یعقوب1
1بہٕ یعقوب چھُس خدا تہٕ خداوند یسوعؔ مسیحؔ سنٛز خدمت کران۔ بہٕ چھُس یہِ چِٹھؠ لٮ۪کھان توٚہہِ ، یِمن یسوعسؔ پیٚٹھ یقین چھُ تہٕ یِمہٕ رومی سلطنت کٮ۪ن واریاہن علاقن منٛز روزان چھُ۔ بہٕ چھُسو توٚہہِ سارنےٕ سلام سوزان۔2میانیو بایو تہٕ بینیو، واریاہ خوشی منایو ییٚلہِ توٚہؠ مختلف مشکلاتن ہُنٛد تجربہٕ چُھو کران۔3یہِ سمجھِیو زنتہٕ توٚہؠ مشکلاتن منٛز خدایس پیٚٹھ ایمان چھُو تھاوان، یہِ کرِ توٚہہِ پۅختہٕ شخص بننس منٛز مدد۔4تہنٛدِس ٲخرس تام کرِو مشکلات برداشت، تاکہِ توٚہؠ ہیٚکو پرٛتھ طریقہٕ مسیحؔ سٕنٛز پٲروی کٔرِتھ۔ تیٚلہِ گژھِو نہٕ توٚہؠ ناکام اصل کارکردگی کرنس منٛز۔5اگر توٚہہِ منٛزٕ کٲنٛسہِ یہِ زاننٕچ ضرورت چھےٚ زِ کیا چھُ کرُن، تیٚلہِ پرژھِ سُہ خدایس تہٕ خدا ونہِ تٔمِس۔ خدا چُھ پرٛتھ کٲنسہِ فراخ دلی سان دِوان۔ خدا چُھنہٕ تِمن لوٗکن کھرٮ۪کھ کران یم چیز منٛگان چِھ۔6مگر ییٚلہِ توٚہؠ خدایس دُعا چھِ منٛگان، توٚہہِ پزِ جواب دِنہٕ خٲطرٕ أمِس پیٚٹھ بھروسہٕ کرُن۔ اتھ پیٚٹھ مہٕ کرِو شک زِ سُہ دِیو نہٕ توٚہہِ جواب تہٕ کریٚو نہٕ مدد۔ یم لوک خدایس پیٚٹھ شک چِھ کران تم چِھ گۅڈٕ اکھ کأم کرنُک فٲصلہٕ کران، مگر پتہٕ چِھ تم بیٚیہِ کینٛہہ کرُن یژھان۔ تِم چھِنہٕ زانٛہہ تہِ اکسےٕ طریقس پیٚٹھ دٔرِتھ روزان۔7درحقیقت، یِم لوٗکھ شک چھِ کران، تمن پزٕ نہٕ یہٕ سونٛچُن زِ خداوند خدا دیہِ تِمن تہِ یہِ تِم ایمانہٕ ورٲے منٛگان چھِ۔8یِتھؠ لوٗکھ ہیٚکن نہٕ زانٛہہ تہِ فٲصلہٕ کٔرِتھ زِ کیا چھُ کرُن۔ تِم چھِ اکھ منصوبہ بناوان، مگر پتہٕ چھِنہٕ تِم اتھ پیٚٹھ عمل کران۔9یِمن مسیحیؔ بٲے یِم غریب چھِ، تِمن پزِ خۅش روزُن، تکیازِ خداین چھُ یمن عزت بخُشمُت۔10مگر یِمن ایمان والیٚن سٮ۪ٹھا پونٛسہٕ آسن، تِمن پزِ خۅش روزُن تکیازِ خداین چھُ تِمن بخُشمُت یہِ ہٲوِتھ زِ تہنٛز دولت بناوِنہٕ تِمن باقیو لوٗکو کھۅتہٕ زیادٕ بہتر۔ ٲخرکار، جنگلی پوشن ہنٛدؠ پأٹھؠ یِم صرف کینٛژس کالس خاطرٕ پھۅلان چھِ تہٕ پتہٕ ژھۅکان چھِ، امیر ایمان وٲلؠ مرن باقین ہنٛدؠ پأٹھؠ۔