پیدٲیش26
1کینٛژِ کٲلؠ وُتھ ملکس منٛز سخت دراگ۔ یہِ دراگ اوس تمہِ دراگہٕ نشہٕ مختلف یُس ابرہامؔ سٕنٛدِ وقتہٕ آمُت اوس۔ لہٰذا گو اضحاقؔ فلستینی لوٗکن ہنٛدِس بادشاہ ابیملِکسؔ سٟتؠ کتھ کرنہِ جنوب مشرق کِس جرار شہرس منٛز۔2مگر خداوند یہُوواہؔ گو ظٲہر تہٕ وُننَس، "مِصر مٕہ گژھِ! تتھ ملکس منٛز روز یُس بہٕ ونےَ!3تتھ ملکس منٛز روزِتھ دِمے بہٕ مدد تہٕ بیٚیہِ کرے برکت۔ تکیازِ بہٕ دِمے ژےٚ تہٕ چانیٚن اولادن یہِ سٲرےٕ زمین تہٕ یُس وعدہ مےٚ چٲنِس مٲلس ابرہامس سٟتؠ کوٚرمُت چُھ سُتہ کرٕ پورٕ۔4بہٕ پھٲلاون چٲنؠ ذریاتھ آسمان کیٚن تارکن ہنٛدؠ پٲٹھؠ۔ بہٕ دمہٕ چانیٚن اولادن یہِ سٲرےٕ زمین تہٕ چٲنؠ اولاد بناوکھ تمام لوٗکن باپتھ برکتٕکؠ بٲعث۔5بہٕ کرٕ یہِ ضرور تکیازِ ابرہامنؔ کٔر میانؠ عبادت۔ تٔمؠ کٔر تِمن سارنےٕ کتھں ہنٛز تعمیل یمہٕ مےٚ تس کرنہٕ خٲطرٕ ونہِ، تہٕ سورےٕ یہِ کرنُک مےٚ حکم تس کوٚر، تہِ سورےٕ یمیُک مےٚ اعلان کوٚر تہٕ تِم سٲری قانون یم مےٚ تس دِتؠ۔6اوے رود اضحاقؔ پنٕنؠ گرٕ واجِنؠ تہٕ شُرؠ ہیٚتھ جرار شہرس منٛز۔7ییٚلہِ جرار کیٚو مردو پرُژھ زِ یہِ زٔنؠ کۅسہٕ چھےٚ تہٕ اسحاقنؔ وُن، "یہِ چھےٚ مےٚ بیٚنہِ۔ "تٔمؠ وُن یہِ اوٕ موٚکھٕ تکیازِ سُہ اوس یہِ وننہٕ کھوٚژان زِ "سۅ چھےٚ مےٚ خاندارِنؠ۔ تٔمؠ سونچ "رِبقہ چھےٚ سیٹھاہ خوبصورت، یمہِ کِنؠ تمِس تم یژھن۔ تمِ ہیٚکن تمِس حٲصل کرنہٕ خٲطرٕ مےٚ مٲرِتھ تہِ۔"8ییٚلہِ وُنؠ اضحاقسؔ تتہِ واریاہ کال گو تہٕ اکہ دوٚہہ دِژ فلستینیؔ بادشاہ ابیملِکنؔ پننہِ محل خانچہِ دارِ کِنؠ بوٚن کُن نظر تہٕ گو یہِ وُچِھتھ حٲران زِ اسحاق اوس پننہِ آشنہِ رِبقہؔ ہس سٟتؠ لول بٲگران۔9پتہٕ اننوو ابیملِکنؔ اسحاق ناد دِتھ تہٕ وننَس، "وُنؠ توٚر مےٚ فکرِ زِ یہِ چھےٚ ژےٚ پزی خاندارِنؠ۔ ژےٚ کیازِ ونُتھ "یہِ چھےٚ مےٚ بیٚنہِ" اسحاقنؔ ونُس یورٕ، مےٚ وُن یہِ اوٕ موٚکھٕ تکیازِ مےٚ سونچ یہِ حٲصل کرنہٕ خٲطرٕ ہیٚکہِ مےٚ یتہِ کانٛہہ مٲرِتھ۔"10ابیملِکنؔ ونُس، "ژےٚ پٔزہی نہٕ اسہِ سٟتؠ یہِ کرُن۔ بنان چُھ زِ سانیٚو نفرو منٛزٕ آسہ ہے کانٛہہ تُہنٛزِ خاندارنہِ نِش شونٛگمُت، تہٕ ژٕ بناوہکھ اسہِ بڈِ گُنہٕکؠ سزاوار۔"