یوحنا13
1عید فسح شروع گژھنہٕ برونٛہہ اکھ دوٚہہ زون یسوعنؔ زِ دُنیا ترٲوِتھ مٲلِس نِش واپس گژھنُک وق ووت۔ سُہ اوس پننٮ۪ن شٲگردن یِم یتھ دُنیہس منٛز تس سٟتؠ سٟتؠ رودؠ سخ لول بران۔ سُہ اوس تمن دل کیو پُروو لول بران۔2ییٚلہِ یسوعؔ تہٕ تسٕنٛدؠ شٲگرد شامُک بتہٕ کھیٚوان ٲسؠ، شیطانن اوٚن شمعون اِسکریوتی سٕنٛدِس نیٚچوؠ یہُوداؔ سٕنٛدِس دِلس منٛز یہِ کتھ تراومژ زِ تس پزِ یہُودؠ سردارن یسوعؔ بٲنٛدؠ بنونس منٛز پنُن مدد دیُن۔3یسوعؔ اوس زانان زِ تس چُھ پننؠ ببن پرٮ۪تھ چیزس پٮ۪ٹھ پورٕ قدرت تہٕ اختیار بخُشمُت تہٕ یِتہِ زانان زِ سُہ چُھ خدایہِ سٕنٛدِ پیٚٹھےَ آمُت تہٕ ولؠ واتہِ واپس تسؠ نِش۔4چونکہِ سُہ اوس یہِ سورےٕ زانان یسوعؔ ووٚتھ شامُک بتہٕ کھینہٕ والہِ میزٕ پٮ۪ٹھٕ تھوٚد۔ نٮ۪برِم پلو کٔڈِن تہٕ وجِن پننِس کمرس تولیا۔5أکِس بجہِ باٹہِ منٛز بوٚرُن آب تہٕ لٲگِن پننٮ۪ن شٲگردن ہنٛدؠ کھوٚر چھلٕنؠ تہٕ پننس، س کمرس ؤلِتھ تولیا سٟتؠ یم پاد خشک کرٕنؠ۔6ییٚلہِ سُہ شمعون پطرس نِش تسٕنٛدؠ کھوٚر چُلنہِ ووت پطرسن وونُس، "خدا وند توٚہہِ پزن نہٕ میٲنؠ کھوٚر چھلٕنؠ۔7یسوعنؔ ووٚنُس یورٕ، "وُنکٮ۪ن چھیٚکھ نہٕ ژٕ زانان زِ بہٕ کیاہ چُھس کران مگر پتہٕ پہن زانکھ۔8پطرسن ووٚنُس، "ژٕ چھلکھ نہٕ میٲنؠ کھوٚر زہنٛؠ تہٕ زہنٛؠ۔ یسوعنؔ وونُس یوٚدوے بہٕ چھلتھ نہٕ ژٕ پراوکھ نہٕ ادٕ زہنٛؠ مےٚ سٟتؠ سٟتؠ خدایہِ سُنٛد فضل۔9شمعون پطرسن وونُس اورٕ، "خداوند۔ میٲنؠ یِم کھورےٕ یٲتؠ مٕہ چھلیٚو۔ میٲنؠ اتھہٕ تہٕ میون کلہٕ تہِ چھلیٚو"10یسوعؔن ووٚنُس، "سُہ یُس کٲنٛسہِ پانہٕ چھوٚلمُت آسہ، تس چُھنہٕ حاجت بییِس کھورو ورٲے بیٚیہِ کینٛہہ چھلنُک۔ تمسُنٛد باقےٕ جسم چُھ پاک۔ توٚہؠ میٲنؠ شٲگرد چُھو پاک مگر نَہ مکمل نَہ سٲری۔11یسوعنؔ ووٚن یہِ روحٲنی طور پاک آسنس متعلق تکیازِ سُہ اوس زانان زِ کُس چُھ یہودٮ۪ن سُہ بٲنٛدؠ بناونس منٛز اتھہٕ روٚٹ کرن وول۔ اوے ووٚن تٔمؠ، "توٚپؠ سٲری چُھو نہٕ پاک"12ییٚلہِ تٔمؠ کھوٚر چٔھلِتھ مۅکلٲوؠ تٔمؠ لٲگؠ پنٕنؠ پیٚٹھؠ پلو واپس۔ پتہٕ بیوٹھ سُہ بیٚیہِ میزس پٮ۪ٹھ تہٕ ووننکھ توٚہہِ پزِ زانُن زِ مےٚ کیاہ کوٚر وۅنؠ تہنٛدِ باپتھ۔