یشوع5
1یہِ خبر وٲژ یردن دریاوکِس مغربس منٛز آباد تمام امورؠؔ رازن تہٕ بحیرِ رومؔ کٮ۪ن بٹھٮ۪ن نَکھہٕ آباد کنعانؠؔ بادشاہن تام تہِ زِ کِتھہٕ پٲٹھؠ کوٚر یردن دریاوُک آب یہُوواہنؔ روٹہٕ یوٚتام بنی اسرائیلی تارَس تٔرؠ اوٕ کِنؠ ترہٛرییہ یِم سٲری تہٕ اسرائیل ین بُتھِ لگنس درییکھ نہٕ زنٛگے۔2تمہِ وزِ ووٚن یہُوواہنؔ یسوعسؔ، "وۅنؠ گٔرِو کنِو کھوٗرؠ تہٕ کرنٲیو سارنےٕ تِمن اسرائیلی مردن ختنہٕ یِمن نہٕ ختنہٕ کرنہٕ آمُت چُھ۔"3لہٰذا گرٕنٲوؠ یسوعنؔ کنیو کھوٗرؠ تہٕ کھلڑِی پہٲڑی جایہِ آو سارنےٕ اسرائیلی مردن ختنہٕ کرنہٕ۔ اتھ جایہِ چھِ وۅنؠ ختنہٕ بال ونان۔4یہِ ختنہٕ کرناونچ ضرورت پیٚیہِ اوٕ موجُب زِ تِم تمام لوٗکھ یِم لڑنس لایق ٲسؠ وۅنؠ مِصرٕ منٛزٕ نیرتھ صحراون منٛز پھیران مودمٕتؠ5یِمن سارنےٕ اوس مِصرس منٛزے ختنہٕ سپُدمُت۔ مگر تِم لڑکہٕ یِم مِصرٕ نیرتھ صحراون منٛز زاے ٲسؠ وُنہٕ ختنہٕ روٚستُے۔6اسرائیلی روٗدؠ صحراون منٛز ژتجہن ؤرین پھیران۔ یوٚتام تمام لوٗکھ یِم لڑنس قٲبل ٲسؠ صحراو بُزؠ گے۔ چونٛکہِ تِمو اسرائیلیٚو ٲسؠ نہٕ یہُوواہؔ سٕنٛدؠ حکم پٲلمٕتؠ لہٰذا اوس یہُوواہؔ سُنٛد یژھُن ز یِم لوٗکھ گژھن نہٕ ہرگِز تہِ سۅ ذرخیز سرِزمین وُچھِنؠ یمیُک خداوندن یہنٛدٮ۪ن بُزرگن وعدہ دیُتمُت اوس۔ یہِ وعدہ دِژمٕژ زمیٖن ٲس تیٖژاہ زرخیز زِ وننہٕ اوس یِوان زِ اتہِ چھےٚ دۅدٕ کۅلہٕ تہٕ مانچھ کۅلہٕ پھیران آبہٕ کۅلن سٟتؠ سٟتؠ۔7یِمنے یہُوواہؔ سنٛدٮ۪ن نافرمان بندن ہنٛدٮ۪ن لڑکن کرنوو یسوعنؔ ختنہٕ جِلجالؔ شہرس منٛز۔ چونکہِ ونیُک تام ٲسؠ یِم سٲری بیابٲنؠ سفرس منٛزے لہٰذا اوسنہٕ یِمن ختنہٕ کرنہٕ آمُت۔8سارنےٕ اسرائیلی مردن ختنہٕ کرنہٕ پتہٕ کوٚر یِمو ساروٕے اسرائیل یو أتی پننس پڑاوس پیٚٹھےَ قرار یوٚتام تِم لوٗکھ بلیے یِمن ختنہٕ اوس کرنہٕ آمُت۔9امہِ پتہٕ ووٚن یہُوواہنؔ یسوعسؔ "از کٔرٕو مےٚ توٚہہِ مِصرٕچ سٲرے خجالتھ تہٕ رسوٲیی دوٗر۔ "اوے پیٚو اتھ جایہِ ناو جِلجالؔ یعنی ڈولہِ گِنؠ لگن واجِنؠ جاے۔10امہِ رٮ۪تہٕ کہِ ژۅدٲہِمہِ دوٚہہ شامس ییٚلہِ اسرائیلی اتی جِلجالس منٛز ٲسؠ یریحو شہرِ کِس مٲدٲنی علاقس نکھہٕ، تِمو منٲو اسرائیل یو فسَح عید أتی۔11امہِ خاص دعوت کہِ دویمہِ دوٚہہ کھییہِ یِمو لوٗکو خمیرٕ ورٲے بناونہٕ آمٕژ ژوٚٹ تہٕ تٔوِتھ پھَل مۅٹھ یۅسہ کنٲنؠ شہرس منٛز وۅپدیمٕژ چھےٚ۔12امہِ پتہٕ کوٚر خداین یِمن آسمٲنؠ غذا "مَنّ" سوزُن بنٛد۔ امہِ پتہٕ کھیٚو یِمو کنعانؔ چہِ زمیٖنہِ پٮ۪ٹھ وۅپدن وول غذا۔13ییٚلہِ یسوعؔ یرِیحُو شہرس نَکھَے اوس تٔمؠ وُچھ اکھ انسان صوٗرت برونٛہہ کنہِ۔ یمِس اتھس منٛز ننگے تلوار ٲس۔ یسوعؔ آو أمِس نَکھہٕ تہٕ پرُژھنس، "ژٕ چُھکھا سانہِ طرفہٕ کِنہٕ دُشمنہٕ سٕنٛدِ انٛدٕ؟14أمؠ انسانن ووٚن یسوعسؔ اورٕ، "کُنہِ تہِ انٛدٕ نہٕ۔ بہٕ چُھس یہُوواہؔ سنٛدٮ۪ن سِپہَن ہُنٛد سالار، تہٕ وۅنؠ چُھس بہٕ آمُت۔ "پتہٕ پیٚو یسوعؔ تس عزت ظٲہر کرنہٕ خٲطرٕ زمینس پٮ۪ٹھ پنُن بُتھ ہٮ۪تھ زمینس پٮ۪ٹھ۔ یسوعنؔ ووٚن أمِس، "میانہِ آغہٕ، ژٕ کیاہ چھُکھ مےٚ کرنُک حکم دِوان؟ بہٕ چُھس تُہنٛد خٲدم۔"15یہُوواہؔ سٕنٛدِ سپہَن ہنٛدؠ سالارن ووٚن یسوعسؔ، "پنٕنؠ نالٲنؠ کٔڈِو پننٮ۪و کھۅرو منٛزٕ، تکیازِ یہِ زمیٖن یتھ پٮ۪ٹھ ژٕ وُنکٮ۪س وۅدٕنؠ چُھکھ چھےٚ مقدس۔" یہِ بوزتھےٕ کٔڈ یسوعنؔ پنٕنؠ نالٲنؠ نٮ۪بر۔
Bridge Connectivity Solutions Pvt. Ltd.