11پتہٕ دیُت ابیملِکنؔ پننٮ۪ن تمام لوٗکن حکم زِ "یمِس نفرس تہٕ یمسنٛزِ خاندارنہِ واتنٲوؠ زیٚو نہٕ کانٛہہ نقصان۔ یُس تہِ یُتھ کینٛہہ کرِ تمِس ییہِ، سزایہِ موت دِنہٕ!12امہِ ورؠ یہِ ووُ اسحاقنؔ اتھ زمینس بیٚول تہٕ لوننَس کافی پھسٕل، تکیازِ یہُوواہؔ ہن کٔر تس برکت۔13اسحاق رود زیادٕ کھۅتہٕ زیادٕ مال ۅپداوان یۅتام سُہ واریاہ دولت منٛد سپُد۔14تمِس نِش ٲسؠ تیر، ژھاوِلؠ تہٕ چارواین ہنٛدؠ بٔڈؠ بٔڈؠ کھیٚلؠ تہٕ واریاہ غلام۔ یمہِ کِنؠ فلستین تمسُنٛد حسد وُتھ۔15تہٕ تِمو پُرنٲوؠ تِم سٲری کریرؠ یم ابرہامنؔ تہٕ تمسنٛدیو نوکرو کٔھنمٕتؠ ٲسؠ۔16ابیملِکنؔ وُن پتہٕ اضحاقسؔ، "توٚہؠ گوو وُنؠ سانہِ کھۅتہٕ زیادٕ، امہِ کِنؠ چُھس بہٕ یژھان زِ توٚہؠ نیریٚو سانہٕ علاقہٕ منٛزٕ۔"17پتہٕ دراو اسحاق تہٕ تمسُنٛد خاندان تتہِ۔ جرار وادی منٛز وٲتِتھ دتِکھ تتہِ پنٕنؠ خٟمہ تہٕ لٔگؠ تٔتؠ بسنہِ۔18اتھ علاقس منٛز ٲسؠ واریاہ کریرؠ یم اسحاق سٕنٛدِس مٲلؠ ابرہامؔ سٕنٛدِ وقتہٕ کھننہٕ آمٕتؠ ٲسؠ مگر فلستینیو ٲسؠ تِم ابرہامؔ سٕنٛدِ مرنہٕ پتے میٚژِ سٟتؠ پُرنٲومٕتؠ۔ مگر اسحاق تہٕ تمسنٛدیو نوکرو کھننٲوؠ یم کریرؠ دبارٕ تہٕ اسحاقنؔ تھٲوؠ یمن کریریٚن تِمے ناو یم تمسںنٛدؠ مٲلؠ تِمن کٔرمٕتؠ ٲسؠ۔19اضحاقؔ سنٛدیو نوکرو کوٚر وادی منٛز تازٕ آبُک اکھ کریور دٔرؠ یاف۔20مگر جرارؔ وادی منٛز چاروٲے رچھن والیٚو لوٗکو لوگ اضحاقؔ سنٛدؠ چاروٲے رچھن والیٚن نفرن سٟتؠ تکرار کرُن۔ وننہِ لٔگؠ زِ یمہِ کریریُک آب چُھ سون۔ امہِ کِنؠ تھوو اسحاقنؔ اتھ کریرِس عِسقؔ ناو۔ یمیُک مطلب "تنازٕ "چُھ۔ تکیازِ اتھ پٮ۪تھ اوس تنازٕ وُتھمُت زِ امیٚک مٲلکھ کُس چُھ۔21پتہٕ پوٚز اسحاق سنٛدیو نوکرو بیاکھ کریٚور مگر تتھ پٮ۪ٹھ تہِ ؤژھ لڑٲے زِ یہِ کوٚہُنٛد چُھ۔ تہٕ اتھ تھوو اسحاقنؔ سِتنہؔ ناو، یمیٚک مطلب "مخالفت" چُھ22تِم دراے اتِتھ تہٕ برونٛہہ پہَن پٔکِتھ کھُنُکھ بدل کریٚور۔ مگر وُنؠ کٔرنہٕ اتھ پٮ۪ٹھ کانٛسہِ لڑٲے زِ امیٚک مٲلکھ کُس چُھ۔ تہٕ تٔمؠ تھوو اتھ "رحوبوتؔ" ناو یمیٚک مطلب "خٲلی جاے" چُھ۔ ونان چُھ زِ "یہُوواہؔ ہن دِژ اسہِ روزنہٕ خٲطرٕ یہِ خٲلی جاے، سۅ جاے یتھ نہٕ باقےٕ لوٗکھ یژھان چھِ۔ تہٕ أسؠ روزو یتہِ واریاہ خوشحال۔"