یوحنا1
1پرٮ۪تھ وۅپدٲیشہٕ برونٛہہ اوس کلام تہٕ کلام اوس خدایس سٟتؠ۔ کلامےٕ اوس خدا۔2تہٕ کلام اوس خدایس سٟتؠ، کایناتچہِ پیدایشہٕ برونٛہہ تہِ۔3پرٮ۪تھ کانٛہہ چیز اوٚن خداین بارسس امی کلامہٕ سٟتؠ۔ یہِ کینٛہہ تہِ ظہوٗرس آو تہِ آو بس امی کلامہٕ سٟتؠ۔4کلام چُھ دِوان پوشوٕنؠ زندگی، تہٕ سۅ پوشہِ ونؠ زندگی چھِ خدایہِ سُنٛد رُت تہٕ پوٚز گاش یُس تمؠ انسانس پؠٹھ ظٲہر کوٚر۔5خداین کور پنن رُت تہٕ پوٚز گاش کۅکار دنیہس پؠٹھ ظٲہر تہٕ تمؠ بدکار دنیاہن کور نہٕ سُہ قبول۔6خداین سوز یوحناؔ ناوُک اکھ شخص یُس بپتسمہ دِنہٕ وٲلؠ سنٛدِ رنگؠ زاننہٕ آو۔7سُہ آو لوٗکن منٛز اعلان کرنہِ زِ یسوعؔ چُھ نور۔ سُہ آو امہِ نورچ گوٲہی دِنہِ یہِ گوٲہی زِ سُہ چُھ نور أمؠ کوٚر یہِ واشگاف اعلان زِ أمؠ سنٛز گوٲہی پٮ۪ٹھ کرن لوٗکھ پژھ تہٕ یقین۔8یوحنا اوسنہٕ پانہٕ سُہ نور مگر سُہ آو لوٗکن اتھ نورس متعلق وننہٕ باپتھ۔9پوٚز گاش اوس یسوعؔ یمؠ خدایہِ سُنٛد پزر تہٕ خٲر پرٮ۪تھ کٲنٛسہِ پٮ۪ٹھ ظٲہِر کوٚر۔ سُہ اوس سُہ گاش یُس دُنیاہس منٛز پرٮ۪زلوُن اوس۔10کلام اوس دُنیاہس منٛز تہٕ تمؠ کور کاینات پٲدٕ۔ مگر دُنیہکیٚو لوکو پرٮ۪زنوو نہٕ سُہ۔11کلام ووت تٔمؠ سنٛدٮ۪ن پننٮ۪ن لوٗکن یعنی یہُودینؔ تام مگر تِمو کوٚر تمس انکار۔12وۅنؠ گو یِمو سُہ قبوٗل کوٚر تہٕ تس پٮ۪ٹھ پژھ کٔر تمن دیُت تٔمؠ خدایہِ سٕنٛدؠ اولاد آسنُک شرف۔13یِم خدایہِ سنٛدؠ اولاد گےَ نہٕ پٲدٕ روحٲنی طور عام انسٲنی طریقو یا انسٲنؠ نفسٲنی خٲہشو کِنؠ تہٕ نَہ پننٮ۪و مالیٚو ہنٛدِ اِرادٕ۔ یِم آے خدایہِ سٕنٛدِ یژھنہٕ روحٲنی طور وجودس۔14کلام بنیٚوو اکھ حقیقی انسان تہٕ بسیوو عارضی پٲٹھؠ ییٚتی ییٚتہِ أسؠ روزان چھِ جلالہٕ بھرژ قۅدرت ظٲہر سپدان۔ یعنے تمس لاثٲنی گۅبرٕ سنٛز جلالہٕ بھرٕژ قۅدرت یوس ببہٕ سنٛدِ پؠٹھٕ آو۔ سُہ چُھ پورٕ پٲٹھؠ خدایہِ سنزن رحمدلی ہنٛزن عملن تہٕ پزن تعلیمن ہُند مٲلکھ۔15یوحنا ہن دِژ امؠ سنٛز گوٲہی۔ بپتسمہ دِنہٕ وٲلؠ یوحناؔہن ووٚن أمِس متعلق لوٗکن کرٮ۪کھ لٲیِتھ، "مےٚ ونُو توٚہہِ گۅڈَے زِ مےٚ پتہٕ چُھ سُہ یِنہٕ وول۔ سُہ یُس میانہِ کھۅتہٕ افضل چُھ تکیازِ سُہ اوس واریاہ کال ہؠتھ مےٚ برونٹھی موجود۔"