرس منٛز ییہِ لایس تمہِ کھۅتہٕ ہرگاہ سُہ تمِس نفرس گناہ کرناوِہے یمِس ایمان کمزور اوس۔3عمل کرنس منٛز روزیٚو ہُشیار۔ ہرگاہ دوٚیم پژھ کرن وول گناہ کرِ، توٚہہِ پزِ تمِس ملامت کرٕنؠ۔ ہرگاہ تٔمؠ ونہِ زِ تمِس چُھ گناہ کرنس پؠٹھ افسوس تہٕ ونِوٕ زِ مےٚ دِ معافی، تیلہِ پزِ توٚہہِ تمِس معافی دنؠ۔4ہتاکہ اگر سُہ أکِس دوٚہس منٛز ستہِ لٹہ تہِ ژےٚ خلاف گناہ کرِ، ہرگاہ سُہ پرٛتھ دوٚہہ ژےٚ نِش یتھ ونہِ، مےٚ چُھ تتھ پؠٹھ افسوس یہِ مےٚ کوٚر، ژٕ تھوٚو تمِس معافی دِنؠ لٲزِمن جٲری۔"5پتہٕ ووٚن تِمو رسولو یسوعؔ ہس، "سون ایمان کر زیادٕ پۅختہٕ!"6یسوعؔن دِیت جواب، "ہرگاہ توٚہہِ یتھ معمولی تِلہٕ گۅگل دانس برابر تہِ ایمان آسہ ہیے، توٚہؠ ؤنؠ ہیو یتھ تُلہٕ کلُس، کڈ سورےٕ پنُن پان موٗل ہٮ۪تھ زمیٖنہِ منٛزٕ نیٚبر، پتہٕ درانٛٹھنُ پنُن پان سمندرس منٛز، سُہ مانہِ ہیے تُہنٛد!"7بیٚیہِ ووٚن یسوعؔن، "فرض کرو زِ توٚہہِ منٛز اوس أکِس اکھ خدمت گار یُس تُہنٛدین کھہَن منٛز دانٛد وایان اوس یا تُہنٛدین تیرن اوس رچھان۔ پتہٕ ووت سُہ کھہہ پؠٹھٕ یتھ تُہنٛدس گرس منٛز، توٚہؠ ووٚنو نہٕ تمِس، ؤلؠ ؤلؠ یِتہٕ تہٕ بیٚہہ کھیٚنہِ!8تمہِ بجایہ توٚہؠ ونیو تمِس، "میانہِ خٲطرٕ کرِ کھیٚن تیار! پتہٕ لاگ خدمت گٲری ہُنٛد لباس تہٕ کرِ مےٚ خدمت یوٗتھ بہٕ کھیٚتھ چیٚتھ ہیٚکہٕ! تمہِ پتہٕ ہیککیو توٚہؠ کھیٚتھ تہٕ چیٚتھ۔9توٚہؠ کٔرِو نہٕ تمِس خدمت گٲرٕ سُنٛد شُکر تتھ کامہ پؠٹھ ادا یۅسہ توٚہہِ تمِس کرنہٕ خٲطرٕ ووٚنمُت اوسو!10یتھے پٲٹھؠ، ییٚلہِ تِمہ سار کامہِ توٚہؠ تِتھے پٲٹھؠ کریو یتھٕ پٲٹھؠ توٚہہ خداین وونمُت چُھ، توٚہہِ پزِ ونُن، ٲسؠ چھِ صرف خدایہِ سٕنٛدؠ خدمت گار۔ أسؠ چھنہٕ کنہِ شکر گذٲری ہنٛدؠ حقدار۔ اسہِ کرِ تِمے کامہ یِمن متعلق اسہِ وننہٕ آمُت اوس۔"11ییٚلہِ زن یسوعؔ تہٕ تسنٛدؠ شٲگرد ٲسؠ یروشلمسؔ کنُ وتہِ پکان، تِم درٛایہِ سامریہ تہٕ گلیل کیو درمیان علاقو منٛزؠ۔12 ییٚلہِ یسوعؔ أکِس گامس منٛز ژاو، تمِس کنُ آیہِ دہ مینٛدؠ لد، مگر تِم روٗدؠ تمِس نِشہ کمےٕ فٲصلہٕ پؠٹھ دوٗر اِستادٕ۔