پیدٲیش18
1تمہِ ورؠ یہِ ییٚلہِ اکہ دوٚہہ گرمی ٲس۔ ابرہامسؔ گو خداوند یہُوواہؔ ممرےؔ کِس أکِس بٔڈس کُلس نِش نظرِ۔ ابرہامؔ اوس پننِس خٟمہٕ کِس دروازس پٮ۪ٹھ بہتھ۔2ابرہامنؔ یتُھےٕ نظر دِژ، پانس برونٛہہ کنہِ ترٛے نفر کھڑا وُچِھتھ گو تس تٲجُب۔ تمن وُچتھ دوریاو سُہ تِمن سمکھنہٕ خٲطرٕ۔ تٔمؠ تروو تعظیمن پنُن کلہٕ سجدس منٛز۔3تٔمؠ وُن تِمو منٛزٕ أکِس، اے خداوند اگر ژٕ مےٚ ناراض چُھکھ ژٕ ٹٔھہر تہٕ أکِس رژھِ یتِنس۔4میانین خٲدمن دتہٕ اجازت تمہٕ انہَن آب تہٕ چھلہٕ ہن چٲنؠ کھۅر پتہٕ ترٲے تو یتھ کُلِس تل آرام۔5"تکیازِ توٚہؠ چُھو یور مےٚ نِش آمٕتؠ لہٰذا دی تو مےٚ اجازت بہٕ انَہا توٚہہِ کھیٚنہٕ خٲطرٕ کینٛہہ تاکہِ توٚہہ ییہِ نیرنہٕ برونٛہہ ہمتھ۔ تٔمؠ ونُس تورٕ "ٹھیک چُھ، یہِ ژٕ یژھان چُھکھ کرِ تہِ۔"6پتہٕ گو ابرہامؔ تیز تیز خٟمس منٛز تہٕ ونُن سارہؔ ہَس، "جلدی ان پننہِ اصل آٹہِ منٛزٕ ٲٹیٚس وُوہہ سیر تہٕ بناو ژۅچہِ!"7پانہٕ دوریاو کھیٚلِس نِش تتہِ انُن اکھ وُژھ ژٲرتھ یس سُنٛد ماز لوو تہٕ مزٕدار آسہ، سُہ دتُن پننِس أکِس خٲدمس تٔمؠ مور سُہ جلدی تہٕ نیٚون بُزتھ۔8ییٚلہِ ماز تیار گو تہٕ ابرہامنؔ أنؠ لٔسؠ، زامُت دۅد تہٕ سُہ ماز یُس خٲدمن تیار کوٚر تہٕ تھووکھ تس برونٛہہ کنہِ۔ سُہ رود تس برونٛہہ تتھ کُلس نِش کھڑا ییٚلہ سُہ یہِ کھیٚن کھیٚوان اوس۔9کھیٚن مۅکلٲوتھ پرُوژھ تٔمؠ أمِس، "چٲنؠ خاندارنؠ سارہؔ کتہِ چھےٚ؟ ابرہامنؔ دِتُس جوابِ "سۅ چھےٚ خٟمس منٛز۔"10پتہٕ وُن امہِ جمٲژ ہنٛدؠ زٹھؠ، "بہٕ یمہٕ نوِ وری یہِ بہارس منٛز بیٚیہِ توٚہہِ نِش، بوزیٚو! تُہنٛزِ خاندارنہِ سارہؔ ہَس اولاد عطا سپُدمُت۔" سپُد یتھ کٔنؠ زِ سارہؔ ٲس خٟمہٕ کِس دروازس پٮ۪ٹھ یہِ بوزان، یُس أمِس نفرس پٔتؠ کِنؠ اوس یُس یہِ کتھ ونان اوس۔11وُنؠ چھِ ابرہامؔ تہٕ سارہؔ سیٹھاہ بڈٕ گٲمٕتؠ تہٕ سارہؔ ہَس چھےٚ بچہٕ دِنچ وانٛس مۅکلیمٕژ۔12سارہؔ ہَس آو پانس پٮ۪ٹھ یہِ بوزِتھ اسُن سونٛچن زِ میون جسم چُھ سوریومُت تہٕ میون خاندار تہِ چُھ بُڈیومُت۔ تہٕ بہٕ کتھ کٔنؠ ہیٚکہٕ بچہ زیٚنٕچ خوشی حٲصل کٔرِتھ؟