16اسہِ چُھ معلوم زِ کلامہٕ چُھ پوٗرٕ پٲٹھؠ خدایہِ سنزن رحمدلی ہنٛزن عملن تہٕ پزن تعلیمن ہُند مٲلکھ تکیازِ اسہِ چُھ اکہِ پتہ اکہِ تمؠ سنزن رحمدل کامؠن ہُند فٲیدٕ تُلمُت یمیُک سُہ پورٕ مٲلکھ چُھ۔17خداین سوز یہِ شریعت یِم قانون اسرائیلی لوٗکن پٮ۪ٹھ موسیٰؔ سٕنٛدؠ دٔسؠ۔ مگر یہُنٛد فضل تہٕ پزر ووت یسوعؔ مسیحؔ سٕنٛدؠ برکتہٕ۔18خدا وُچھ نہٕ زہنٛؠ کٲنٛسہِ مگر یسوعؔ چُھ بےمثل تہٕ پانہٕ خدا۔ سُہ چُھ بب خدایس نکھہٕ تہٕ تمؠ چُھ پٲنؠ پانہٕ بب ظٲہر کوٚرمُت۔19بپتسمہ دِنہٕ وٲلؠ یوحناؔہن دِژ امچی گوٲہی ییٚلہِ یہُودؠ زِٹھیٚو تمِس نِش یروشلم پٮ۪ٹھٕ کینٛہہ کاہن تہٕ لاوی یہِ پرژھنہِ سوزؠ۔ ژٕ کُس چُھکھ؟20امہِ وزِ ونُکھ یوحناؔہن کھوٚر ٹھُکرٲوِتھ "بہٕ چُھس نہٕ مسیحؔ"21پتہٕ پرُژھہس "یوٚدوے یی پزر چُھ تیٚلہِ کُس ژٕ؟ ژٕ چُھکھا ایلیا" تورٕ ووٚننکھ، "نَہ، بلکل نہٕ" امہِ پتہٕ پرُژھہس، "ژٕ چُھکھا تیٚلہِ رسول یُس زن خدایہِ سٕنٛدِ وننہٕ کِنؠ یِنہٕ وول چُھ یوحناؔہن ووننکھ "نَہ"22لہٰذا پرُژھ یِمو کاہنو تہٕ ٲوؠ یو اکہ پھرِ بیٚیہِ یوحناہسؔ اسہِ ون تیٚلہِ کُس چُھکھ۔ تاکہِ چون جواب واتناوو أسؠ تِمن زِٹھٮ۪ن یِمو أسؠ ژےٚ نِش سوزؠ۔ پانس متعلق کیاہ دعوا چُھکھ ژٕ کران۔23یوحناؔہن ووننکھ بہٕ چُھس یِمن بیابانن منٛز تُرَے دِنہٕ وول تاکہِ توٚہؠ کٔریٚو پنُن پان تیار تس خداوند سنٛزِ خوش آوے باپتھ ییٚلہِ سُہ ییہِ۔ بہٕ چُھس سُہ یمِس متعلق یسعیاہؔ نبین پیش گوییٔ کرمٕژ چھِ۔ 24یِم کاہن تہٕ لاوی یِم یروشلمسؔ منٛز بہتھ زِٹھٮ۪و سوزؠ مٕتؠ ٲسؠ تِم ٲسؠ فریسی۔25یِمو پرُژھ أمِس مزید، "یوٚدوے ژٕ نَہ چُھکھ مسیحؔ تہٕ نہ ایلیا تہٕ نہٕ رسول تیٚلہِ کیازِ چُھکھ ژٕ لوٗکن بپتسمہ دوان"26یوحناؔ وتھُکھ در جواب، "بہٕ چُھس لوٗکن آبہٕ سٟتؠ بپتسمہ دِوان۔ مگر وۅنؠ چُھ توٚہہِ منٛزٕ کُستام یُس نہٕ توٚہؠ زٲنہِ ہون۔27سُہ چُھ مےٚ پتہٕ ینہٕ وول پوٚز بہٕ چُھس نہٕ تمِؠ سنٛز کھۅربانہٕ وۅتھراونس لایق تہِ۔28یِم واقات سپدؠ دریایہِ یردنس اپارِ مشرقہٕ طرفہٕ بیت عینیاہ گامس منٛز۔ یہِ چھِ سۅ جاے یتہِ یوحناؔ لوٗکن بپتسمہ دِوان اوس۔