لوق15
1وُنؠ، ٲسؠ واریاہ گُذروان بیٚیہِ باقیو لوٗکھ یسوعؔ ہس نِش تعلیم بوٗزنہٕ خٲطرٕ یوان، یِمن مذہبی سردار گناہگار مانان ٲسؠ۔2ییٚلہِ فریسیو تہٕ یہُودؠ شریعتکیو عٲلمو یہِ وُچھ، تِمو لوٗگ شور کرُن۔ تِمو ووٚن، "یہِ شخص چُھ گناہگارن خوش آوے کران بیٚیہِ چُھ تِمن سٟتؠ کھیوان چؠوان۔ "تِمو سونچؠ زِ یسوعؔ اوس تہِ کرنہٕ سٟتؠ پنُن پان گندٕ کران۔3لہٰذا ووٚن یسوعؔن تِمن یہِ ورگہٕ پٲٹھؠ:4 توٚہؠ منٛزٕ ٲسؠ أکِس نفرس ہَتھ تیٖرؠ تہٕ تِمو منٛزٕ راؤ اکھ۔ ژےٚ تراوِتھ نمنمَتھ 99 تیٖرؠ وجارس منٛز تہٕ دراکھ سُہ رووٕمُت تیوٗر ژھارنہِ توٚت تام یوٚت تام نہٕ سُہ لُوٗبتھ۔5ییٚلہِ ژےٚ سُہ لُوٗبتھ، ژےٚ تُلتھ خوشی سان سُہ نکھس پؠٹھ تہٕ دراکھ گرٕ کُن۔6گرٕ وٲتِتھ کرکھ پننؠن دوستن تہٕ ہمساین آلو تہٕ تِمن ووٚننکھ، "مےٚ سٟتؠ منٲوِو شٲدؠ یانہٕ، تکیازِ مےٚ لوٗب سُہ تیوٗر یُس مےٚ رووٕمُت اوس!"7یتھے پٲٹھؠ پزِ توٚہؠ تہِ زاننُ زِ آسمانس پؠٹھ تہِ چھِ شٲدؠ یوان مناونہٕ ییٚلہِ اکھ گناہگار چُھ پننؠن گناہو نِشہ توبہٕ کران۔ سۅ شٲدؠ چھِ تِمن لوٗکن ہنٛدِ کھۅتہٕ زیادٕ آسان یِم برٛونٹھے خدایس نِشہ نیک آسن چھِ تہٕ تِمن چُھ نہٕ آسن توبہٕ کرنچؠ ضرورت۔8یا مثالے زِ أکِس زنانہِ ٲسؠ چاندِ ہنٛدؠ دہ قٕمتی سِکہٕ مگر تِمو منٛزٕ راوُس اکھ۔ یقیٖنن سۅ زالہِ اکھ ژونگ تہٕ فرَشش دِیہ ڈُوُن توٚت تام ژھارِ دیٛانہٕ سان یوٚت تام نہٕ سۅ لبس۔9ییٚلہِ تمہِ سُہ لوٗب، سۅ لایہِ پننؠن وؠسن تہٕ ہمساین ناد پتہٕ ونی تِمن، "مےٚ سٟتؠ منٲوِو شٲدؠ یانہٕ، تکیازِ مےٚ لوٗب سُہ رووٕمُت سِکہٕ!"10بہٕ چُھس توٚہہ تیٖ ونان زِ یتھے پٲٹھؠ چھِ خدایہِ سنٛدین فرشتن منٛز شٲدؠ یانہٕ آسان ییٚلہِ اکھ گناہگار پننیٚو گناہو نِشہ توبہٕ چُھ کران۔"11پتہٕ روٗد یسوعؔ ونان، "أکِس شخصس ٲسؠ زِ نیٚچوؠ۔12لۅکٕٹؠ نیٚچو ووٚن اکہ دوٚہہ پننِس مٲلس، مولا، مےٚ دِ وُنؠ پنٕنؠ جایدادٕ منٛز پنُن حصہ یُس مےٚ چٲنہِ مرنہٕ پتہٕ واتہِ۔ لہٰذا تٔمؠ مٲلؠ کوٚر تقسیم پنُن جایٔیداد پننؠن دوٚشونی نیٚچوٮ۪ن منٛز۔13 کینٛہہ دوٚہہ پتہٕ، تٔمؠ لۅکٕٹؠ نیٚچوؠ کوٚر سُہ حصہ آمُت سورےٕ جایٔیداد جمع تہٕ دراو سفرس أکِس دوٗر دراز ملکس کنُ۔ تتھ ملکس منٛز کوٚر تٔمؠ پنُن سورےٕ پونٛسہٕ پننہِ بیقلٲزی تہٕ بدکٲری سٟتؠ زایہِ۔14ییٚلہِ تٔمؠ پنُن سورےٕ پونٛسہٕ اوس خرچ کوٚرمُت، تتھ سٲرسےٕ ملکس منٛز ووٚتھ اکھ شدید دراگ۔ جلد سپد سُہ محتاج۔15لہٰذا گوٚو سُہ تمہِ ملکہٕ کس أکِس روزن وٲلِس نفرس نِش تہٕ تس ووٚنُن مےٚ رٹھ تہٕ طَلبس۔ تٔمؠ نفرن سوز سُہ پننؠن کھہَن منٛز سور رچھنہِ۔16تمِس لجؠ تیٖژ بۅچھِ زِ سُہ کھییٚہ ہےٕ ہِمہٕ پھل یُس سور کھیوان ٲسؠ، پوٚز سُہ تہِ دِتسُ نہٕ کٲنسے۔17ٲخٕرس پؠٹھ لوٗگ تٔمؠ پننہِ بیقلٲزی متعلق ہوشہِ سان سونٛچن، تہٕ پانس کنُ ووٚنُن: میٲنس مٲلس نِشہ چھِ سٲری مُزور یڈ بٔرِتھ غذا کھیوان، پوٚز بہٕ چُھس ییٚتہِ بۅچھِ سٟتؠ مَران!18 لہٰذا بہٕ نیرٕ ییٚتہِ تہٕ گژھٕ پننِس مٲلس نِشہ واپس۔ بہٕ ونہٕ تسَ، "ببہٕ، مےٚ چھِ خدایس تہٕ ژےٚ برونٛہہ کنہِ گناہ کرِمٕتؠ۔19بہٕ چُھس نہٕ اتھ لایق زِ ژےٚ مانکھ مےٚ وُنہِ تہِ پنُن نیٚچو۔ مہربٲنی کٔریتھ مےٚ دِتہٕ پننؠن مُزورن منٛز أکِس مُزور سٕنٛدؠ پٲٹھؠ پانس نِشہ کٲم کرنہٕ۔"20سُہ ووٚتھ تہٕ لوٗگن پننِس مٲلس سٕنٛدِس گرس کنُ واپس سفر کرُن۔ پوٚز ییٚلہِ سُہ وُنہِ مٲلؠ سٕنٛدِس گرس سیٹھاہ دوٗرِ اوس، تمسنٛدؠ مٲلؠ وُچھ سُہ تہٕ تسَ آو تٔمؠ سُنٛد بڈٕ عار۔ سُہ لاریوو پننِس نیٚچوِس کنُ تہٕ روٚٹُن نالہٕ مَتہِ بیٚیہِ کوٚرنس میوٗٹھ۔21نیٚچوؠ ووٚن تسَ، "ببہٕ، مےٚ چھِ خدایس بیٚیہِ ژےٚ برونٛہہ کنہِ گناہ کرِمٕتؠ۔ لہٰذا بہٕ چُھس نہٕ اتھ لایق زِ ژٕ مانکھ مےٚ بیٚیہِ تہِ پنُن نیٚچو۔22پوٚز تمسنٛدؠ مٲلؠ ووٚن پننؠن خدمت گارن، "ؤلؠ ؤلؠ گٔژھوِ تہٕ میٚون ساروےٕ کھۅتہٕ رُت جامہٕ أنیٚو تہٕ لٲگوِ میٲنس نیٚچوِس۔ بیٚیہِ لٲگیوٗس اوٚنگجہِ میٲنؠ وٲج تہٕ کھۅرن میٚون کھۅربانہٕ۔