13توٚہؠ چُھو پزنہٕ پٲٹھؠ مےٚ پنُن استاد تہِ خداوند مانُن۔ پزی چُھس بہٕ یی۔14چونکہِ مےٚ، تہنٛدؠ استادن تہٕ خداوندن کرٕو توٚہہِ بڈٕ انکسٲری سان خدمت تہنٛدؠ پاد چٔھلِتھ لہٰذا پزِ توٚہہِ تہِ انکسٲری سان اکھ اکؠ سنٛز خدمت کرٕنؠ پانہٕ وٲنؠ کھوٚر چٔھلِتھ۔15تُہنٛدؠ کھوٚر چٔھلِتھ کٔر مےٚ اکھ مثال قٲیِم یُتھ توٚہؠ پانہٕ وٲنؠ اکھ اکؠ سنٛز خدمت کٔرِو یتھ پٲٹھؠ زن مےٚ تہنٛز خدمت کٔر۔16بہٕ چُھسو پوٚز ونان۔ یتھ پٲٹھؠ زن اکھ نوکر یا غلام پننس مٲلکہٕ سنٛدِ کھۅتہٕ ژوٚر اہم چُھنہٕ تہٕ نَہ چُھ خبر انُن وول رسول تس سوزن وٲلؠ سنٛدِ کھۅتہٕ اہم۔17چونکہِ توٚہہِ زونو یہِ وۅنؠ زِ توٚہہِ پزِ اکھ اکؠ سنٛز خدمت کرٕنؠ خدا کَریو توٚہہِ پنُن فضل۔18بہٕ چُھس نہٕ ونان زِ توٚہہِ سارنےٕ کریو خدا فضل۔ بہٕ چُھسکھ پننہِ شاگردی باپتھ پنٕنؠ ژٲرمٕتؠ لوٗکھ وارٕ زانان وۅنؠ گو یہِ سپدن وول چُھ تہِ گژھِ سپدُن تاکہِ مقدس صحیفن منٛز لٮ۪کھنہٕ آمٕژ نبین ہنٛز کتھ نیرِ پٔز۔ یمؠ نفرن مےٚ سٟتؠ کال کھیو أکِس یارٕ سٕنٛدؠ پٲٹھؠ سُے آو دُشمن ہٮ۪تھ وتہٕ ہاوک۔ 19یمہِ اپور وَنو بہٕ یہِ سپدن وول چُھ، تہِ سپدِنہٕ برونٛہےٕ تاکہِ ییٚلہِ یِتھے پٲٹھؠ سورےٕ سپدِ توٚہؠ ہیٚکو پژھ کٔرِتھ زِ بےٕ چُھس خدا۔ 20یہِ چُھ سورےٕ پزر ونان۔ سُہ ہر کانٛہہ یُس میٲنِس سوزمتِس پٮ۪ٹھ پژھ تھاوِ چُھ مےٚ مانان تہٕ یُس مےٚ مانان چُھ سُہ چُھ میٲنِس مٲلِس تہِ مانان یمؠ بہٕ سوزُس۔21ییٚلہِ یسوعنؔ یہِ ووٚن سُہ گو بے چین۔ بڈٕ سنٛجیدگی سان کوٚر تِمو اعلان۔ بہٕ چُھسو ونان پوٚز۔ توٚہہِ منٛزے اکھ کرِ دغل یارژ میانٮ۪ن دُشمنن سٟتؠ رٔلِتھ۔22تسٕنٛدؠ شٲگرد رودؠ اکھ أکِس کُن ژرژان تہٕ تعجب کران زِ یہِ کُس نفر چُھ تِمو منز یس متعلق یسوعؔ ونان چُھ۔23جان ناوُک اکھ شٲگرد یس یسوعؔ لول کران اوس اتؠ أمِس نکھہٕ میزس پٮ۪ٹھ بہتھ۔24شمعون پطرسن ہوو أمِس کُن زِ سُہ پرژھِن یسوعؔس اما سُہ کس شٲگردس متعلق چُھ یہِ کتھ کران۔ اوے کھوٚت جان ہیٚور پہن یسوعؔس پرژھنہِ25اوے نمیو سُہ رژھا پتھ کُن تہٕ ہرژھُن یسوعؔس لوٚتہِ پٲٹھؠ۔ خداوند۔ توٚہہِ کُس کرِ دغا۔