29امہِ واقہٕ سپدنہٕ پتہٕ بیٚیہِ دوٚہہ وُچھ یوحناؔہن یسوعؔ تمس کُن یوان۔ ادٕ ووٚن تمؠ لوٗکن کُن، وُچھِو! خدایہِ سُنٛد برٕ کٹہٕ مونگُر۔ لوٗکن ہنٛدؠ گناہ بخشنہٕ باپتھ کرِ یہِ پنُن پان قربان تٔتھؠ دنیاہس منٛز۔ 30امؠ سےٕ متعلق اوسسو بہٕ ونان، "سُہ ییہِ مےٚ پتہٕ تہٕ سُے آسہ میانہِ کھۅتہٕ افضل تہٕ اہم تکیازِ سُہ اوس مےٚ برونٛہہ۔31بہٕ اوسُن نہٕ زانان گۅڈٕ زِ سُہ کُس چُھ۔ بہرحال مےٚ تھوو آبہٕ سٟتؠ بپتسمہ دیُن جٲری چھرا اوٕ کِنؠ زِ سُہ سپدِ اسرائیل ین پٮ۪ٹھ ظٲہِر۔32یوحناؔہن دِژ سٲرؠ سےٕ تُرَے، "مےٚ وُچھ دیدمان خدایہِ سٕنٛدِ طرفہٕ روح أکِس کوتُر سنٛزِ شکلہِ آسمانہٕ وسان تہٕ یہِ روح بیوٹھ یسوعسؔ پٮ۪ٹھ۔33گۅڈٕ گۅڈٕ زون نہٕ مےٚ سُہ۔ مگر خداین سوزُس بہٕ آبہٕ سٟتؠ لوٗکن بپتسمہ دِنہِ تہٕ ووننم، "سُہ شخص یمِس پٮ۪ٹھ میون روح وسہِ تہٕ لبہِ قرار دِیہ لوٗکن پاک روح سٟتؠ بپتسمہ۔34مےٚ وُچھ یہِ دیدمان تہٕ بہٕ چُھس توٚہہِ بڈِ ہَٹہِ ونان زِ یہِ شخص یسوعؔ چُھ خدایہِ سُنٛد گۅبُر۔35امہِ واقہٕ پتہٕ بیٚیہِ دوٚہہ بپتسمہ دِنہٕ وول یوحنا اوس پننٮ۪ن بیٚین دوٚن شٲگردن سٟتؠ۔36ییٚلہِ تٔمؠ یسوعؔ وُچھ انٛدؠ پٔکؠ پکان تٔمؠ ووٚن، "وُچھِو یوٚہے چُھ خدایہِ سُنٛد کٹہٕ مونگُر37جان سنٛدیو یِمو دوٚیو شاگردو بوز جان سُنٛد ونُن تہٕ لٔگؠ یسوعسؔ پتہٕ پتہٕ پکنہِ۔38ییٚلہِ یسوعنؔ پوٚت پھیرِتھ یِمہٕ پتہٕ پتہٕ پکان وُچھ، تٔمؠ پرژھُکھ، "توٚہؠ کیا ژھاران؟" تِمو ووٚنُس تورٕ، "ربی آرمنی زبٲنؠ منٛز اُستاد توٚہؠ کتہِ قرار کٔرِتھ۔39تٔمؠ وونُکھ، "ؤلِو پٔکِو مےٚ سٟتؠ تہِ وُچھِو" لہٰذا آیہِ تِم أمِس پتہٕ پتہٕ تہٕ وُچُھکھ یسوعؔ کتہِ اوس ٹھٔہرِتھ۔ امہِ دوٚہہ رودؠ تِم أمسےٕ سٟتؠ تکیازِ دوٚہہ اوس درس لوٚگمُت وق اوس ژیر گوٚمُت یہِ آسہ ہا ژور بجے شام ہیٚو۔40یوحناؔ سنٛز کتھ بوزن والیٚن یِمن دوٚن شٲگردن منٛز اوس اکھ اندریاسؔ یُس یسوعس پتہٕ پتہٕ پکان اوس۔ سُہ اوس شمعون پطرس سُنٛد لۅکُٹ بوے۔41اندریاسن اوٚن گۅڈٕ پنُن بوے شمعون ژھٲرِتھ تہٕ ووننس، "اسہِ لوٚب مسیحؔ گو!" مسیحؔ چُھ یونٲنؠ زبٲنؠ منٛز "کرایسٹ۔"