عزرا10
1عزراؔ اوس خدایہِ سٕنٛدِس مقدِسس برونٛہہ کنہِ بِہتھ پنُن کلہٕ نۅمرٲوِتھ دعا کران، ماتم کران تہٕ تِمن لوٗکن ہنٛدٮ۪ن گنہن ہُنٛد اقرار کران یِمہٕ تِمَو کٔرؠ مٕتؠ ٲسؠ۔ یمہِ وزِ سُہ یہِ کران اوس، اسرائیلی لوٗکن ہنٛز اکھ بٔڈ جماتھ یتھ منٛز مرٕد، زنہِ تہٕ شُرؠ شٲمل ٲسؠ گے تس انٛدؠ انٛدؠ جمع تہٕ ٲسؠ تلخ پٲٹھؠ ودان تہٕ رِوان۔2یحی ایلؔ سُنٛد اولاد سِکنیاہؔ اوس عیلام قبیلُک، سُہ لوٚگ عزراؔہس کُن وننہِ: "اسہِ کٔر پننِس خدایہ سنٛز نافرمٲنی۔ سانیٚو کینٛژو فَردو کوٚر غٲر اسرائیلی زَنیٚن سٟتؠ خاندر۔ تم آیہ دویمیٚو قبیلو پٮ۪ٹھٕ تہٕ رلییہِ اسہِ سٟتؠ۔ مگر اسہِ چھےٚ توتہِ یہِ امید زِ یہُوواہؔ سَپدِ اسہِ اسرائیلی لوٗکن پٮ۪ٹھ مہربان۔3میانؠ تجویز چھےٚ زِ أسؠ کرو تی یہِ توٚہؠ ونان چُھو، باقی لوٗکن ہنٛدؠ پٲٹھؠ یم خدایہ سنٛدین احکامن ہُنٛد احترام کران چھِ۔ أسؠ کرو تی یہِ خدایہ سُنٛد شریعت اسہِ ونان چُھ۔ أسؠ چھِ پننِس خدایس سٟتؠ وعدہ کران۔ أسؠ چھِ سٲری یمہِ خٲطرٕ تیار زِ أسؠ سوزٕہوکھ پننہِ یم غٲر ملکی خاندارنہِ طلاق دِتھ تہنٛدؠ شُرؠ ہیٚتھ واپس یِم اسہِ زامٕتؠ چھِ۔4یہِ چھےٚ تُہنٛز ذمہٕ دٲری زِ اسہِ ؤنِو کیاہ چُھ کرُن، کروا کِنہ نَہ، توٚہؠ تھٲیِو حوصلہٕ تہٕ کٔریٚو تہِ یہِ کرُن ضروری چُھ۔ أسؠ چھِ توٚہہِ سٟتؠ۔5لہٰذا تُل عزراؔہن قدم تہٕ ونُن کاہنن، لاوینؔ تہٕ اسرائیلی زِٹھیٚن زِ تم کرَن امہِ کتھِ ہُنٛد اعلان زِ یہِ کینٛژھا سکنیاؔہَن ووٚن تم کرن تتھ پٮ۪ٹھ عمل۔ لہٰذا دیُت ساروٕے یقین تہٕ تی کرنُک کوٚرُکھ وعدہ۔6پتہٕ ووٚتھ خدایہ سٕنٛدِ گرٕ برونٛہہ کنہِ عزراؔ تھوٚد تہٕ ژاو الیاسبؔ سٕنٛدِس نیٚچوِس یہُوحانانؔ سُنٛد گرٕ۔ یِتُھے سُہ تور ژاو تٔمؠ کھیٚو چیو نہٕ تتہِ کِہیٚن۔ سُہ اوس جلایہ وطنی پٮ۪ٹھٕ واپس آمتیٚن لوٗکن ہنٛزِ خدایہ سنٛدین احکامن ہنٛز عدولی کرنَس پٮ۪ٹھ غمزدٕ۔7پتہٕ سوز یمو زِٹھیٚو یہُوداہسؔ تہٕ یروشلمؔ شہرس منٛز روزن والیٚن تمام لوٗکن شیٚچھ تہٕ وُنہکھ تِم سٲری گٔژھیٚو جلدی یروشلمؔس منٛز حٲضر یم ہجرت پتہٕ بابلؔ پٮ۪ٹھٕ واپس آمٕتؠ چھِ۔8زِٹھیٚو کوٚر امیٚک اعلان زِ یُس اکھا تہِ ترٛین دوٚہُن انٛدر انٛدر واتہِ نہٕ تٔمؠ سُنٛد سورےٕ جاداد ییہِ ضبط کرنہٕ تہٕ سُہ ییہِ اسرائیلی جلایہ وطنِیو نِشہ کٔڈِتھ ژھٕننہٕ۔9یتھ کِنؠ سپٕدؠ تریٚن دوٚہُن انٛدر انٛدر یہُوداؔ تہٕ بنیمِینؔ ۂکؠ سٲری لوٗکھ نٔومہِ ریتہٕ کہِ وُہمہِ تٲریخہ یروشلمؔس منٛز جمع۔ تم بیٹھؠ مقدس کِس آنٛگنس منٛز۔ تم ٲسؠ ہانیمٕتؠ تہٕ کانٛپنیمٕتؠ تکیازِ اکہ انٛدٕ اوس رود پیٚوان تہٕ دوٚیمہِ طرفہٕ اوس تِمن تشویش پننہِ کرمَتیُک سزا رٹنُک۔ 10پتہٕ ووٚتھ عزراؔ تھوٚد تہٕ ونُن یمن، "توٚہہِ منٛزٕ کٔر کینٛژو نفرو خدایہ سنٛز نافرمٲنی۔ توٚہہِ کُرو تِمن زنیٚن سٟتؠ خانٛدر یم غٲر ملکی تہٕ غٲر اسرائیلی آسہٕ۔ یہِ کٔرتھ بنیاے أسؠ اسرائیلی پرانہِ کھۅتہٕ زیادٕ گناہ گار۔11مگر وُنؠ کٔریو توٚہؠ پننٮ۪ن گُنہن ہُنٛد اعتراف پننٮ۪ن جد و اجدادن ہنٛدس خدا یہُوواہؔ ہس برونٛہہ کنہِ تہٕ کٔریٚو تہِ یہِ تمسُنٛد فرمان چُھ۔ پنُن پان کٔریٚو الگ غٲر ملکی لوٗکن نِش تِمن زنیٚن طلاق دِتھ یم توٚہہِ نیتھٕرؠ چھےٚ۔12سارے جمٲژ دیُت یکہٕ وٹہٕ بڈِ جواب، آ، اسہِ پزِ تی کرُن یہِ توٚہہِ فرموو۔13اکھا وُتھ تہٕ ونُن، مگر أسؠ چھِ واریاہ لوٗکھ، تہٕ روٗد تہِ چُھ کٲفی پیٚوان۔ یتھِس روٗدس منٛز نیٚبرٕ کنہِ کھڑا روزُن چُھ مشکل۔ چونٛکہ اسہِ منٛز چُھ واریہن یہِ گناہ سرِزد گوٚمُت۔ اوٕ کِنؠ لگہ یم چیز ٹھیک کرنس کینٛہہ وقت۔14امہِ موٚکھٕ دِیو سانیٚن زِٹھیٚن یہِ فٲصلہٕ نِنُک موقہٕ زِ اسہِ کیاہ پزِ کرُن۔ پریٚتھ کُنہِ شہرس منٛز چُھ کانٛہہ نتہٕ کانٛہہ یمؠ غٲر اسرائیلی زنہِ سٟتؠ خاندر کوٚرمُت چُھ۔ تمن ؤنِو تم ین تمہِ دوٚہہ یُس توٚہؠ مقرر کٔریٚو۔ تم انُن پننِس کٲنٛسہِ زِٹھِس تہٕ وکیلس سٟتؠ۔ ییٚلہ أسؠ یہِ کرو، أسؠ بچو پننِس خدایہ سٕنٛدِ قہرٕ نِشہ تکیازِ اسہِ چُھ تٔتھؠ لایکھ کوٚرمُت۔15جمٲژ منٛزِ ووٚتھ صرف عساہؔیل سُنٛد نیٚچو یونتنؔ تہٕ تِقوہ سُنٛد نیٚچو یحازؔیاہ تھوٚد تہٕ کٔرکھ اتھ مخالفت۔ پتہٕ ؤتھؠ مسلامؔ تہٕ سبتیؔ لاوی تہٕ دِتُکھ یہنٛزِ کتھِ ساتھ۔16مگر یم رودؠ کُنی زٔنؠ یمو اتھ تجویزِ مخالفت کٔر باقی تمامو یمہٕ بابلؔ پٮ۪ٹھٕ واپس آمٕتؠ ٲسؠ ووٚن زِ أسؠ کرو یہِ۔ لہٰذا ژٲرؠ کاہن عزراؔ ہن پرٛتھ کُنہِ جمٲژ منٛزٕ زِٹھؠ تہٕ تھٲونکھ ذمہٕ دارؠ تمن نفرن ہُنٛد فہرست بناونچ یمو غٲر اسرائیلی زنیٚن سٟتؠ نیتھٕر کوٚرمُت چُھ۔ دٔہمہِ ریتکہِ گوٚڈنکہِ دوٚہہ سمن تِم سٲری تہٕ دِمو اتھ مسلس دل۔ 17دویمہِ وریکہِ گوٚڈنکہِ ریتہٕ کِس گوڈنکِس دوٚہس تام اوس یہِ ماملہٕ طے سپُدمت زِ کٔمؠ کٔمؠ فردن چُھ غٲر ملکی تہٕ غٲر اسرائیلی زنہِ سٟتؠ خاندر کوٚرمُت۔18تِمو زون یتہِ زِ کاہنن ہنٛدیو اولادو منٛزٕ تہِ چُھ کینٛژو غٲر ملکی تہٕ غٲر اسرائیلی زَنیٚن سٟتؠ خاندر کوٚرمُت۔ یمن منٛز یسوعؔ سنٛدیو اولادو منٛزٕ یُوصدؔق سُنٛد نیٚچو تہٕ تمسںنٛدؠ کینٛہہ بٲے یمن معسیاہؔ، الِیعزرؔ، یارِبؔ تہٕ جِدلیاؔہ شٲمل ٲسؠ۔19تِمو کوٚر غٲر اسرائیلی خاندارنیٚن طلاق دِنُک پۅختہٕ وعدہ تہٕ اکھ اکھ ہونٛڈ کوٚرکھ گناہو کفارٕ کِس صوٗرتس منٛز قربان۔20اِمیرؔ سٕنٛدِ قبیلہٕ منٛزٕ ٲسؠ حنانیؔ تہٕ زبدیاہؔ۔21حارِمؔ سٕنٛدِ قبیلہٕ منٛزٕ معسیاہؔ، الِیاہؔ، سمعیاؔہ، یحی ایلؔ تہٕ عزیاہ۔22فشحُورؔ سٕنٛدِ قبیلہٕ منٛزٕ الیوعیناییؔ، معسیاہؔ، اسمٰعیلؔ، نتنی ایلؔ، یُوزابادؔ تہٕ الِعسہؔ۔23لاویو منٛزٕ یمو غٲر ملکی زَنیٚن سٟتؠ خاندر کوٚرمُت اوس تِم ٲسؠ یُوزابادؔ، سمعیؔ، قلایاہ یمِس قلیتاؔہ تہِ ونان ٲسؠ فطحیاؔہ، یہُوداؔ تہٕ الِیعزرؔ۔24گیٚون والیٚو منٛزٕ اوس الیاسبؔ، دربانو منٛزٕ ٲسؠ سلُومؔ، طلم تہٕ اُورؔی۔25یہِ چُھ فہرست باقی اسرائیلی لوٗکن ہُنٛد یمو غٲر ملکی زنہِ نیتٔرؠ آسہ کرِمژٕ۔ پرعُوسؔ قبیلہٕ منٛزٕ ٲسؠ رمیاہؔ، یزیاہؔ، ملکِیاہؔ، میامینؔ، الِیعزرؔ، ملکِیاہؔ تہٕ بنایاؔہ۔26عیلامؔ قبیلہٕ منٛزٕ متنیاہؔ، ذکریاہؔ، یحی ایلؔ، عبدیؔ، یریموتؔ تہٕ الِیاہؔ۔27زتُوؔ قبیلہٕ منٛزٕ ٲسؠ الیوعیناییؔ، الیاسبؔ، متنیاہؔ، یریموتؔ، زابادؔ تہٕ عزیزہؔ۔28ببئیؔ قبیلہٕ منٛزٕ چھِ یہُوحانانؔ، حننیاہؔ، زبّیؔ تہٕ عطلیؔ۔ 2929بانیؔ قبیلہٕ منٛزٕ ٲسؠ مسلامؔ، ملوکؔ، عدایاہؔ، یاسوبؔ سیال تہٕ یریموتؔ۔30پخت موآبؔ قبیلہٕ منٛزٕ عدنؔا، کلالؔ، بنایاؔہ، معسیاہؔ، متنیاہؔ، بضلی ایلؔ، بنویؔ تہٕ منسیؔ۔31حارِمؔ سنٛدیو اولادو منٛزٕ ٲسؠ: الِیعزرؔ، یشیاؔہ، ملکِیاہؔ، سمعیاؔہ، شمعون،32بنیمِینؔ، ملوکؔ تہٕ سمریاؔہ۔33حاشُومؔ سنٛدیو اولادو منٛزٕ: متنی، متنیاہؔ، زابادؔ، الیفلطؔ، یریمیؔ، منسیؔ تہٕ سمعیؔ۔34بانیؔ سنٛدیو اولادو منٛزٕ ٲسؠ: معدیؔ، عمرامؔ، اُوایلؔ،35بنایاؔہ، بدیاؔہ، کلوہؔ،36ونیاؔہ، مریموؔت، الیاسبؔ،37متنیاہؔ، متنیؔ تہٕ یعسو۔38بانیؔ سنٛدیو اولادو منٛزٕ: سمعیؔ،39سلمیاؔہ، ناتنؔ، عدایاہؔ،40مکندؔبی، ساسیؔ، ساریؔ۔41عزرئیلؔ، سلمیاؔہ، سمریاؔہ۔42سلُومؔ امریاؔہ تہٕ یوسفؔ۔43نبُو قبیلہٕ منٛزٕ یعنی ایل، متِتیاؔہ، زابادؔ، زبِیناؔ، یددؔ، یُوایلؔ تہٕ بنایاؔہ۔44یمو ساروٕے مردو اوس غٲر ملکی گٲر یہُودؠ زنیٚن سٟتؠ خاندر کوٚرمُت۔ یمن منٛز ٲسؠ واریہن زنیٚن شُرؠ تہِ زامٕتؠ۔ اوے ییٚلہ یمن زنیٚن طلاق دِتُکھ یمَن دتِکھ شُرؠ تہِ سٟتؠ۔
Bridge Connectivity Solutions Pvt. Ltd.