پیدٲیش27
1ییٚلہِ اسحاق بُڈیو، سُہ سپُد یہِ دٔپزِ تہِ اوٚن۔ اکہِ دوٚہہ اوٚن تٔمؠ پنُن زیُٹھ نیٚچو عیسوؔ ناد دِتھ تہٕ وُننَس، "میانہ گۅبرا؟" تٔمؠ ونُس، بہٕ چُھس یکیاہ۔"2اسحاقنؔ ونُس، "میانؠ کتھ بوز۔ بہٕ چُھس وُنؠ سیٹھاہ بُڈیٚمُت، مےٚ چھنہٕ پتاہ زِ مےٚ کرِ آسہ مرُن۔3لہٰذا تُل پنٕنؠ تیرکمان، سیٹھاہ تیرکش بٔرِتھ جنٛگل کُن تہٕ ان میانہٕ باپتھ جنٛگلی جانور شکار کٔرِتھ۔"4اکھا مارُن تہٕ کرِ تمہِ قسمُک مزٕدار ماز تیار یُس مےٚ پسنٛد چُھ۔ پتہٕ ان سُہ مےٚ نِش تاکہِ سُہ کھیٚتھ کرے بہٕ مرنہٕ برونٛہہ ژےٚ دعایہ خٲر۔5رِبقہ ٲس بوزان ییٚلہ اسحاق یہِ پننِس نیٚچوِس عیسوؔ ہس ونان اوس۔ تہٕ یتُھے عیسوؔ شکارس نیرنہٕ باپتھ خٟمہ منٛزٕ نیٚبر دراو،6رِبقہؔ ہن ووٚن پننِس نیٚچوِس یعقوبس، "میانؠ کتھ بوز۔ مےٚ وُچھ چون مول چٲنِس بٲیس عیسوؔ ہس سٟتؠ کتھ کران، ونان اوسُس،7گژھِ کانٛہہ جنٛگلؠ جانور انُن یور مٲرِتھ تہٕ مزٕدار طریقہٕ کرِ ماز تیار یُتھ بہٕ سُہ کھیٚتھ ہیٚکہٕ۔ مرنہٕ برونٛہہ منٛگے بہٕ رُت دعا یوٚدوے یہُوواہؔ بوزان آسہ۔"8وُچھ سا میانہِ گۅبرا، یہِ بہٕ ژےٚ ونان چھیٚسےَ تی کر۔9گژھِ کھیٚلہِ منٛز ان لۅکٕٹؠ ژھاوجہِ بچہ زٕ تہٕ مٲرِتھ انُکھ مےٚ نِش تہٕ بہٕ بناوے چٲنس مٲلس باپتھ مزٕدار کھیٚن، یتھ سُہ پسنٛد کرِ۔10پتہٕ ہیککھ ژٕ سُہ پننِس مٲلس نِتھ یُتھ سُہ کھییہِ تاکہِ مرنہٕ برونٛہہ کری سُہ ژےٚ دعا۔11مگر یعقوبنؔ وُن پننہِ ماجہ رِبقہؔ ہس، "میانِس بٲیس عیسوؔ سنٛزِ تنہِ چُھ مس تہٕ میانؠ تن چھنہٕ تِژھ۔ میانؠ تن چھےٚ صاف!12اگر میٚون مول مےٚ اتھٕ سٟتؠ سارِ تیٚلہ کیاہ بنہِ؟ سُہ زانہِ پانے زِ بہٕ چُھس تس دونٛکھٕ دِوان، تہٕ مےٚ میلہِ رحمتہٕ بجایہ زحمت!13تمؠ سنٛزِ ماجہِ وُن تمِس، "اگر تہِ سپُد تیٚلہ چھےٚ میانہِ گۅبرا مےٚ پٮ۪ٹھ لعنت۔ ژٕ کرِ تی یہِ بہٕ ژےٚ ونان چھیٚسےَ۔ گژھِ ژٕ ان میانہ خٲطرٕ ژھاوٕلؠ!"14یتھ کِنؠ گو یعقوبؔ تہٕ اننؠ پننہِ ماجہ نِش ژھاولؠ زٕ مٲرِتھ۔ پتہٕ کوٚر تمؠ سنٛزِ ماجہِ مزٕدار سیٚون تیار، یتھ کِنؠ تمسنٛدس مٲلِس پسنںد چُھ۔