13تِمو دِژ کرٛکھ، "یسوعؔ، ووستادٕ، مہربٲنی کٔریتھ کرتہٕ اسہِ پؠٹھ رحم!"14 یسوعؔن ییٚلہِ تِم وُچھ، تٔمؠ ووٚن تِمن، گٔژِھو تہٕ پانس کرناو کاہننس اتھِ ملاحظ۔ "أتی درٛایہِ تِم تہٕ وتہِ منٛزےٕ سُپد تِمن میونٛد غٲب۔15پتہٕ تِمو منٛزٕ ییٚلہِ اکؠ وُچھ زِ تمِس اوس نہٕ وُنؠ میونٛد، سُہ پھیوٗر خدایہِ سنٛدؠ تعریف زورٕ زورٕ کران پوٗت۔16سُہ ووت یسوعؔ ہس نِش تہٕ کوٚرن یسوعؔ سنٛدین پادن تل زمیٖنس پؠٹھ بُتھِ کِنؠ سَجدٕ، بیٚیہِ کوٚرنس شُکریا ادا۔ یہِ اوس اکھ سامری شخص۔17یسوعؔن ووٚن پتہٕ، "مےٚ کوٚر دہن میونٛد لدن شفا! مےٚ اوس انٛدازٕ زِ تِم نو تہِ واتن واپس!18یہِ اوس ۅپر ملکُک صرف اکھ شخص یُس خدایہِ سنٛز شکُر گذٲری کرنہٕ باپتھ واپس آو۔ باقٕیو منٛز آو نہٕ کانٛہہ اکھ تہِ واپس!"19پتہٕ ووٚن تٔمؠ تمِس شخصس، "ووٚتھ تھوٚد تہٕ گژھِ پننہِ وتہِ۔ خداین چُھے ژٕ شفا کوٚرمُت تکیازِ ژےٚ کوٚڑُتھ مےٚ پؠٹھ بھروسہٕ۔"20اکہ دوٚہہ پرُوژھ کینٛژو فریسیو یسوعؔ ہس، "خدایی بادشٲہی کرِ گژھِ پرٛیتھ أکِس پؠٹھ شروع؟" تٔمؠ دِیت جواب، "تتھ منٛز آسن نہٕ اِشارٕ یُتھ زن لوٗکھ پرزٕناون اگر تِم تِمن ہُنٛد انتظار کرن۔21لوٗکھ آسن نہٕ تتھ لایق زِ تِم ونن، وُچھو! خدایہِ بادشٲہی چھِ یتن! یا خدایہِ بادشٲہی چھِ ہوٗتنؠ! تُہنٛدس سونچس برعکس، خدایہِ بادشٲہی چھِ برٛونٹھے توٚہؠ منٛز شروع گٕمژ۔"22یسوعؔن ووٚن پننؠن شٲگردن، "اکھ وقت ییہِ ییٚلہِ توٚہہِ گژھؠو تمناہ مےٚ اولادِ آدمس، طاقتہٕ سان بادشٲہی کران وچُھن۔ پوٚز توٚہؠ وُچھو نہٕ تہِ۔ 23لوٗکھ ونن توٚہہِ، وُچھوِ، مسیحؔ چُھ ہوپٲرؠ، یا تِم ونن، وُچھوِ سُہ چُھ یپٲرؠ، تِمن گژھِ نہٕ پتہٕ پتہٕ پکنُ۔24یتھٕ کٔنؠ وزٔمل زٕژٕ آسمانس اکہ انٛدٕ پؠٹھٕ بییٚس انٛدس تام گٲشراوان چھِ یتھ ہر کانٛہہ وُچِھتھ ہیٚکہ۔ تِتھے پٲٹھؠ آسہ اولادِ آدمؔ ییٚلہِ سُہ دُبارٕ ییہِ، مےٚ وُچھِ ہر کانٛہہ۔25پوٚز تہِ سپدن برونٛٹھ چُھ ضروری زِ مےٚ چھِ مختلف طریقو تکلیف وؠتراوٕنؠ، تہٕ لوٗکھ کرن مےٚ رد۔