یوحنا21
1یِمو واقہو پتہٕ گو یسوعؔ پننٮ۪ن شٲگردن پٮ۪ٹھ بیٚیہِ اکہِ دوٚہہ ظٲہر تبریاس ناوکِس سۅدرس پٮ۪ٹھ یتھ گلیلی ہُنٛد سُدر تہِ ونان چھِ۔ یہِ سپدیاو یمہِ آیہِ۔2شمعون پطرس، تُوما یمِس دوکُر تہِ ونان چھِ، نتن ایلؔ یُس گلیلی علاقہٕ کہِ قصبہٕ قانا پٮ۪ٹھ آمُت اوس، زبیدیؔ سنٛدؠ نیٚچوؠ یعقوبؔ تہٕ یوحناؔ تہٕ بیٚہِ زٕ یسوعؔ سنٛدؠ شٲگرد ٲسؠ یِکہٕ وٹہٕ۔3شمعون پطرسن ووٚن باقین شٲگردن، "بہٕ گژھو کینٛہہ گاڈٕ رٹنہِ۔ "تِمو ووٚنُس، "أسؠ تہِ یِمو ژےٚ سٟتؠ" تِم دراے سٲری تہٕ کھٔتؠ أکِس ناوِ رودؠ گاڈٕ رٹنچہِ کوششہِ منٛز۔ مگر امہِ رٲژ ہٮ۪چ نہٕ یِمو کانٛہہ گاڈ رٔٹِتھ۔4دویمہِ دوٚہہ گاش پھۅلوُن اوس یسوعؔ سۅدرٕ بٔٹھِس پٮ۪ٹھ وۅدٕنؠ مگر شٲگرد یِم گاڈٕ رٹنہِ درامٕتؠ ٲسؠ رودؠ امہِ نِش بے خبر۔5یسوعؔن دیُت یِمن ناد، "میانیو یارو۔ توٚہہِ چُھو نہٕ کانٛہہ گاڈ تہِ رٔٹمٕژ۔ چُھوا" تِمو ووٚنُس، "اسہِ چُھنہ۔"6تٔمؠ ونُکھ "پنُن زال ترٲیِو ناوٕ دٔچھنہِ انٛدٕ تہٕ توٚہؠ ہیٚکِو گاڈٕ رٔٹِتھ۔ "یِمو کوٚر یی تہٕ رچٮ۪کھ بسیار گاڈٕ مگر تِم ہیٚکؠ نہٕ زالس واپس لٔمِتھ7بہٕ، سُہ شٲگرد یمِس یسوعؔن لول بوٚر، وۅتُھس پطرسن، "یہِ چھُے خداوند یسوعؔ۔ اوے ییٚلہِ شمعون پطرسن یہِ بوز تٔمؠ لوگ پنُن کوٹ یُس تٔمؠ کامہِ باپتھ کوٚڈمُت اوس تہٕ لٲیِن آبس وۅٹھ بٹھس کُن ژھانٹہِ ترنہٕ باپت۔8باقےٕ گاڈٕ رٹنہِ درامٕتؠ شٲگرد آے ناوِ منٛز بٔٹھِس کُن گاڈو تروپتھ زالس ناوِ پتہٕ پتہٕ لمان۔ تِم ٲسؠ نہٕ جھیلہٕ کہ بٹھہِ دوٗر زیادٕ، صرف نمتھ میٹر دوٗر۔9ییٚلہِ تِم بٔٹھِس پٮ۪ٹھ وٲتؠ، تِمو وُچھ نار دزان یُس یسوعؔن زولمُت اوس یتھ پٮ۪ٹھ یسوعؔ گاڈٕ بُزان اوس اتَتھ اوس اکھتُے اکھ ژوچہِ ٹُکرٕ تہِ موجود۔10یسوعؔم ونُکھ، "گژھیٚو انِو کینٛہہ گاڈٕ یمہٕ توٚہہِ ؤنؠ رچیٚو۔11اوے دراو شمعون پطرس واپس ناوِ ہنحدِس دمس کُن تہٕ اوٚنُن زال لٔمِتھ بٔٹھِس کُن۔ یہِ اوس 153 بجو گاڈو سٟتؠ بٔرِتھ۔ ییژٕ گاڈٕ ٲسِتھ تہِ آو نہٕ زال پھُٹِتھ۔12یسوعؔن ونُکھ، "ولیٚو پٔکیٚو یورکُن تہٕ کٔرِو ناشتہٕ!" شاگردو منٛزٕ کوٚر نہِ اکؠ تہِ جُرت۔ شاگردو منٛزٕ ووٚتھ نہٕ أکِس تہِ تار زِ پرژھ ہس، "توٚہؠ کم چُھو۔ "تِم ٲسؠ زانان زِ سُہ چُھ یسوعؔ خداوند۔13یسوعؔ آو تہٕ تجِن ژوٚٹ تہٕ پلنٲوکھ گاڈن سٟتؠ تہٕ کوٚرُن یی۔