13یہُوواہنؔ ووٚن ابرہامسؔ، "سارہؔ ہَن کیازِ تروو اسُن؟ سۅ کیازِ چھےٚ یہِ سونچان زِ بہٕ چھیٚس بُڈیمٕژ تہٕ مےٚ کتھٕ کٔنؠ ہیٚکہ بچہٕ زیٚتھ؟14یہِ چھا میانہِ خٲطرہ کانٛہہ مشکِل کٲم؟ بہٕ یمہٕ نوِ ؤرؠ یہِ بہار کِس موسمس منٛز تمہِ وقتہٕ یُس مےٚ مقرر کوٚر، تہٕ سارہؔ ہَس آسہ اکھ شیر خوار بچہ کھۅنہِ منٛز۔15سارہؔ کھوژ یہِ بوزِتھ تہٕ تمہِ وُن ٲکھتی زِ مےٚ اوٚس نہٕ۔ مگر یہُوواہنؔ ونُس "اتھ مٕہ کرِ اِنکار! ژےٚ ترووُتھ اسُن۔"16ییٚلہ تم ترےٚ نفر تتہِ نیرنہٕ خٲطرہ ؤتھؠ تِمو کوٚر سدومؔ شہر کُن رۅخ۔ ابرہامؔ وُتھ تمن "رخصتی" دنہٕ باپتھ سٟتؠ۔17یہُوواہؔ ہَن وُن پانسےٕ کُن، "میانہ باپتھ چُھنہٕ یہِ ٹھیک زِ بہٕ تھاون ابرہامؔ تمہِ نشہٕ بےخبر یہِ بہٕ کرُن یژھان چُھس۔18ابرہامٕنؔؠ اولاد آسن اکہ عظیم تہٕ طاقتور قومٕکؠ فرد۔ تہٕ یہِ کینٛژھا بہٕ تسٕنٛدِ خٲطرہ کران چُھس تمہ کہِ وساطتہٕ کرَن تمام جمٲژن ہنٛدؠ لوٗکھ برکتھ حٲصل۔19مےٚ ژور سُہ اوٕ موٚکھٕ تاکہِ سُہ کرٕ پننٮ۪ن شُرین تہٕ تہنٛدین گرٕ والین ہدایت یُتھ تم میانؠ عبادت کٔرتھ تم کامہٕ کرن یم صحی تہٕ منصفانہٕ آسن۔ یُتھ تِم خداوند ابرہامس سٟتؠ تی کرَن یہِ مےٚ تمِس سٟتؠ کرنہٕ خٲطرہ ونمُت چُھ۔20پتہٕ وُن یہُوواہنؔ ابرہامسؔ، "مےٚ بوزٕ تِم ہٲبت ناکھ کتھٕ یمہٕ لوٗکھ سدومؔ تہٕ عمورہؔ کیٚن لوٗکن متلِق ونان چھِ۔ تم چھِ بٔڈؠ گناہ گار۔21لہٰذا وسہٕ بہٕ تِمن نشہٕ تہٕ وُچھٕ زِ یم یَچھ کتھٕ مےٚ بوزٕ تم چھا صحی کِنہٕ نَہ۔22پتہٕ دراے بیٚیہِ زٕ نفر تہٕ لٔگؠ سدومؔ کُن پکنہِ مگر ابرہامؔ رود یہُوواہؔ ہَس برونٛہہ کنہِ کھڑا۔23ابرہامؔ آو تمِس نزدیک تہٕ وُننَس، "کیاہ توٚہؠ کٔرووکھا پزی تم لوٗکھ تہٕ بُرباد یمو نہٕ بدکارن سٟتؠ روزِتھ کانٛہہ غلط کوٚر؟24اگر شہرس منٛز پنژاہ نفر آسن یمو نہٕ کانٛہہ غلط کوٚرمُت آسہ تہٕ توٚہؠ کیاہ کٔریو؟ کیاہ توٚہؠ کٔرووکھا پزی تِم تباہ تہٕ تِمن پنژہن بےٚقصورن خٲطرٕ کٔڈیو نہٕ بچنٕچ کانٛہہ تہِ وتھ۔ یمو نہٕ کانٛہہ غلطی کٔرمژ آسہ؟25یقینَن کرَکھ نہٕ ژٕ تِژھ کٲم یمہِ سٟتؠ بُرٕ لوٗکن سٟتؠ نیک لوٗکھ تہِ مارٕ گژھن۔ نیکن تہٕ بدکار لوٗکن سٟتؠ کٔریو کنُے رٔویہ۔ توٚہؠ ہیٚکیو نہٕ تہِ کٔرِتھ۔ تکیازِ توٚہؠ، یم زمینہِ پٮ۪ٹھ اکھ منصف چھِ کٔریو پزی تی یہِ صدوم کیٚن لوٗکن ہنٛدِ باپتھ منٲسب چُھ۔26خداوند یہُوواہنؔ دتُس جواب، "اگر مےٚ سدومؔ شہرس منٛز پنژاہ نفر سمکھن یمو نہٕ کانٛہہ غلطی کرمٕژ آسہ تہٕ بہٕ تراون تہنٛدِ باپتھ سورے علاقہٕ یلہٕ۔"27ابرہامنؔ دیُت جواب، "میانہ خداوندٕ! مےٚ پزنہٕ یتھٕ کِنؠ توٚہہ سٟتؠ تھدِ کلام کرُن تکیازِ بہٕ چُھس سوٗرٕ تہٕ لژھِ کھۅتہٕ کمتر۔28مگر توٚہؠ کیاہ کٔریو اگر صرف پنٛژتٲجی نفر تم آسن یمو نہٕ کانٛہہ غلطی کرمٕژ آسہ؟ کیاہ توٚہؠ کٔرووکھا شہرس منٛز روزن وٲلؠ سٲری تباہ تکیازِ تتہِ آسن صرف پنٛژتٲجی لوٗکھ اصل تہٕ باقی پنٛژاہ نہٕ؟ یہُوواہنؔ دیُت جواب، "بہٕ کرن نہٕ یہِ تباہ اگر مےٚ پے لگہ زِ اتہِ چھِ پنٛژتٲجی لوٗکھ جان۔29ابرہامؔ رود تمِس سٟتؠ یتھے کِنؠ کتھٕ کران تہٕ پرُوژھنس، "اگر توٚہہ معلوم سپدِ زِ تتہِ چھِ صرف ژتجی نفر اصل تہٕ توٚہؠ کیاہ کٔریو؟ یہُوواہنؔ دِتُس جواب، "بہٕ کرکھ نہٕ تم سٲری ژتجہِو باپتھ مارٕ۔"30ابرہامنؔ ونُس، "مہربٲنی کرزیٚو ینہٕ شرارتھ کھسیٚو، مےٚ دیتو بیٚیہِ وننہٕ۔ اگر صرف ترٛہہ نفر اصل آسن تیٚلہِ کیاہ کریوٚ توٚہؠ؟ تِمو دیُت یتھ کٔنؠ جواب زِ بہٕ کرٕنہٕ ہرگِز تہِ اگر مےٚ باسہ اتہِ چھِ ترٛہہ نفر۔31ابرہامنؔ ووٚن، "میانہِ خداوندٕ! مےٚ پزِ نہٕ توٚہہ سٟتؠ یتھ کٔنؠ کلام کرُن مگر زانپن چُھس یژھان اگر توٚہہِ پے لگہ تتہِ چھِ صرف وُہے نفر یم نیک چھِ، تہٕ توٚہؠ کیاہ کٔریٚو؟" تِمو وُن در جواب، "تِمو وُہو نفرو موٚکھٕ کرَن نہٕ بہٕ سورےٕ شہر تباہ۔32ٲخرس پٮ۪ٹھ وُن ابرہامنؔ، "اے میانہِ خداوندٕ، مےٚ گٔژھؠ زیٚو نہٕ ناراض، مےٚ دِیو صرف اکھ کتھ وننہٕ۔ اگر توٚہہِ معلوم سپدِ زِ تتہِ چھِ صرف داہ نفر نیک تہٕ تیٚلہ کیاہ کٔریو توٚہؠ؟ خداوند یہُوواہنؔ دِتُس جواب، "تِمو دہو خٲطرٕ تہِ کرن نہٕ بہٕ سورے شہر تباہ۔"33ابرہامنؔ کٔر نہٕ مذید کانٛہہ کتھ۔ یتُھے یہُوواہنؔ ابرہامسؔ سٟتؠ کتھ سپدٲو سُہ دراو، تہٕ ابرہامؔ ژاو گرٕ کُن۔
Bridge Connectivity Solutions Pvt. Ltd.