15پتہٕ أنؠ رِبقہؔ ہن پننِس بٔڈس نیٚچوِس عیسو سنٛدؠ اصل پلو یم تس خٟمَس منٛز ٲسؠ تہٕ لٲگِن پننِس لۅکٹِس نیٚچوِس یعقوبسؔ۔16تٔمؠ تھٲو ژھاوجہِ بچن ہنٛز بستہٕ تمسنٛدین اتھن تہٕ گردٕنہٕ لٲگتھ۔17پتہٕ دژٕ تٔمؠ کینٛہہ ژۅچہ تہٕ سُہ مزٕدار کھیٚن یُس تٔمؠ تیار اوس کوٚرمُت یعقوبسؔ اتھِ۔18یعقوبنؔ روٚٹ تہٕ نیوٗن پننِس مٲلِس نِش تہٕ وُننَس، "میانہٕ ببا" اسحاقنؔ ونُس، "ونسا گۅبریا، کُس ہیٚو میٚون نیٚچو چُھکھ؟"19یعقوبنؔ وُن پننِس مٲلِس، "بہٕ چُھسے چون زیُٹھ ہیٚوٗ نیٚچو عیسوؔ۔ مےٚ کوٚر تی یہِ ژےٚ مےٚ کرنہٕ خٲطرٕ ونُتھ۔ وۅتھ تہٕ کھیٚہ یہِ ماز تہٕ کرِ تہٕ مےٚ رُت دعا۔20مگر اسحاقنؔ پرُوژھ پننِس نیٚچوِس، "میانہِ گۅبرا، یہِ کِتھٕ کِنؠ چُھ ممکن زِ ژٕ انہَن یوٖت جلد اکھ جانور لٔبتھ تہٕ مٲرِتھ؟" یعقوبنؔ ونُس در جواب، "تکیازِ یہُوواہؔ یمسنٛز ژٕ عبادت کران چُھکھ، دِژ مےٚ اتھ منٛز کامیٲبی۔"21اسحاقنؔ وُن یعقوبسؔ، "میانہٕ گۅبرا، مےٚ نزدیک یہِ، تاکہِ بہٕ لاگے ژےٚ اتھٕ یُتھ مےٚ ننہِ زِ ژٕ چُھکھا پزی میٚون نیٚچو عیسوؔ۔22چونکہِ یعقوبؔ گو پننِس مٲلِس اضحاقسؔ نکھٕ۔ اسحاقنؔ سور تمِس تہٕ ونُن، "آواز چھےٚ یعقوبٕنؠ، مگر اتھن چھِ مس وال بٔڈس بٲیس عیسوؔ سنٛدؠ پٲٹھؠ۔"23اسحاقنؔ پرزٕنووےٕ نہٕ سُہ تکیازِ تس اوس نہٕ گاشےٕ تہٕ یعقوبٕنؠؔ اتھٕ ٲسؠ عیسو سنٛدؠ پٲٹھؠ جٔژ دار۔ اوٕ کِنؠ گو اسحاق تس دعا کرنہٕ خٲطرٕ تیار۔24مگر گۅڈٕ پرِژُھس اسحاقنؔ، کیاہ ژٕ چُھکھا پزی میٚون نیٚچو عیسو؟" یعقوبن دتُس جواب، "آ، بےٕ چُھس۔"25اسحاقنؔ ونُس، گۅبریا، یُس ماز ژےٚ رنُتھ تمہِ منٛزٕ ان رژھ کھنٛڈ مےٚ نِش، آ، یُتھ بہٕ سُہ کھیٚمہٕ تہٕ پتہٕ کرے بہٕ ژےٚ دُعا۔ تہٕ یعقوبنؔ اوٚن أمِس کھیٚنہٕ خٲطرِ کہتام تہٕ تٔمؠ کھیٚو۔ یعقوبنؔ اوس تمِس باپتھ شراب تہِ اوٚنمُت تہٕ تٔمؠ چیو سُتہ۔26پتہٕ وُن تمسںنٛدؠ مٲلؠ اسحاقنؔ تمِس۔ "میانہِ گۅبرا، ولہٕ یورؠ تہٕ کرِ تہٕ مےٚ میٚوٹھاہ۔"27تہٕ یعقوبؔ گو تمِس نِش تہٕ تمسنٛدؠ مٲلؠ کوٚر تمِس بُتھِس میوٗٹھ۔ اسحاقنؔ ہیٚوت تمسنٛدین پلون مُشِک یم تس لٲگِتھ ٲسؠ۔ تٔمؠ ژینؠ عیسوؔ سنٛدین پلون ہنٛز مُشِک۔ تہٕ ونُن، "پزی چھےٚ یہِ میانِس نیٚچوِس سنٛز خوشبو تمہِ کھہٕچ ہِش خوشبو یتھ یہُوواہؔ ہن برکت دِژ۔28بہٕ چُھسے دعا کران زِ خدا ترٲونے آسمانہٕ پٮ۪ٹھٕ رحمتِ باراں یمہٕ سٟتؠ چٲنؠ کھہہ سٲراب کرِ تہٕ چٲنِس زمینس نیرن واریاہ فصٕل بسیار پَھل تہٕ مےَ یہِ باپتھ دچھ۔29بہٕ چُھس منٛگان زِ واریہن جمٲژن ہنٛدؠ لوٗکھ کرِن چٲنؠ خدمت تہٕ ژےٚ کٔرنےَ سجدٕ۔ بہٕ چُھس ونان زِ کرِ پننٮ۪ن باین پٮ۪ٹھ حکمرٲنی، تہٕ چانہِ ماجہِ ہنٛدؠ اولاد تہِ کٔرنے ژےٚ سجدٕ۔ بہٕ چُھس دعا کران زِ خدا وٲلِن تِمن لعنت یم ژےٚ لعنت سوزان چھی، تہٕ تمن کٔرِن برکت یم چٲنؠ برکت کانٛچھان چھِ۔30ییٚلہِ اسحاقنؔ یعقوبسؔ یہِ دعا کوٚر تہٕ یعقوبؔ اوس وُنہِ امہِ کمرٕ منٛزٕ نیرٲنی یتہِ تمسُنٛد مول اوس، تہٕ یورٕ پیٚو شکارٕ پتہٕ تمسُنٛد بوٚڈ بوے وٲتِتھ۔31عیسوؔ ہن اوس میوٗٹھ مازاہ تیار کوٚرمُت تہٕ اوٚنُن پننِس مٲلِس برونٛہہ کُن۔ تٔمؠ وُن پننِس مٲلِس، "میانہِ ببا، وُتھ سا وار وارٕ روز سا بہِتھ تہٕ کھیٚہ یمہِ مازٕ منٛز رژھ کھنٛڈ یُس مےٚ رٔنِتھ اوٚنےٕ، تہٕ کرِ تہٕ مےٚ دعا۔"32تمسنٛدؠ مٲلؠ اسحاقنؔ پرُوژھ تمِس، ژٕ کُس چُھکھ؟ تٔمؠ ونُس تورٕ، "بہٕ چُھس عیسوؔ، تُہنٛد زیُٹھ نیٚچو!33اضحاقؔ لوٚگ سیٹھاہ کانٛپنہِ۔ تٔمؠ وُن تیٚلہ کُس اوس یہِ یمؠ مےٚ برونٛہہ کُن اوٚن یُس یمؠ شکار کٔرِتھ اوٚنمُت اوس تہٕ مےٚ کھیٚو سُہ سورےٕ؟ ژٕ ینہٕ برونٛہہ اوس سُہ یتی۔ مےٚ کوٚر تس دُعا تہٕ بہٕ ہیٚکہ نہٕ یہِ نعمت واپس نِتھ۔34ییٚلہ عیسوؔ ہن مٲلؠ سنٛزٕ یمہٕ کتھٕ بوزٕ سُہ لوٚگ بڈِ بڈِ ودنہِ۔ سُہ گو سیٹھاہ مایوس۔ تٔمؠ وُن پننِس مٲلِس، "میانہ ببا، میٚتہِ کرِ تہٕ دعا!"35مگر مٲلؠ ونُس یورٕ، "چون بوے آو تہٕ دِتُن مےٚ دونٛکھٕ، تہٕ نِین چٲنؠ برکت۔36عیسوؔ ہن ونُس، "یہِ گو ٹھیک زِ تمِس چُھ یعقوبؔ ناو، تکیازِ تٔمؠ تٲر مےٚ دویہ لٹہِ بٲزؠ۔ گوڈنچہِ لٹہ نیٚونم زیُٹھ بوے آسنُک حق، تہٕ از نِین میانؠ برکت! پتہٕ پرِژُھن: کیاہ توٚہہِ نِش روز نا میانہِ خٲطرٕ کانٛہہ نعمتھا؟37اسحاقنؔ دیُت جواب تہٕ ونُن عیسوؔ ہس، "مےٚ کوٚڈ یہِ زیٚوِ زِ چون لۅکُٹ بوے کرِ ژےٚ پٮ۪ٹھ حکومت، مےٚ کوٚر یہِ اعلان زِ امسنٛدؠ تمام رشتہٕ دار کرن امسنٛز خدمت۔ تہٕ مےٚ وُن زِ خدا دِیہ أمِس وٲفِر اناج تہٕ مےَ خٲطرٕ دچھ۔ ونسا گۅبریا تُہنٛدِ خٲطرٕ کیاہ ہیٚکہ بہٕ کٔرِتھ؟"38عیسوؔ ہن وُن پننِس مٲلِس، "میانہِ ببا، کیاہ ژےٚ نِش چھا یوہے اکھ دُعا، میانہِ ببا میٚتہِ کرِ تہٕ دُعا! پتہٕ لوٚگ عیسوؔ زورٕ زورٕ ودنہِ39تمسنٛدؠ مٲلؠ اسحاقنؔ وُن تمِس، "سۅ جاے یتہِ ژٕ بسان آسکھ آسہ زرخیز میٚژِ تہٕ تمہِ شبنمہٕ نشہٕ محروم یُس خدا آسمانہٕ پٮ۪ٹھ کھہَن آب دنہٕ باپتھ سوزان چُھ۔40ژٕ لوٗٹہٕ ہکھ تہٕ مارٕ ہکھ لوٗکھ یُتھ ژٕ زنٛدگی گزارنٕچ ضرورت پوٗرٕ کرکھ۔ تہٕ ژٕ آسکھ تیٚوتھ زنتہٕ ژٕ پننِس بٲے سُنٛد نوکر آسکھ۔ مگر ییٚلہ ژٕ تس خلاف بغاوتھ کرنُک فٲصلہٕ نِکھ تہٕ ژٕ کرکھ پنُن پان تمسنٛدِ تلفہٕ تلہٕ آزاد۔"41تمہِ دعا کہ برکتہٕ یُس یعقوبسؔ پنٕنؠ مٲلؠ کوٚر، عیسوؔ لوٚگ پننِس بٲیس نفرت کرنہِ۔ عیسوؔ ہن وُن پانسےٕ کُن، "ییٚلہِ میٚون مول مرِ، تہٕ تمؠ سنٛز ماتم دٲری موٚکلٲوتھےٕ ژھنَن بہٕ یعوبؔ مٲرِتھ۔"42مگر رِبقہؔ ہس لوٚگ پےَ زِ عیسوؔ کیاہ چُھ سونچان۔ اوٕ کِنؠ اوٚن تمہِ پنُن لۅکُٹ نیٚچوِس یعقوبؔ بُلاوِتھ تہٕ وُننَس، "میانؠ کتھ بوز! چون بوٚڈ بوے عیسوؔ، چُھ ژٕ مارنٕچ سٲزِش بناوان تہٕ پانس یہِ زٲنِتھ تسلی دِوان زِ سُہ ہیٚیہِ تمہ دونٛکھُک بدلہٕ یُس ژےٚ تسنٛدس مٲلس دِتُتھ۔43تہٕ وُنؠ بوز میانہِ گۅبرٕ غورٕ سان یہِ بہٕ ونےَ۔ جلدےٕ ژل تہٕ ژلِتھ بیٚہہ حارانَسؔ منٛز میانِس بٲیِس لابنَسؔ نشہٕ۔44تس نِش روزکھ تۅتام یۅتام زٹِھس بٲیس شرارتھ ؤسی۔45ییٚلہ تس مٔشتھ گژھِ زِ ژےٚ کیاہ کیاہ ورتووُتھ تس سٟتؠ تہٕ بہٕ سوزے شیٚچھ ولہٕ یہِ اورٕ واپس۔ اگر ژےٚ عیسوؔ ژےٚ مٲری تہٕ باقےٕ مارن تس۔ تہٕ پتہٕ مرن میانؠ دوشوے اولاد اکے ساعتہٕ۔46پتہٕ وُن رِبقہؔ ہن اضحاقسؔ، یمو غٲر ملکی زنیٚو یمن سٟتؠ عیسوؔ ہن خاندر کوٚرمُت چُھ۔ یم حِت سنٛزٕ کورِ چھےٚ، چھےٚ میانؠ زندگی وبال بنٲومٕژ۔ اگر یعقوبؔ تہِ امی علاقہٕ منٛزٕ کانٛسہِ حِتی کورِ سٟتؠ خاندر کرِ میانؠ زندگی گژھِ بیکار!"
Bridge Connectivity Solutions Pvt. Ltd.