14خدایہِ سٕنٛدِ طرفہٕ زندٕ کرنہٕ پتہٕ اوس تریٚمہِ پھرِ یسوعؔ پننٮ۪ن شٲگردن منٛز ظٲہر گوٚمُت15ییٚلہِ تِمو اڈٕ کوج کھیٚتھ مۅکلوو یسوعؔن پرُژھ شمعون پطرسس، "شمعون، ژٕ چُھکھا مےٚ یِمو ساروٕے کھۅتہٕ زیادٕ لول بران:" پطرسن ووٚنُس، "آ! خداوند ژےٚ چھے خبر بہٕ چُھسے ژےٚ لول بران:" یسوعؔن ووٚنُس، "یِمن ہُنٛد خیال تھٲوزِ یِم مےٚ پٮ۪ٹھ پژھ تھاون چھِ:" 16یسوعؔن ووٚنُس مزید، "جان سنٛدِ شمعونہٕ ژٕ چُھکھا مےٚ لول کران؟" أمؠ ووٚنُس اورٕ، "خداوند! آ۔ توٚہہِ چُھو پانس خبر زِ بہٕ چُھسے ژےٚ لول کران" یسوعؔن ووٚنُس، "یِمن ہُنٛد خیال تھٲوزِ یِمن مےٚ پٮ۪ٹھ پژھ چھےٚ:"17یسوعؔن پرُژھ تریٚمہِ پھرِ، "یوحناؔ سنٛدِ شمعونہٕ، ژٕ چُھکھا مےٚ لول کران۔ پطرس سپُد دۅکھٕ زد زِ یسوعؔن پرُژھ أمِس بار بار ترییہٕ پھرِ زِ سُہ چھا تمِس لول کران۔ پطرسن ونُس خداوند ژےٚ چھے سٲری خبر۔ ژےٚ چھے خبر زِ بہٕ چُھسے ژےٚ لول کران۔ یسوعؔن ووٚنُس، "تہنٛدؠ خیال تھٲوؠ زِ یِم مےٚ پٮ۪ٹھ پژھ تھاوان چھِ۔18بہٕ چُھسے ونان پوٚز۔ ییٚلہِ ژٕ جوان اوسُکھ ژٕ اوسُکھ پنٕنؠ پلو پانے لاگان تہٕ یوٚت یژھکھ توٚت نیرہکھ۔ وۅنؠ گو ییٚلہِ ژٕ بوٚڈ گژھکھ ژٕ رٹکھ پننہِ شریرٕ نِشہ پنٕنؠ اتھہٕ پتھ تہٕ بدل کانٛہہ لٲگی ژےٚ پلو تہٕ نی پانس سٟتؠ یوٚت ژٕ گژھُن یژھان آسکھ تہٕ۔19یسوعؔن ووٚن ہاونہٕ باپتھ زِ پطرس کِتھہٕ پٲٹھؠ مرِ تہٕ خدایہِ سنٛز عظمت ہاونہٕ باپتھ۔ اوٕ پتہ ووٚنُن پطرسس، "ؤلِو بٔنِو میٲنؠ شٲگرد"20ییٚلہِ پطرس پتھ کُن پھیور، تٔمؠ وُچھ جان شٲگرد یمِس یسوعؔ لول کران اوس۔ پتہٕ پتہٕ پکان جان اوس نفر یُس کال کھیٚنہٕ وِزِ یسوعؔ ہس کُن نمیو۔ یسوعؔ سٕنٛدِ مرنہٕ برونٛہہ تہِ اوسنس پرُژھمُت، "خداوند ژےٚ کُس کری دغا۔21اوے ییٚلہِ پطرسن جان وُچھ تٔمؠ پرُژھ یسوعؔس، "خداوند۔ یمِس کیاہ چُھ سپدن وول:"22یسوعؔن ووٚنُس، "یوٚدوے بہٕ پننس واپس ینس تام امسُنٛد زندٕ روزُن یژھ، تتھ سٟتؠ چھی نہٕ ژےٚ کینٛہہ یوتام چون تعلق چُھ ژٕ روز ہتھٔے میون شٲگرد۔ یتھٕ پٲٹھؠ زن ژٕ میون شٲگرد روزکھ"23چونکہ یسوعؔن ووٚن یہِ، شٲگردن منٛز گییہِ افوا زِ یوحنا چُھنہٕ زانہٛہ تہِ مرن وول زِ تِم روٗد یہِ ایماندارن منز دُھراوان۔ وۅنؠ گو یسوعؔن ووٚن نہٕ پطرسس زِ یوحنا مرِ نہٕ زانہٛہ بلکہِ ووٚننس یوٚدوے بہٕ یژھٕ امسُنٛد زندٕ روزُن یوٚتام بہٕ واپس یِمہٕ۔24بہٕ، یوحنا، یسوعؔ سُنٛد شٲگرد چُھس یِمن کتھن تصدیق کران تہٕ مےٚ ہٮ۪چھہٕ یِمہٕ کتھٕ یتھ پننہِ کتابہِ منٛز۔ أسؠ چھِ زانان زِ یہِ مےٚ لیٚوکھ سُہ چُھ پوٚز۔25یسوعؔن کٔرؠ بیٚیہِ تہِ کٟتؠ معجزٕ یِم یوٚدوے بہٕ اکہِ اکہِ لیکھہٕ بہٕ چُھس مانان زِ تیٚلہِ آسنہٕ سورےٕ دُنیا تہِ کٲفی سۅ کتاب لیٚکھنہٕ باپتھ۔
Bridge Connectivity Solutions Pvt. Ltd.