لوق14
1أکِس سبتٕکس دوٚہس پٮ۪ٹھ، یسوعؔ گوٚو أکِس فریسی سردار سنٛدِس گرس منٛز ژوٹ کھٕنہِ۔ أمؠ سردارن ٲس باقین فریسین تہِ اتھ منٛز دعوت دِژٕمژ۔ تِم سٲری ٲسؠ یسوعؔ ہس ہشیاری سان وچھان زِ أمِس نیرن نوقص تہٕ دِنس الزام۔2یسوعؔ ہس برونٛہہ کنہِ دٔچھنہِ طرفہٕ اوس اکھ نفر یمِس اکہ بٮ۪مارِ سٟتؠ نَرِ تہٕ زنٛگہٕ سیٹھاہ زیادٕ ہُنیومٕژٕ آسہ۔3یسوعؔن پرُوژھ تتہِ موجود یہُودؠ شریعت کین عٲلمن بیٚیہِ فریسین، "سبتکٕہِ دوٚہہ لوٗکن شفا دیُن چھا شرع مطابق جٲیز کنہِ نہٕ؟"4تِمو دِیت نہٕ جواب۔ أتی تھوٚو یسوعؔن پنُن اتھٕ تمِس نفرس پؠٹھ تہٕ سپدس شفا۔ پتہٕ کوٚرن تسَ رخصت۔5تٔمؠ ووٚن تتہِ باقین، "ہرگاہ توٚہہِ اوس اکھ نیٚچو یا اکھ دانٛد سُہ گوو أکِس سٔنِس کھۅڈس منٛز سبات کہِ دوٚہہ، توٚہہِ کھالِہنُ سُہ فورن۔"6تِمو ہیوٗک تمِس نہٕ اتھ تہِ جواب دِتھ۔7یسوعؔ ہس توٚر فِکرِ زِ یِمن لوٗکن سالس پؠٹھ دعوت دِنہٕ آمٕژ ٲس تِم ٲسؠ تھَزرس بِہنُ پسنٛد کران۔ لہٰذا تٔمؠ دِژ تِمن یہِ نصیحت۔8"ییٚلہِ توٚہہِ منٛزٕ کٲنٛسہِ أکِس کانٛہہ خانٛدرس پؠٹھ سالس ینٕچ دعوت دِیہ، یتھنہٕ تتھ جایہِ بِہیو یتؠن لٲزم دار لوٗکھ بہن۔ ممکن چُھ تٔمؠ آسہ تمِس نفرس سالس پؠٹھ دعوت دِژمٕژ یُس تُہنٛدِ کھوٗتہٕ زیادٕ یزتھ دار آسہ۔9سُہ یزمان ییٚلہِ پتہٕ وچھِ زِ توٚہہِ دوشوےٕ کتہِ چُھو بہتھ، سُہ ونی ژےٚ، "یمِس نفرس تراو تہٕ یتؠن جاے! شرمنٛدٕ گژھتھ پییی ژےٚ بوٗن وسنُ۔10 اتھ برعکس، ییٚلہِ کانٛہہ اکھ ژےٚ سالس پؠٹھ دعوت دِیہ، گژھ تہٕ بہہ سارنےٕ بوٚنہٕ کنہِ۔ پتہٕ ییٚلہِ میزبان ییہِ سُہ ؤنی، "دوستا یتھ رٕژِ جایہِ بہہ!" پتہٕ سپدِ سارنےٕ سالرن منٛز ژےٚ یزتھ۔11خدایہِ والہ تس بوٚن یُس پانس تھوٚد زانہِ، تہِ یُس پانس لۅکُٹ زانہِ تس دِکھ تھزر۔"12یسوعؔن ووٚن تمِس فریسیسؔ بیٚیہِ، یمؠ تمِس سال کوٚرمُت اوس، "ییٚلہ ژےٚ دوپہرکس یا شامہٕ کِس کالس پؠٹھ سالٕچ دعوت دِکھ، دوستن، رشتہٕ دارن یا ہمسایہ امیرن یوت نہٕ، یِم ژےٚ سال کٔرِتھ نکھٕ ووٚتھ کرنےٕ۔13امہِ بدلہٕ، دِیہ زِ غریٖب، معذور، لنگؠن یا آما لوٗکن دعوت ییٚلہِ ژےٚ سال کرکھ۔14ہرگاہ ژٕ تہِ کرکھ، خدایہِ دِیہ ژےٚ انعامہٕ، تکیازِ تِمن نِش چُھنہٕ کہنؠ زِ نکھٕ والنےٕ۔ ژےٚ گژھی یقین آسن زِ خدایہِ دِیہ ژےٚ واپس تمہِ وزِ ییٚلہ سُہ نیک لوٗکن دُبارٕ زندگی عطا کرِ۔15سالرو منٛزٕ اکؠ سالر بوز تٔمؠ سنٛز کتھ۔ تٔمؠ ووٚن یسوعؔ ہس، "بختہٕ بوٚڈ چُھ سُہ یمِس خدٲیی بادشٲہی منٛز أژتھ جشن مناونُک موقعہ ییہِ!"16یسوعؔن ووٚن تمِس، "اکہ وقتہٕ نیٚو اکؠ شخصن اکھ بوٗڈ سال تیار کرنُک فٲصلہٕ۔ تٔمؠ دِژ واریہن لوٗکن دعوت۔17سالہٕ وزِ سوز تٔمؠ پنُن غلام تِمن نِش یہِ ووٚننہٕ باپتھ، ولہٕ وُنؠ سورےٕ کینٛہہ چُھ تیار!18پوٚز ییٚلہِ تٔمؠ خدمت گارن تہِ کوٚر، تِمو ساروےٕ لوٗکو یِمن تٔمؠ دعوت دِژمٕژ ٲس، لوٗگ ووٚننہِ زِ تِم کیازِ ہیکن نہٕ یتھ۔ خدمت گار یمِس گوٗڈنتھ گوٚو تٔمؠ ووٚن، "مےٚ چُھ وُنؠ اکھ کھاہ مٔلؠ ہیٚوتمُت، مےٚ چُھ ضرور تتھ نظر دِنہِ گژھن۔ مہربٲنی کٔریتھ پننِس مٲلکس ووٚن زِ مےٚ دِیہ نہٕ ینہٕ خٲطرٕ معٲفی!"19دوٚیم شخصن ووٚن، "مےٚ چھِ وُنؠ پانٛژھ جورِ دانٛد مٔلؠ ہیتؠ مٕتؠ، تہٕ مےٚ چُھ تِم مُرِ کڈنؠ گژھن۔ مہربٲنی کریتھ پننِس مٲلکس ووٚن مےٚ دِیہ نہٕ یِنس پؠٹھ معٲفی!20بیٚیہِ اکؠ نفرن ووٚن، "مےٚ چُھ وُنؠ خاندر کوٚرمُت، لہٰذا بہٕ ہیٚکہٕ نہٕ یِتھؠ۔"21لہٰذا آو سُہ خدمت گار پننِس مٲلکس نِش واپس تہٕ ووٚننس تہِ یہِ پرٛیتھ اکؠ تمِس ووٚنمُت اوس۔ گرٕکس خاندارس کٔھژ سخ ژکھ پتہٕ ونن پننِس خدمت گارس، "ؤلؠ ؤلؠ گژھِ شہرِ چؠن گلؠ ین تہٕ کوچؠن منٛز تہٕ أنِکھ غریٖب، معذور، آما تہٕ لٔنگؠ لوٗکھ میٲنس گرس منٛز!"22پتہٕ گوٚو سُہ خدمت گار نیٚبر تہٕ کوٚرن تی پتہٕ واپس یتھ ووٚننس، "جناب، مےٚ کوٚر تہِ یہِ ژےٚ ووٚنتھ مگر ییٚتہِ چھِ وُنہِ تہِ واریہن لوٗکن ہنٛدِ خٲطرٕ جاے۔23لہٰذا ونُس پنٕنؠ مٲلکن، "شہرٕ نیٚبر گژھِ۔ لوٗکھ ژھانڈکھ بجن وتن پؠٹھ، تنگ وتن پؠٹھ۔ تِم لوٗکھ انُکھ مجبور کٔرِتھ میٲنس گرس منٛز۔ بہٕ چُھس یژھان یہِ گژھِ لوکو سٟتؠ بٔرِتھ یُن!24تمہِ علاوٕ ونےَ بہٕ ژےٚ اکھ کتھ زِ تِمن نفرن یِمن مےٚ گۅڈٕ دعوت دِژ تِم گژھن نہٕ میانہِ سالک مَزٕ تُلٕنؠ تکیازِ تِمو کوٚر سالس یِنس اِنکار۔"25یسوعؔ ہس سٟتؠ اوس لوٗکن ہُنٛد اکھ بوٚڈ ہجوم سفر کران۔ سُہ پھیٚور لوٗکن کُن تہٕ تِمن ونُن،26 "ہرگاہ کانٛہہ مےٚ نِش ییہِ یُس پننِس مٲلس، ماجہِ، آشنہِ، شُرین، باین، بیٚنین میانہِ کھۅتہٕ زیادٕ لول آسہ بران، سُہ ہیٚکہٕ نہٕ میون شٲگرد ٲسِتھ۔ سُہ گژھِ ضرور پننہِ زندگی ہنٛدِ کھۅتہٕ زیادٕ مےٚ لول برُن!27یُس اکھ نہٕ پننِس صلیبس پانہٕ تُلِتھ ہیٚکہ بیٚیہِ کرِ نہٕ میٲنؠ تٲبیادٲری، سُہ ہیٚکہِ نہٕ میٚون شٲگرد ٲسِتھ۔28بہرحال، ہرگاہ توٚہہ منٛزٕ کٲنٛسہِ اکؠ یوٚژھ اکھ بُرُج تعمیٖر کرُن، توٚہؠ بِہیو تہٕ کریو فٲصلہٕ زِ اتھ کٲژا لاگتھ لگہ۔ تمہِ سٟتؠ لگہ توٚہہ پتاہ زِ توٚہہ نِش چھا تیوتاہ پونٛسہٕ یمہٕ سٟتؠ یہِ انٛد واتہِ، کِنہٕ نہٕ۔29نتہٕ، ہرگاہ توٚہہ کٕن دِتوٕ پتہٕ اوسو نہٕ سُہ بُرج انٛد واتناونُک طاقت، یُس کانٛہہ تہِ پتہٕ وُچھِ سُہ ژٹہِ توٚہہ ٹٲنہٕ۔30تِم ونن، "أمؠ شخصن لاجاو اکھ بُرج تعمیٖر کرُن، پوٚز سُہ اوس نہٕ ژکہِ اتھ ختم کرنس قٲبل!31یا مثلن أکِس بادشاہس اوس دہن ساسن سِپہن پؠٹھ مشتمل پنُن فوج۔ بیاکھ بادشاہ اوس وُہہ ساس سِپاہ ہیٚتھ تمِس پؠٹھ حملہٕ کرنہِ پکان۔ پنُن فوج جنگس منٛز سوزنہٕ برونٛہہ کرِ سُہ گۅڈنیُک بادشاہ یقیناً پننٮ۪ن مشیرن سٟتؠ مشورٕ زِ سُہ ہیٚکیا بییٚس بادشاہ سنٛدِس فوجس شِکس دِتھ کِنہٕ نَہ۔32مثلن تٔمؠ نیٚو فٲصلہ زِ تٔمؠ سُنٛد فوج ہیٚکہ نہٕ بییٚس فوجس شکس دِتھ۔ پتہٕ سوزِ سُہ بیٚیس بادشاہس نِش پنٕنؠ شیٚچھِ وٲلؠ، ییٚلہِ تمِس پنُن فوج وُنہِ سیٹھاہ دوٗر آسہ۔ سُہ ونہِ تِمن شیٚچھِ والیٚن تمِس پرِژھو، "ژےٚ سٟتؠ صلح کرنہٕ خٲطرٕ کیاہ چُھ مےٚ ضروری کرُن؟"33لہٰذا، یتھے پٲٹھؠ، ہرگاہ توٚہہ منٛزٕ کانٛہہ اکھ یُس گۅڈٕ فٲصلہٕ ہیٚکہ نہٕ کٔرِتھ زِ سُہ چُھ یژھان تہِ سورےٕ کینٛہہ تراوُن یہِ تمِس آسہ، سُہ ہیٚکہ نہٕ میٚون شٲگرد ٲسِتھ۔"34یسوعؔن ووٚن بیٚیہِ، "توٚہؠ چُھو نوٗنکؠ پٲٹھؠ یُس سیٹھاہ فٲیدٕمنٛد چُھ۔ پوٚز ہرگاہ نوٗنس راوِ پنُن نوٗنہٕ مَزٕ، کانٛہہ اکھ ہیٚکہ نہٕ اتھ زانٛہہ تہِ دُبارٕ مزٕدار نوٗن بنٲوِتھ۔35ییٚلہِ نہٕ نوٗنس وُنؠ نوٗنہٕ مزٕ روزِ، سُہ نَہ چُھ وُنؠ زمیٖنہِ خٲطرٕ رُت تہٕ نَہ پاہ بننہٕ خٲطرٕ۔ لوٗکھ چھِ اتھ نیٚبر دٲرتھ دِوان۔ توٚہہ پزِ ہوشیٲری سان اتھ پؠٹھ سونٛچن یمہٕ مےٚ وُنؠ کتھٕ ونہِ تہٕ توٚہہ بوزو!"
Bridge Connectivity Solutions Pvt. Ltd.