23اتہِ پٮ۪ٹھٕ گو اسحاق بیرسبعؔ24گۅڈنچہِ رٲژ ییٚلہِ سُہ تتہِ اوس، یہُوواہؔ سپُد تس نِش ظٲہر تہٕ وُننَس، "بہٕ چُھس سُہ خدا یمسنٛز عبادت چٲنؠ مٲلؠ ابرہامنؔ کٔر۔ کُنہِ چیزس مٕہ کھوٚژ۔ بہٕ کرے ژےٚ مدد، بہٕ دِمے ژےٚ برکت تہٕ یُس وعدہ مےٚ پننِس بنٛدس ابرہامس سٟتؠ کوٚرمُت چُھ زِ بہٕ بڑاوَن چٲنؠ ذریاتھ واریاہ۔"25لہٰذا بنٲو اسحاقنؔ تتہِ اکھ قربان گاہ تہٕ خدایہ سنٛز عبادت کرنہٕ خٲطرٕ کریٚن قربٲنیہ پیش۔ تٔمؠ لٲگؠ تتہِ پنٕنؠ خٟمہٕ تہٕ تمسنٛدیو نوکرو لوگ کریٚور کھنُن۔26ییٚلہِ تِم کریٚور کھنان ٲسؠ تہٕ بادشاہ ابیملِکؔ آو جرارؔ پٮ۪ٹھٕ اضحاقسؔ نِشہ پنُن مشیر احوزتؔ تہٕ سِپاہ سالار فیکلؔ ہیٚتھ۔27اسحاقنؔ وُن تِمن، "توٚہہِ کوٚرو گۅڈٕ مےٚ سٟتؠ دشمنانہٕ رٔویہ تہٕ ژھنووس بہٕ کڈِتھ۔ تہٕ وُنؠ کیازِ او مےٚ نِش؟28تِمو منٛزٕ وُن اکؠ، "اسہِ وُچھ زِ یہُوواہؔ چھی ژےٚ مدد کران۔ اوے وُن اسہِ اکھ أکِس زِ اسہِ تہٕ اضحاقسؔ درمیان گژھِ اکھ مہادٕ سپدُن۔ لہٰذا پزِ اسہِ توٚہہِ سٟتؠ صلحُک مہادٕ کرُن،29زِ توٚہؠ واتنٲیو نہٕ اسہِ کانٛہہ نقصان، یتھ کِنؠ نہٕ اسہِ توٚہہِ سٟتؠ کانٛہہ زیادتی کٔر، اسہِ کوٚر توٚہہ سٟتؠ ہمیشہ رُت سلوک، تہٕ اسہِ کٔریٚو توٚہؠ امنہٕ سان رخصت۔ وۅنؠ چُھ یہُوواہؔ توٚہہِ برکت عطا کران۔"30پتہٕ کٔر اسحاقنؔ ابی ملک تہٕ تہنٛدِٮ۪ن دوستن خٲطرٕ ضیافت تیار تہٕ تِمو کھیٚو چیو۔31دویمہِ دوٚہہ صبحٲے کوٚر ساروٕے قسم زِ یم وعدہ اسہِ کٔرؠ تِم نباوو۔ پتہٕ سوزؠ اسحاقنؔ تِم اطمنانہٕ سان پنُن گرٕ۔32امی دوٚہہ آے اسحاقٕنؠ نوکر تمِس نشہٕ تہٕ وُنہَس تتھ کریرِس متعلق یُس تِمو کھنِتھ مۅکلوو۔ تِمو وُن، "اسہِ آو کریرِس آب!33اسحاقنؔ کوٚر اتھ کریرِس سبعؔ ناو یُس عِبرٲنؠ لفظ باسان چُھ، امیُک مطلب گو "عہد" موجودٕ دورس تام اوس امہِ شہرُک ناو "بیرسبعؔ" مطلب "امن مہادٕ کریٚور۔"34ییٚلہِ عیسوؔ ژتجی وہُر ووت تہٕ تٔمؠ کوٚر بیری سنٛزِ کورِ یہودِت تہٕ ایلونؔ سنٛزٕ کورِ بشامتؔہِ سٟتؠ کھانٛدر۔ تم دونوے کورِ آسہٕ حِتی سنٛزٕ اولاد، نکہِ اسحاق سٕنٛدِ قبیلچہ۔35عیسوؔ سنٛزو یمو دویو زنانو بنٲو اضحاقؔ تہٕ رِبقہؔ ہنٛز زنٛدگی وبال۔
Bridge Connectivity Solutions Pvt. Ltd.