یشوع8
1امہِ پتہٕ ووٚن خداوندن یسوعسؔ، "یِنہٕ وُنؠ کھوٚژِو یا پست ہمت گٔژھِو۔ ووٚتھ پنٕنؠ سٲری سِپاہ ہٮ۪تھ نٮ۪بر تہٕ کٔرِو تتھ عیؔ شہرس پٮ۪ٹھ نوو حملہٕ۔ عیؔ شہر گٔژھِو بہٕ چُھسو عیؔ شہرُک رازُت توٚہی بخشان۔ توٚہؠ أنیٚو اتِکؠ لوٗکھ تہٕ اتِچؠ زمیٖن تلفس تل۔2چٲنؠ سِپاہ کرن عیؔ تہٕ اتہِ کِس بادشاہس سٟتؠ تی یہِ یمو یرِیحُو شہرس تہٕ اتہِ کٮ۪ن لوٗکن سٟتؠ کوٚر۔ بوزو! أزکہِ لٹہِ رٔٹیٚو توٚہؠ سُہ سورےٕ لوٗٹہٕ مال پانس یہِ اتہِ تھَپہِ تھۅسہِ أنِو۔ بیٚیہِ بوز، "کینٛہہ سِپاہ تھٲؠ وُکھ شہرس پٔتؠ کِنؠ ژرژنہِ تہٕ امہِ پتہٕ کرِ حملچ تیٲری۔3تو پتہٕ تُل پوٗرٕ فوج ہٮ۪تھ یسوعنؔ عیؔ شہرس کُن حملہٕ کرنہٕ باپتھ قدم۔ أمؠ ژٲرؠ ترٕہ ساس سِپاہ یِم پننہِ بلہٕ تہٕ جراعت باپتھ زاننہٕ ماننہٕ ٲسؠ آمٕتؠ تہٕ کٔرِن یِم راتھ کیُتھ عیؔ شہرس کُن روانہٕ۔4ستؠ ووننکھ کن تھٲیِو۔ توٚہہِ منٛزٕ روزیٚو کینٛہہ شہرس پٮ۪ٹھ بےٚ خبر پٲٹھؠ حملہٕ کرنہٕ باپتھ تیار۔ بس توٚہؠ شہرس پٔتؠ کِنؠ روزتھ منظم کرو۔ شہرس نکھے روزیو۔ توٚہہِ سارِنےٕ چُھو حملہٕ باپتھ تیار روزُن۔5بہٕ تہٕ میٲنؠ باقی سِپاہ نیرن صُبحس سُلے شہرس کُن۔ تہٕ ییٚلہِ شہرٕکؠ لوٗکھ برونٛٹھِم پٲٹھؠ شہرٕ نٮ۪بر نیرتھ اسہِ سٟتؠ جنگس یِن تِمن وُچھتھےٕ پھیرو أسؠ پوٚت تہٕ لاگو تِمن نِشہ دوٗر ژَلُن6تِمن باسہِ زِ أسؠ چھِ برونٛٹھِم پٲٹھؠ تِمن نِشہ پان بچٲوِتھ ژَلان۔ تِم کرن پنٕنؠ کِنؠ اسہِ شہر دوٗر تام لار۔ ییٚلہِ یپٲرؠ أسؠ تِمن برونٛہہ برونٛہہ ژَلان روزو7توٚہؠ، ژوٗرِ ژھٮ۪پہِ روزن وٲلؠ سِپاہ یی زیٚو پننہِ چھپَن جایہِ پٮ۪ٹھ نیرتھ تہٕ کُنی دورِ أژؠ زیٚو شہرس تہٕ کٔرؠ زیٚو اتھ قبضہٕ۔ خداوند دِیو امہِ شہرُک راج تاج توٚہی8شہرُک قبضہٕ رَٹوُنےٕ کٔرؠ زیٚو یہٕ شہرٕ نارٕ بُزؠ۔ تی کرو یہِ خداوندن ونُو۔ یوٚہے حکم چُھسو بٕتہ دِوان توٚہہِ۔9امہِ پتہٕ کٔر یسوعنؔ تیٲری تہٕ سوزِن تِم ترٕہ ساس سِپاہ ژوٗرِ روزنہٕ باپتھ عیؔ تہٕ اتھ مغربس منٛزؔ بیت ایلؔ جایہِ درمیان۔ مگر امہِ رٲژ شونٛگ یسوعؔ پننٮ۪ن سپہن درمیان۔10دوٚیمہِ دوٚہہ صُبحٲے أنؠ یسوعنؔ پنٕنؠ سِپاہ سمبرٲوِتھ: سُہ رود عیؔ شہرس پٮ۪ٹھ حملہٕ کرنہٕ باپتھ یِمن سارِنےٕ سِپہن تہٕ باقی اسرائیل ین برونٛہہ برونٛہہ رہنمٲیی کران۔11یِمو کٔرؠ پنٕنؠ خٟمہٕ شہرکِس جنوبس منٛز کھڑا یتہِ تِمن سٲری شہرٕکؠ لوٗکھ وُچِھتھ ہیٚکن۔ تٕن تہٕ عیؔ شہرس درمیان ٲس اکھ گھاٹی۔12یسوعسؔ ٲسؠ پانٛژھ ساس سِپاہ گۅے سوزؠ مٕتؠ تہٕ ووٚنُن تِمن زِ توٚہؠ روزیٚو شہرس پٔتؠ کِنؠ زاگہِ اچانک حملہٕ کرنہٕ باپتھ۔ شہرکِس مغربس منٛز عیؔ تہٕ بیت ایلؔ جایہِ درمیان۔13سارِوےٕ کٔر امہِ حکمہٕ مطٲبق عمل۔ سپہن ہُنٛد مزکزی دستہٕ اوس شہرکس شمالس منٛز، باقی رودؠ زاگ دِتھ شہرکِس مغربس منٛز۔ امہِ دوٚہہ رات کیُتھ رود یسوعؔ گھاٹی منٛز۔ 14عی شہرٕکؠ بادشاہن ڈیونٛٹھ اسرائیلی فوج، تہٕ دوٚیمہِ دوٚہہ صُبحٲے ووٚتھ سُہ پنُن فوج ہٮ۪تھ تہٕ دراو شہرٕ نٮ۪بر یمن سٟتؠ جنگس۔ تِم وٲتؠ شہرکِس مشرقس منٛز یتہِ پٮ۪ٹھٕ تِم یردن دریاوکِس مٲدٲنی علاقس پٮ۪ٹھ نظر تھٲوِتھ ہیٚکن یہِ زاننہٕ ورٲے زِ اسرائیلی فوج چُھ شہرٕ پٔتؠ کِنؠ زاگہِ روزِتھ تِمن پٮ۪ٹھ حملہٕ کرنس تیار۔15یسوعؔ تہٕ اسرائیلی فوجن دیُت پوٗرٕ موقعہ عی کٮ۪ن فوجین تِمن دکہٕ دِتھ ژلناونُک۔ اسرائیلی فوج لوٚگ بیابانس کُن ژلنہِ۔16عی فوجس آو حکم دِنہٕ یسوعؔ تہٕ تسٕنٛدِس فوجس پتہٕ لگنُک۔ یِمو تروو پنُن شہر تہٕ کٔرٕکھ یسوعسؔ تہٕ تمسٕنٛدِس فوجس لار۔17عیؔ تہٕ بیت ایلؔ شہرٕ کیٚو تمام مردو تہِ کر اسرائیلی فوجس لار۔ تِمو تروو نہٕ امیُک دفاع کرنہٕ خٲطرٕ عیؔ شہرس منٛز اکھ تہِ نفر۔ تہٕ تِمو ترٲوؠ شہرٕکؠ دروازٕ کُھلہ یلہٕ کُنہِ رٲچھ ورٲے تہٕ دوریاے أنؠ دانٛدن ہنٛدؠ پٲٹھؠ اسرائیلی فوجس لار کرنہٕ باپتھ۔18امہِ پتہٕ ووٚن یہُوواہنؔ یسوعسؔ "تُل پنُن نیزٕ تہٕ کر اشارٕ عیؔ شہرس کُن۔ بہٕ چُھسے یہِ شہر چانٮ۪ن فوجین فتح کرنس قٲبل بناون وول۔ عشوعنؔ تُل نیزٕ عیؔ شہرس کُن19یُتھےٕ زاگہِ روزِتھ اسرائیلی فوجن یہِ اِشارٕ وُچھ تِم دورے پنہٕ نیٚو چھپَن جایو پٮ۪ٹھٕ سیٚودے شہرس کُن تہٕ اوٚنُکھ تلفس تل تہٕ دیُت ہس یکدم نار۔20ییٚلہِ عیؔ کیٚو لوٗکو پتھ کُن وُچھ اتہِ اوس شہرس دُہےٕ دُہہ وۅتھان۔ مگر کینٛہہ کرنُک وق اوس روومُت۔ تِمو ہیوٚک نہٕ کِہین کٔرِتھ۔ اسرائیلی فوج اوس تہنز پوت پھیرنچہِ وتہِ رٔٹِتھ تہٕ برونٛہہ برونٛہہ ثلن وول آکھ پوٚت پھیرِتھ۔21یسوعؔ تہٕ تسنٛدیٚو سٲتھی فوجیو وُچھ زِ زاگہِ روزِتھ فوجیو چُھ شہر تلفس تل اوٚنمُت تہٕ چھِ وُنؠ اتھ نارٕ بُزؠ کران۔ تِمو وُچھ پانہٕ شہرس دُہےٕ دُہہ وۅتھان۔ لہٰذا پھیرؠ تِم پوٚت تہٕ لٲگِکھ یِم عی یِکؠ دُشمن مارٕنؠ۔22یِمو سِپہَو شہر تلفس تل اوٚن آیہِ واپس نیرتھ تہٕ رٔٹِکھ عی فوجی زنتہٕ کنٛزس منٛز۔ عی فوجی آے دونوے انٛدو اسرائیلی فوجیو دٔسؠ کنجس منٛز۔ اکھ تہِ دراو نہٕ بٔچِتھ۔ اسرائیلی روٗدؠ یِمن پیٚٹھےٕ یوٚتام اکھ عی فوجی مارنہٕ آو23ؤنؠ گو عی شہرُک بادشاہ آو زندے رٹنہٕ تہٕ یسوعس نِش واتناونہٕ۔24یٖتِس کالس یہِ لڑٲے روز۔ اسرائیلی فوجیو پکہٕ نٲوؠ عی شہرٕکؠ فوجی مٲدانس تہٕ بیابانس کُن تہٕ کترٲوِکھ اکہ اکہ سٲری۔ امہِ پتہٕ ژاے تِم شہرس منٛز تہٕ کوٚرُکھ نیست و نابود پرٮ۪تھ کانٛہہ چیٖز تہٕ زون یُس وُنہِ تہِ زِندے اوس25امہِ دوٚہہ مٲرؠ یِمو باہ ساس زنہِ تہٕ مرد۔ تِمو مٲرؠ سٲری عی شہرٕکؠ بسکین۔26یسوعؔ رود کھڑا نیزٕ شہرس کُن رٔٹِتھ یوٚتام عی یِکؠ سٲری لوٗکھ مارنہٕ آے۔27اسرائیلیٚو رٔٹؠ اتِکؠ جانور تہٕ باقی چیٖز سٲری پانس یہِ زن خداوندن یسوعسؔ ووٚنمُت اوس کرُن۔28یسوعؔ تہٕ تسٕنٛدیو فوجیو زول عی شہر ژوٚک تام تہٕ ترووُکھ ہمیشہٕ باپتھ ملبُک ڈیر ہیٚو پتھ کُن۔ از تہِ چُھ وٲرانےٕ۔29یسوعنؔ تروو عی شہرُک بادشاہ أتی کلس ترۅدِ تہٕ شام تام رود سُہ أتی ڈۅلان۔ آفتابہٕ لوسہٕ وُن ووٚن یسوعنؔ پنہٕ نٮ۪ن فوجین بادشاہ ترۅدِ پٮ۪ٹھٕ والنُک تہٕ تتھ جایہِ تراونُک یتہِ نس شہرُک دروازٕ اوس۔ فوجیو کوٚر بالکُل یی تہٕ کوٚرُکھ امسنٛز لاشہِ پٮ۪ٹھ اکھ کنہِ انبار تیار یُس وُنہِ تہِ اتہِ چُھ۔30یسوعنؔ ووٚن کینٛہہ کال پتہٕ پننٮ۪ن لوٗکن اسرائیلی خدا سٕنٛدِ احترامہٕ باپتھ عیبال بالسؔ پٮ۪ٹھ اکھ قربان گاہ تعمیر کرنہٕ خٲطرٕ۔ 31تِمو کوٚر یہِ تعمیر تمہِ انمانہٕ یتھٕ پٲٹھؠ زن خدا سٕنٛدِ بنٛدٕ موسیٰؔ ہن اوس تتھ شریعتس منٛز لیٚوکھمُت یۅسہ تمِس خداین عنایت کٔر۔ یہِ قربان گاہ آیہ کنیو منٛزٕ کھالنہِ بغٲر گراے تہٕ شِسترو کانٛہہ اوزار لاگنہٕ ورٲے چھرا کنیو ستؠ۔ امہِ پتہٕ کٔر اسرائیلیٚو خداوندس پیش یورٕ دزن سوختی نذر۔ بیٚیہِ کوٚرُکھ تس سٟتؠ سلامتی ہُنٛد عہد پورٕ کرنہٕ باپتھ باقی نذرانہٕ تہِ پیش۔32باقی اسرائیلی لوٗکن دیدمان لیکھ یسوعنؔ موسیٰؔ ہس دِنہٕ آمتہِ خداوند سُنٛد شریعتُک نقل کنٮ۪ن پٮ۪ٹھ۔ 33امہِ پتہٕ رودؠ سٲری اسرائیلی زِٹھؠ، عہددار، قٲضی تہٕ باقی منصب دار مقدس صندوقس دوٚپاسے وۅدٕنؠ۔ سٲری روٗدؠ مقدس صندوق ہٮ۪تھ لاوین تہٕ ربین کاہنن کُن بُتھ کٔرِتھ۔ اتہِ نس ٲسؠ غیر اسرائیلی تہِ کینٛہہ وۅدٕنؠ۔ نیصف لوٗکھ رودؠ عیبالؔ پہاڑکِس دامنس تل اکہ طرفہٕ تہٕ نیصف گرزِیمؔ پہاڑ کِس دامنس تل۔ مقدس صندوق اوس بوٚن گھاٹی منٛز دون درین درمیان۔ گۅڈٕ انوارِ کوٚر تِمو خداوند سٕنٛدِس بندس موسیٰؔ سٕنٛدِ وننس پٮ۪ٹھ سارنےٕ اسرائیلی لوٗکن رُت دُعا۔34امہِ پتہٕ کٔر یسوعن تمام لوٗکو باپتھ موسیٰؔ سٕنٛدِ شریعتچ تلاوت۔ اتھ منٛز اوس خداوند سنٛدٮ۪ن حکمن تہٕ مانن والٮ۪ن ہنٛدِ باپتھ امؠ سنٛزن برکتھن تہٕ نَہ مانن والٮ۪ن ہنٛدِ باپتھ بد دُعاہن ہُنٛد تہِ بیان۔35یسوعنؔ پٔرؠ بڈٕ احتیاطہ سان موسیٰؔ سنٛدؠ دِتمٕتؠ حکم۔ تمؠ پوٚر اکھ اکھ لفظ تمام سمیمتِس اسرائیلی اجتماعس برونٛہہ کنہِ۔ تمام زنہِ تہٕ شُرؠ تہِ ٲسؠ اتہِ تہٕ تِم غٲر ملکی تہِ یم اسرائیل ین سٟتؠ روزان ٲسؠ۔
Bridge Connectivity Solutions Pvt. Ltd.