پیدٲیش31
1اکہِ دوٚہہ وُن کمتام یعقوبسؔ زِ لابن سنٛدؠ لڑکہٕ ٲسؠ شکایت کران تہٕ ونان ٲسؠ، "یعقوبن کھیٚو سٲنِس مٲلِس سورےٕ تہٕ سپُد سیٹھاہ امیر۔"2یعقوبؔ اوس ژرژان زِ لابنؔ چُھنہٕ تس سٟتؠ دوستانہ سلوٗک ورتاوان یِتھؠ کِنؠ زن تٔمؠ پتھ کُن ورتوو۔3پتہٕ وُن یہُوواہنؔ یعقوبسؔ، "پننِس ملکَس تہٕ پننٮ۪ن رشتہٕ دارن نِشہ گژھِ واپس تہٕ بہٕ کرے تتہِ ژےٚ مدد۔"4یہِ بوزِتھ سوز یعقوبنؔ راخِلؔ تہٕ لیاہؔ شیٚچھ زِ تِم واتن گاسہٕ مٲدانن نِش یتِتھ تمسنٛدؠ چاروٲے، ژھاوٕلؠ تہٕ تیر کھیٚلؠ چھِ،5ییٚلہِ تمہٕ واژٕ، تٔمؠ وُن تِمن، "مےٚ چُھ تران فکرِ زِ تُہنٛد مول چُھنہٕ وُنؠ مےٚ سٟتؠ پرُون ہیٚو سلوک کران۔ مگر خداین یمسنٛز عبادت میٚون کران اوس کوٚر مےٚ مدد۔6توٚہؠ دوٚنوے چُھو زانان زِ مےٚ کٲژاہ سخت خدمت کٔر تُہنٛدِس مٲلِس۔7تٔمؠ کٔر واریاہہِ پھرِ میانؠ مُزورؠ کھیٚتھ مےٚ سٟتؠ دانٛدلی مگر خداین دیُت نہٕ تس زانٛہہ تہِ مےٚ نقصان واتناونُک موقہٕ۔8ییٚلہِ لابننؔ وُن، "ٹیچہ ہٲرؠ جانور یم تہِ چھِ تم دِمے بہٕ ژےٚ مُزورِ رنٛگؠ، پتہٕ دِتؠ ساروٕے جانورو ٹیچہِ ہٲرؠ ژھو۔ پتہٕ ییٚلہِ نیت بدلییَس تہٕ ونُن، "یمن کریٚہنہِ تہٕ سفید رکھٕ آسن تِمے گۓ ژےٚ مُزور، پتہٕ ترٲوؠ ساروٕے جانورو رکھٕ دارےٕ ژھو۔9یتھ پٲٹھؠ تُلؠ خداین تم چاروٲے یم چٲنِس مٲلؠ سنٛدؠ ٲسؠ تہٕ دتِن مےٚ۔10اکہِ دوٚہہ ییٚلہ جانور صحبت کران ٲسؠ تہٕ مےٚ وُچھ خاب۔ خابس منٛز وُچھ مےٚ زِ بہٕ اوسُس ہیٚور کُن وچھان تہٕ بہٕ گوس یہِ وچِھتھ حٲران زِ ژھاوجن یم مونٛگر لاگنہٕ یوان ٲسؠ تِمن آسہٕ کریہنہِ تہٕ سفید رکھٕ، تہٕ کینٛژن ٲسؠ ٹیٚکؠ۔11خابس منٛز آو مےٚ خدایہ سنٛدِ طرفہٕ اکھ فرشتہٕ یمؠ مےٚ وُن، "یعقوبؔ!" مےٚ دتُس جواب، "بہٕ چُھس حٲضر۔"12تٔمؠ وُن مےٚ تورٕ، "ہیٚور کُن وُچھ تہٕ اتہِ وُچھکھ سارنےٕ مونٛگرن یم ژھاوجن سٟتؠ چھِ کریٚہنہِ تہٕ سفید رکھٕ تہٕ نتہٕ چِھکھ ٹیٚکؠ۔ یہِ چُھ اوٕ موٚکھٕ سپدان تکیازِ مےٚ وُچھ تہِ سورےٕ یہِ کینٛژھا لابنؔ ژےٚ سٟتؠ ورتاوان اوس۔13بہٕ چُھس سُہ خدا یُس ژےٚ بیت ایلَسؔ منٛز وُچھتھن، یتہِ ژےٚ اکھ کِنؠ کھڑا کرٕتھ تہٕ تتھ پٮ۪ٹھ زیتون تیٖل ترٲوِتھ مےٚ سٟتؠ اکھ پۅختہٕ وعدہ کۅرتھ۔ لہٰذا نیر جلد یمہِ سرِزمینہِ منٛزٕ تہٕ وات تتھ سرِزمینہِ پٮ۪ٹھ یتہِ ژےٚ زایُن لوٚبُتھ۔"14راخِلؔ تہٕ لیاہؔ وژھٕ یورٕ تمِسِ "سون مول دییہِ نہٕ مرنہٕ کِس دمس تام اسہِ کینٛہہ۔15سُہ چُھ اسہِ سٟتؠ تیٚوتھ سلوٗک کران زنتہٕ أسؠ وۅپر ملکچہِ چھےٚ۔ تِمن سارنی ورؠ ین ہنٛز کٲم یۅسہ ژےٚ تمسنٛدِ خٲطرٕ کٔرتھ چھےٚ تمیُک ماوضہٕ یُس ژےٚ تس سانہِ خٲطرٕ دِتُتھ، مگر أسؠ چھنہٕ تمہِ منٛزٕ کُنے مٲلکھ یُس مال ژےٚ تمسنٛدِ خٲطرٕ ۅپدووُتھ، تٔمؠ کوٚر تہِ سورےٕ ہڈپ!16یقینن چھےٚ سۅ دولت سٲنؠ تہٕ سانیٚن شُرین ہنٛز یۅسہ خداین تس نِشہ نیٚیہ۔ لہٰذا یہِ کینٛژھا ژےٚ خداین کرُن وُنےٕ تہِ کرِ!"17پتہٕ تھٲوؠ یعقوبنؔ پنٕنؠ شُرؠ تہٕ گرٕواجنہِ اونٛٹن پٮ۪ٹھ بہنٲوِتھ۔18پنٕنؠ چو چاروٲے کٔڈن برونٛہہ برونٛہہ ییٚلہ تِمو نیرن ہیٚوت۔ تٔمؠ تُل پنُن سورےٕ مال و اسباب سٟتؠ یُس تٔمؠ فدن ارامسؔ منٛز روزِتھ تہِ کموٕمُت اوس۔ یتھ پٲٹھ کوٚر تٔمؠ پننِس مٲلِس اضحاقسؔ نِش واپس گژھنُک سفر شروع، یُس ملکِ کنعانس منٛز روزان اوس۔19لابنؔ گو وُنؠ پنٕنؠ تیر نیٚتنہِ۔ تمؠ سنٛزِ غٲر حٲضری منٛز گییہِ راخِلؔ تہٕ أنِنؠ لکٕرِ ہنٛدؠ تِم بُت ژورِ کٔڈتھ یم تمسنٛدس مٲلِس خٟمَس منٛز ٲسؠ۔20امہِ لاوٕ سپُد یتہِ زِ یعقوبنؔ تھٲوؠ نَہ ؤنِتھ لابنؔ ارامیؔ یتھ دونٛکھس منٛز زِ سُہ چُھ تتہِ نیرنُک سنٛز کران۔21یتھ کِنؠ ژٔلؠ یعقوبؔ تہٕ تمسُنٛد خاندان پنُن سورےٕ اسباب ہیٚتھ۔ دریاے فُراتس تار دِتھ کوٚر تِمو جِلعادؔ کِس پہٲڑی ملکَس کُن سفر شروع۔22تہنٛدِ نیرنہٕ پتہٕ ترییہِ دوٚہؠ وُن کمتام لابنَسؔ زِ یعقوبؔ تہٕ تمسُنٛد خاندان ژوٚل۔23یہِ بوزِتھ دراو سُہ کینٛہہ رشتہٕ دار ہیٚتھ یعقوبسؔ ژھانٛڈنہِ۔ ستن دوٚہُن پٔکِتھ رٔٹؠ تِمو تِم جِلعادؔ کِس پہٲڑی علاقس منٛز۔24لابنَس آو أتھؠ راتس انٛدر خدا خابس منٛز۔ تٔمؠ وُن تمِس، "ییٚلہِ ژٕ یعقوبؔ رٹہَن حیٚس کٔرزِ اگر تس کینٛہہ ونکھ۔25دویمہِ دوٚہہ ییٚلہِ لابنؔ یعقوبس سمُکھ تہٕ یعقوبنؔ تہٕ تمسنٛدیو گرِکیٚو ٲسؠ جِلعادؔ بالَس پٮ۪ٹھ پنٕنؠ خٟمہ دِتؠ مٕتؠ۔ حالانکہ لابن تہٕ تمسنٛدیو رشتہٕ دارو تہِ دِتؠ پنٕنؠ خٟمہ أتھؠ جایہ۔26پتہٕ گو لابنؔ یعقوبس نِش تہٕ وننَس، "ژےٚ کیازِ کۅرتھ یہِ؟ ژےٚ دِتُتھ مےٚ دونٛکھٕ، میانہِ کورِ ژولُکھ زنتہٕ جنٛگہٕ منٛزٕ قٲد کٔرِتھ۔27ژٕ کیازِ ژولُکھ مےٚ دونٛکھٕ دِتھ؟ ژےٚ کیازِ ونُتھ نہٕ مےٚ یہِ زِ مےٚ چُھ نیرُن، یُتھ زن بہٕ جان پٲٹھؠ رخصت دمہٕ ہے۔ امہِ برونٛہہ زِ لوٗکھ گیٚوٕہن طبلہٕ تہٕ بربت وٲیتھ، أسؠ مناوٕہو خوشی تہٕ بیٚیہِ گیوٕ ہو!28ژےٚ دِتُتھ نہٕ مےٚ پننٮ۪ن زُرین نیرنہٕ برونٛہہ بوسہٕ کرنُک تہِ موقہٕ۔ ژےٚ یہِ کۅرتھ یہِ گییہِ بیوقوفی!29مےٚ تہٕ میانیٚن رشتہٕ دارن چُھ طاقت ژےٚ نقصان واتناونُک۔ مگر راتھ راتس وُن مےٚ تٔمؠ خداین یمسنٛز عبادت چون مول کران چُھ زِ سیٹھاہ یعقوبس سٟتؠ کتھ کرنہٕ وزِ۔30وُنؠ چُھس بہٕ زانان زِ ژٕ دراکھ تکیازِ ژٕ چُھکھ یژھان واپس پنُن گرٕ گژُھن۔ مگر ژےٚ کیازِ نیتھکھ میانؠ بُت ژوٗرِ؟"31یعقوبنؔ وُن لابنِسؔ یورٕ، مےٚ وُنےٕ نہٕ ژےٚ زِ بہٕ چُھس یتہِ نیرُن یژھان، تکیازِ مےٚ اوس خوف زِ ژٕ گوٚژھکھ نہٕ پننٮ۪ن کوریٚن زبردستی مےٚ نِش دور کرُن۔32وُونؠ اگر ژےٚ یتہِ کانٛہہ شخص اتھِ لگی یمِس اتھِ چٲنؠ بُت آسن، أسؠ کروون سُہ قتل۔ ییٚلہِ زن سٲنؠ رشتہٕ دار وُچھان چھِ تِم کرن پانے تلاش زِ کانٛہہ چیز ما چُھ یتہِ سُہ یُس تُہنٛد چُھ۔ اگر کانٛہہ چیز آسہ سُہ ہکیٚو توٚہؠ نِتھ!" ییٚلہِ یعقوبنؔ یہ ونان اوس تس ٲس نہٕ یہ پےَ زِ راخِلؔہِ چھِ پننِس مٲلؠ سنٛدؠ بُت ژوٗرِ انمٕتؠ۔33لابنؔ ژاو یعقوبؔ سنٛدِس خٟمس منٛز، أتھؠ سٟتؠ لیاہؔ سنٛدِس خٟمس تہٕ تمہِ پتہٕ دوٚن لونڈین ہنٛدِس خٟمس منٛز بُت ژھانٛڈنہٕ مگر تمِ لبِن نہٕ۔ تہنٛدیو خٟمو منٛزٕ نیرتھ ژاو سُہ پتہٕ راخِلؔ سنٛدِس خٟمس منٛز۔34مگر راخِلؔہِ ٲسؠ گۅڈے تِم بُت اونٹن ہنٛدِس زیٖنس منٛز تھٲومٕتؠ تہٕ پانہٕ ٲس زیٖنس پٮ۪ٹھ بہِتھ۔ لابننؔ دِژ راخِلؔ سٕنٛدِس خٟمس پوٗرٕ پٲٹھؠ ژھٲنڈ مگر بُت آس نہٕ کُنہِ اتھِ۔35راخِلؔ ؤژھ پننِس مٲلِس کُن، میانہِ بابہٕ مےٚ گٔژھزینہٕ ناراض، آقا بہٕ ؤژھس نہٕ چٲنِس احترامس منٛز اوٕ موٚکھٕ تھوٚد تکیازِ مےٚ چُھ وُنہِ کیٚن زنہِ حساب چلان۔ "لہٰذا لٔبؠ نہٕ تٔمؠ مذید ژھٲنڈ دِتھ تہِ پنٕنؠ بُت۔36پتہٕ کھوٚت یعقوبسؔ سخ شرارتھ۔ تٔمؠ وُن لابنَس، "مےٚ کُس خطا چُھ کوٚرمُت؟ ژٕ کٔمو گنہَو باپتھ چُھکھ مےٚ پتہٕ لاران؟37ووُنؠ کٔرتھ ژےٚ میانِس سٲرسےٕ مالس تلٲشی تہٕ ژےٚ میولےٕ نہٕ کانٛہہ چیز یُس چون اوس۔ اگر ژےٚ کینٛہہ میولےٕ سُہ ہاو تہٕ یتِتھ پننؠن تہٕ میانیٚن رشتہٕ دارن برونٛہہ کنہِ، تاکہِ تم کرن فٲصلہٕ زِ کُس چُھ صححی، ژٕ ہا کِنہٕ بۅ!38بہٕ اوسُس ژےٚ نِش وُہَن ورؠ ین۔ یمن وُہن ورؠ ین منٛز گییہ نہٕ چٲنؠ کانٛہہ گٔب یا ژھاوج اتھٕ۔ مےٚ مور نہٕ چانہِ کھیٚلہِ منٛزٕ کانٛہہ تیوٗر نَہ کھیٚوم۔39ییٚلہِ چانیٚو چاروایو منٛزٕ کٲنسہِ جنگلی جانورن حملہٕ کوٚر یا مورُن مےٚ اوٚن نہٕ سُہ توٚہہِ نِش بلکہِ ترووُم تمِس ممتِس بدل پننیٚو منٛزٕ زندٕ نگ۔ ییٚلہِ تہِ چون کانٛہہ چاروُوے دوٚہلہِ یا روتلہِ راوان اوس تہٕ ژٕ اوسہٕ ہن سُہ مےٚ نِش طلب کران تہٕ بہٕ اوسُس تتھ پنُن ڈنٛڈ بران۔40بہٕ اوسُس دوٚہس گرمی تہٕ راتس سردی سٟتؠ دزان۔ اکثر اوسُس نہٕ شونٛگِتھ تہِ ہیٚکان!41وُہن ورؠ ین رودُس چٲنِس گرس منٛز۔ چانیٚن کورین سٟتؠ خاندر کرنہٕ موٚکھٕ کٔر مےٚ ژودہَن ورؠ ین چٲنؠ کٲم۔ تہٕ رودُس مذید شیٚن ورؠ ین چٲنؠ تیر ژھاولؠ ہیٚوان کٕنان۔ اتھ دوران کٔرتھ ژےٚ میانِس تنخاہَس دہہِ پھرِ تبدیلی کٔرِتھ کٔمی۔42اگر خدا، یمسنٛز عبادت میٚون بُڈِ بب ابرہامؔ کران اوس تہٕ یمِس برُنہہ کنہِ میٚون مول اسحاق لرزان اوس، مےٚ سٟتؠ آسہ ہے نہٕ تہٕ مےٚ مدد کرِہے نہٕ، تہٕ ژٕ کڈہکھ مےٚ ژھوٚرےٕ تہٕ چھۅنےٕ اتھٕ ہاوان۔ مگر خداین وُچھ زِ بہٕ کٲتِس تکلیفس منٛز چُھس تہٕ بہٕ کٲژاہ محنت چُھس کران، اوے وُننے راتھ ژےٚ تمؠ خابس منٛز زِ ژےٚ یہ مےٚ سٟتؠ ورتووُتھ تہِ چُھ غلط۔43لابنؔ ووٚتھ یعقوبسؔ درجواب، یم دوٚنوے زنہِ چھےٚ میانہِ کورِ تہٕ یہنٛدؠ بچہ چھِ زُرؠ تہٕ چاروٲے چھِ میانؠ چاروٲے۔ یہ کینٛژھا ژٕ یتہِ وُچھان چُھکھ تہِ چُھ میٚون!44مگر بہٕ ہیٚکہ نہٕ یم رٔژھراونَس منٛز کِہین تہِ کٔرِتھ، اوٕ کِنؠ پییہِ ژےٚ تہٕ مےٚ یکہ وٹہٕ اکھ مہادٕ کرُن، یُس اسہِ درمیان شٲہد بنِتھ روزِ۔