26 پوٚز ییٚلہِ بہٕ اولادِ آدمؔ دُبارٕ یِمہٕ لوٗکھ آسن کامہ تیھےٕ پٲٹھؠ کران یتھٕ کٔنؠ نوحؔ سنٛدِس زمانس منٛز لوٗکھ کران ٲسؠ۔27تمہِ وقتہٕ ٲسؠ لوٗکھ کھیوان چؠوان، خاندر کران، تتھ دوٚہس تام ییٚلہِ نوحؔ تہٕ تسنٛد خاندان ووٚتھ أکِس بجہِ ناوِ منٛز۔ پوٚز پتہٕ آو سٔہلاب تہٕ تِم سٲری گےَ مارٕ یِم نہٕ ناوِ منٛز ٲسؠ۔28یِتھۓ پٲٹھؠ، لوٗط سنٛدِس زمانس منٛز ییٚلہِ صدوم شہرس منٛز لوٗکھ ٲسؠ حسبِ معمول کھیوان تہٕ چؠوان۔ تِم ٲسؠ چیز ہؠوان تہٕ کٕنان۔ تِم ٲسؠ حسبِ معمول فصل وۅپداوان بیٚیہِ مکانہٕ تعمیٖر کران۔29 پوٚز یمہِ دوٚہہ لوٗط سدومہٕ منٛز دراو نار تہٕ گندُھک ووٚتھ آسمانہٕ پؠٹھٕ تہٕ تِم سٲری سٕپدؠ مارٕ یِمو تتھ شہرس منٛز ٹھٔہراو کوٚرمُت اوس۔30یِتھۓ پٲٹھؠ، ییٚلہِ بہٕ اولادِ آدمؔ زمیٖنہِ پؠٹھ واپس واتہٕ لوٗکھ آسن نہٕ تیار۔31تمہِ دوٚہہ، یِم پننیٚو گرٕ نیٚبر آسن تِہنٛدؠ سٲری چیز آسن گرن منٛزٕ، تِمن نِشہ آسہ نہٕ توٚت وقتہٕ یوٚت تِم ہیکن تِم چیز گرن منٛز انٛدر أژتھ تہٕ بیبر کٔڈتھ۔ یِتھۓ پٲٹھؠ، یِم کھہَن منٛز کٲم کران تِمن پزِ نہٕ گرٕ یُن کانٛہہ چیز حٲصٕل کرنہٕ باپتھ۔ تِم ژَلن ضروری ؤلؠ ؤلؠ۔32 یاد کریو لوٗط سنٛزِ آشنہِ کیا سُپد!33کانٛہہ تہِ اکھ یُس تہِ پننہِ طریقہٕ زندگی بسر کرِ سُہ سُپدِ مارٕ۔ پوٚز یُس اکھ پننہِ زندگی بسر کرنُک پرُون طریقہٕ میانہِ خٲطرٕ بدلاوِ سُہ کرِ ابدی زندگی بسر۔34 بہٕ چُھس توٚہہِ یہِ ونان: یمہِ راژ ییٚلہِ بہٕ واپس واتہٕ، زٕ نفر آسن اکسےٕ پلنٛگس پؠٹھ شۅنٛگتھ۔ اکھ ییہِ تُلنہٕ تہٕ بیاکھ تراونہٕ۔35زٕ زنہِ آسن یِکہٕ وٹہٕ پھل پِشان۔ خدایہِ تُلہِ تِمو منٛز أکِس تہٕ بییٚس ترٛاوِ پتھ کنُ۔"36"کھہَس منٛز آسن زٕ نفر؛ اکھ ییہِ تُلنہٕ بیٛاکھ ییہِ ترٛاونہٕ۔"37 شاگردو ووٚن یسوعسؔ، "خداوندٕ، یہِ کتہِ سپدِ؟" تٔمؠ دِیتُ تِمن جواب، "ییٚتہِ کُنہِ مودمُت آسہ تتہِ گژھن گرؠد جمع سۅ کھؠنہٕ خٲطرٕ، یمہٕ نشانہٕ چھِ ہاون زِ ٲخری وقت چُھ نزدیک۔"
Bridge Connectivity Solutions Pvt. Ltd.