42اندریاسن اون شمعون یسوعس نِش۔ ییٚلہِ یسوعن پطرس وُچھ تٔمؠ ووٚنُس، "ژٕ چُھکھ شمعون۔ چٲنِس مٲلؠ سُنٛد ناو چُھ یوحناؔ۔ یمہِ یوکُن آسہ چون ناو کیفس تہِ۔ "کیفس" چُھ اکھ آرٲمی لفظ۔"پطرس" چُھ یونٲنؠ تہٕ دوشوٕنؠ ہُنٛد معنہِ چُھ "کنہِ پل۔"43امہِ واقہٕ پتہٕ بیٚیہِ دوٚہہ کوٚر یسوعنؔ فٲصلہٕ یہِ جاے تراونُک۔ سُہ گو گلیلی ہنٛدِس علاقس منٛز تہٕ لوٚبُن اتہِ فلپسؔ ناوُک اکھ شخص۔ یسوعنؔ ووٚن أمِس، "پکھ بن میون شٲگرد۔"44فلپس اوس بیت صیدا گلیلی ہنٛدِ شہرُک۔ اندریاسؔ تہٕ پطرس تہِ ٲسؠ امے شہرٕکؠ۔45پتہٕ دراو فلپس تہٕ اوٚنُن نتن ایل ژھٲرِتھ۔ ییٚلہِ سُہ أمِس نِش ووت تہٕ فلپسن ووٚن أمِس، "اسہِ لوٚب مسیحؔ۔ یمِس متعلق موسیٰؔ ہنؔ پننہِ شریعتہٕ چہِ کتابہِ منٛز لیٚوکھمُت چُھ۔ یۅسہ خداین اسرائیل ین سوز تہٕ یمِس متعلق نبیو ووٚن زِ سُہ چُھ یِنہٕ وول۔ سویٔ مسیحؔ چُھ یسوعؔ۔ امؠ سٕنٛدِس مٲلؠ سُنٛد ناو چُھ یوسف۔ سُہ چُھ ناصرت قصبُک روزن وول۔"46نتن ایلن ووٚنُس یورٕ، "ناصرت پٮ۪ٹھ؟ "امہِ جایہِ پٮ۪ٹھٕ کۅسہٕ امید چھےٚ رٕژرچ" فلپس وتھُس یورٕ، "پکھ تہٕ وُچھ پانے!"47ییٚلہِ یسوعنؔ نتن ایلؔ پانس کُن پکان وُچھ۔ تٔمؠ وونُس، "وُچھِو یہِ گو اکھ ایماندار اسرائیلی۔ یہِ دِیہ نہٕ زانہٛہ کٲنٛسہِ دھوکھہٕ48نتن ایلنؔ پرُژھنس ژٕ کتہِ زانَکھ بہٕ کیُتھ انسان چھس۔ یسوعنؔ ووٚنُُس یورٕ، "مےٚ وُچُھکھ ژٕ فلپس سُنٛد یور اننہٕ برونٛٹھے ییٚلہِ ژٕ انجیر کُلِس تل بہِتھ اوسُکھ۔"49امہِ پتہٕ ووٚنُس نتن ایلن کھُلہٕ پٲٹھؠ زیٚو مُژرِتھ، "اُستاد ژٕ گژھکھ ضرور خدایہِ سُنٛد گۅبُر آسُن۔ ژٕ چُھکھ اسرائیل لُک بادشاہ۔ یمؠ سُنٛد انتظار ٲسؠ کران أسؠ۔50یسوعنؔ ووٚنُس، "ژٕ چُھکھا مےٚ پٮ۪ٹھ اوٕ کِنؠ پژھ کران زِ مےٚ وۅنےٕ ژےٚ زِ ژٕ اوسُکھ پانہٕ انجیر کُلِس تل بہتھ۔ "ژٕ روزکھ مےٚ امہِ کھۅتہٕ تہِ بجہِ کامہِ کران وُچھان۔51امہِ پتہٕ ووٚنُس یسوعنؔ، "بہٕ چُھسے ژےٚ پوٚز ونان پننس جدس یعقوبؔ سنٛدِ خوابکؠ پٲٹھؠ ژٕ وُچھکھ آسمان مُژرنہٕ یِوان، تہٕ ژٕ وُچھکھ خدایہِ سٕنٛدؠ فرشتہٕ مےٚ خدایہِ سٕنٛدِس گۅبرس پٮ۪ٹھ یِوان تہٕ گژھان۔
Bridge Connectivity Solutions Pvt. Ltd.