45یعقوبنؔ اوٚن اکھ بوٚڈ پل تہٕ تھووُن سُہ کھڑا کٔرِتھ۔46پتہٕ ووٚن یعقوبنؔ پننٮ۪ن رشتہٕ دارن کینٛہہ کَنہِ اننہٕ خٲطرٕ، تِمو انہِ کینٛہہ کَنہِ تھاویکھ ڈیرَس تہٕ پتہٕ کھیٚوکھ اتھ ڈیرس نزدیکےٕ کینٛہہ کھیٚن۔47لابننؔ تُھوو اتھ ڈیرس ارامیؔ ناو یجرشاہدوتھاؔ تہٕ یعقوبنؔ تھووُس عِبرٲنؠ ناو جِلعاد۔48لابننؔ وُن یعقوبسؔ، "یُس یہ کنیٚن ہُنٛد ڈیر از اسہِ یتہِ جمع کوٚر دییہِ اسہِ مدد یہ مہادٕ یادتھاونَس منٛز۔ "اوے وُن اتھ یعقوبنؔ جِلعادؔ۔49تِمو تھوو اتھ جایہ تہِ مِصفاہؔ ناو، عِبرٲنؠ زبٲنؠ منٛز یمیُک مطلب "رٲچھ" چُھ۔ تکیازِ لابنَن وُن، "أسؠ کرو یہُوواہسؔ عرضی زِ سُہ تھاوِ اسہِ نظر یۅتام أسؠ اکھ أکِس نِش رخصت سپدو، تاکہِ أسؠ کرو نہٕ اکھ أکِس نقصان واتناونٕچ کوشش۔50اگر ژٕ میانیٚن کوریٚن سٟتؠ بدسلوٗکی کرَکھ یا بدل زنہِ پننہِ خاندارنہِ بناوہکھ، اگر نہٕ مےٚ کانٛہہ یہ ونہِ تہِ، مگر یہ مٔشرٲوؠ زیٚنہٕ زِ خدا چُھ وُچھان ژتہٕ بہٕ کیاہ چھِ کران۔"51لابنؔ وُتھ یعقوبسؔ کُن، "ژٕ چُھکھ یہ بٔڈ کٔنؠ تہٕ کنیٚن ہُنٛد یہ ڈیر وُچھان یُس اسہِ منٛزس کھڑا چُھ کوٚرمُت۔52کنیٚن ہُنٛد ڈیر تہٕ یہ بٔڈکٔنؠ دونوے روزن اسہِ یاد پاوان زِ ژےٚ نقصان واتناونہٕ خٲطرٕ ترنہٕ بہٕ یمو کنیٚو اپور تہٕ مےٚ نقصان واتناونہٕ خٲطرٕ ترکھ نہٕ ژٕ یمو کنیٚو یپور۔53سُہ خدا یمسنٛز عبادت ابرہامؔ کران اوس تہٕ سُہ خدا یمؠ سنٛز عبادت نحورؔ کران اوس تہٕ تِمن معبودن یہنٛز عبادت جدٕ اجداد تیراہؔ کران ٲسؠ دِین اسہِ منٛزٕ تس أکِس سخت سزا یُس کٲنسہِ نقصان واتناوِ۔ "یعقوبنؔ کوٚر سُہ خدا حٲضر نٲضر رٔٹِتھ پوٚختہٕ وعدہ یمسنٛدؠ فرمودات عملاونٕکؠ تمسنٛدس مٲلِس اضحاقسؔ ہٲبتھ اوس یہ تِمو پننِس امن مہادس منٛز وُن۔54یعقوبنؔ کٔر تتہِ پہٲڑی علاقس منٛز خدایس قربٲنی پیش تہٕ پننٮ۪ن رشتہٕ دارن کرٕن پانس سٟتؠ کھنٕچ دعوت۔ کھیٚن کھیٚتھ شونٛگؠ تِم اتھ راتس أتؠ۔55بیٚکہ، دوٚہہ صبحٲے کٔرؠ لابنن پننٮ۪ن زُرین تہٕ کوریٚن میٹھؠ تہٕ خدایس مونٛگُن دعا، سُہ کٔرِنؠ تِمن برکت۔ پتہٕ دراے لابن تہٕ تمسنٛدؠ نفر اتہِ تہٕ گے گرٕ واپس۔
Bridge Connectivity Solutions Pvt. Ltd.