پیدٲیش16
1اتھ وقتس تام دیُت نہٕ ابرامؔ سنٛزِ خاندارنہِ ساریؔ ابرامؔ سٕنٛدِ باپتھ کٲنسہِ تہِ اولادس زایُن۔ مگر تمِس نشہٕ ٲس اکھ مِصری لونٛڈی، یمِس حاجرہ ناو اوس۔2تہٕ ساریؔ وُن ابرامسؔ، "میانؠ کتھ بوز! یہُوواہنؔ دیُت نہٕ مےٚ حٲملہٕ روزنُک اجازت۔ لہٰذا شونٛگ ژٕ میانہِ لونٛڈی حاجرہ ہَس نِش تاکہِ تمِس زیوِ کانٛہہ اولاد یُس أسؠ پنُن گنٛزراوون، ابرامنؔ کوٚر سارایہؔ ہنٛزٕ اتھ کتھِ سٟتؠ اتفاق۔3یہِ سپُد ابرامؔ تہٕ سارایہ ہنٛدِ کنعانس منٛز روزنہٕ پتہٕ دہہ ؤہرؠ۔ یتھ کِنؠ بنٲو ابرامنؔ ساریؔ ہنٛز مِصرٕچ لونٛڈی پنٕنؠ دویم خاندارِنؠ4سُہ سپُد حاجرہ ہَس سٟتؠ ہم بستر تہٕ سۅ روز بیٚیہِ زُووٕ۔ یتھے یہِ پے لوٚگ زِ سۅ چھےٚ بیٚیہِ حسابہٕ۔ تمہِ لٲج پنٕنؠ مٲلکٲنؠ سارہؔ کم پایہ زانٕنؠ۔5پتہٕ وُن ساریؔ ابرامسؔ، "یہِ چھےٚ چٲنؠ غلطی! مےٚ کرے ژےٚ پنٕنؠ خٲدم حوالہٕ تاکہِ ژٕ شونٛگکھ تس نِشہ۔ وۅنؠ سپٕز سۅ آوارٕ تہٕ اوے لٔج سۅ مےٚ کم پایہ زاننہِ۔ تکیازِ مےٚ چُھنہٕ کانٛہہ اولادےٕ۔ خداوند یہُوواہؔ زٲنی ژےٚ قصور وار مےٚ سٟتؠ یہِ ورتاونہٕ باپتھ۔6ابرامنؔ وُن ساریؔ، "میانؠ کتھ بوز! سۅ چھےٚ ژےٚ داے، یُس سلوک ژٕ منٲسب بٲسی سُہ ہیککھ ژٕ تمِس سٟتؠ کٔرتھ۔" پتہٕ لٲج سارایہ تمِس سٟتؠ بدسلوکی کرٕنؠ تہٕ حاجرہؔ ژٔج۔7ییٚلہ سۅ بیابانن منٛز وٲژ أکِس ناگہٕ پُکھرِ نِش آو تس خداوند سُنٛد فرشتہٕ برونٛہہ کُن۔ یہِ چُھ سُہ ناگ یُس شور ناوچہِ وتہِ منٛز اوس۔8تٔمؠ وُن تس، "اے حاجرہ، مٲلکٲنؠ سارہؔ ہنٛزِ دٲے، ژٕ کتہِ آیکھ تہٕ کوٚت گژھکھ؟ تمہِ ونُس جواب، "بہٕ آیس پننہِ ملکانہِ سارایہ نِش ژٔلِتھ۔"9یہُوواہؔ سنٛدؠ فرشتن ونُس، "ژٕ گژھِ پننہِ مٲلکانہِ نشہٕ واپس تہٕ روز تمسنٛز فرمانبردٲری کران۔"10تہٕ خداوند سنٛدؠ فرشتن وُن تمِس یتہِ زِ بہٕ دِمے ژےٚ تیتؠ اولاد یمن نہٕ کانٛہہ گرینٛدےٕ کٔرتھ ہیٚکہِ۔11فرشتن وُن تمِس، بوز! ژٕ چھیٚکھ بیٚیہِ زُووٕ۔ ژےٚ زیٚوی اکھ لڑکہٕ یمِس ژےٚ اسماعیل ناو پیی تھاوُن، یمیُک مطلب یہِ چُھ زِ خدا چُھ بوزن وول۔ تکیازِ یہُوواہنؔ بوز چون ودُن تہٕ ژیونُن چون غم۔12مگر چون نیٚچو روزِ جنگلی خرٕ سٕنٛدؠ پٲٹھؠ آزاد۔ سُہ کرِ پرٮ۪تھ کٲنٛسہِ سٟتؠ بغاوتھ تہٕ تمِس روزن سٲری مخالفت کران۔ سُہ ہیٚیہِ پننؠن رشتہٕ دارن نشہٕ تہِ دور۔13حاجرہنؔ وُن پانسےٕ کُن، "بہٕ روزٕ زندٕ، حلانکہِ یہُوواہنؔ وُچھس بۅ" اوے دیُت تٔمؠ یہُوواہسؔ آلو، "خدا، سُے یُس مےٚ وُچھان چُھ۔"14توے تہِ چھِ اتھ ناگس لوٗکھ "بیر لحی روئی" ونان۔ یمیُک مطلب یہِ گۅ زِ" زندٕ کرُور یُس مےٚ وُچھان چُھ!" یہِ چُھ قادِس تہٕ بیردس درمیان وُنہِ تہِ موجود۔15یتھ کٔنؠ دیُت حاجرہَن پتہٕ ابرامؔ سٕنٛدِ خٲطرٕ نیٚچوِس زایُن تہٕ تمِس تھووُن اسماعیل ناو۔16تمہِ وزِ اوس ابرامؔ شیٚیہ شیتھ وہُر ییٚلہِ حاجرہَن تمسنٛدس نیٚچوِس اسماعیلسؔ زایُن دیُت۔
Bridge Connectivity Solutions Pvt. Ltd.