23بیٚیہِ أنؠ وون سُہ وُژھ یُس اسہِ اکہ خاص موقعہ خٲطرٕ فِلہٕ کوٚرمُت چُھ تہٕ کرِیوٗس خشَ، یُس أسؠ کھؠمو ہنُ تہٕ شٲدؠ یانہٕ کرَو!24اسہِ چھِ شٲدؠ یانہٕ کرنچؠ ضرورت تکیازِ میٚون یہِ نیٚچو اوس أکِس مودؠ مٕتس نفرس ہیو، وُنؠ سُپد دُبارٕ زندٕ! یہِ اوس رووٕمُت وُنؠ لوٗب أسؠ بیٚیہِ! ادٕ لٔگؠ تِم سٲری شٲدؠ یانہٕ کرنہِ۔25ییٚلہِ یہِ سورےٕ سپدان اوس، تمِس مٲلؠ سُنٛد زِٹھ نیٚچو اوس کھہَن منٛز کٲم کران۔ پنٕنؠ کٲم انٛد واتناونہٕ پتہٕ دراو گرٕ کنُ۔ یتھے سُہ لوٗگ گرٕ نکھٕ واتنہِ، تٔمؠ بوز لوٗکن ہُنٛد گیٛوُن تہٕ نَژنُ۔26تٔمؠ اوٚن اکھ خدمت گار ناد دِتھ تہٕ ووٚنس یہِ کیاہ اوس سپدان۔27خدمت گار ووٚن تسَ، "چون بوے چُھ آمُت۔ چٲنؠ مٲلؠ ووٚن اسہِ سُہ وُژھ مارنہٕ خٲطرٕ یُس اسہِ روٚچھمُت اوس تکیازِ چون بوے آو صحت و سلامت واپس۔28پوٚز زِٹھِس نیٚچوِس کٔھژ ژکھ تہٕ تٔمؠ یوٚژھ نہٕ شٲدؠ یانس منٛز شٲمل گژھن۔ لہٰذا تسُنٛد مول دراو نیٚبر کنُ تہٕ کوٚرنس انٛدر اژنہٕ خٲطرٕ زارٕ پارٕ۔29پوٚز تٔمؠ دِیُت پننِس مٲلس جواب، "بوز! یِمو ساروےٕ ورؠ یو پؠٹھٕ چُھس بہٕ أکِس غلامہٕ سنٛدؠ پٲٹھؠ چٲنؠ ٹہلؠ کران رودمُت۔ بہٕ رودس ہمیشہ پرٛتھ کنہِ معاملس منٛز چون تٲبیع دار یہ ژےٚ ووٚنتھ تہِ کوٚڑ مےٚ۔ پوٚز ژےٚ دِتُتھ نہٕ مےٚ زانٛہہ اکھ ژھاوٕلؠ موٚنگُر تہِ یُتھ زَن بہٕ پننؠن دوستن ہنٛدِ خٲطرٕ اکہ سالُک انتظام کرِتھ ہیٚکہٕ ہا۔30پوٚز وُنؠ ییٚلہِ یہِ چون نیٚچو چون سورےٕ پونٛسہٕ بدکار زنانن پؠٹھ بُرباد کٔرِتھ گرٕ واپس آو، ژےٚ ونُتھ پننؠن خدمت گارن اکھ شٲدؠ یانہٕ کرنہٕ باپتھ مٲرؠ وون سُہ روٚچھمُت وُژھ!31پوٚز تسَنٛدؠ مٲلؠ ووٚن تمِس، "میانہِ گۅبرٕ، ژٕ چُھکھ ہمیشہ مےٚ سٟتؠ، یہِ کینٛژھا میٚون چُھ سُہ چُھ چون۔32پوٚز شٲدؠ یانہٕ مناون تہٕ خوش سپدنُ چُھ سانہِ خٲطرٕ ضروری، تکیازِ چون بوے اوس زن تہِ مودمُت وُنؠ سپد دُبارٕ زندٕ! سُہ اوس زن تہِ رووٕمُت تہٕ وُنؠ لوٗب اسہِ یہِ دُبارٕ!"
Bridge Connectivity Solutions Pvt. Ltd.