11اکھ جنگلؠ پوش چھُ روزان کم وقتس تکیازِ ییٚلہِ آفتاب کھسان چھُ، امیُک تژر چھُ کُلٮ۪ن خشک کران تہٕ تہنٛدؠ پوش چھِ ؤسؠ پیٚوان۔ تِم چھِنہٕ زیادس کالس خۅشوٕنؠ روزان۔ یِتھٕ پٲٹھؠ پوش چھِ مران، امیر لوٗکھ تہِ مرن یودوے زن تِم پونٛسہٕ کماونس کُن لگمٕتؠ آسان چھِ ۔12خدا چھِ تِمن عزت بخشان یِم تس مشکل حالاتن منٛز فرمانبردار روزن۔ بے شک دِیہِ تمن خدا انعام، تِمن پوشوٕنؠ زندگی بخشِتھ۔ یہِ زن خداین وعدٕ چھُ کوٚرمُت تِمن سارنےٕ سٟتؠ یہِ کرنُک یِم تس لول برن۔13ییٚلہِ أسؠ گناہ کرنس تنبلو، اسہِ پزِ نہٕ یہِ سونٛچُن زِ یہِ چُھ خدا یُس اسہِ تنبلاوان چھُ۔ نہ، کانہٛہ تہِ ہیٚکہِ نہٕ خدایس بُرٕ کرنہٕ خٲطرٕ آمادٕ کٔرِتھ، تہٕ خدا چُھنہٕ زانہٛہ تہِ کٲنٛسہِ بُرٕ کرنہٕ خٲطرٕ آمادٕ کرنٕچ کوشش کران۔14مگر لوٗکھ چھِ یژھان پنہٕ نیٚوٕے خوٲہِشو کِنؠ بُرٕ کرُن۔ ییٚلہِ تِم یہِ کران چھِ، یہِ چھُ زنتہٕ تِم چھِ کُنہِ زالس منٛز پھسیمٕتؠ15اوٕ پتہٕ، تکیازِ تِم چھِ بُرٕ کٲم کرنٕچ خوٲہِش کران، تِم چھِ تہِ کرُن شروع کران، تہٕ ٲخر کار چھِ تِم عادتن کران۔ اگر نہٕ تم پننیٚو گناہگار حرکژو نِش پتھ ہیٚن، تم گژھن ہمیشہ خاطرٕ خدایس نش جُدا۔16میانیٚو ایماندار سٲتھیٚو یِمن بہٕ لول چھُس بران۔ پننِس پانس دھوکھہٕ دیُن کریٚو بنٛد۔17پرٛتھ کانہٛہ پٔزؠ یٲرؠ، اصل تہٕ کٲمل تحفہٕ چھِ بب خدایہِ سنٛدؠ طرفہٕ یوان، یُس آسمانس پیٚٹھ چُھ۔ تٔمؠ بنٲوؠ آفتاب، زوٗن تہٕ تارک مگر خدا چُھنہٕ تِتھ پٲٹھؠ بدلان یِتھٕ پٲٹھؠ یہنٛزٕ ژھایہ بدلان چھےٚ، نٔنؠ گژھان تہٕ غٲب گژھان چھِ۔ خدا چُھنہٕ زانہٛہ بدلان۔ سُہ چُھ ہمیشہٕ رُت ۔18خدا بنیاو سون روحٲنی بب ییٚلہِ اسہِ تسنٛدِس پٔزِس پٲغامس پیٚٹھ یقین کوٚر۔ یہِ اوس تہِ یہِ سُہ کرُن یژھان اوس۔ لہٰذا بناے یسوعسؔ پیٚٹھ ایمان انن وٲلؠ گۅڈنِکؠ لوٗکھ یم خدایس سٟتؠ امہِ قسمٕکٮیٚن تعلقن ہنٛد تجربہٕ چِھ کران یُس مستقبلس منٛز مزید لوٗکھ کرن۔19میانیٚو ایماندار سٲتھیٚو یِمن بہٕ لول چھُس بران، بہٕ چھُس یژھان توٚہؠ زٲنؠ راوٕنؠ زِ توٚہہِ پزِ پرٛتھ اکِس صبرٕ سان بوزُن زِ باقین کیا چھُ ونُن۔ توٚہہِ پزِ احتیاط سان پنٕنؠ کتھ کرٕنؠ۔ توٚہہِ پزِ پنُن شرارت قوبو کرُن،20تکیازِ ییٚلہِ اسہِ شرارت چھُ کھسان، اسؠ ہیٚکو نہٕ اصل چیز کٔرِتھ یہِ خدا یژھان چھُ زِ اسؠ گژھو کرٕنؠ۔21لہٰذا تمام قسمچہٕ بُرٕ کامہِ کرنہِ کرِو بند۔ فخرٕ سان مزاحمت کرنہٕ بغٲر کرِو تہِ یہِ خداین توٚہہِ کرنہٕ باپتھ ووٚنمُت چُھ۔ خدا کرِ توٚہہِ یہِ یاد تھاونہٕ تہٕ سمجھنہٕ باپتھ مدد۔ امہِ سٟتؠ سپدِ یہِ ظٲہِر زِ توٚہؠ چھُو خدایس سٟتؠ رٔلِتھ۔22یہِ چُھ اہم زِ خدا کیا حکم چھُ دِوان، اتھ مہٕ کرِو صرف بوزُن۔ تم لوک یم صرف یہٕ بوزان چِھ تہٕ چھِنہٕ اتھ پیٚٹھ عمل کران، تِم چِھ پننس پانس بیوقوف بناوان یہِ سونٛچِتھ زِ یہِ بچاوِ تِمن۔23تہٕ کینٛہہ لوٗکھ چھِ ووٚنؠ خدایہِ سُنٛد پٲغام بوزان، مگر تِم چھِنہٕ تہِ کران یہِ سُہ پٲغام ونان چھُ۔ یِم لوٗکھ چھِ تٔمِس شخصہٕ سنٛدؠ پٲٹھؠ یُس پنُن بُتھ عٲنس منٛز چھُ وُچھان،24حالانکہِ سُہ چُھ پانس کُن وُچھان، مگر سُہ چُھ شیشہٕ نِش دوٗر گژھان تہٕ فوراً چُھس مٔشِتھ گژھان زِ سُہ کیاہ چُھ باسان۔25مگر باقےٕ لوٗکھ چھِ سونٛچِتھ سمجھِتھ خدایہِ سُنٛد قانون مانان۔ یہِ چُھ مکمل تہٕ یہِ چھُ لوٗکن رضامندی سان تہِ کرنس قٲبل بناوان یہِ خدا یژھان چھُ زِ تِم گژھن کرٕنؠ۔ یُتھ خدا تِمن برکت دییہِ۔26کینٛہہ لوٗکھ چھِ سونچان زِ تِم چھِ خدایہ سٕنٛز صحیح پٲٹھؠ عبادت کران، مگر تِم چھِ بے ہودٕ کتھٕ کران۔ یمن لوٗکن ہُنٛد سونٛچُن چھُ غلط۔ خدا چھُنہٕ سانہِ عبادتہٕ سٟتؠ متٲثِر سپدان یودوے أسؠ ہٮ۪تھےٕ بُرٕ کتھٕ کرو ۔27تِمو چیزو منٛز، یِم اسہِ خداین ؤنؠ کرنہٕ باپتھ چھُ اکھ یہِ زِ یتیمن تہٕ مۅنٛدن ہُنٛد چھُ خیال تھاوُن یِم پریشٲنی منٛز مبتلا آسن۔ تِم لوٗکھ یِم تہِ کرن، چھِ پزی خدایہِ سنٛز عبادت کران، یُس سون بب چھُ۔ لوکھ چھِ اوٕ کِنؠ تہِ پزی خدایہِ سنٛز عبادت کران اگر نہٕ تِم باقین ہنٛدؠ پٲٹھؠ غٲر مہذب پٲٹھؠ سونٛچن یِم خدایہِ سنٛز نافرمانی چِھ کران۔ خدا چھُ تِمن لوٗکن ہُنٛد تٲیید کران یِم یِتھی چیز کران چھِ۔
Bridge Connectivity Solutions Pvt. Ltd.