26یسوعؔن ووٚنُس، "سُہ سخص یمِس بہٕ یہِ ژۅچہِ کھنٛڈ دِمہٕ اتھ کٹورِ منٛز غۅتہٕ کٔرِتھ:" امہِ پتہٕ کوٚر تٔمؠ آبہٕ کٹورِ منٛز ژۅچہِ کھنٛجہِ غوتہٕ تہٕ پلنٲون یہُوداہسؔ شمعون اِسکریوتی سٕنٛدِس نیٚچوِس۔27یُتھےٕ یہوداین یہِ ژۅچہِ کھنٛڈ رٔٹ یسوعؔس نِش، شیطانن اوٚن سُہ پننِس اتھس منٛز۔ یسوعؔن ووٚنُس، "کرِ ؤلؠ ؤلؠ یہِ ژؠےٚ سونچمُت چُھتھ"28میزس پٮ۪ٹھ بہتھ کٲنسہِ تہِ نفرس توٚگ نہٕ زہنٛؠ زِ یسوعؔن کیازِ ووٚن یہِ یہُوداہسؔ۔29یِمو منٛزٕ زون کینٛژو زِ یسوعؔ چُھ ژکہِ یہُوداہسؔ نیرنہٕ باپتھ ونان تاکہِ سُہ انہِ مٔلؠ عید فسع باپتھ ضرورے چیز یا نیرِ غریبن پونٛسہٕ دِنہٕ باپتھ۔ تِمو سونچ یہِ اوٕ کِنؠ تکیازِ یہُوداؔ اوس تتھ تھیلہِ رٔٹِتھ یتھ منٛز پونٛسہٕ ٲسؠ آسان۔30وۅنؠ ییٚلہِ یہوداہنؔ یسوعؔس نِش ژوٚٹ رٔٹ سُہ دراو ؤلؠ ؤلؠ نٮ۪بر اتہِ ٲس نٮ۪برٕ راتھ31یہُوداؔ نیرنہٕ پتہٕ ووٚن یسوعؔن۔ وۅنؠ ہوو خداین پانہٕ لوٗکن زِ بہٕ آدمؔ سُنٛد گۅبُر کوتاہ عظیم چُھس۔ مےٚ ہوو پانہٕ لوٗکن خدا کوت عظیم چُھ۔32خدا ہاوِ پانہٕ لوٗکن زِ بہٕ آدمؔ سُنٛد گۅبُر کوتاہ عظیم چُھس تہٕ سُہ ہاوِ یہِ وۅنؠ۔33توٚہؠ، یمن بہٕ محبت کران چُھس زنتہٕ میٲنؠ شُرؠ چُھو۔ بہٕ روزٕ توٚہہِ سٟتؠ بس بیٚیہِ رژھِ کھنجہِ پتہٕ ژھٲرِو توٚہؠ مےٚ مگر بہٕ آسہٕ تی یہِ مےٚ یہُودؠ سردارن ووٚن تہٕ توٚہہِ چُھو سُہ ونان "توٚہؠ ہیٚکو نہٕ تتھ مقامس وٲتِتھ یوٚت بہٕ واتن وول چُھس۔34وۅنؠ دِمو بہٕ توٚہہِ اکھ نوو حکم تاکہِ توٚہؠ کٔرِو اکھ أکِس محبت۔ توٚہہِ پزِ اکھ أکِس محبت کرُن تِتھے پٲٹھؠ یتھٕ پٲٹھؠ مےٚ توٚہہِ کورُو۔35یوٚدوے توٚہؠ اکھ أکِس محبت کٔرِو توٚہہِ ژرژان سٲری ونن پزی چھِ یِم میٲنؠ شٲگرد۔36شمعون پطرسن ووٚنُس، "خداوند ژےٚ کور چھِے واتُن۔ یسوعؔن ووٚنُس، "ژٕ ہیٚککھ نہٕ وۅنؠ مےٚ سٟتؠ تور یِتھؠ یوٚت مےٚ گژھُن چُھ۔ وۅنؠ گو پتہٕ پہن ہیٚککھ گٔژھِتھ۔37پطرسن ووٚنُس، "خداوند بہٕ کیازِ ہیٚکہٕ نہٕ وُنکٮ۪س ژےٚ سٟتؠ یتھ۔ بہٕ چُھس چانہِ باپتھ مرُن یژھان۔38یسوعؔن ووٚنُس، "ژٕ چھُکھ نہٕ میانہِ باپتھ مرنہٕ باپتھ تیار کینٛہہ۔ یقیناً ونکھ ژٕ کۅکر بانگہِ برونٛہہ صبحٲے زِ ژٕ زانکھ نہٕ مےٚ"
Bridge Connectivity Solutions Pvt. Ltd.